Catégorie : Actualités en N’Ko

ߞߐߣߊߞߙߌ߫ ߓߌ߲ߠߊߥߎߟߋ߲߫ ߕߟߋ߬ ߂߇/ ߂߀߂߆

  ߞߊ߲ߕߌ߯ߘߊ ߟߊ߬ߕߍ߰ߦߊ߬ ߞߐߝߍ߬ ߡߍ߲ ߞߊ߬ ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߟߐ߬ ߗߋߢߊ ߓߟߏߟߊߕߎ߲߰ߠߌ߲ ߠߊ߫ ߞߏߕߌ߯ ߝߟߐߦߊ ߟߐ߬ߘߎ߮ ߘߐ߫. ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߏߕߌ߯ߝߟߐߘߊ ߡߐ߰ߓߊ ߞߊ߬ ߖߊ߬ߡߊ ߖߍ߬ߘߍ ߖߍ߬ߘߍ ߟߋ߬ ߛߍߥߊߣߍ߲ ߦߴߊ߬ ߟߊ߫ ߞߏߟߐ߲ߓ ߞߎߓߋ ߟߊ߫. ߟߊ߬ߛߣߍ߬ߟߌ ߢߊ߬ߢߊ߮ ߛߋ߲߬ߝߍ߬ ߊ߬ ߣߴߊ߬ ߟߊ߫ ߞߎߓߋߘߐ ߛߌ߲߬ߝߏ߲ ߠߎ߬ ߞߊ߬ ߢߐ߲߯ߦߋ߫ ߛߌߦߊߡߊ߲߫ ߞߍ߫. ߏ߬ ߓߍ߲߬ߛߋ߲߬ߡߊ ߞߏߛߐ߲߬ ߊ߬ ߞߏߟߊߘߍߢߐ߲߮ ߠߎ߬ ߞߵߊ߬ߟߎ߬ ߟߊ߫ ߞߎߟߎ߲ߖߋߟߌ ߟߊߛߴߊ߬ ߡߊ߬ ߞߎߓߋߘߐ ߞߏߕߌ߮ ߟߊ߫ ߛߐ߲ߞߐߟߐ߲ߧߊ ߝߍ߬. ߊ߬ ߣߌ߫ ߞߊ߬ ߘߎߓߊ߫ ߊ߬ ߢߍ߫ ߛߎߘߊ߲ߠߌ߲ ߣߌ߫ ߛߋ߲߬ߕߊ߰ ߓߟߋߓߟߋ ߟߊ߫ ߊ߬ ߟߊ߫ ߗߋߢߊ ߟߥߊ߬ߟߌ߬ߟߌ ߞߎ߲߬ߕߊ߮ ߞߣߐ߫.

ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߕߌ߲ߕߌ߲߫ ߊ߬ ߞߊ߲߬ ߊ߬ ߟߊ߫ ߛߙߊ߬ߣߎ߲ ߘߐ߫ ߞߏ߫ ߞߊ߬ߓߌ߯ ߕߎߟߊߝߌ߲߫ ߕߟߋ߬ ߅/ ߂߀߂߁ ߞߊ߲ߓߍ߲߫ ߞߊ߲ߕߌ߮ ߟߊ߫ ߟߊ߬ߛߌ߲߬ߠߌ߲ ߞߣߐߡߊ߬ ߢߡߊߦߟߍߡߊ߲߫ ߡߛߍ߬ߞߍ߬ߡߛߍ߬ߞߍ ߟߎ߬ ߘߊߡߌ߬ߣߊ߬ ߘߊ߫. ߊ߬ ߓߟߏߟߊߕߎ߲߮ ߦߴߌߘߐ߫ ߝߣߊ߫ ߞߎ߲߬ߞߊߟߌߦߊ ߘߝߊߣߍ߲ ߘߐ߫. ߥߞߊ߬ߟߌ ߣߌ߫ ߘߐ߬ߖߊ ߖߍ߬ߘߍ ߖߍ߬ߘߍ ߘߐ߫. ߞߊ߬ߓߌ߯ ߏ߬ ߕߎ߬ߡߊ ߞߎ߲߬ߠߊ߬ߛߌ߰ߟߊ߬ߞߊ ߟߎ߬ ߖߡߐߙߐߞߐߦߊ ߦߴߊ߬ ߞߊ߲߬ ߞߊ߬ ߕߊ߯ ߢߍߝߍ߬ ߟߋ߬ ߞߘߊߎ߫. ((ߖߌ߬ߣߍ ߦߋ߫ ߦߟߍ߬ߡߊ߲߫ ߞߊ߲߬ ߊ߬ ߘߏ߲߬ ߦߟߍ߬ߡߊ߲߬ߕߐ ߟߋ߬. ߊߟߎ߫ ߞߊ߬ ߖߡߊ߬ߣߊ ߡߍ߲ ߟߐ߬ ߣߌ߲߬ ߓߌ߬ ߏ߬ ߣߌ߫ ߛߊ߲߬ ߣߊ߬ߕߐ ߟߎ߬ ߕߊ ߕߍ߫ ߞߍ߫ ߟߊ߫ ߞߋߟߋ߲ߘߌ߫. ߦߟߍߡߊ߲ ߘߌߣߊ߬ ߛߋ߲߬ߠߞߊߟߌߦߊ߫ ߣߴߊ߲ ߛߋ߫ ߘߊ߫ ߖߐ ߟߊ߫ ߛߓߊ߬ߕߌ߬ ߟߊ߫. ߊ߬ ߣߌ߫ ߞߊ߬ ߢߡߊߦߟߍߡߊ߲߫ ߘߊߡߌ߬ߣߊ߬ߣߍ߲ ߠߎ߬ ߓߟߏߟߊߕߎ߲߰.)) ߊ߬ ߞߊ߬ ߘߐ߬ߞߣߍ߬ߟߌ ߞߍ߫ ߓߊ߬ ߞߊ߬ ߞߐ߲߬ ߊ߬ ߟߊ߫ ߝߘߏ߬ߓߊ߬ ߗߋߢߊ ߕߊ߭ ߢߍ߫.

ߞߐߣߊߞߙߌ߫ ߓߌ߲ߠߊߥߎߟߋ߲߫ ߕߟߋ߬ ߂߁/ ߂߀߂߆

ߞߎ߲߬ߠߊ߬ߝߎߟߋ߲߫ ߗߋߢߊ ߛߋߞߏߦߊ߫ ߟߥߊ߬ߟߌ ߡߞߊߝߏ ߛߋ߲߬ߞߘߐ߬ߓߌ߲ߓߌ߲ ߞߊߡߊ߲ ߘߐ߫، ߞߎ߲߬ߠߊ߬ߛߌ߮ ߞߊ߬ ߝߟߐߦߊ ߘߌ߫ ߡߊ߬ߞߍ߬ߦߙߐ ߞߏ ߟߋ߬ ߡߊ߬߸ ߊ߬ ߣߌ߫ ߞߎ߲߬ߞߏ߬ߕߐ߬ߦߊ ߞߟߍ߬ ߖߐ߯ߙߊ߲߫ ߠߎ߬ ߞߵߏ߬ ߓߍ߯ ߟߊ߫ ߛߋ߲ߞߏߟߦߊ ߝߏ߲߬ߝߏ߲߬ ߖߎ߮ ߟߎ߬ ߞߊ߲߬߸ ߏ߬ ߡߊߞߍߣߍ߲߫ ߘߞߌ߬ߛߌ߲ߣ ߞߊ߬ߝߏ߬ߙߋ߲ ߠߋ߬ ߞߣߐ߫. ߓߟߌߕߍ߫ ߝߌ߬ߟߊ߬ ߢߊߞߎߘߦߊߣߍ߲ ߏ߬ ߓߘߊ߫ ߞߍ߫ ߡߊ߬ߞߍ߬ߦߙߐ ߘߌ߫ ߞߵߊ߬ ߡߊ߬ߖߐ߯ߙߊ߲߫. ߏ߬ ߡߍ߲ ߣߊ߲߬ߝߟߏ߬ߦߊ߬ߣߍ߲߫ ߥߙߎߞߌ ߝߛߎߞߎ ߝߊ߬ߛߏ߬ߟߊ߬ߞߊ ߘߐ߫

(ߓߋ ߍߣ ߘߋ) ߊ߬ ߝߘߏ߬ߓߊ߬ ߘߊߦߟߍߟߌ ߞߍߣߍ߲߫ ߞߏߟߌ߲ߞߏߟߌ߲ ߕߟߋ߬ ߁߇ ߕߊ߬ߡߌ߲߬ߣߍ߲ ߢߌ߲߬ ߠߋ߬ ߟߊ߫. ߞߍߢߊ߫ ߏ߬ ߕߊ߲߬ߘߏ߬ߣߍ߲߬ߓߊ ߟߋ߬ ߕߋ߰ߙߋ߬ߦߊ ߟߊߥߟߌ߬ߣߍ߲ ߠߎ߬ ߘߐ߫ ߛߐ߲߬ߡߦߊ߬ߞߏ ߘߐ߫. ߞߵߊ߬ ߓߍ߲߬ ߛߋ߲ߒߞߏߟߦߊ ߞߎ߲߬ߕߐ߮ ߟߎ߬ ߡߊ߬. ߓߌߟߏ߲ ߢߌ߲߬ ߡߊ߬ ߊߡߊߘߎ߫ ߎߙߌ߬ ߓߊ ߡߊߟߐ߬ߣߍ߲ ߕߘߍ߬ ߞߎ߲߬ߠߊ߬ߝߎߟߋ߲ ߣߌ߫ ߣߊ߲߬ߒ߬ߕߊ߲ ߠߎ߬ ߟߊߞߊ߲ߘߊ ߞߏߕߌ߮ ߟߋ߬ ߓߟߏ߫. ߣߴߏ߬ ߦߋ߫ ߞߟߍ߬ߕߌ߯ ߓߊߛߌߙߎ߬ ߖߊߟߏ߫ ߘߌ߫. ߊ߬ߟߎ߬ ߞߊ߬ ߦߙߐ߫ ߡߊߝߟߍ߫ ߘߏ߫ ߞߍ߫، ߕߐ߲ߓߟߏߡߟߊ ߝߊ߬ߛߏ߬ߟߊ߬ߞߊ ߗߋߕߌ߮ ߢߊߞߘߐ߫. ߊ߬ ߣߌ߫ ߡߊ߬ߘߎ߮ ߡߊ߬ߞߟߐ ߣߴߊ߬ ߞߏߟߊߕߍ߯ ߛߌߦߊߡߊ߲߫ ߢߊߞߘߐ߫. ߡߍ߲ ߟߐ߬ߕߐ߫ ߓߐߒߡߊߟߌ ߡߊ߬

ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߝߏ߬ߟߌ ߞߍ߫ ߞߵߊ߬ ߓߍ߲߬ ߓߊ߯ߙߊ ߟߊ߫ ߢߍߕߊ߮ ߟߊ߬ߞߎ߲߬ߘߎ߲߬ߣߍ߲ ߠߎ߬ ߡߊ߬، ߡߍ߲ ߟߐ߬ߣߍ߲ ߕߐ߲ߓߟߏߡߦߊ ߝߊ߬ߛߏ߬ߟߊ߬ߞߊ ߢߊߞߎߘߦߊߟߌ ߛߌߟߊ ߡߊ߬.  ߊ߬ ߞߵߊ߬ ߕߌ߲ߕߌ߲ ߊ߬ ߞߊ߲߬ ߞߏ߫ ߞߎ߲߬ߞߏ߬ߕߐ߬ߦߊ ߞߍߢߊ߫ ߥߙߎߞߌߣߍ߲ ߡߍ߲ ߠߎ߬ ߦߋ߲߬ ߞߊ߬ߝߏ ߣߌ߫ ߓߟߏߘߐߓߍ߲ ߠߋ߬ ߞߢߊߡߊ߲߫ ߏ߬ ߟߎ߬ ߞߍ߬ߟߍ ߛߋ߲ߞߏߟߊߘߐߦߊ ߖߐ߯ߙߊ߲ ߠߎ߬ ߟߊ߫. ߛߋ߲߬ߠߞߊߟߌߦߊ ߣߌ߫ ߓߍ߲߬ߒ߬ߢߐ߲߰ߡߊ߬ߦߊ ߛߌߟߊ ߝߍ߬. ߊ߬ ߞߊ߬ ߞߟߊߓߎߡߦߊߟߌ ߞߍ߫ ߞߎ߲߬ߠߊ߬ߝߎߟߋ߲߫ ߝߊ߲߬ߞߊ ߛߋߞߏߦߊ߫ ߟߎ߬ ߝߊ߲߬ߞߊߘߏ߲߭ ߘߐ߫ ߊ߬ ߣߌ߫ ߞߊ߬ ߟߊߒߠߦߊ ߓߊ߲ߓߊ߲߫ ߕߐ߲ߓߟߏߡߊ ߟߎ߬ ߣߌ߫ ߘߎ߰ߘߋ߲ ߠߎ߬ ߕߍ߫. ߏ߬ ߛߋ߲߬ߝߍ߬ ߞߎ߲߬ߠߊ߬ߝߎߟߋ߲߫ ߞߏߕߌ߮ ߞߊ߬ ߖߊ߲߬ߓߌ߬ߟߌ ߞߍ߫ ߗߋߕߌ߯ߘߊ ߣߌ߲߬ ߟߐ߬ߘߎ߰ ߞߟߍ߬ߦߊ߬ߡߊ ߟߊ߫ ߞߵߊ߬ ߓߍ߲߬ ߖߘߍ߬ߕߌ߰ߦߊ ߟߊߞߊ߲ߘߊߟߌ ߡߊ߬ ߢߎߡߍߙߋ߲ߦߊߟߌ ߘߍ߲ߖߘߍߟߦߊ ߘߐ߫. ߊ߬ ߣߌ߫ ߡߐ߰ ߞߎ߲߬ߞߋߟߋ߲ ߠߎ߬ ߣߌ߫ ߛߌ߲߬ߝߏ߲߬ߘߊ ߟߎ߬ ߟߊߞߊ߲ߘߊ ߘߐ߫. ߊ߬ ߣߌ߫ ߞߊ߬ߝߏ ߟߊ߫ ߓߊߛߎ߲ ߢߊ߬ߕߣߐ߬ߡߊ ߟߎ߬ ߟߊߞߊ߲ߘߊ.

ߞߐߣߊߞߙߌ߫ ߓߌ߲ߠߊߥߎߟߋ߲߫ ߕߟߋ߬ ߁߇/ ߂߀߂߆

ߞߊ߲ߓߍ߲߫ ߞߊ߲ߕߌ߮ ߡߊ߬ߡߊߘߌ߫ ߘߎ߲ߓߎߦߊ߫ ߟߊߛߌ߱ ߢߊ߰ߢߊ߮ ߓߍ߲߬ߒ߬ߛߋ߲߬ߡߊ ߞߏߛߐ߲߬߸ ߝߊ߬ߙߊ߲߬ߛߌ߫ ߞߊ߲ߕߌ߮ ߋߡߊߣߏߟ ߡߊߞߐߙߐ߲߫ ߞߐߦߌ߬ߘߊ߬ߣߍ߲߫ ߓߐ߬ߟߐ߲߬ߞߊ ߋߟߋߣߏߙ ߞߊߙߑߥߊ߫ ߟߋ߬ ߓߟߏ߫. ߞߏߕߌ߯ ߗߋߦߊߣߍ߲ ߘߌ߫ ߣߴߊ߬ ߟߊ߫ ߢߎ߲߯ߣߍ߲߫ ߝߊ߬ߙߊ߲߬ߛߌ߬ ߞߊ߲ߝߐ ߕߍߓߊ߯ߦߊ߫ ߡߊ߲߬ߕߏ߲߬ߕߍ߬ߟߊ߬ߞߊ ߟߊ߫ ߊ߬ ߣߌ߫ ߝߊ߬ߙߊ߲߬ߛߌ߬ߞߊ ߡߍ߲ ߠߎ߬ ߦߋ߫ ߕߎ߲ߒߞߊ߲ ߠߊ߫. ߞߵߊ߬ ߓߍ߲߬ ߖߊ߲߬ߖߏ߲ ߢߊ߬ߕߣߐ߬ߡߊ߬ߓߊ ߣߌ߲߬ ߡߊ߬ ߝߊ߬ߙߊ߲߬ߛߌ ߟߊ߫ ߗߋߦߊߟߌ ߟߊߛߣߍ߫ ߘߊ߫ ߞߐߟߐ߲ߓ ߞߎߓߋ ߞߣߐ߫، ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߝߍ߬. ߛߟߊߕߌ߯ ߊߡߊߘߎ߫ ߎߙߌ߬ ߓߊ ߢߐ߲߯ߦߋ ߏ߬ ߞߍ߫ ߘߊ߫ ߡߙߌߣߊ߲߫ ߡߝߊߟߋ߲ ߓߘߍ ߟߎ߬ ߟߋ߬ ߞߊ߲߬.

((ߕߎ߬ߢߊ ߣߌ߫ ߜߍߢߐ߲߮ ߢߍ߫ ߘߐ߫)) ߊ߬ߟߎ߬ ߣߌ߫ ߞߏߕߌ߮ ߕߍ߫. ߓߐ߬ߟߐ߲߬ߞߊ ߞߵߊ߬ ߦߌ߬ߘߊ߬ ߞߏ߫ ߖߌ߬ߣߍ߫ ߘߐ߬ߕߊߡߌ߲ ߞߍߣߍ߲߫ ߓߍ߯ߦߡߊ ߟߋ߬ ߘߌ߫. ߊ߬ ߣߌ߫ ߖߡߊ߬ߣߊ ߟߐ߬ߘߎ߮ ߦߌ߬ߘߊ߬ ߡߊ߲߬ߕߏ߲߬ߕߍ߬ ߝߛߊߒߞߏߡߦߊ ߘߐ߫. ߓߐ߬ߟߐ߲߬ߞߊ ߋߟߏߣߐߙ ߞߊߙߑߥߊ߫ ߞߊ߬ ߝߊ߬ߙߊ߲߬ߛߌ ߟߊ߫ ߞߐߡߊߓߌ߲ߓߌ߲ߠߌ߲ ߖߍ߬ߘߍ ߖߍ߬ߘߍ ߦߌ߬ߘߊ߬. ߊ߬ ߣߌ߫ ߞߊ߬ ߞߎߟߎ߲ߖߋߟߌ ߞߍ߫ ߡߊ߬ߝߊ߲߬ ߞߍߣߍ߲ ߠߎ߬ ߘߐ߫߸ ߞߵߏ߬ ߓߍ߯ ߟߊߥߟߌ߬ ߞߟߊߓߎߡߦߊߟߌ ߡߊ߬ ߡߜߊ߬ ߞߍߣߍ߲ ߠߎ߬ ߘߊߓߊ߲ ߘߐ߫߸ ߊ߬ ߞߊ߬ ߘߐ߬ߞߣߍ߬ߟߌ ߞߍ߫ ߖߌ߬ߣߍ ߣߌ߫ ߝߊ߬ߙߊ߲߬ߛߌ ߟߊ߫ ߕߍߓߊ߯ߦߊ ߓߊ߲ߓߊ߲ߠߌ߲ ߝߣߊ߫ ߘߐ߫. ߞߊ߬ ߓߍ߲߬ ߖߊ߬ߕߋ߬ߘߐ߬ߛߌ߮ ߛߏ߯ߙߏߦߊߣߍ߲ ߞߐߡߊߓߌ߲ߓߌ߲ߣߍ߲ ߠߎ߬ ߡߊ߬ ߝߊ߬ߙߊ߲߬ߛߌ ߥߙߎߞߌ ߖߋ߬ߕߌ߰ߘߊ ߣߌ߫ ߟߐ߲ߞߏߦߊ ߓߟߏ߫. ߞߊߕߙߍ߬ߕߍ߫ ߞߍ߲ߘߍߦߊ ߡߊ߬ߘߎ߮ ߡߊ߬. ߞߵߏ߬ ߟߊ߫ ߘߌ߲߬ߞߌߙߊ ߟߎ߬ ߟߊ߫ ߛߊߣߌߧߊ ߞߊ߲߬. ߞߵߏ߬ ߟߊ߫ ߞߟߍ߬ߦߊ߫ ߡߊ߬ߘߎ߰ ߜߘߍ߫ ߟߎ߫ ߞߊ߲߬.

 

ߞߐߣߊߞߙߌ߫ ߓߌ߲ߠߊߥߎߟߋ߲߫ ߕߟߋ߬ ߁߆/ ߂߀߂߆

 ߞߊ߬ߝߏ ߞߎ߲߬ߕߌ߮ ߡߊ߬ߡߊߘߌ߫ ߘߎ߲ߓߎߦߊ߫ ߟߊߛߌ߱ ߓߍ߲߬ߒ߬ߛߋ߲߬ߡߊ ߞߏߛߐ߲߬߸ ߘߋ߲ߡߌߛߍ߲ ߡߍ߲ ߠߎ߬ ߝߘߊߣߍ߲߫ ߕߏ߰ߝߏ ߟߎ߬ ߟߊ߫ ߏ߬ ߟߎ߬ ߟߊ߫ ߗߋߦߊߟߌ ߘߏ߲߬ ߘߊ߫ ߞߐߣߊߞߙߌ߫ ߞߎߘߍ߫ ߇߀߀ ߓߏ߬ߙߌ߬ ߞߐ߫ ߔߏߔߏ ߟߊ߫ ߞߊ߬ ߓߐ߫ ߝߏ߫ ߞߊ߲ߞߊ߲߫. ߊ߬ߟߎ߬ ߡߐ߰ ߁߇ ߘߋ߲ߡߌߛߍ߲ ߡߍ߲ ߠߎ߬ ߟߊߘߍ߬ߣߍ߲ ߞߙߎ ߞߋߟߋ߲߫ ߘߌ߫ ߟߋ߬߸ ߛߊ߫ ߞߊ߬ ߞߊ߲ߓߍ߲߫ ߠߊ߫ ߞߏ ߕߊ߭ ߊ߬ ߣߌ߫ ߞߊ߬ ߞߍ߫ ߥߙߎߞߌ ߓߐ߲ߛߐ߲ߘߊ߫ ߥߟߌ߬ߕߐ ߝߊ߲߬ߞߊ߬ ߞߙߍߞߙߍߣߍ߲ ߘߌ߫ ߟߊ߬ߟߐ߲߬ߠߌ߲߬ߦߊ߬ߟߌ ߛߌߟߊ ߝߍ߬. ߊ߬ߟߎ߬ ߞߊ߬ ߓߐߒߣߘߐ ߣߌ߲߬ ߞߍ߫ ߟߋ߬ ߞߵߊ߬ߟߎ߬ ߟߊ߫ ߖߘߍ߬ߘߏ߲߬ߒ߬ߞߊ߲߬ߡߊ ߟߊߛߙߋߦߊ߫. ߊ߬ ߣߌ߫ ߞߵߊ߬ߟߎ߬ ߟߊ߫ ߕߋߟߋ߲߫ ߦߌ߬ߘߊ߬ ߞߊ߲ߓߍ߲߫ ߞߊ߲ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߞߐߡߊߓߌ߲ߓߌ߲ ߘߐ߫. ߊ߬ߟߎ߬ ߟߊߛߣߍ߫ ߘߊ߫ ߞߎߟߐ߲ߓ ߞߎߓߋ ߟߋ߬ ߞߣߐ߫ ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߓߟߏ߫. ߞߏߕߌ߯ߝߟߐߘߊ ߞߎߓߋߘߐ ߗߋߕߌ߯ ߛߙߍߞߍ ߕߘߍ߬ ߞߣߍ ߞߊ߲߬ ߣߊߟߌ߬ߡߎ߲߬ ߟߊ߲߰ߛߌ߬ߣߍ߫ ߤߥߊ߬ ߘߎ߲ߓߎߦߊ߫ ߘߌ߫. ߏ߬ ߓߍ߲߬ߒ߬ߛߋ߲߬ߡߊ ߞߏߛߐ߲߬߸ ߞߙߎ ߟߊ߫ ߓߋߟߋ߲ߠߊ ߦߊߦߊ߬ ߞߋߕߊ߬ ߞߵߊ߬ ߦߌ߬ߘߊ߬ ߞߏ߫ ߞߍߥߊߟߌ ߣߌ߲߬ ߦߋ߫ ߟߊ߬ߤߘߌ߫ ߕߊ߬ߣߍ߲߫ ߖߊ߲ ߘߏ߫ ߟߋ߬ ߡߝߊߣߍ߲ ߘߌ߫. ߞߏߕߌ߯ ߝߟߐ ߕߐ߯ ߘߐ߫ ߞߏߕߌ߯ߝߟߐߘߊ ߞߎߓߋߘߐ ߗߋߕߌ߯ ߛߙߍߞߍ ߞߊ߬ ߝߓߊ߬ߘߋ߲߬ߧߊ ߣߌ߫ ߡߊ߬ߝߊ ߞߎߟߎ߲ߖߋ ߟߐ߬ ߘߋ߲ߡߌߛߍ߲ ߠߎ߬. ߞߵߊ߬ߟߎ߬ ߞߟߊߓߎߡߦߊ߫ ߊ߬ߟߎ߬ ߟߊ߫ ߘߎ߰ߘߋ߲߬ߧߊ ߖߘߍ߬ߘߏ߲߬ߒ߬ߞߊ߲߬ߡߊ ߓߟߏߟߊߕߎ߲߯ߠߌ߲ ߠߊ߫߸ ߞߊ߬ ߓߍ߲߬ ߡߊ߲߬ߕߏ߲ ߗߋߢߊߟߌ ߛߌߟߊ ߡߊ߬.

ߞߐߣߊߞߙߌ߫ ߓߌ߲ߠߊߥߎߟߋ߲߫ ߕߟߋ߬ ߁߆/ ߂߀߂߆

ߞߐߣߊߞߙߌ߫ ߕߌ߲߬ߞߎߘߎ߲߫ ߕߐ߲ߓߟߏߡߟߊ ߞߍߕߐ ߟߋ߬ ߟߊߓߊ߯ߙߕߊ ߘߌ߫ ߡߎ߬ߕߎ߲߬. ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߟߊ߫ ߞߣߍ߫ ߞߊ߲߫ ߓߐߒߡߊߟߌ. ߊ߬ ߛߋ߲߬ߘߏ߲߬ߢߐ߲߮ ߕߘߍ߬ ߞߎ߲߬ߠߊ߬ߝߎߟߋ߲ ߣߌ߫ ߣߊ߲߬ߒ߬ߕߊ߲ ߠߎ߬ ߟߊߕߊ߲߬ߞߊ ߞߏߕߌ߮ ߟߋ߬ ߘߌ߫ ߞߟߍ߬ߕߌ߯ ߓߊߛߌߙߎ߬ ߖߊߟߏ߫. ߏ߬ ߞߍ߫ ߘߊ߫ ߛߊߓߎ߫ ߘߌ߫ ߞߊ߬ ߞߎߟߎ߲ߖߋߟߌ ߞߍ߫ ߓߊ߯ߙߊ ߘߏ߲߬ߖߟߎ߬ߡߦߊ߬ߣߍ߲ ߢߌ߲߬ ߠߊ߫ ߢߍߕߊ߮ ߟߊ߫. ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߓߊ߯ߙߊ ߟߊ߫ ߓߐߒߢߟߊ ߜߍߘߐߕߊ ߣߌ߲߬ ߝߏ߬ߟߌ ߞߍ߫. ߞߊ߬ ߟߐ߬ ߓߊ߯ߙߊ ߣߌ߫ ߕߐ߲ߓߟߏߡߦߊ߫ ߝߊ߬ߛߏ߬ߟߊ߬ߞߊ ߖߎ߬ߓߐ ߕߐ߬ߡߊ ߟߎ߬ ߡߊ߬. ߊ߬ ߞߵߊ߬ ߕߌ߲ߕߌ߲߫ ߊ߬ ߞߊ߲߬ ߞߏ߫ ߓߊ߯ߙߊ ߣߌ߲߬ ߞߎ߲߬ߕߋߟߋ߲ ߦߋ߫ ߢߡߊߦߟߍߡߊ߲߫ ߡߊ߬ߡߊ߬ߟߌ ߝߘߏ߬ߓߊ߬ߡߊ ߘߐߘߎ߲߬ߧߊ߬ߣߍ߲ ߠߋ߬ ߘߌ߫. ߞߊ߬ ߟߐ߬ ߖߌ߬ߣߍ߬ ߕߐ߲ߓߟߏߡߊ ߟߎ߬ ߡߊ߬. ߡߊ߬ߘߍ߬ߡߍ߲߬ߠߌ߲ ߏ߬ ߡߍ߲ ߘߊߝߟߐߣߍ߲߫ ߞߊ߲ߓߍ߲߫ ߞߊ߲ߕߌ߮ ߓߟߏ߫ ߊ߬ ߣߌ߫ ߞߎ߲߬ߠߊ߬ߛߌ߮ ߡߎ߰ߡߍ.

ߞߏߕߌ߯ ߝߟߐ ߞߵߊ߬ ߦߌ߬ߘߊ߬ ߞߏ߫ ߞߊ߬ ߞߎ߲߬ߠߊ߬ߛߌ߮ ߟߊ߫ ߓߏ߲ ߠߎ߬ ߟߐ߬ ߞߊ߬ߞߎ߬ߘߟߊ߬ߞߊ ߝߊߘߌ ߘߐ߫߸ ߞߐߣߊߞߙߌ߫ ߣߌ߫ ߖߡߊ߬ߣߊ ߞߣߐߟߊ ߟߎ߬ ߓߍ߯ ߘߐ߫. ߏ߬ ߟߐ߬ߘߌ߬ߦߊ߬ߓߊ ߟߋ߬ ߦߋߝߊߘߌ ߣߌ߫ ߗߋߘߊߕߌ߯ ߟߎ߬ ߟߊ߫ ߝߓߊ߬ߘߋ߲߬ߧߊ ߣߌ߫ ߞߎ߲߬ߞߊ߬ߟߌ߬ߦߊ ߘߐ߫. ߊ߬ ߣߌ߫ ߕߐ߲ߓߟߏߡߊ ߟߎ߬ ߟߊ߫ ߗߋߘߊߕߌ߯ߦߊ ߘߐ߫ ߘߎ߰ߘߋ߲ ߠߎ߬ ߕߙߐ߬ߝߍ߬. ߊ߬ ߞߊ߬ ߖߊ߲߬ߓߌ߬ߟߊ߬ߟߌ ߞߍ߫، ߞߏ߫ ߞߊ߬ߝߏ ߟߊ߫ ߡߙߊ߬ߦߊ ߟߋ߬ ߣߌ߫ ߛߌ߰ߟߌ ߦߴߊ߬ ߞߊ߲߫ ߛߌ߲߬ߝߏ߲߬ߘߊ ߟߎ߬ ߡߊߓߏ߬ߢߊ߬ ߞߊ߲ߡߊ߬. ߞߊ߬ ߞߐ߲߬ ߞߏ ߓߍ߯ ߢߍ߫ ߞߵߏ߬ ߟߊ߫ ߊ߬ ߣߌ߫ ߡߊ߬ߞߊ߲߬ߞߊ߲߬ ߝߊ߲߬ߞߊ ߣߌ߫ ߟߊ߬ߞߊ߲߬ߘߊ߬ߟߌ ߞߊ߲߬.

ߞߐߣߊߞߙߌ߫ ߓߌ߲ߠߊߥߎߟߋ߲߫ ߕߟߋ߬ ߁߅/ ߂߀߂߆

ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߞߊ߬ ߓߐ߬ߟߐ߲߬ߞߊ ߞߖߊߕߎ߬ ߖߊߟߏ߫ ߟߊߛߣߍ߫. ߊ߬ ߡߊ߬ߟߐ߬ߣߍ߲߬ ߕߘߍ߬ ߞߊ߬ߙߊ߲߬ߝߊ ߟߌߞ ߞߖ߭ߋߟߌ߫ ߓߌߦߊߝ߭ߏߖߌ߫ ߟߋ߬ ߓߟߏ߫ ߊ߬ ߣߴߊ߬ ߟߊ߫ ߞߐߙߍ ߛߌ߲߬ߝߏ߲ ߠߎ߬. ߞߵߊ߬ ߓߍ߲߬ ߊ߬ ߟߊ߫ ߞߐߛߊߦߟߌ ߡߊ߬ ߖߌ߬ߣߍ߫ ߞߣߐ߫. ߞߊ߬ ߓߍ߲߬ ߘߊ߲ߘߊߟߌ ߖߐ߰ߣߍ߬ߕߊ ߞߙߍߞߙߍߣߍ߲ ߡߊ߬ ߡߊ߬ߙߐߞ ߡߊ߲߬ߛߊ߬ߟߊ ߓߟߏ߫. ߢߐ߲߯ߦߋ ߢߌ߲߬ ߞߍ߫ ߘߊ߫ ߛߊߓߎ߫ ߘߌ߫ ߞߖߊߕߎ߬ ߖߊߟߏ߫ ߞߐߙߍ ߛߋ߫ ߘߊ߫ ߘߊ߲߬ߕߍ߰ߟߌ ߘߐߞߣߍߣߍ߲ ߞߍ߫ ߟߊ߫ ߞߏߕߌ߯ ߝߟߐ ߢߍ߫ ߸ߞߵߊ߬ ߓߍ߲߬ ߘߐ߬ߓߛߏ߬ߟߌ ߘߍ߬ߡߍ߲߬ߠߌ߲ ߡߊ߬. ߡߍ߲ ߞߍߣߍ߲߫ ߝߛߊ߬ ߘߊ߲ߘߊ ߛߍߡߦߊ ߘߌ߫ ߞߛߊߓߊߟߊ߲ߞߊ. ߞߵߏ߬ ߓߍ߯ ߟߊ߫ ߛߋ߲߬ߕߊ߮ ߡߞߊ߬ߝߏ߬ ߞߏ߬ߢߌ߲ ߞߊ߲߬. ߊ߬ ߟߊ߫ ߞߍ߲ߘߍߦߊ ߡߊ߬ߘߎ߮ ߘߐ߫ ߏ߬ ߓߍ߲߬ߒ߬ߛߋ߲߬ߡߊ ߞߏߛߐ߲߬ ߞߐߙߍ ߞߵߊ߬ ߟߊ߫ ߛߍߥߊ߫ ߦߌ߬ߘߊ߬. ߞߎ߲߬ߠߊ߬ߛߌ߮ ߞߎ߲߬ߕߌ߮ ߟߊ߫. ߞߵߊ߬ ߓߍ߲߬ ߊ߬ ߟߊ߫ ߘߐ߰ߘߏ߲߬ߠߌ߲ ߡߊ߬. ߞߵߊ߬ ߓߍ߲߬ ߖߌ߬ߣߍ߫ ߞߊ߬ߝߏ ߟߊ߫ ߖߘߍ߬ߘߏ߲߬ߒ߬ߞߊ߲߬ߡߊ ߡߊ߬. ߞߵߊ߬ ߓߍ߲߬ ߘߊ߲ߘߊߟߌ ߖߐ߰ߣߍ߬ߦߊ߬ߟߌ ߕߊ߭ ߡߊ߬ ߞߐߞߊ߲߬. ߂߀߀߇ ߓߌ߲ߠߊߥߎߟߋ߲߫ ߣߌ߫ ߞߏ߲ߞߏߜߍ ߟߊ߫ ߞߵߊ߬ ߕߘߍ߬ ߊ߬ ߛߊ߲߬ ߁߆ ߟߋ߬. ߓߐ߬ߟߐ߲߬ߞߊ ߞߖߊߕߎ߫ ߖߊߟߏ߫ ߞߊ߬ ߜߟߍ߬ߡߊ߲߫ ߛߌߦߊߡߊ߲߫ ߠߋ߬ ߟߊߢߐ߬ߠߌ߲߬ ߞߵߊ߬ ߓߍ߲߬ ߘߐ߬ߓߛߏ߬ߟߌ ߢߊ߬ߒ߬ߞߐ߬ߓߊߟߌ ߟߎ߬ ߡߊ߬߸ ߘߐ߬ߓߛߏ߬ߟߌ ߡߍ߲ ߞߍߣߍ߲ ߞߐ ߢߌ߲߬ ߠߊ߫ ߡߊ߬ߙߐߞ ߞߊ߬ߓߌ߯ ߓߌ߬ߟߊ߬ߒ߬ߘߐ ߞߍ߫ ߘߊ߫ ߓߣߊ߬ߟߐ߲߬ߘߐ߬ߦߊ ߛߌߟߊ ߝߍ߬. ߖߊ߲߬ߞߊߙߏ ߦߋ߫ ߞߐ߯ߣߍߙߋ߲ ߡߊߛߎ߬ߘߎ߲߬ߧߊ ߘߐ߫ ߡߍ߲ ߦߴߊ߬ ߞߢߊ߬ ߟߊ߫ ߊ߬ ߟߐ߬ ߟߊ߫. ߞߊ߬ߙߊ߲߬ߝߊ ߟߎߞ ߞߖ߭ߋߟߌ ߓߌߦߊߝ߭ߏߖߌ ߞߵߊ߬ ߦߌ߬ߘߊ߬ ߞߏ߫ ߡߊ߬ߘߍ߬ߡߍ߲߬ߠߌ߲ ߞߍ߫ ߘߊ߫ ߓߍ߲߬ߒ߬ߛߋ߲߬ߡߊ ߘߌ߫ ߛߍߡߦߊ ߟߊ߫ ߛߋ߲߬ߕߊ߮ ߘߐ߫ ߞߊ߬ ߟߊߥߛߊ߬ ߛߐ߬ߘߐ߲߬.  ߊ߬ ߦߋ߫ ߛߋ߫ ߟߊ߫ ߕߊ߯ߡߊ ߟߊ߫ ߓߌ߬ ߟߐ߬ߖߘߍ߬ߟߊ ߘߐ߫. ߞߣߐ߬ߜߍ߲߬ߠߌ߲ ߓߍߣߊ߬ ߕߏ߫ ߡߞߊ߬ߝߏ߬ߟߌ߬ ߘߊߞߘߐ߫. ߞߊ߬ߕߙߍ߬ߕߍ߫ ߣߌߘߐߟߐ߲ߘߐߦߊ ߞߣߐߘߐ ߟߐ߲ ߓߟߏߡߊ߬߸ ߞߵߊ߬ ߟߊߥߟߌ߬ ߞߊ߲ߓߍ߲߫ ߞߊ߲ߕߌ߮ ߟߊ߫ ߖߘߍ߬ߘߏ߲߬ߒ߬ߞߊ߲߬ߡߊ ߓߐߢߟߊ ߡߊ߬. ߞߟߍ߬ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߡߍ߲ ߣߐ߬ ߊ߬ ߘߐ߰ߘߏ߲߬ ߠߊ߫ ߞߎ߲߬ߠߊ߬ߛߌ߰ߦߊ߬ߟߌ ߝߟߐߦߊ ߟߎ߬ ߟߊ߫ ߞߊ߬ߓߌ߯ ߕߎߟߊߝߌ߲ ߂߀߂߁ ߏ߬ ߡߍ߲ ߞߐߝߟߌ ߦߋ߫ ߞߊ߬ߝߏ ߟߊ߫ ߢߐ߲߯ߘߍߡߍ߲ ߘߌ߫ ߞߵߊ߬ ߟߐ߬ ߊ߬ ߟߊ߫ ߘߎ߰ߘߋ߲ ߠߎ߬ ߡߊ߬.

 

ߓߌ߲ߠߊߥߎߟߋ߲߫ ߕߟߋ߬ ߁߅/ ߂߀߂߆

ߞߏߕߌ߫ ߝߟߐ ߊߡߊߘߎ߫ ߎߙߌ߬ ߓߊ ߞߊ߬ ߓߐߒߡߊߟߌ ߢߊ߬ߕߣߐ߬ߡߊ ߘߏ߫ ߞߍ߫ ߛߊ߲ߡߊߘߊ߲߫ ߡߊ߲߬ߕߏ߲߬ߕߍ߬ߟߊ߬ߞߊ ߊߤߑߡߍߘ ߛߋߞߎ߬ ߕߎ߬ߙߋ߬ ߟߊ߫ ߞߐߣߊߞߙߌ߫. ߕߊ߯ߡߊ ߣߌ߲߬ ߟߊߢߌߣߌ߲ ߠߋ߬ ߞߊ߲ߓߍ߲߫ ߞߊ߲ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߟߊߛߌ߱ ߓߟߏߘߐߓߍ߲ ߠߎ߬ ߘߌ߫. ߏ߬ ߡߍ߲ ߓߟߏߘߐߓߍ߲ ߦߋ߫ ߓߌ߲ߠߊߥߎߟߋ߲߫ ߁߇ ߣߊ߬ߕߐ ߣߌ߲߬ ߘߌ߫. ߡߊ߬ߝߟߍ߬ߟߌ ߞߎ߲߬ߕߊ߮ ߞߣߐ߫. ߞߏߕߌ߯ ߝߟߐ ߞߊ߬ ߛߌ߰ߘߊ߬ߟߋ߲߫ ߛߌߦߊߡߊ߲߫ ߘߐߝߟߍ߫ ߛߊ߲ߡߊߘߊ߲߫ ߕߊߝߟߊ ߞߘߐߟߊ ߟߎ߬ ߘߐ߫. ߞߊ߬ߕߙߍ߬ߕߍ߫ ߝߘߏ߬ߓߊ߬ ߡߊ߬ߞߍ߬ ߦߌߟߊ ߟߎ߬ ߡߊ߬ ߡߍ߲ ߠߎ߬ ߢߊߞߎߘߦߊߣߍ߲߫ ߞߐ ߣߌ߲߬ ߠߊ߫. ߊ߬ ߞߊ߬ ߞߎߟߎ߲ߖߋߟߌ ߞߍ߫ ߓߊ߯ߙߊ ߛߎ߯ߦߊ ߓߐߢߟߊߕߊ ߟߊ߫ ߢߊ߬ߟߌ ߟߊ߫. ߊ߬ ߣߌ߫ ߞߊ߬ ߕߘߍ߬ߒ߬ߘߐ߬ ߥߣߊ ߟߎ߬ ߓߍ߯ ߝߏ߬ ߡߍ߲ ߠߎ߬ ߕߘߍ߬ ߘߊ߫ ߖߊ߬ߕߋ߬ߘߐ߬ߛߌ߰ ߓߘߍ ߢߌ߲߬ ߓߐߢߟߊ ߘߐ߫. ߊߡߊߘߎ߫ ߎߙߌ߬ ߓߊ ߞߵߌ ߕߌ߲ߕߌ߲߫ ߊ߬ ߞߊ߲߬ ߞߏ߫ ߢߊߞߎߘߦߊߟߌ ߝߊ߲߬ ߝߟߐ ߓߘߊ߫ ߓߊ߲߫ ߞߍ߫ ߟߊ߫. ߝߏ߫ ߞߊ߬ ߓߊ߯ߙߊ ߝߊ߲߬ ߜߘߍ߫ ߘߊߦߟߍ߬ ߡߍ߲ ߘߌ߫ ߛߋ߫ ߖߌ߬ߣߍ߬ ߕߊ ߓߍ߲߬ ߠߊ߫ ߡߊ߲߬ߕߏ߲߬ߕߍ߬ߦߊ ߖߊ߭ ߡߊ߬.

ߞߏߕߌ߯ ߝߟߐ ߞߊ߬ ߓߍ߲߬ߒ߬ߛߋ߲߬ߡߊ ߏ߬ ߕߣߐ߬ߓߐ ߞߊ߬ ߖߊ߲߬ߓߌ߬ߟߌ ߞߍ߫ ߞߊ߲ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߟߊߛߌ߰ ߞߏ ߟߎ߬ ߟߊߕߊ߯ߢߊ ߓߘߍ ߟߊ߫. ߖߊ߲߬ߖߏ߲ ߏ߬ ߡߍ߲ ߞߍߕߐ߫ ߞߊ߬ߝߏ ߞߎ߲߬ߕߌ߰ ߛߌߦߊߡߊ߲߫ ߣߌ߫ ߞߎ߲߬ߠߊ߬ߛߌ߰ ߗߊ߯ߡߊ߲߫ ߠߊߛߣߍ߫ ߟߊ߫ ߞߐߣߊߞߙߌ߫ ߞߵߏ߬ ߓߍ߯ ߟߊ߫ ߡߐ߰ ߡߊߓߏ߬ߢߕߊ߬ߓߊ ߟߎ߬ ߞߊ߲߬. ߊ߬ߟߎ߫ ߞߊ߬ ߟߊ߬ߘߍ߲߬ߞߣߍ߬ߦߊ߬ߟߌ ߞߍ߫ ߛߋ߲ߞߏߟߦߊ߫ ߓߟߏߘߐߓߍ߲ ߠߎ߬ ߡߊ߬ߘߏ߬ߣߌ߲߬ߠߌ߲ ߠߊ߫. ߞߵߏ߬ ߟߊ߫ ߟߊ߬ߞߊ߲߬ߘߊ߬ߟߌ ߞߊ߲߬ ߞߊ߬ ߞߏ߫ ߟߎ߫ ߛߌ߰ ߛߋ߲߬ߞߊ߲ ߞߊ߬ ߟߊ߬ߞߢߐ߬ߡߊ߬ߟߌ ߢߐ߲߰ߦߋ߬ߓߊߟߌ ߛߌ߰ ߛߋ߲߬ߞߊ߲߬. ߡߍ߲ ߓߍ߲߬ߣߍ߲߫ ߡߊ߲߬ߕߏ߲߬ߕߍ߬ߦߊ ߡߊ߬ߜߟߍ߬ߦߊ߬ߟߌ ߟߌ߬ߤߟߊ ߡߊ߬. ߞߏߕߌ߯ ߝߟߐ ߞߊ߬ ߞߟߌߟߌ ߟߐ߬ ߖߌ߬ߣߍ߫ ߡߌ߬ߙߌ߲߬ߘߌ ߝߣߊ߫ ߡߊ߬. ߞߏ߫ ߖߡߊ߬ߣߊ ߦߋߝߊߘߌ ߣߴߊ߬ ߡߊ߬ߓߏ߬ߢߊ߬ߟߌ ߝߣߊ߫ ߓߍߣߊ߬ ߟߊߞߙߐ߬ߛߌ߫ ߘߎߢߊ߫ ߡߎ߬ߡߍ ߓߟߏ߫. ߊ߬ ߞߊ߬ ߖߡߊ߬ߣߊ߬ߘߋ߲ ߓߍ߯ ߡߊߞߟߌ߫ ߌ ߞߍ߫ ߘߊ߫ ߟߌ߬ߤߟߊ߬ ߛߌ߫ ߘߐ߫. ߞߏ߫ ߓߍ߯ ߦߴߌ ߕߊ ߞߍ߫ ߖߊ߲߬ߖߏ߲ ߝߊ߬ߛߏ߬ߟߊ߬ߞߊ ߢߌ߲߬ ߠߊ߫ ߛߎߘߊ߲ ߘߐ߫. ߏ߬ ߡߍ߲ ߦߋ߫ ߢߡߊߦߟߍߡߊ߲ ߣߌ߫ ߖߌ߬ߣߍ߬ ߘߊߦߟߍߟߌ ߟߊ߲ߡߊ ߘߌ߫. ߓߍ߯ ߦߋ߫ ߥߊ߫ ߟߊ߲߰ߛߣߍ߬ ߞߐ߲ߕߍ߬ ߕߏ߬ߟߊ߲߬ߕߊ߲߫ ߞߣߍ ߘߐ߫ ߣߐ߲ߜ߭ߐ߫. ߞߊ߬ ߞߐ߲߬ ߏ߬ ߓߍ߫ ߢߍ߫ ߞߐߞߊ߲ߞߏ ߟߎ߬ ߞߏߕߌ߯ߘߊ ߟߋ߬ ߛߐ߰ߕߐ߫ ߡߊ߬ߓߘߍ߬ߓߘߍ߬ߟߌ ߟߎ߬ ߡߊ߬ ߝߟߐ߫.

ߞߐ߬ߓߊ߬ߟߏ߲ ߓߌ߲ߠߊߥߎߟߋ߲߫ ߕߟߋ߬ ߁߂/ ߂߀߂߆

ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߕߊ߯ ߘߊ߫ ߗߋߦߊߟߌ߫ ߢߊ߬ߕߣߐ߬ߡߊ߬ߓߊ ߘߏ߫ ߡߊߟߐ߬ ߞߵߊ߬ ߓߍ߲߬ ߝߌ߬ߟߊ߲߬ߛߊ߯ߘߊ ߘߏ߫ ߞߓߊߝߟߐߛߌ߮ ߡߊ߬߸ ߞߵߏ߬ ߞߍ߫ ߓߊ߯ߙߊ߫ ߝߘߏ߬ߓߊ߬ ߘߊߡߌߣߊߟߌ ߘߌ߫ ߖߡߍߓߊ߲ߜ߭ ߛߏ߲߯ߘߋ ߞߣߐ߫ ߔߌߕߊ߬ ߡߙߊ߬ߓߊ߰ߘߊ ߞߣߐ߫. ߏ߬ ߡߍ߲ ߣߊ߲߬ߝߟߏ߬ߦߊ߬ߣߍ߲ ߥߙߎߞߌ ߝߛߎߞߎ ߝߊ߬ߛߏ߬ߟߊ߬ߞߊ ߘߐ߫ (ߓߋ ߍߣ ߘߋ) ߖߎ߬ߓߐ ߛߏ߯ߙߏߣߍ߲߫ ߝߏ߯ ߛߓߊ߬ ߟߋ߬ ߟߊ߫߸ ߊ߬ ߣߌ߫ ߛߓߍ ߞߋߟߋ߲߫ ߣߌ߫ ߡߣߐ߬ߓߏ߲߬ ߞߋߟߋ߲߫، ߢߍ߲߯ ߞߣߐ ߝߌ߬ߟߊ߬. ߊ߬ ߣߌ߫ ߝߎ߬ߙߊ߲߬ ߖߐ߯ߙߊ߲ߦߊߣߍ߲ ߞߵߏ߬ ߓߍ߯ ߟߊ߫ ߣߍ߰ߛߊ߲ߛߊ߲ ߜߟߊ߬ߜߟߊ߬ ߄߀߀ ߘߏ߲߭ ߣߴߊ߬ ߡߊ߬. ߓߊ߯ߙߊ߫ ߞߎ߲߬ߕߊ߮ ߞߊߙߏ߫ ߂߄ ߠߋ߬ ߘߌ߫. ߔߌߕߊ߬ ߗߋߦߊߟߌ߫ ߞߙߍߞߙߍߣߍ߲߫ ߞߊ߲ߕߌ߮ ߞߎߡߊ߫ ߘߊ߫ ߔߌߕߊ߬ ߡߌ߬ߙߌ߲߬ߘߌ ߕߐ߯ ߘߐ߫.  ߞߏ߲߬ߓߏ ߌߛߎߝ ߓߊ ߞߵߊ߬ ߟߊ߫ ߣߌߟߊߛߍߥߊ߫ ߖߍ߬ߘߍ ߖߍ߬ߘߍ ߦߌ߬ߘߊ߬ ߞߵߊ߬ ߟߐ߬ ߞߎ߲߬ߠߊ߬ߛߌ߮ ߡߊ߬. ߊ߬ ߞߊ߬ ߝߏ߬ߟߌ ߖߍ߬ߘߍ ߖߍ߬ߘߍ ߟߊߛߋ߫ ߘߌ߲߬ߞߌߙߊ ߟߊ߬ߞߟߏ߬ߞߟߏ߬ߟߌ ߡߊ߬ߞߏ ߟߎ߬ ߘߊ߲ߞߎ߲ߠߌ߲ ߘߐ߫. ߔߌߕߊ߬ ߡߙߊ߬ߓߊ߰ߘߊ ߟߊ߬ߞߟߏ߬ߞߟߏ߬ߟߌ ߗߋߕߌ߯ ߤߊߘߌ߬ ߖߊ߰ߓߌ ߞߵߊ߬ ߟߊ߫ ߣߌߟߊߛߍߥߊ ߦߌ߬ߘߊ߬ ߟߊ߬ߞߟߏ߬ߞߟߏ߬ߟߌ ߗߋߢߊ ߟߊ߫ ߟߎ߬ ߟߊ߫. ߊ߬ ߣߌ߫ ߡߌ߬ߙߌ߲߬ߘߌ ߞߵߊ߬ ߓߍ߲߬ ߖߊ߬ߕߋ߬ߘߐ߬ߛߌ߮ ߣߌ߲߬ ߓߐߢߟߊ ߡߊ߬ ߞߵߊ߬ ߟߐ߬߬ ߊ߬ ߡߊ߲߬ߞߕߎ ߢߊ ߡߊ߬ ߏ߬ ߡߍ߲ ߦߋ߫ (( ߡߊ߬ߞߏ߬ߡߊ߬ߝߋ߲߫ ߢߊ߬ߒ߬ߞߐ߬ߓߊߟߌ ߘߌ߫)) ߘߌ߲߬ߞߌߙߊ ߛߌ߰ߓߊ߮ ߟߎ߬ ߓߟߏ߫. ߊ߬ ߞߵߊ߬ ߦߌ߬ߘߊ߬ ߞߏ߫ ߝߌ߬ߟߊ߲߬ߛߊ߯ߘߊ ߣߌ߲߬ ߦߋ߫ ߘߍ߬ߞߏ߬ߦߊ ߕߋߟߋ߲ߓߊ߯ߦߊ ߟߋ߬ ߦߌ߬ߘߊ߬ߟߊ߲ ߘߌ߫)) ߜ߭ߡߍߓߊ߲ߜ߭ߌߞߊ ߘߋ߲ ߠߎ߬ ߢߍ߫. ߞߊ߬ ߢߍߕߊ߮ ߛߐ߬ߘߐ߲߬ ߊ߬ߟߎ߬ ߝߣߊ߫ ߓߟߏ߫ ߦߏ߫ ߛߏߓߊ ߞߣߐߟߊ ߟߎ߬ ߕߊ. ߞߏߕߌ߯ ߝߟߐ ߞߵߊ߬ ߦߌ߬ߘߊ߬ ߞߏ߫ ߝߌ߬ߟߊ߲߬ߛߊ߯ߘߊ ߣߌ߲߬ ߟߐ߬ߟߌ ߞߎ߲߭ ߠߋ߬ ߕߐ߲ߛߌ߮ ߘߌ߫ ߦߙߐߖߊ߲ ߕߊ߯ߡߊ ߟߊ߫ ߘߌ߲߬ߞߌߙߊ ߛߌ߰ߓߊ߮ ߣߴߊ߬ ߟߊ߬ߡߌߣߌ߲߫ ߡߐ߱ ߓߟߏ߫ ߞߊߕߙߍ߬ߕߍ߫ ߓߙߎߥߊߟ ߤߏߟߊ߲ߘߍ߬ ߡߊ߬. ߓߙߎߥߊߟ ߕߊߔߍ ߣߌ߫ ߛߏ ߡߌߛߍ߲ ߕߐ߭ ߟߎ߬ ߦߋ߫ ߘߟߊ߬ߓߊ߫ ߡߙߊ߬ߓߊ߰ߘߊ ߟߋ߬ ߞߣߐ߫. ߞߵߊ߬ ߟߊߥߟߌ߬ ߞߎߘߍ߫ ߁߅ ߥߟߊ߫ ߁߇ ߟߎ߬ ߕߊ߯ߡߊ ߘߐߛߊ߭ ߡߊ߬ ߞߣߊ߬ߕߏ߫ ߔߌߕߊ߬ ߞߊ߬ߙߊ߲߬ߘߊ ߟߊߛߐ߬ߘߐ߲߬ ߠߊ߫. ߟߌ߬ߤߟߊ ߏ߬ ߡߍ߲ ߕߴߛߋ߫ ߓߍ߲߬ ߠߊ߫ ߘߋ߲ߣߍ߲߫ ߛߊ߲߬ ߁߀ ߣߌ߫ ߁߂ ߟߎ߬ ߡߊ߬. ߞߙߍߞߙߍߦߟߊ߫ ߊ߬ ߦߋ߫ ߖߊ߲߬ߞߌ߲߬ߠߌ߲ ߠߋ߬ ߘߌ߫ ߘߋ߲ߡߛߏߣߍ߲ ߠߎ߬ ߢߍ߫. ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߕߌ߲ߕߌ߲ ߊ߬ ߞߊ߲߬ ߞߏ߫ ߖߌ߬ߣߍ߬ ߘߍ߬ߞߏ߬ߦߊ ߟߊ߫ ߛߌߣߌ߲ߢߍߛߌ߮ ߝߊ߲߬ߓߊ߬ߦߊ ߦߋ߫ ߘߋ߲ߡߛߏߣߍ߲ ߠߎ߬ ߟߋ߬ ߘߌ߫. ߏ߬ ߟߎ߬ ߡߍ߲ ߠߎ߬ ߦߋ߫ ߡߌ߬ߙߌ߲߬ߘߌ % ߅߂ ߘߌ߫. ߟߊ߬ߞߟߏ߬ߞߟߏ߬ߟߌ ߖߎ߬ߓߐ ߡߊ߬ߛߎߘߎ߲ ߢߌ߲߬ ߠߎ߬ ߛߊߓߎ߫ ߟߊ߫، ߞߎ߲߬ߠߊ߬ߛߌ߮ ߦߋ߫ ߟߊߛߐ߬ߘߐ߲߬ߠߌ߲ ߝߊ߲߬ߞߊߘߏ߲߬ ߟߊ߬ߞߟߏ߬ߞߟߏ߬ߟߌ ߛߌߟߊ ߝߍ߬ ߞߊ߬ ߘߋ߲ߡߛߏߣߍ߲ ߠߎ߬ ߟߊ߫ ߞߊ߬ߙߊ߲߬ߠߊ߬ߘߏ߲ ߠߊߖߊ߲ߞߏ߫. ߞߵߊ߬ ߣߊ߲߬ߝߟߏ߬ߘߏ߲߬ߘߊ߬ߟߊ ߘߎ߲ߡߕߊ ߞߍ߫ ߡߐ߰ߦߊ ߞߎߓߋߘߦߊ ߛߌߟߊ ߝߍ߬. ߏ߬ ߡߍ߲ ߕߊ ߟߐ߬ߘߎ߰ߓߊ ߦߋ߫ ߥߙߎߞߌ߫ ߝߊ߬ߛߏ߬ߟߊ߬ߞߊ ߘߐ߫.

ߓߌ߲ߠߊߥߎߟߋ߲߫ ߕߟߋ߬ ߁߂/ ߂߀߂߆

ߜߡߍ߬ߓߊ߲ߜ߭ߌ ߕߊ ߞߐߝߍ߬ ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߏߛߑߕߏߦߊ߫ ߞߊ߬ߙߊ߲߬ߕߊ ߘߎ߲ߓߎߟߞߊ ߞߓߊߝߟߐߛߌ߮ ߞߍ߫، ߏ߬ ߡߍ߲ ߦߋ߫ ߔߌߕߊ߬ ߞߊ߬ߙߊ߲߬ߘߊ ߝߟߐ ߘߌ߫. ߡߙߌߣߊ߲ ߣߌ߲߬ ߞߎ߲߭ ߠߋ߬ ߞߎ߲߬ߠߊ߬ߛߌ߮ ߓߟߏ߫ ߟߊ߬ߞߟߏ߬ߞߟߏ߬ߟߌ ߖߎ߬ߓߐ ߟߎ߬ ߝߊ߲߬ߞߊߘߏ߲߭ ߘߌ߫. ߊ߬ ߣߌ߫ ߞߊ߬ ߞߊ߬ߙߊ߲߬ߘߋ߲ ߠߎ߬ ߟߊ߫ ߟߞߊ߬ߙߊ߲߬ߠߌ߲ ߞߍߗߏ߮ ߟߊߢߊ߬. ߏ߬ ߡߍ߲ ߣߊ߲߬ߝߟߏ߬ߦߊ߬ߣߍ߲߫ ߥߙߎߞߌ ߝߊ߬ߛߏ߬ߟߊ߬ߞߊ ߝߛߎߞߎ ߘߐ߫ ((ߓߋ ߍߣ ߘߋ) ߊ߬ ߣߌ߫ ߊߟߌߡߊ߲ߢ ߟߊ߬ߖߊ߲߬ߞߏ߬ߟߌ ߥߙߎߞߌ ߜߍߓߏ߲. ߖߊ߬ߕߋ߬ߘߐ߬ߛߌ߮ ߦߋ߫ ߍߙ ߔߟߌߛ ߘߋ ߞߊ߬ߙߊ߲߬ߓߏ߲߫ ߞߣߐ߫ ߛߓߊ߬ ߟߋ߬ ߘߌ߫. ߟߍߙߊߓߏ߲߫ ߞߋߟߋ߲߫، ߡߊ߬ߡߙߊ߬ߟߌ ߝߏ߯ ߂، ߘߊߥߎ߲ߠߌ߲ߓߏ߲߫ ߂، ߢߍ߲߯ ߣߊ߯ߣߌ߲߫. ߘߐ߬ߝߎ߬ߟߋ߲߬ ߓߟߏߡߊ߬، ߊ߬ ߡߊ߬ߞߍ߬ߘߊ ߞߵߏ߬ ߓߍ߯ ߟߊ߫ ߝߎ߬ߙߊ߲ ߖߐ߯ߙߊ߲ߦߊߣߍ߲ ߠߎ߬ ߞߊ߲߬. ߛߊ߫ ߞߊ߬ߙߊ߲߬ߕߊ ߢߊߞߎߘߦߊߣߍ߲ ߟߊߓߊ߯ߙߕߊ ߘߌ߫ ߛߋ߫ ߛߐ߬ߘߐ߲߬ ߠߊ߫. ߔߌߕߊ߬ ߟߊ߬ߞߟߏ߬ߞߟߏ߬ߟߌ ߗߋߕߌ߯ ߡߙߊ߬ߓߊ߰ߘߟߊ߬ߞߊ ߤߊߘߌ߬ ߖߊ߰ߓߌ ߞߊ߬ ߓߊ߯ߙߊ߫ ߜߋ߬ߟߎ߲߬ߠߌ߲ ߖߍ߬ߘߍ ߖߍ߬ߘߍ ߟߊ߬ߤߘߌ ߕߊ߬ ߞߏ߫ ߊ߬ ߘߌ߫ ߖߊ߬ߕߋ߬ߘߐ߬ߛߌ߮ ߞߎ߲߬ߝߊ߰ߣߍ߲ ߝߣߊ߫ ߞߙߐ߬ߛߌ߬. ߞߵߊ߬ ߓߍ߲߬ ߖߎ߬ߓߐ ߟߎ߬ ߡߊ߬ߡߙߊ߬ߢߊ ߣߌ߫ ߟߊ߬ߓߊ߰ߙߊ߬ ߞߏߢߌ߲ ߡߊ߬. ߟߞߊ߬ߙߊ߲߬ߠߌ߲߫ ߕߣߐ߬ߢߊ߬ߒ߬ߞߐ߬ߓߊߟߌ ߟߎ߬ ߛߌߟߊ ߝߍ߬ ߞߵߊ߬ ߓߍ߲߬ ߘߌ߲߬ߞߌߙߊ ߟߊ߬ߞߟߏ߬ߞߟߏ߬ߟߌ ߞߊ߲ߞߋߦߊ ߡߊ߬.

ߞߏߕߌ߯ ߝߟߐ ߞߊ߬ ߞߟߌߟߌ ߖߍ߬ߘߍ ߖߍ߬ߘߍ ߟߐ߬ ߞߊ߬ߙߊ߲߬ߘߋ߲ ߠߎ߬ ߡߊ߬. ߞߏ߫ ߊ߬ߟߎ߫ ߞߊ߬ߙߊ߲߬ߕߊ ߞߍ߫ ߝߟߐߦߊ ߓߍ߯ ߘߐ߫ ߢߍߕߊ ߘߌ߫. ߊ߬ ߞߵߊ߬ ߕߌ߲ߕߌ߲߫ ߓߊ߯ߙߊ ߢߊ߬ߕߣߐ ߣߌ߫ ߡߊ߬ߝߊ ߣߌ߫ ߟߊ߬ߞߙߐ߬ߛߌ߬ߟߌ ߞߊ߲߬ ߞߵߊ߬ ߦߌ߬ߘߊ߬ ߞߏ߫ ߟߊ߬ߞߟߏ߬ߞߟߏ߬ߟߌ ߕߊ߬ߡߌ߲߬ߣߍ߲ ߞߎ߲߬ߞߋߟߋ߲߫ ߛߎߘߊ߲ߠߌ߲ ߓߍ߯ ߟߊ߫ ߊ߬ߟߋ ߕߐ߬ߣߐ ߦߋ߫ ߘߍ߭ ߕߊ ߟߋ߬ ߘߌ߫. ߊ߬ ߞߵߊ߬ ߦߌ߬ߘߊ߬ ߞߏ߫ ߘߋ߲ ߓߍ߯ ߞߊ߫ ߞߊ߲߫ ߞߊ߬ ߓߍ߲߬ߛߋ߲߬ߡߊ ߖߍ߬ߘߍ ߖߍ߬ߘߍ ߕߣߐ߬ߓߐ߫ ߞߊ߬ ߞߊ߬ߝߏ ߟߊ߫ ߞߊ߬ߙߊ߲߬ߕߊ߫ ߖߎ߬ߓߐ ߟߎ߬ ߟߐ߬ߟߌ ߣߌ߫ ߢߊߞߎߘߦߊߟߌ ߟߎ߬ ߞߍ߫. ߞߊ߬ ߘߋ߲ ߠߎ߬ ߞߟߊߓߎߡߦߊ߫ ߞߊ߬ߙߊ߲ ߠߊ߫ ߛߍ߬ߓߍ ߘߐ߫. ߊ߬ ߞߊ߬ ߞߎ߲߬ߠߊ߬ߛߌ߮ ߟߊ߫ ߥߞߊ߬ߟߌ  ߦߌ߬ߘߊ߬ ߣߊ߲߬ߝߟߏ߬ߘߏ߲߬ ߘߐ߫ ߡߐ߰ߦߊ ߡߊߣߊ߲ߞߎ߲ ߘߐ߫. ߊ߬ ߞߵߊ߬ ߦߌ߬ߘߊ߬ ߞߏ߫ ߟߐ߲ߠߌ߲ ߠߋ߬ ߛߌߟߊ ߜߍߣߍ߲ ߘߌ߫ ߞߊ߬ ߘߎ߰ߘߋ߲ ߠߎ߬ ߟߊߞߐ߯ ߞߊ߬ ߢߝߍߕߊ߯ ߡߊ߲߬ߕߏ߲ ߠߊߘߊ߲߫، ߡߐ߲ߢߐ߲߯ߡߊ ߘߐ߫ ߞߵߌ ߞߎ߲߬ߛߌ߲߯ ߕߊ߯ ߢߝߍߟߊ߫. ߞߎߡߊ ߞߎ߲߬ߘߏ߲ ߘߐ߫ ߞߎ߬ߢߊ߬ߘߐ ߟߕߊߡߌ߲ ߞߍ߫ ߘߊ߫ ߓߏ߬ߢߊ߬ ߓߟߏߡߊ߬. ߞߊ߲ߓߍ߲ ߞߊ߲ߕߌ߮ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߡߊ߬، ߞߵߊ߬ ߓߍ߲߬ ߊ߬ߟߎ߬ ߖߘߍ߬ߘߏ߲ ߡߊ߬ ߞߵߊ߬ ߟߐ߬ ߖߐ ߟߊ߫ ߛߓߊ߬ߕߌ ߡߊ߬߸ߞߵߊ߬ߟߎ߬ ߕߊ߫ ߘߍ߬ߡߍ߲߬ߠߌ߲ ߕߐ߰ߡߊ߬ߛߙߋ߬ߡߊ ߞߍ߫ ߟߊ߬ߟߐ߲߬ߠߌ߲߬ߦߊ߬ߟߌ ߘߐ߫. ߞߵߊ߬ ߟߐ߬ ߖߡߊ߬ߣߊ߫ ߘߍ߬ߞߏ߬ߦߊ ߥߙߎߞߌ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߡߊ߬.

ߓߌ߲ߠߊߥߎߟߋ߲߫ ߕߟߋ߬ ߁߂/ ߂߀߂߆

ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߟߊߓߋ߬ ߕߌ߲߬ߞߎߘߎ߲߫ ߡߊ߬ߡߙߊ߬ߟߌ ߝߘߏ߬ߓߊ߬ ߣߊ߲߬ߝߟߏ߬ߦߊ߬ߟߌ ߖߌ߬ߦߊ߬ߘߊ ߘߊߦߟߍߟߌ ߢߊ߰ߢߊ߮ ߢߣߊߓߊ߯ߦߊ߫߸ߣߊ߲߬ߝߟߏ߬ߦߊ߬ߟߌ ߖߌ߬ߦߊ߬ߘߊ ߢߌ߲߬ ߓߐߢߟߊ߫  ߦߋ߫ ߡߙߊ߬ߦߊ ߟߎ߬ ߡߊ߬ߘߏ߲߬ߠߊ ߟߋ߬ ߘߌ߫߸ ߘߌ߲߬ߞߌߙߊ ߛߌ߰ߓߊ߮ ߟߎ߬ ߡߊ߬ߡߙߊ߬ߟߌ߬ߟߊ ߟߎ߬ ߕߍ߫. ߞߊ߬ ߝߊ߲߬ߞߊ߬ߘߏ߲߬ߠߌ߲ ߞߍ߫ ߝߏ߲߬ߝߏ߲߬ߟߊ ߘߐ߫ ߞߊ߬ ߝߘߏ߬ߓߊ߬ ߛߐ߬ߘߐ߲߬ߕߊ ߡߊߞߊ߲ߞߊ߲߫ ߞߊ߬ ߛߋ߫ ߝߘߏ߬ߓߊ߬ ߣߊ߲߬ߝߟߏ߬ߦߊ߬ߟߌ ߡߊߡߙߊ߬ ߟߊ߫߸ ߞߵߊ߬ ߓߍ߲߬ ߓߍ߲߬ߓߊ߬ߟߌ߬ߦߊ ߟߎ߬ ߟߊߕߐ߲ ߡߊ߬ ߊ߬ ߟߊ߫ ߟߊ߬ߡߍ߲߬ߠߌ߲ ߘߐ߫. ߟߊߓߋ߬ ߕߌ߲߬ߞߎߘߎ߲߫ ߞߎ߲߬ߠߊ߬ߛߌ߰ߟߊ ߞߵߊ߬ ߦߌ߬ߘߊ߬ ߞߏ߫ ߡߊ߬ߞߍ߬ߟߌ ߞߎߘߊ ߣߌ߲߬ ߘߌ߫ ߞߍ߫ ߛߊߓߎ߫ ߘߌ߫. ߞߊ߬ ߛߋ߫ ߗߋߢߊ ߟߊߓߘߍ߬ߦߊ߬ߟߌ ߟߊ߫. ߞߊ߬ ߓߟߏߘߏ߲ߢߐ߲߰ߓߟߏ ߝߊ߲߬ߞߊߘߏ߲߬. ߝߘߏ߬ߓߊ߫ ߣߊ߲߬ߝߟߏ߬ߦߊ߬ߟߌ ߥߊ߬ߣߊ ߟߎ߬ ߣߌ߫ ߢߐ߲߯ߕߍ߫. ߊ߬ ߣߌ߫ ߞߊ߬ ߟߊ߬ߓߊ߰ߙߊ߬ߟߌ ߟߊ߫ ߓߍߓߊ߯ߦߊ߫߸ ߞߵߊ߬ ߓߍ߲߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߞߘߎ߬ߜߍߟߍ߲ ߠߎ߬ ߡߊ߬. ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߣߊ߲߬ߝߟߏ߬ߦߊ߬ߟߌ ߞߏߕߌ߯ ߞߊ߬ ߖߊ߲߬ߓߌ߬ߟߊ߬ߟߌ ߞߍ߫ ߞߏ߫ ߞߊ߬ߝߏ ߟߊ߫ ߓߍߓߊ߯ߦߊ ߕߐ߰ߡߊ߬ߛߙߋ߬ ߟߋ߬ ߣߌ߲߬ ߘߌ߫. ߞߵߊ߬ ߞߏ߫ ߟߎ߬ ߕߊ߲ߓߊ߲߫ ߓߐ߫ ߏ߬ ߘߌ߫ ߛߋ߫ ߓߟߏߡߦߊ߫ ߟߐ߬ߕߊ ߓߙߊߞߊߣߍ߲ ߘߏ߲߬ߢߐ߲߰ߒ߬ߘߐ߬ߟߊ ߘߏ߫ ߘߌ߫ ߟߊ߫ ߘߍ߬ߞߏ߬ߦߊ ߡߊ߬ ߘߎ߰ߘߋ߲߬ ߠߎ߬ ߟߊ߫ ߛߌߟߊ ߝߍ߬ ߡߊ߲߬ߕߏ߲ ߠߎ߬ ߕߍߡߊ߬. ߊ߬ ߞߵߊ߬ ߕߌ߲ߕߌ߲ ߞߍߥߊߟߌ ߣߌ߲߬ ߞߊ߲߬ ߞߏ߫ ߞߊ߬ߝߏ ߟߊ߫ ߓߍߓߊ߯ߦߊ ߕߐ߰ߡߊ߬ߛߙߋ߬ ߜߌߟߌ߲ߓߊ ߟߋ߬ ߣߌ߲߬ ߘߌ߫. ߏ߬ ߡߍ߲ ߦߋ߫ ߛߋ߫ ߟߊ߫ ߝߘߏ߬ߓߊ߫ ߡߊ߬ߡߙߊ߬ߟߌ߬ߘߊ ߟߊ߫ ߞߊ߬ ((ߞߏ߲߬ߘߏ ߗߋߢߊ ߟߊ߫ ߗߋߦߊߟߌ ߝߟߐ ߣߊ߲߬ߝߟߏ߬ߦߊ߬ߟߌ ߜߋ߬ߟߎ߲߬ߠߌ߲، ߝߘߏ߬ߓߊ߬ ߟߐ߯ߝߍ ߟߎ߬ ߜߋ߬ߟߎ߲߬߬ߠߌ߲، ߊ߬ ߣߌ߫ ߞߊ߬ߝߏ ߝߊ߬ߗߍ ߟߎ߬ ߡߊ߬ߡߙߊ߬ߟߌ، ߞߵߏ߬ ߓߍ߯ ߟߊ߫ ߝߘߏ߬ߓߊ߫ ߛߐ߬ߘߐ߲߬ߘߊ ߟߎ߬ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߢߐ߲߰ߦߋ߬ߓߊߟߌ ߛߌ߲߬ߝߏ߲߬ߧߊ߫ ߞߊ߲߬.ߞߵߏ߬ ߟߊ߫ ߛߎ߯ߦߊ ߟߊ߫ ߓߘߍ߬ߦߊ ߣߌ߫ ߓߊߓߋߟߌ ߞߊ߲߬ ߊ߬߬ ߣߌ߫ ߝߘߏ߬ߓߊ߫ ߖߐ߰ߣߍ߬ߦߊ߬ߟߌ ߣߐ߰ߦߊ ߛߌߟߊ))

ߞߏߕߌ߯ ߝߟߐ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߞߍߕߊ ߓߊߖߎߟߞߊ ߟߋ߬ ߘߌ߫. ߞߊ߬ ߟߊ߬ߛߣߍ߬ߟߌ ߖߎ߬ߓߐ ߛߋߞߏߦߊߕߌ߮ ߟߎ߬ ߡߊߞߍ߫ ߘߌ߲߬ߞߌ߬ߙߊ߬ ߞߋߟߋ߲߫ ߢߌ߲߬ ߘߐ߫. ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߣߊ߲߬ߝߟߏ߬ߦߊ߬ߟߌ ߥߣߊ߬ ߓߐߣߍ߲ߢߐ߲߰ߡߊ ߟߎ߬ ߟߊ߫ ߡߊ߬ߞߜߟߍ߬ߦߊ߬ߟߌ ߢߌ߲߬ ߦߋ߫ ߝߛߎߞߎߦߊߟߌ ߞߏߕߌ߯ ߝߣߊ߫ ߟߊߢߌߣߌ߲߫ ߠߊ߫، ߞߣߊ߬ߕߏ߬ ߛߋ߫ ߟߊ߫ ߟߊ߲ߞߎ߲ ߗߋߢߟߊ ߟߎ߬ ߡߊ߬. ߊ߬ ߣߌ߫ ߝߐ߰ߕߐ߬ߕߍ߰ߘߊ، ߤߊ߲߯ ߞߊ߬ ߕߊ߯ ߛߋ߫ ߛߌ߲߬ߝߏ߲߬ߘߊ ߜߘߍ߫ ߟߎ߫ ߡߊ߬߸ߊ߬ ߦߋ߫ ߡߍ߲ ߠߎ߬ ߢߍ߫ ߛߌߟߊ߫ ߘߐ߫. ߝߏ߫ ߏ߬ ߟߎ߬ ߦߋ߫ ߞߊߘߊ߲߫ ߠߋ߬ ߞߍ߫ ߞߵߊ߬ ߟߊ߫ ߖߘߍ߬ߕߊ߬ߦߊ߫. ߞߊ߬ ߡߊ߬ߡߙߊ߬ߟߌ ߓߊ߯ߙߊ ߟߎ߬ ߟߊߣߐ߰ߦߊ߬. ߊ߬ ߣߌ߫ ߕߣߐ߬ߓߐ߬ߟߌ ߣߌ߫ ߘߏ߲߬ߖߟߎ߬ߡߊ߬ߟߌ ߛߋߞߏߦߊ߫. ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߦߌ߬ߘߊ߬ ߞߏ߫ ߢߌߣߌ߲ߞߏ߫ ߖߐ߲ߖߐ߲ ߘߐߞߣߍߣߍ߲߫ ߠߋ߬: ߞߊ߬ ߕߌ߲߬ߞߎߘߎ߲߫ ߡߊ߬ߡߙߊ߬ߟߌ߬ߟߊ ߟߎ߬ ߓߌ߬ߟߊ߬ ߟߌ߬ߤߟߊ ߢߌߡߊ ߘߐ߫. ߛߊ߫ ߞߊ߬ ߛߋ߫ ߡߊ߬ߡߙߊ߬ߟߌ ߕߊ߲ߓߊ߲߫ ߓߐ߫ ߟߊ߫ ߞߊ߬ ߛߴߊ߬ ߟߊ߫ ߟߐ߬ߒ߬ߗߋ߬ߟߊ ߟߎ߬ ߞߍ߫ ߟߴߊ߬ ߢߌߡߊ ߟߊ߫. ߦߙߐ ߘߊߦߟߍ߬ߣߍ߲ ߣߌ߲߬ ߦߋ߫ ߘߏ߲߬ߘߊ ߞߋߟߋ߲߫ ߠߋ߬ ߘߌ߫، ߊ߬ ߣߌ߫ ߟߊ߬ߛߣߍ߬ߟߌ ߝߏ߯ߓߊ ߞߋߟߋ߲߫، ߛߓߍߘߊ߫ ߃߆، ߛߣߍ߬ߞߍ߬ߟߊ ߟߎ߬ ߟߊ߫ ߛߓߍߘߊ߫ ߃، ߏ߬ ߡߍ߲ ߞߣߐ ߘߐߓߍ߲߬ߠߌ߲ ߓߊ߯ߙߟߊ ߟߎ߬ ߣߌ߫ ߞߏߟߊߘߍߢߐ߲߯ ߠߎ߬ ߢߍ߫ ߞߊ߬ߞߎ߬ߘߟߊ߬ߞߊ ߣߴߊ߬ ߓߊ߯ߙߊߝߋ߲߫ ߓߘߍ ߓߍ߯.