Catégorie : Actualités en Pular

Konaakiri ñannde 26 juko 2026 – Ardiiɗo yaakitoraaɓe ɓen, Aamadu Wuuri Baa sannii ka jonnde mun tefooɓe ɓen ka jaggeeji yaakitorɗe ɗen. Ngal tinntidal ko fii ɓannginngol faandaare tefooɓe ɓen faadee e newinngol golle ardiigu ngenndi ndin.

E nder ɗun, Ardiiɗo yaakitoraaɓe ɓen ɓannginii faandaare kañun tefooɓe ɓen ka jagge yaakitorde mun. O anndintini wonnde laamu ƴanngalhu ngun wattiraama ɓaawo. Laamorɗe kese timmbaama hiɗe haanaa semmbineede, wallitee fii no ɗe huurire ko ɗe haani waɗude kon totta gooto kala hakkee mun on.

Ardiiɗo yaakitoraaɓe ɓen holli, ardiigu moƴƴu ngun haanaa luttude e konngol tun. Hingu haani ɓaarorde aalaaji e kuuɗe etotooɗe : « Ardiigu moƴƴu, ko ɗoworde moyyere ñinnaynde kuuɗe tinotooɗe, etotooɗe ». O holli.

E nder ɗun, Aamadu Wuuri Baa torike tefooɓe ɓen gollugol wonndude e aalaaji kesi etirɗi ɗin. O holli ko yo ɓe naɓidu, ɓe jiwnga ko jiwngotoo kon ɓe newinana yaakitorde maɓɓe nden no gollira golle kenndeeje.

Ka lannoode, Ardiiɗo yaakitoraaɓe ɓen tentinii e hitteendi heyɗintingol laamu ngun faadee e ardiigu moƴƴu tentinii e banŋe ñinnugol Simanndu 2040.

Konaakiri ñannde 26 juko 2026 Ardiiɗo yaakitoraaɓe ɓen, Aamadu Wuuri Baa wonndude e huɓindiiɓe ɗuuɗuɓe seenino ka kartiyee Miniyeer e nder Komiin Diksin, ka galle yo Alla hinno Alahajji Sayfullaahi Jallo, Ardiiɗo arano Mbatu Mawngu ngenndi ndin, fii yarlinngol ɓeynguure nden battane faatunnde Hajja Hawwaawu Jallo  sonna kañun Alahajji Sayfullaahi Jaalo. Fatunnde nden ko waɗi, ko ñannde 25 juko 2026. Feƴƴimɓe ɓen, faatodii e duuɓi 98.

E innde Ardiiɗo Hawtaandi ndin koohoo Maamadii Dummbuyaa e laamu ngun, Ardiiɗo yaakitoraaɓe ɓen yurminii, yarlinii ɓeynguure faatoraaɓe ɓen.

E nder ɗun laamu ngun heyɗintinii faandaare tammbitagol ɓeynguure nden fii battane faatiiɗo on, fii no furee on hewtira ka surretee ɗon Labe, wano ɓeynguure nden holliri non binnde maama maɓɓe Karamoko Alfaa Mo Labe.

Konaakiri ñannde 24 juko 2026 ardiiɗo yaakitoraaɓe ɓen, Aamadu Wuuri Baa tolnii ka jonnde mun mojobere jeyaaɓe Sigiri wonndude e mawɗo musidal maɓɓe ngal Alahajji Daraman Magasubaa.

Fanndaare seenayee mojobere nden, ko weltanagol Ardiiɗo Hawtaandi ndin, Koohoo Mamadii Dummbuyaa fadee e ko ƴellitini kon Saare Sigiri nden watti nde Laral ardorde.

Seeniiɓe ɓen e innde Sigiri, jarnii Ardiiɗo yaakitoraaɓe ɓen battane tinnaare makko nden fii laatinngol faale maɓɓe ɓooyuɗo. Ɓe holli wonnde ngal ƴellital ko tayre hittunde fii ɓeyditugol ardiigu ngenndi ndin e wattanngol hilla e faandaaje jamaa Sigiri on.

Ardiiɗo yaakitoraaɓe ɓen Aamadu Wuuri Baa kañun kadi weltanike ɓe e o heyɗintinii anngisannde laamu ngun faadee e toppitagol huulannde Ardiiɗo hawtaandi ndin. E nder ɓantal e fotondiral hakkunde lare ɗen e nder leydi ndin.

Konaakiri ñannde 17 juko 2026 Ardiiɗo yaakitoraaɓe ɓen Aamadu Wuuri Baa  sannii ka jonnde mun seeniiɓe e innde State Power Investment Corporation (SPIC). Ko ardii seeniiɓe ɓen ko ardiiɗo mojobere nden. Sommbo seenayee on, ko yewtugol fii suluuru honcinirdu leydi baafata ndin ka saare Bofa.

Mojobere nden ko nde Siin, hinde liggoo e banŋe eneljii SPIC no ardani Gine eɓɓoore suluuru mawndu waylayndu leydi ndin watta ndi baafata ɓeydita keɓal ngenndi ndin.

E nder ngal tintidal, yewtereeji ɗin ko no golle eɓɓoore timmbugol suluuru ndun fewndorii. E kuuɗe hikkotooɗe ɗon ɗen, fii yanñugol keɓal ngal faadee e wintaari ndin.

Timmbugol ndun suluuru ko gila ñannde 26 mbooy 2025 fuɗɗaa ka saare Bofa. Eɓɓoore suluuru ndun ko honcinngol leydi emmbere toonu miliyon 1,2 wonayɗun baafata e nder hitaande. No wattii ɗon alhaaliiji ilan yiite e ko bakondiri e mun.

Ɗun ɗoo no humondiri e faandaare ngenndi ndin waylugol jawle oogirɗe ɗen ka suluuji ngenndi ndin.

Ardiiɗo yaakitoraaɓe ɓen jarnii anngisannde SPIC faadee e ñinnugol nduu suluuru ndu tawata no jeyaa e tayre hittunde fii ñinnugol faandaare ngenndi ndin, wayla jawle leydi ndin gay adeede.

Wonannde Ardiiɗo yaakitoraaɓe ɓen, waylugol jawle oogirɗe ɗen no jeyaa e faandaare mawnde ngenndi ndin. Faandaare yaadunde e huulannde Ardiiɗo Hawtaandi ndin Maamadii Dummbuyaa e faandaare timmbugol suluuji ɗin ka eɓɓoore Simanndu 2040.

« En toppitoto golle ɗen, fii newinngol ngurndan yimɓe ɓen newinana wintotooɓe ɓen e nder ngenndi ndin ». Hommbiri Ardiiɗo yaakitoraaɓe ɓen.

Eɓɓoore SPIC no jeyaa e wintaaje ɓuruɗe e mawnude ɗen en banŋe waylugol oogirde watta baafata. Wonndude e miijo sincugol golle buy e ɓantal alhaaliiji buy e ɓeyduru ganndal.

Timmbugol nduu suluuru honcinirdu Bofa ko tayre mawnde fii ɓeydugol golle e ɓantal faggudu.

Konaakiri ñannde 14 juko 2026 ñalaande jowɓere golle ndartino jagge yaakitorɗe ɗen waɗii hannde e mawnde faadee e weeɓitugol ɗeri golle yaakitorɗe jowi. Ɗun ɗoo ko adintinngol ndartal mawngal ngal e silto 2026.

Kuungal ko ndartugol golle waɗaaɗe ɗen e nder feccere hitaande nden faadee e winntaaje waɗaaɗe ɗen e nder hitaande 2026. Anndugol ka fewndaa, golle ñinnaaɗe ɗen, caɗeele hawraaɗe e mun, e eɓɓooje timmbaaɗe e pehe ƴettaaɗe e nder feccere hitaande nden.

Golle ndartino ngon e ley konngol ardiiɗo Kabinee on Doftooru Dawda Kamisoko e cukko makko Lansine Hawaa Dummbuyaa nde tawnoo ko kamɓe ɗiɗo ardii jonnde. Tawtunoɓe luujagol waajotooɓe ɓen ka yaakitorde aranere toɗɗaaɓe e ngal banŋal ɗon.

Wonannde ngal ñallal sakkitoral, taskagol ɗeri ɗin no fewtunoo yaakitorde nden ka Ardiigu ngenndi ndin, e yaakitorde nden ka sonnaaɓe ɓen e ɓeyngureeji e yurmondiral, Koolorde banŋe diina, yaakitorde fii kiwal e yaakitorde fii ca’e e werdeeji.

Ɓay ɓe hollitii ɗeri ndatal maɓɓe ngal, waajotooɓe ɓen toppitino, taskii maakuuji maɓɓe ɗin inni yo ɓe ɓanngin ko waɗaa kon gila siilo haa korse 2026, ɓe ɓanngina kadi ŋakkereeji ɗin, e no ɓe miijorii non ƴellitorgol caɗeele ɗen faadee e wintaari fewndiindi ndin.

Toonii hollitannde nden, yewtereeji ɗin newinno faltondiral ngal immorde e faandaaje ɗe ɓe happanaa ɗen, ɓanngini nokku ka ɓe haani wattannde ɗon hilla, holli pehe no ɓe ƴellitora caɗeele ɗen fii no neworanaɓe ndartal mawngal saatiingal ngal.

No nootinoo e innde yaakitorɗe ɗen, koolaaɓe kuugal ɓen, hooreeɓe kabinee ɓen ƴewtotooɓe ɓen e hooreɓe ɓen ka BSD.

Ngal ñallal jowaɓal ndartino joofuno e hoore hiɓe anndi goole waɗaaɗe ɗen wonanayɓe fonndo fii ndartal mawngal ngal.

Konaakiri ñannde 12 juko 2026 hooreejo Kabinee on sonna Faatumata Binta Jallo e innde Ardiiɗo yaakitoraaɓe ɓen Aamadu Wuuri Baa yeɗii fooluɓe ɓen 13 geɓe faadee e weeɓitannde tataɓere olenpiyade mecce ɗen.

Haaju foolotiro ngon ko gila ñannde 22 haa ñannde 24 waɗi ka yaakitorde jannde e karallaagal Foolotiro ngon ko e banŋe karalle waɗi fii no sukaaɓe ɓen ɓannginira ñeeñal mun ngal immorde e mecce ɗe ɓe woni e janngannde ɗen.

Haaju on ko e tawnde Moodi Yuusuf Bunndu Sillaa koolaaɗo kaydi ka yaakitorde e waajotooɓe buy wonuɓe ka yaakitorde aranere.

Sonna Faatumata Binta Jallo jarniiɓe weltanike ɓe sabu wakkilaare nden. O heyɗintini angisannde laamu ngun tammbitagol jannde nden no haaniri tentinii e banŋe karallaagal wonannde sukaaɓe ɓen sabu ɗun ko sommbo ɓantal faggudu e ɓantal ngenndi duumiingal.

Konaakiri ñannde 12 juko 2026, ɓaawo balɗe ɗiɗi ndarto jagge yaakitorɗe buy weeɓitii ɗeri ndartirɗi mun ɗin. Hannde e mawbaare golle ndarto ngon toppitaama e banŋe ɓantal duumingal.

E ley ñinnoodi yaakitoraaɗo ardiiɗo kabinee on e cukko makko on ka yaakitorde aranere nde tawnoo ko kamɓe ɗiɗo ardii ndartino ngon e dow ballal hooreejo kabinee on, yewtereeji ɗin ɓannginno angisannde jagge ɗen fii fii ñinnugol eɓɓooje ɗe ɗe halfinaa ɗen e caɗeele ɗe ɗe hawri e mun ɗen.

Immorde e ko winndii kon ka ɗeri hollitannde ndartitanagol nden, waajjotooɓe ɓen ka yaakitorde aranere e banŋe alhaaliiji e bantal duumiingal taskike golle ñinnaanɗe ɗen. Ɓe ɓanngini anngisannde golluɓe ɓen, ɓe ndarti faandaaje ɗen e yaltundi ndin.

jagge yaakitorɗe ɗen teddiniraaɗe e ngal ndartal tataɓal no seenodi e koolaaɓe konngol, wajotooɓe yaakitorɗe ɗen, ndartooɓe golle ɓen, e ɓee ka BSD

Bay ɓe gaynii hollitude, yaakitoraaɗo ardiiɗo kabinee on lanndii hooreeɓe seeniiɓe ɓen, yo ɓe banngin huulanɗe maɓɓe ɗen, e caɗeele haɗuɗeɓe ñinngol ko heddii kon fii yo ɓe fewnjindiran pewje nafooje.

Fow-fow mun ko yaakitorɗe jowi holliti ɗerol ndatitannde mun nden. Ɗun ko ndee ka ilan yiite, ndee ka laɓɓino e kuɓɓan, ndee ka demal, ndee ka ngayna e ndee ka yunngo e faggudu nder maayo.

Konaakiri ñannde 12 juko 2026 Ardiiɗo yaakitoraaɓe ɓen Aamadu Wuuri Baa tolnii ka jonnde yaakitorde aranere Moodi Matt Holcz Ardiiɗo mawɗo salndu Oogirde jannɗe Rio Tinto seeniiɗo yeru fajuhun Gine wonndude e gollideteeɓe buy.

Ngal tintidal newinii fii faltagol ka eɓɓoore Simanndu nden fewndii ɗon e ɓe yewtidii fii fannuuji arooji. Yewtere nden yollitorii fannuuji ɓantal alhaaliiji e ɓeyditugol faggudu ngenndi ndin e no yimɓe leydi ndin heɓira geɓal e yaltudi ndin.

Ɓay ɓe gaynii tintidude, ka damal Yaakitorde aranere Moodi Matt Holcz jarnii Ardiiɗo yaakitoraaɓe ɓen fii hitteendi yewtereeji ɗin e hilla mo o wattani on eɓɓoore Simanndu nden. O jarni fahin hettanaare laamu Gine ngun, o heyɗintini angisannde Rio tinto nden fii toppitagol wonndude e laamu Gine ngun laatal eɓɓoore nden.

Ardiiɗo yaakitoraaɓe ɓen Aamadu Wuuri Baa, ɓannginii hitteendi eɓɓoore Simanndu nden. O tentinii e himme e ɓure ko woni kon e ndee eɓɓoore. O holli no haani ka eɓɓoore nden timmba alhaaliiji kelɗuɗi newinayɗi nguuree jamaa on.