Auteur/autrice : adminprimaaicha

Konaakiri ñannde 26 mbooyi 2026 – Ardiiɗo yaakitoraaɓe ɓen sannii ko jonnde mun mawɓe saare Bofa ɓen.

Wonndude e Perefee on, seeniiɓe ɓen yottinno e inne jamaa Riyoo Ponngoo on, weltaare maɓe nden fii anngisannde laamu ngun faadee e ɓantal nokkuure maɓɓe nden.

E innde mawɓe saare nden fow, Alahajji Mammadu Jaawaraa jaranii ɓantal nokkure nden tentinii e banŋe ɗate e wonunndeeji. O watti ɗon ɗuuɗal anterpiriisiiji ɗin faadee e wallitagol jamaaji maɓɓe ɗin.

Seeniiɓe ɓen aamaano anndintingol lo’ere moter ilan yiite ngen, nde tawnoo o accii townude faaleeji ɗin sabu ɗuuɗugol jamaa on.

Ardiiɗo yaakitoraaɓe ɓen jarni seenayee maɓɓe on. O inni o maandinii faale maɓɓe ɗen e banŋe ilan yiite e ndiyan. O watti ɗon wonndema o yewtidanii e ardiiɗo mawɗo EDG on fii yo ɓe dañu kuntal duumii ngal.

Konaakiri ñannde 26 mbooyi 2026 Ardiiɗo yaakitoraaɓe ɓen tolnii ka jonnde mun mojobere immornde Société Financière Internationale (SFI) salndu Banki mondiyal, ko ardii mojobere nden ko moodi Maktar Joop.

Ngal tummbondiral mawngal no humondiri e ɓeydugol naɓidal ngal hakkunde Gine e SFI wonndude e faandare, ɓannginngol eɓɓooje hittuɗe, yaccina mbaylanduru njuɓɓudiiji hittuɗi, tammɓitoo ɓantal ngal e banŋe jawle jeytoraaɗe tentinii yaaduɗe e eɓɓoore Simanndu 2040 nden.

Ka fuɗɗagol yewtere nden, Sonnaajo Yaakitoraaɗo faggudu ndun, anndintinno faandaare tintidal ngal wano hollirɗen non dow ɗoo.

Ardiiɗo SFI on Maktar Joop, ɓanngini giggol ngol o jogganii Gine ngol o anndintini huwondire kiɗɗe hakkunde makko e Ardiiɗo yaakitoraaɓe ɓen, mo o janngidi e saa’iiji feƴƴuɗi.

O watti ɗon wonnde Gine no fewnɗii e saa’i mo tawata mbaylanduru no haanaa timmbeede tentinii e banŋal ndee eɓɓoore Simanndu 2040. Miijo ngon no haanaa wattee kuugal kenndewal.

Ardiiɗo SFI ɓannginno eɓɓooje heewuɗe winteteeɗe e mun wano : ɗate hakkunde koɗooli ɗin fii tammbitagol demal ngal, uddita damal illan yiite fii ñeninooɓe jawle ɓen, tammbitagol nimerik on e tammbitagol ŋanaaɓe wakkiliiɓe fii ɓantal ngenndi ndin.

Ka jaabagol, Ardiiɗo yaatoraaɓe ɓen, sanni moƴƴa seeniiɓe ɓen, o weltori yewtere maɓɓe nden o weltori faale maɓɓe naɓidugol e Gine, e kala golle ɗe ɓe timmbi gila neeɓii tentinii angisannde maɓbe nden e humondire e banŋe ɓantal duunde Afiriki nden fow.

Koohoo Aamadu Wuri Baa anndintini wonnde Gine no yawtude baylanduru mawndu wonannde taariika mun kan. Ɗun no lanndii heyɗintine yuɓɓondirɗe. O ɓanngini angisannde laamu ngun e ñinnugol hunndaari newinanayndi wintotooɓe ɓen tentinii e banŋe ɓantal yowondirgal e ɗate koɗooli ɗin, ilan yiite ngen, e yaccino nimerik on e tammbitagol yeñinooɓe jawle ɓen.

Ardiiɗiiɗo yaakitoraaɓe ɓen catii e ardinngol njuɓɓodiiji eɓɓoojeɗen ardina taskanɗe mofto jawle fii no eɓɓooje ɗen wintoree.

Wonannde eɓɓojje mawɗe fewndiiɗe ɗen, o ardinno eɓɓoore ɗatal mawngal nam-naangewal e taariingal Simannduwal ngal Gasayɗe waylude Gine e hirnaange Afiriki.

 

 

Konaakiri ñannde 25 mbooyi 2026 – Ardiiɗo yaakitooraaɓe ɓen Aamadu Wuuri Baa hollii ka ganngunal CNT feññinannde ɗoworɗe mawɗe laamu ngun.

Tummbondiral ngal, ko e ley ardiigu ardiiɗo CNT on Doftooru Dansaa Kurumaa. Ɗun ko e tawnde jeyaaɓe ka laamu buy, jaagoraaɓe heewuɓe, e ardiiɓe njuɓɓudiiji ngenndiyankooji e huɓindiiɓe ka laamu.

Ka nder yewtere makko, Doftooru Dansaa Kurumaa annditini wonndema oo jarsiisi ngenndiyankoojo no jeyaa e kuuɗe mawɗe ɓannginay ɗe laaɓal ardiigu ngun.

Ko e nder ɗun Ardiiɗo yaakitoraaɓe ɓen, ɓawo o yettude Alla jom hinnayee sabuu ɓuttu ngu o yeɗi hawtaandi ndin, sabu kiwal ngal o huuri e jamaa hawtaandi ndin, e deeƴere nde o huuri e jamaa on, fii yo o nafu ngenndi ndin, Aamdu Wuuri Baa holli wonndema oo jarsiisi ɗoo no yaadi e huulannde Ardiiɗo hawtaandi ndin.

Wonannde Aamdu Wuuri Baa, oo jarsiisi no ɓanngini faandaare laaɓunde : wurnitugol e nder duumayee pide ardiigu ngun e heyɗintingol hoolaare hakkunde laamu ngun woni ka nder ngendi walla ka jananiri.

E banŋe njuɓɓudiiji e ɗoworɗe, o ɓanngini wonnde Gine yawtii lowre mawnde fii heyɗintinngol rutta ngenndi ndin e laawol sariyayankewol : « leydi men ndin dañii Sariya mawɗo, sar’inorde fii suɓo-suɓo heyɗintinaade, winndito jamma Gine on e nder rewrere yeru yimɓe 8 979 923  fii ɗerol suɓotooɓe yottiiɓe e limoore 6 768 458 ».

Nde o toppitii e yewtere nden, Ardiiɗo yaakitoraaɓe ɓen holli wonndema suɓo lanndugal ngal (referandoomu) ñannde 21 silto 2025 jokkitii ɗon soɓo fii ardiigu leydi ndin, ñannde 28 bowte 2025 newinii ruttugol ngenndi ndin e laawol sariya e nder deeƴere, nde seeniiɓe tinugol ɓen fow dagini. Ɗun newinii ruttannde leydi ndin e darnde mayri nden e nder winndere nden.

Toŋalle ɗe fawaɗen ɗen ñannde 5 silto 2021 no towniteede seeɗa-seeɗa. wano farankofonii townitanii en e silto 2024, CEDEAO townitannii en e siilo 2026 wurin artirii Gine e fewjodeteeɓe ɓen ka nder mojobere.

Wano non UA townitanii en toŋalle ɗen, nde artuno ɗen e ngenndi sariyayankoori faade e suɓo-suɓo 2025 ngon. Ɗun ɗoo newinay taweede Gine e nder mojobe afirikinaaje ɗen fow.

Ardiiɗo yaakitoraaɓe ɓen ɓannginii fahin wonndema fii kala caɗeele no woodi faandaare jamaa Gine on fii tabintingol pottal e nder ndimu no ɓanngi.

Konaakiri ñannde 25 mbooyi 2026 – keɓal e banŋe renndo  e karallaagal ngenndi ndin e faandaareeji calɗi e eɓɓoore Simanndu 2040 nden wonuno tayre tammere yewtere Ardiiɗo yaakitoraaɓe ɓen Koohoo Aamadu Wuuri Baa ka Mbatu CNT.

Nde o yewti fii renndo ngon, o ɓangini fawtaare laamu ngun e banŋe cellal liggotooɓe ɓen ka laamu haa telen 80%, ɗun no holli faale laamu ngun e hiwugol ɓii-leydi en. E banŋe demal ngal hektaaruuji 14700 hebulinaama e masinji remirɗi (tarakiteeri) 507 sennditanaama remooɓe ɓen fii no Gine tabitirira e darnde mun aranere nden ka demal fonñe e nder winndere nden wonndude e toonuuji 560 000 baagol hitaande.

Ardiiɗo yaakitoraaɓe ɓen holliti ɓure dañaaɗe ɗen e banŋe karallaagal sabu ɗun heyɗintini ardiigu gun e ɗuytii wintaaje goo. Ɓuri kilomeeter 12 000 fiibur optik waɗaama e koɗooli ɓuri 300 waɗanaama ilan yiite. Baylanduru e banŋe alhaaliiji ardiigu ngun newinanii Gine yaarirgol yeeso yeru jonndeeji 23 e etirɗe ɓantal Nasiyon unii ɗen yaaduɗun a ardorɗe elektoronik ɗen.

Gine iwii 183^ɓo e hiitaande 2000 hewtii 160^ɓo. tippude e ɗun, en innay wonndema keɓal dañorgal no haaniri, no yaawi ko waylata genndi, ɓeyda hoolaare hakkunde laamiiɓe e laamaaɓe, uddita dame fii ɓantal goo.

Ardiiɗo yaakitoraaɓe ɓen, holli wonndema tabbital ardiigu ngun nafii woo si no yaadi e ɓantal. E ɓantal, ko si tawii ko huuɓungal. « Jawle oogirɗe nafii woo si ɗe nafii ɓii-leydi en ».

Ko e nder ɗun eɓoore Simanndu 2040 holliraa a tugalal kenndewal fii baylanduru faggudu e renndo Leydi Gine.

Eɓɓoore nden no saatini ɓantal yeru 10,3% jawle ɗe waylaaka emmbere miliyaaruuji 152 dala ɗoo e 2040, liddu miliyaaruuji 35 dala fewndo hannde. Nde timmbay miliyonji 5 liggotooɓe. Caggal ngal ko eɓɓooje mawde (megaporosee) 122 njuɓɓudiji 39 yeru winntaaje miliyaaruuji 330 dala e nder duuɓi 15. Tayre aranere nden gila 2026 haa 2030 moftay miliyaaruuji 75 dala e nder ɗin miliyaaruuji 20 no huutoreede fii alhaaliiji yulirɗe humondirɗe e eɓɓoore nden.

Wintaaje ɗen hawtindiray 38% jawle jeytoraaɗe, 11% ballal luujotooɓe, 19% jawle martoraaɗe ngenndi ndin, 32% jawle maral ngenndi ndin.

E banŋe demal ngal, neeminal ngal, ngeegu ngun, ko eɓɓooje mawɗe 32 e njuɓɓudiiji 10  yeru miliyaaruuji 65 dala.

Ardiiɗo yaakitoraaɓe ɓen anndintini, jiñinooɓe fii demal 45000 wallitaama, no e maɓɓe 60% sonnaaɓe yeru miliyaaruuji 298,5 faran Gine mooɓitaama immorde e Fonds de Développement Agricole (FODA) e Programme de Développement de l’Agriculture Commerciale en Guinée (PDACG), fii timminngol wintaari jananiri ndin yeru eɓɓooje 20.

O holli no jeyaa e ɗoworɗe laamu ngun waylugol e nder ko duumii demal ngal e nder leydi ndin fow, tabintina jeyal leyɗe ɗen, newinira demal ngal aalaaji, heɓulina dunkiije ɗen fii no coñal ngal ɓeydora e nder leydi ndin, wallitoo remooɓe ɓen fii no demal ngenndi ndin waawira faggude leydi ndin fow e laral hirnaange ngal fow.

 

 

Konaakiri ñannde 25 mbooyi 2026 nde o gaynunoo ɓannginnde baylanduru ndun e banŋe ñinnirɗe ɗen, ardiiɗo yaakitoraaɓe ɓen ɓangini kisan tayre ɗimmere yewtere makko nden faadee e ko yowondiri e faggudu. No jeyaa e ɗun ɓeyditugol keɓal ngenndi ndin, hakkinndina winntaaje ɗen, rewrina kala ko humondiri e mbuuɗi fii no ñinnora needi e nder wintagol ngol e ɓeyda hoolaare e faggudu mawngu ngun e nder leydi ndin.

« keɓal laamu ngun feƴƴii e miliyaaruuji 18 859 faran Gine e hitaande 2020 haa e miliyaaruuji 45 000 e hitaande 2025. Ɗun no holli ɓeydoral ngal 139 %. Heyɗintinal yerirɗe jawle ɗen e rewrino ɗe ngon e hoore huutorol cinkal gootal ɗeri maandinirgal ka laamu newinii ɓeyditorgol yeru miliyaaruuji 246 faran Gine ɓonndaaɗi ».

Ka lannoode, o holli wonnde ɓeydannde PIB on newinii anndinngol jawle ngenndi ndin yeru ko ɓuri miliyaaruuji 35 dala, telen ɓeydannde nde 51,2 % holluɗun wonnde faggudu Gine ndun mawnii layii ɓuri ka wonunoo ɗon.