Catégorie : Actualités en N’Ko

ߞߐߣߊߞߙߌ߫ ߣߍߣߍߓߊ߫ ߕߟߋ߬ ߁߀/ ߂߀߂߅

ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߞߊ߬ ߟߊ߬ߞߢߐ߬ߡߊ߬ߟߌ ߞߍ߫ ߛߊ߲ߡߊߘߊ߲߫ ߡߊ߲߬ߕߏ߲߬ߕߍ߬ߟߊ߬ߞߊ ߊߤߊߡߍߘ ߛߋߞߎ߬ ߕߎ߬ߙߋ߬ ߟߊ߫ ߛߟߊߕߌ߯ ߙߏߓߍߙ ߓߋߜ߭ߙߋ߬ ߡߊ߲ߓߋ߬ ߏ߬ ߕߘߍ߬ ߡߊߟߐ߬ߣߍ߲ ߜߋ߲߬ߞߐ߬ߖߌ߬ߘߊ ߘߊ߬ߡߊ߲߬ ߣߌ߫ ߕߊߖߌ ߣߌ߫ ߜߟߐߡߌ߲ ߞߏߕߌ߮ ߟߋ߬ ߓߟߏ߫ ߛߟߊߕߌ߯ ߡߊ߲ߡߊߘߎ߫ ߛߊ߲ߜ߭ߊߝߎߥߊ߫ ߞߎ߬ߟߎߓߊ߬ߟߌ߬ ߟߋ߬ ߓߟߏ߫. ߜߋ߲ߞߐ߰ߖߌ߬ߘߊ ߞߊ߲ߓߍ߲ ߞߏߕߌ߯ ߝߟߐ ߦߋ߫ ߕߋ߬ߟߋ߫ ߝߌ߬ߟߊ߬ ߟߊߕߊ߬ߡߌ߲߬ ߠߊ߫ ߞߐߣߊߞߙߌ߫. ߞߊ߬ ߛߟߊߕߌ߯ ߡߊ߬ߓߏ߬ߢߊ߬ߕߊ ߊߟߛߊߣ ߘߙߊ߬ߡߊߣ ߥߕߊߙߊ߫ ߞߐߦߌ߬ߘߊ߬ ߜߋ߲ߞߐ߰ߖߌ߬ߘߊ ߞߊ߲ߓߍ߲ ߞߊ߲ߕߌ߮. ߞߵߊ߬ ߓߍ߲߬ ߢߊ߰ߢߊ߰ ߘߝߐ߬ߟߊ߬ߞߊ ߘߊߦߟߍߟߌ ߖߊ߲߬ߖߏ߲ ߡߊ߬߸ ߡߍ߲ ߟߐ߬ߣߍ߲ ߛߌߡߊ߲ߘߎ߯ ߘߊ߬ߡߊ߲ ߣߌ߫ ߖߎ߬ߓߐ ߖߊ߬ߕߋ߬ߘߐ߬ߛߌ߰ߓߊ ߘߐߛߏ߲߬ߘߏ߲߬ߜߊ߬ߟߌ ߡߊ߬߸ ߏ߬ ߖߊ߬ߕߋ߬ߛߌ߰ߣߍ߲ ߣߍߣߍߓߊ߫ ߁߁/ ߂߀߂߅ ߟߊ߫ ߡߏ߬ߙߌ߬ߓߊ߬ߦߊ߫ ߘߊ߲ߞߊ߲ ߠߊ߫. ߏ߬ ߦߋ߫ ߓߌ߬ߟߊ߬ߢߐ߲߰ߡߊ ߕߋߙߌߦߊ ߓߐߒߡߊߟߌ߫ ߡߊߦߋߙߋ߲ߣߍ߲߫ ߓߘߍ ߟߋ߬ ߘߌ߫. ߡߍ߲ ߦߋ߫ ߖߌ߬ߣߍ߬ ߞߊ߲ߓߍ߲ ߣߌ߫ ߜߋ߲ߞߐ߰ߖߌ߬ߘߊ ߞߊ߲ߓߍ߲ ߓߌ߬ߟߊ߬ߢߐ߲߰ߡߊ߬ߦߊ߫ ߟߊ߫ ߓߊߘߋ߲ߧߊ ߟߊ߬ߘߍ߬ߟߌ߬ ߘߌ߫. ߡߊ߲߬ߕߏ߲ ߝߌ߬ߟߊ߬ ߡߍ߲ ߥߞߊ߬ߟߌ߬ߣߍ߲ ߥߙߎߞߌ ߞߎ߲߬ߕߋߟߋ߲ ߘߎ߲ߡߕߊ ߞߋߟߋ߲߫ ߠߊ߫߸ ߊ߬ ߣߌ߫ ߝߙߊ߬ߢߐ߲߰ߒߞߊ߲ ߕߌ߲߬ߞߎ߬ߘߎ߲߬ߠߊ߬ߞߊ ߡߙߌߣߊ߲.

ߣߍߣߍߓߊ߫ ߕߟߋ߬ ߅/ ߂߀߂߅

ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߢߊ߰ߢߊ߰ ߟߊߥߊ߲߬ߞߊ߲߬ߣߍ߲ ߘߏ߫ ߢߍߡߌߘߊ߫ ߡߌ߬ߙߌ߲߬ߘߌ ߟߊ߫ ߞߎߓߋ ߟߊ߫، ߞߵߊ߬ ߓߍ߲߬ ߖߌ߬ߣߍ߫ ߝߘߏ߬ߓߊ߬ ߞߊ߬ߙߊ߲߬ߕߊ߫ ߛߊ߯ߘߊ߫ ߝߟߐ ߂߂߀߀ ߜߊ߲߬ߞߎ߲߬ߠߌ߲ ߖߊ߬ߕߋ߬ߘߐ߬ߛߌ߮ ߦߌ߬ߘߊ߬ߟߌ ߡߊ߬. ߞߵߊ߬ ߓߍ߲߬ ߖ߭ߌߜ߭ ߞߎ߲߬ߦߌ߬ߘߊ߬ߟߌ ߡߊ߬߸ ߏ߬ ߡߍ߲ ߞߎ߲߬ߟߐ߬ߣߍ߲ ߛߌߡߊ߲ߘߎ߯ ߂߀߄߀ ߠߊ߫ ߛߌߡߊ߲ߘߎ߯ ߘߎ߲ߓߎ ߞߏ߲߭ ߠߊ߫ ߛߐ߲ߞߐߟߐ߲ߧߊ ߡߊ߬. ߞߎ߲߬ߦߌ߬ߘߊ߬ߟߌ߬ ߞߊ߲ߕߌ߯ߘߟߊߞߊ ߣߌ߲߬ ߞߎ߲߬ߕߋߟߋ߲ ߠߋ߬ ߕߌ߲߬ߞߎߘߎ߲ ߠߎ߬ ߟߊ߫ ߕߎߣߎ߲ߓߊߟߌߦߊ ߘߌ߫. ߞߊ߬ ߟߞߊ߬ߙߊ߲߬ߠߌ߲ ߛߋߞߏߦߊ ߟߊߓߘߍ߬ߦߊ ߢߎߡߍߦߋ߲ߠߞߊ ߟߎ߬ ߟߊߓߎ߫ ߟߊ߫. ߞߊ߬ ߘߋ߲ߡߌߛߍ߲ ߦߋߟߋ߲ߕߌ߮ ߟߎ߬ ߘߐߓߍ߲߬. ߞߴߊ߬ ߟߊߞߐ߯ ߞߵߊ߬ߟߎ߬ ߟߊ߫ ߟߊ߫ ߊ߬ߟߎ߬ ߖߘߍ߬ ߛߌߣߌ߲ߢߍߛߌ߮ ߢߌߣߌ߲ ߘߐ߫. ߏ߬ ߦߋ߫ ߖߊ߯ߓߘߊ ߢߍ߫ ߟߞߊ߬ߙߊ߲߬ߠߌ߲ ߘߎ߰ߟߊ߬ߕߊ ߞߏߕߌ߮ ߟߊ߫ ߞߊ߲ ߘߐ߫، ߖߊ߬ߕߋ߬ߘߐ߬ߛߌ߮ ߣߌ߲߬ ߘߌ߫ ߞߍ߫ ߛߊߓߎ߫ ߘߌ߫ ߟߞߊ߬ߙߊ߲߬ߠߌ߲߬ߠߊ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߢߍ߫، ߞߊ߬ߙߊ߲߬ߘߋ߲ ߓߍ߯ ߢߍ߫߸ ߊ߬ ߣߌ߫ ߟߊ߬ߞߟߏ߬ߞߟߏ߬ߟߌ ߥߊ߬ߣߊ ߓߍ߯ ߢߍ߫ ߞߊ߬ ߞߎߘߍߞߎߘߍ߫ ߛߎߘߎ߲߫ ߛߐߘߐ߲ߘߊ ߟߎ߬ ߕߣߐ߬ߓߐ ߓߟߐߟߐ ߟߊ߫. ߞߊ߬ߕߙߍ߬ߕߍ߫ ߢߎߡߍߙߋ߲ߦߊߟߌ ߞߣߐߘߐ ߟߊߥߟߏߣߍ߲ ߠߎ߬ ߡߊ߬ ߊ߲ ߘߌ߲ߞߌߙߊ ߘߐ߫. ߞߊ߬ ߛߋߞߏߦߊ ߟߎ߬ ߓߊ߲ߓߊ߲ ߡߐ߬ߟߐ߲߬ߘߏ߲. ߘߎ߬ߘߋ߲߬ߧߊ ߢߎߡߍߙߋ߲ߦߊ ߕߋߟߋ߲ߓߊ߯ߦߊ ߟߐ߲ߠߌ߲ ߟߊߛߐ߬ߘߐ߲߬ ߣߐ߰ߦߊ ߘߐ߫: (( ߞߵߏ߬ ߟߊߓߊ߲߫ ߛߊߣߌ߬ ߂߀߂߅ ߟߊߓߊ߲ ߠߊ߫߸ ߞߊ߬ߙߊ߲߬ߕߊ ߁߀߀߀ ߘߌߣߊ߬ ߜߊ߲߬ߞߎ߲߬ ߏ߬ ߡߍ߲ ߕߐ߬ߣߐ ߛߋߕߐ߫ ߘߋ߲߫ ߗߋ߲߬ߥߟߎ߬ ߞߋߟߋ߲߫ ߡߊ߬)) ߊ߬ ߞߊ߬ ߟߊ߬ߘߍ߲߬ߞߣߍ߬ߦߊ߬ߟߌ ߞߍ߫ ߓߊ߬؟ ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߕߌ߲ߕߌ߲߫ ߊ߬ ߞߊ߲߬ ߞߏ߫ ߖߊ߬߫ߕߋ߬ߘߐ߬ߛߌ߮ ߢߌ߲߬ ߠߎ߬ ߛߊߓߎ߫ ߟߊ߫ ߘߎߢߊ߫ ߞߎߘߊ߫ ߓߘߊ߫ ߘߊߦߟߍ߬. ߡߍ߲ ߓߣߊ߬ߦߊ߬ߣߍ߲ ߓߍ߲߬ߒ߬ߛߋ߲߬ߡߊ ߟߎ߬ ߟߊ߫ ߣߌ߫ ߛߋߞߏߦߊ ߟߎ߬ ߟߊ߫. ߊ߬ ߣߌ߫ ߓߊ߯ߙߘߊ ߞߎ߲߬ߠߊ߬ߓߐ߬ߣߍ߲ ߠߎ߬ ߟߊ߫(( ߞߎߣߎ߲߬ ߟߞߊ߬ߙߊ߲߬ߠߌ߲߬ߠߊ ߟߎ߬ ߕߍߣߊ߬ ߞߍ߫ ߟߊ߫ ߦߏ߫ ߛߌߣߌ߲߫ ߕߊ ߟߎ߬ ߊ߬ ߞߊߓߋ ߘߌߣߊ߬ ߡߊߦߟߍ߬ ߞߊ߬ ߟߊߞߐ߯ ߞߊ߬ ߖߙߎߡߎ߲ߦߟߍߡߊ߲߫)) ߊ߬ ߞߊ߬ ߖߊ߲߬ߓߌ߬ߟߊ߬ߟߌ ߞߍ߫ ߞߏ߫ ߝߘߏ߬ߓߊ߬ ߞߊߙߊ߲ߕߊ ߡߍ߲ ߠߎ߬ ߛߌ߲ߘߌ ߓߘߊ߫ ߞߎ߲߬ߘߐ߬ߖߊ߲߰ߧߊ߫ ߏ߬ ߟߎ߬ ߞߊ߫ ߞߊ߲߬ ߞߊ߬ ߞߍ߫ ߢߍߕߊ߮ ߓߍ߲߬ߒ߬ߛߋ߲߬ߡߊ ߘߐߞߢߊߣߍ߲ ߢߍߡߌߘߊߟߊ߲߫ ߓߟߋߓߟߋ ߘߌ߫ ߞߊ߲ߓߍ߲ ߘߋ߲ ߓߍ߯ ߢߍ߫. ߓߌ߬ߢߐ߲߰ ߟߏ߲، ߖߊ߬ߕߋ߬ߘߐ߬ߛߌ߮ ߓߘߊ߫ ߛߋ߫ ߡߐ߱ ߁߇߀߀ ߟߊߓߊ߯ߙߊ߫ ߟߊ߫ ߟߊ߬ߕߋߟߋ߲ ߣߌ߫ ߟߊ߬ߕߋ߬ߟߋ߲߬ߓߊ߬ߟߌ߬ߦߊ ߘߐ߫. ߏ߬ ߡߍ߲ ߦߋ߫ ߡߊ߬ߝߊ߲ ߕߐ߰ߡߊ߬ߛߙߋ߬ߡߊ ߡߊߦߌ߬ߘߊ߬ ߟߊ߫ ߘߋ߲ߡߌߛߍ߲ ߛߋߞߏߦߊߕߌ߮ ߘߎ߲ߡߊߣߍ߲ ߠߎ߬ ߢߍ߫ ߢߎߡߍߙߋ߲ߦߊߟߌ ߓߊ߯ߙߘߊ ߘߐ߫. ߏ߬ ߕߊ߬ߡߌ߲߬ߣߍ߲ ߞߐ ߞߊ߬ߙߊ߲߬ߕߊ߫ ߅߈߅ ߜߊ߲߬ߞߎ߲߬ߣߍ߲ ߞߘߐ ߟߋ߬ ߖߡߊ߬ߣߊ ߢߊߝߍ߬.

ߣߍߣߍߓߊ߫ ߕߟߋ߬ ߇/ ߂߀߂߅

ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߞߊ߬ ߖߌ߬ߣߍ߬ ߏߙߊ߲ߗ߭ ߟߊ߫ ߡߊ߬ߞߍ߬ߘߊ ߞߎߘߊ ߘߊߦߟߍ߬ߟߌ ߢߊ߰ߢߊ߰ ߞߎ߲߬ߠߊ߬ߛߌ߰ ߗߋߕߌ߯ߦߊ ߕߊ߲ߓߊ߲ߘߊ ߟߊ߫ ߞߟߏ߬ߡߊ߬ ߡߍ߲ ߝߊ߲߬ߝߘߊ߬ߢߊ ߦߋ߫ ߜߟߊ߬ߜߟߊ߬ ߁߁ ߄߀߀ ߏߙߊ߲ߗ߭ ߖߌ߬ߣߍ߬ ߟߊ߫ ߡߊ߬ߞߍ߬ߘߊ ߞߎߘߊߞߏ ߦߋ߫ ߞߊ߲ߓߍ߲ ߞߊ߲ߕߌ߮ ߟߊ߫ ߟߊߢߌ߬ߣߌ߲ ߞߎ߲߬ߕߋߟߋ߲ ߘߏ߫ ߟߋ߬ ߘߌ߫߸ ߡߍ߲ ߦߋ߫ ߞߟߊߓߎߡߦߊߟߌ ߞߍ߫ ߟߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߠߊ߫ ߥߙߎߞߌ ߟߊ߫߸ ߊ߬ ߣߌ߫ ߥߊߟߌߘߊ ߟߊ߫ ߢߊߞߎߘߦߊߟߌ ߡߍ߲ ߟߐ߬ߣߍ߲ ߘߍ߭ ߡߊ߬ߞߍ߬ߘߊ ߞߏ ߡߊ߬، ߏ߬ ߡߍ߲ ߦߋ߫ ߖߘߍ߬ߘߏ߲߬ߒ߬ߞߊ߲߬ߡߊ ߕߐ߰ߡߊ߬ߛߙߋ ߘߌ߫ ߘߎ߲߰ߘߎ߲߬ߡߊ ߡߊ߬ߘߎ߮ ߟߎ߬ ߘߐ߫ ߞߵߊ߬ ߓߍ߲߬ ߥߙߎߞߌ ߝߊ߬ߛߏ߬ߟߊ߬ߞߊ ߡߊ߬((  ߛߊ߲߬ ߕߊ߲߫ ߏ߬ ߦߋ߫ ߞߎ߬ߡߊߞߎ߬ߘߎ ߕߎ߬ߡߊ ߟߋ߬ ߘߌ߫߸ ߖߘߍ߬ߤߣߍ ߕߎ߬ߡߊ ߟߋ߬، ߊ߬ ߣߌ߫ ߖߊ߬ߓߌ߬ߦߊ߬ߟߌ ߊ߲ ߘߍ߬ߡߊ߬ ߡߊ߬ߞߍ߬ߘߊ ߟߋ߬ ߘߌ߫߸ ߕߐ߰ߡߊ߬ߛߙߋ ߟߋ߬ ߊ߬ߟߎ߬ ߕߊ ߡߊ߬ߝߊ߲ ߞߍ߫ ߘߐ߫ ߖߡߊ߬ߣߊ ߟߊ߫ ߥߙߎߞߌ ߘߐ߫)) ߖߌ߬ߣߍ߬ ߏߙߊ߲ߗ߭ ߡߊ߬ߡߙߊ߬ߟߌ߬ ߘߍ߬ߘߊ ߞߏߟߊߕߍ߮ ߞߊ߲ߕߌ߮ ߛߟߊߕߌ߯ ߓߙߋߟߐߕ ߓߊ ߞߵߊ߬ ߦߌ߬ߘߊ߬߸ ߥߎߟߊߖߊ߲ߠߊ߫ ߟߊߟߐ߲ߠߌ߲ߦߊߟߌ ߣߌ߫ ߢߎߡߍߙߋ߲ߦߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߗߋߓߏ߲ߞߏߕߌ߮ ߐߙߐߛ ߔߏߟߊ߬ ߔߙߌߛߋߡߎ߫، ߝߣߊ߫ ߞߊ߬ ߖߊ߲߬ߖߏ߲ ߢߌ߲߬ ߞߍ߫ ߥߞߊ߬ߟߌ ߟߋ߬ ߘߌ߫ ߢߡߊߦߟߍߡߊ߲ ߛߏ߯ߙߏߦߢߊ ߞߏ ߘߐ߫ ߞߊ߲ߓߍ߲ ߞߊ߲ߕߌ߯ ߞߟߍ߬ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߞߎ߲߬ߕߋߟߋ߲ ߡߊ߬. ߞߵߊ߬ ߓߍ߲߬ ߞߟߊߓߎߡߦߊߟߌ ߡߊ߬ ߥߊߟߌߘߊ ߟߎ߬ ߟߊ߫ ߡߊ߬ߞߍ߬ߘߊ߬ߓߊ ߗߋߕߌ߯ߦߊ߫ ߕߊ߲ߓߊ߲ ߟߐ߭ ߟߊ߫ ߞߟߏ߬ߡߊ߬. ߊ߬ ߞߊ߬ ߖߊ߲߬ߓߌ߬ߟߊ߬ߟߌ ߞߍ߫ ߞߏ߫ ߞߊ߲ߕߌ߯ߘߊ߫ ߞߎ߲߬ߕߋ߬ߟߋ߲߬ߡߊ߬ߦߊ߫ ߏ߬ ߦߋ߫ ߓߊߦߟߍ߬ߡߊ߲ ߠߊ߫ ߟߋ߬ ߡߎ߬ߕߎ߲߬ ߞߵߊ߬ ߓߍ߲߬ ߘߎ߰ߣߍ߲ ߠߎ߬ ߝߊ߲߬ߕߙߊ ߦߟߍ߬ߡߊ߲߬ߦߟߍ߬ߡߊ߲߬ߠߌ߲ ߡߊ߬ ((ߞߟߏ߬ߡߊ߬ ߓߘߊ߫ ߞߍ߫ ߖߌ߬ߣߍ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߡߊ߬ߡߙߊ߬ߟߌ ߕߊ߲ߓߊ߲ ߘߌ߫… ߦߊ߲߬ ߞߙߍߞߙߍߣߍ߲ ߞߐ߫ ߏߙߊ߲ߗ߭ ߖߌ߬ߣߍ߬ ߓߟߏ߫ ߞߊ߬ ߟߐ߬ߟߌ ߞߍ߫ ߦߊ߲߬ ߟߊ߲ߒߘߦߊ ߘߐ߫ ߖߌ߬ߣߍ߬ ߘߋ߲ߡߌߛߍ߲ ߠߎ߬ ߟߊ߫ ߡߊ߬ߝߊ ߘߐ߫ ߊ߬ߟߎ߬ ߓߘߊ߫ ߣߊ߲߬ߝߟߏ߬ߘߏ߲߬ߘߊ߬ ߟߊ߫ ߊ߲ ߠߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߘߐ߫)) ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߕߊ ߝߊ߲߭ ߘߐ߫ ߊ߬ ߞߊ߬ ߝߏ߬ߟߌ ߞߍ߫ ߖߌ߬ߣߍ߬ ߢߍ߫ ((ߟߏ߲߫ ߘߝߐ߬ߟߊ߬ߞߊ ߣߌ߲߬ ߘߐ߫)) ߞߊ߬ ߖߊ߲߬ߓߌ߬ߟߊ߬ߟߌ ߞߍ߫ ߞߏ߫ ߘߊߦߟߍߟߌ ߣߌ߲߬ ߟߊߞߘߎ߬ߣߍ߲ ߕߐ߰ߡߊ߬ߛߙߋ߫ ߛߌߦߊߡߊ߲ ߠߋ߬ ߡߊ߬: ߡߍ߲ ߞߎ߲߬ߕߋߟߋ߲ ߦߋ߫ ߞߊ߲ߕߌ߯ߘߊ߫ ߢߌߣߌ߲ߞߏ ߘߌ߫، ߝߘߏ߬ߓߊ߬ ߣߝߊ߬ߢߐ߲߰ߦߊ ߣߌ߫ ߘߎ߲߬ߘߎ߲߬ߡߊ߬ߕߊ ߟߎ߬ ߘߐ߫߸ ߊ߬ ߣߌ߫ ߕߍߝߐ߫ ߝߊ߬ߛߏ߬ߟߊ߬ߞߊ ߘߐ߫.

ߞߐߣߊߞߙߌ߫ ߣߍߣߍߓߊ߫ ߕߟߋ߬ ߁߀/ ߂߀߂߅

ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߝߘߊ߬ߝߌ߲߬ߠߊ߫ ߕߟߋ߬ߓߋ ߘߍ߭ ߣߊ߲߬ߝߟߏ߬ߘߏ߲߬ߘߊ߬ߟߊ ߣߌ߫ ߥߙߎߞߌ ߜߍߓߏ߲ ߠߊ߫ ߗߋߦߊߟߌ ߟߊߞߢߐ߬ߡߊ߬߸(ߓߋ ߌ ߘߋ ߛߋ) ߡߍ߲ ߢߍߡߌ߬ߘߊ߬ߣߍ߲ ߕߘߍ߬ ߊ߬ ߞߊ߲ߕߌ߮ ߓߟߏ߫߸ ߞߏ߲߬ߓߏ ߗ߭ߐߙߑߛ ߊߖ߭ߌߦߋߞߎߡ ߘߏ߲ߞߐߙ ߘߌ߫. ߘߊߘߐߝߙߊߢߐ߲߯ߦߊ߫ ߕߊ߬ߡߌ߲߬ ߘߊ߫ ߖߌ߬ߣߍ߬ ߣߌ߫ ߛߌ߲߬ߝߏ߲߬ߘߊ߫ ߕߌ߲߬ߞߎ߬ߘߎ߲߬ߠߊ߬ߞߊ ߕߍ߫. ߞߵߊ߬ ߓߍ߲߬ ߝߟߐߦߊ ߖߊ߬ߕߋ߬ߘߐ߬ߛߌ߮ ߟߎ߬ ߟߊ߫ ߢߍߕߊ߮ ߡߊ߬. ߡߍ߲ ߦߋ߫ (ߓߋ ߌ ߘߋ ߛߋ) ߕߊ߫ ߓߟߏ߫ ߞߊ߲߬ ߖߌ߬ߣߍ߬ ߞߣߐ߫. ߞߊߕߙߍ߬ߕߍ߫ ߖߎ߬ߓߐ ߟߎ߬ ߣߌ߫ ߢߎߡߍߦߊߟߌ ߣߌ߫ ߟߊ߬ߞߟߏ߬ߞߟߏ߬ߟߌ ߡߊ߬ߘߎ߮ ߟߎ߬ ߡߊ߬. ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߞߐߡߊߓߌ߲ߓߌ߲ ߝߏ߬ߟߌ ߟߊߛߋ߫ ߞߵߏ߬ ߟߊ߫ ߘߐ߬ߢߌ߬ߣߌ߲߬ߞߊ߬ߟߌ ߟߎ߬ ߞߊ߲߬ ߓߋ ߌ ߘߋ ߛߋ ߟߊ߫ ߞߎ߲߬ߠߊ߫. ߞߊߕߙߍ߬ߕߍ߫ ߥߊ߯ߕߌ߫ ߜߍߟߍ߲ ߠߎ߬ ߡߊ߬، ߊ߬ ߓߊ߲߫ ߘߊ߫ ߝߣߊ߫ ߞߊ߬ ߛߌ߲߬ߝߏ߲߬ߘߊ ߞߎߟߎ߲ߖߋ߫ ߣߊ߲߬ߝߟߏ߲߬ߘߏ߲߬ߘߊ߬ߟߊ ߞߍ ߘߐ߫ ߛߋ߲ߞߏߟߊ߫ ߞߊߙߊ߲ߘߊ߫ ߞߏ ߘߐ߫، ߡߍ߲ ߟߐ߬ߕߐ߫ ߟߊ߬ߞߐ߰ߟߌ ߡߊ߬ ߟߐ߯ߝߍ ߡߊ߬ߞߏ߬ߡߊ߬ߝߋ߲ ߠߎ߬ ߞߊ߲߬: ((ߡߍ߲ ߣߊ߬ߝߊ ߞߊ߫ ߓߏ߲߬ ߊ߬ ߓߍ߯ ߘߴߏ߬ ߘߐ߫، ߊ߲ ߘߋ߲ ߠߎ߬ ߟߊ߫ ߜߊ߬ߛߊ ߟߊߓߊ߲ ߠߊ߫ ߊ߬ ߛߊ߲߬ ߁߇ ߥߟߊ߫ ߁߈ ߊ߬ ߘߌ߫ ߓߐ߫ ߓߊߘߎ߲ߦߊ ߖߐ߲ߓߐ߲ ߣߌ߫ ߓߊ߯ߙߘߊ ߘߏ߫ ߟߐ߲ ߘߴߊ߬ ߓߟߏ߫)) ߊ߬ ߞߵߏ߬ ߡߊߝߙߊ߬ ߊ߬ ߢߌ߬ߡߊ ߟߊ߫ ߓߊ߬؟ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߞߟߍ߬ߦߊ߬ ߖߊ߬ߕߋ߬ߘߐ߬ߛߌ߰ ߞߎߘߊ ߣߊ߬ߕߐ ߞߎߡߊ ߝߣߊ߫ ߟߊߥߟߌ߬. ߞߊߕߙߍ߬ߕߍ߫ ߢߎߡߍߓߊߟߊ߲ ߞߏ ߡߊ߬، ߡߍ߲ ߘߌ߫ ߛߋ߫ ߘߐߕߟߊ߫ ߟߊ߫ ߞߊ߬ ߜߟߐߡߌ߲߫ ߢߊ߬ߒ߬ߞߐ߬ߓߊߟߌ ߟߎ߬ ߓߟߏߡߦߊ߫ ߞߵߊ߬ ߓߍ߲߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߢߡߊߦߟߍߡߊ߲ ߡߊ߬، ߊ߬ ߣߌ߫ ߘߍ߲߰ߦߊ߬ߟߌ ߟߊߖߊ߲ߞߏ ߥߊ߲ߓߦߊ. ((ߓߐ߰ߝߍ߬ߞߊ߲ߞߋ ߟߎ߬ ߦߴߊ߲ ߓߟߏ߫، ߡߍ߲ ߠߎ߬ ߞߊ߫ ߞߊ߲߫ ߞߊ߬ ߟߊ߫ ߓߌ߲߬ߒ߬ߕߊ߬ߦߊ߫ ߣߊ߲߬ߝߟߏ߬ߘߏ߲߬ߘߊ߬ߟߊ ߖߍ߬ߘߍ ߖߍ߬ߘߍ ߓߟߏߡߊ߬߸ ߞߊ߬ ߞߣߊ߬ߕߏ߫ ߢߎߡߍ߫ ߥߛߊ߬ߕߊ ߟߊߥߟߏ߫ ߟߊ߫ ߞߊ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߢߡߊߦߟߍߡߊ߲ ߛߋ߲߬ߞߘߐ߬ߓߌ߲ߓߌ߲߫)) ߊ߬ ߞߊ߬ ߘߐ߬ߞߣߍ߬ߟߌ ߞߍ߫ ߓߊ߬. ߞߎߡߊ ߞߎ߲߬ߝߊ߮ ߘߐ߫.

 ߞߏߕߌ߯ ߝߟߐ ߞߊ߬ ߞߎ߲߬ߠߊ߬ߛߌ߮ ߟߊ߫ ߛߐ߲߬ߒ߬ߡߊ߬ߦߊ ߥߊߣߌ߲ߞߋ ߟߊߞߎߘߦߊ߫ ߞߊ߬ ߖߌ߬ߣߍ߬ ߟߊ߫ ߓߍߓߊ߯ߦߊ ߦߌ߬ߘߊ߬ ߛߌ߲߬ߝߏ߲߬ߘߊ ߡߊ߲߬ߕߏ߲߬ߕߍ߬ߟߊ߬ߞߊ ߟߎ߬ ߟߊ߫߸ ߞߊ߬ ߓߊ߲߫ ߞߵߊ߬ ߛߋߞߏߦߊ߫ ߝߊ߬ߛߏ߬ߟߊ߬ߞߊ ߟߎ߬ ߡߐ߬ߟߐ߲߬ߡߊ߬ߦߊ߫ ߞߵߊ߬ ߓߍ߲߬ ߖߡߊ߬ߣߊ ߥߙߎߞߌ ߗߋߢߊ ߟߎ߬ ߡߊ߬.

ߣߍߣߍߓߊ߫ ߕߟߋ߬ ߂/ ߂߀߂߅

ߞߊ߲ߓߍ߲ ߞߊ߲ߕߌ߮ ߣߌ߫ ߞߊ߬ߝߏ ߞߎ߲߬ߕߌ߮ ߞߟߍ߬ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߕߐ߯ ߘߐ߫، ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮. ߛߟߊߕߌ߯ ߊߡߊߘߎ߫ ߎߙߌ߬ ߓߊ ߞߊ߬ ߢߍߥߟߊ߫ ߘߏ߫ ߞߎ߲߰ߝߊ߰ ߢߊ߰ߢߊ߰ ߞߎ߲߬ߠߊ߬ߛߌ߰ ߓߌ߬ ߞߊ߯ߙߌ߫ ߡߊ߬ ߞߐߣߊߞߙߌ߫. ߣߊ߲߬ߒ߬ߕߊ߲߬ߣߊ߲߬ߕߌ߮ ߢߍߥߟߊ߫ ߝߘߏ߬ߓߡߊ߬ߦߊ ߞߎ߲߬ߠߊ߬ߓߐ߬ߕߊ ߡߍ߲ ߠߊߢߌߣߌ߲ ߣߊ߲߬ߒ߬ߕߊ߲߬ߣߊ߲߬ߕߌ߮ ߟߎ߬ ߝߍ߬، ߢߍߥߟߊ߫ ߞߙߎߝߊߣߍ߲ ߢߌ߲߬ ߦߋ߫ ߣߌ߬ ߟߏ߯ߟߎ߫ ߟߋ߬ ߘߌ߫، ߡߍ߲ ߛߏ߯ߙߏߣߍ߲߫ ߗߋߘߊߕߌ߯ ߥߊ߯ ߕߊ߲ ߠߊ߫ ߊ߬ ߣߌ߫ ߟߞߊ߬ߙߊ߲߬ߠߌ߲߬ߠߊ ߥߊ߯ ߕߊ߲߫ ߊ߬ ߣߌ߫ ߡߐ߱ ߥߊ߯ ߕߊ߲߫ ߓߍ߲߬ߒ߬ߘߐ ߓߟߏߡߊ߬߸ ߖߊ߲߬ߖߏ߲ ߣߌ߲߬ ߦߋ߫ ߝߓߊ߬ߘߋ߲߬ߧߊ ߕߐ߰ߡߊ߬ߛߙߋ ߟߋ߬ ߘߌ߫، ߊ߬ ߣߌ߫ ߡߊ߲߬ߕߏ߲ ߗߋߢߊߟߌ. ߏ߬ ߦߋ߫ ߞߊߓߋ߫ ߞߘߐߕߊߣߍ߲ ߠߋ߬ ߦߌ߬ߘߊ߬ ߟߊ߫ ߞߵߊ߬ ߓߍ߲߬ ߘߊߦߟߍߟߌ ߡߊ߬ ߛߋ ߍߣ ߍߙ ߘߋ ߡߙߌߣߊ߲ ߢߍ߫ ߡߍ߲ ߟߐ߬ߣߍ߲ ߞߊ߬ߝߏ ߜߘߌߛߌ߯ߞߎߘߊ ߡߊ߬. ߞߏߕߌ߯ ߝߟߐ ߞߵߊ߬ ߦߌ߬ߘߵߊ߬ ߟߊ߫ ߓߋߟߋ߲ߠߊ ߘߐ߫، ߡߍ߲ ߠߎ߬ ߘߐߕߟߊߣߍ߲߫ ߟߐ߯ߕߍ߫ ߦߙߌߞߊ߫ ߞߎ߲߬ߕߊ߮ ߞߘߐ߫߸ ߣߊ߲߬ߕߌ߮ ߟߎ߬ ߟߊ߫ ߘߋ߬ߙߌ߬ߒߠߊ ߘߐ߫.ߊ߬ ߞߊ߬ ߖߊ߲߬ߓߌ߬ߟߊ߬ߟߌ ߞߍ߫ ߞߏ߫ (ߣߊ߲߬ߕߌ߰ ߟߎ߬ ߟߊ߫ ߖߏ߯ߦߊߟߌߦߊ ߕߏ߲ߕߊ ߏ߬ ߟߋ߬ ߦߋ߫ ߞߍߥߊߟߌ߫ ߝߟߐ ߘߌ߫ ߡߍ߲ ߦߋ߫ ߖߡߊ߬ߣߊ ߟߊ߫ ߖߘߍ߬ߕߌ߰ߦߊ ߕߏ߫ ߟߴߊ߬ ߡߊ߬. ߊ߬ ߦߋ߫ ߓߍ߯ ߡߊߞߟߌ߫ ߟߊ߫ ߖߌ߬ߣߍ ߗߋߢߊߟߌ ߡߊ߬، ߖߘߍ߬ߡߊ߬ߖߌ߮ ߘߐ߫، ߡߊ߬ߝߊ ߘߐ߫، ߊ߬ ߣߌ߫ ߞߍߕߦߊ ߓߟߏߡߊ߬. ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߛߘߍ߫ ߝߟߐ ߣߌ߲߬ ߕߐ߯ ߟߋ߬ ߞߏ߫ ߛߘߍ߫ ߞߟߍ߬ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߓߊ߯ߙߊ ߣߌ߫ ߝߘߏ߬ߓߊ߬ ߗߋߢߊ ߞߏߕߌ߮ ߛߟߊߕߌ߯ ߝߊ߰ߦߊ߬ ߝߊߙߊ߲ߛߎߥߊ߫ ߓߙߎߣߏ߫، ߞߵߊ߬ ߦߌ߬ߘߊ߬ ߞߏ߫ ߢߍߥߟߊ߫ ߣߌ߲߬ ߦߋ߫ ߕߐ߰ߡߊ߬ߛߙߋ ߟߋ߬ ߘߌ߫، ((ߞߍߞߋߟߋ߲ߘߌ ߝߊ߬ߛߏ߬ߟߊ߬ߞߊ ߣߌ߫ ߝߘߏ߬ߓߊ߬ ߗߋߢߊ ߟߊߢߊ߭ ߘߐ߫)) ߏ߬ ߦߋ߫ ߣߝߊ߬ߢߐ߲߰ߦߊ߬ ߝߊ߲ߝߘߊ ߘߏ߫ ߟߋ߬ ߥߟߏߒߘߐ ߘߌ߫ ߞߵߊ߬ ߓߍ߲߬ ߊ߬ ߟߊ߫ ߓߏߟߏ߲ߝߘߊ ߣߌ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߯ ߝߊ߬ߛߏ߬ߟߊ߬ߞߊ ߕߍ߫ ߓߌ߬ߟߊ߬ߢߐ߲߰ߡߊ ߡߊ߬. ߡߊ߬ߞߊ߲߬ߞߊ߲߬ߠߌ߲ ߝߊ߬ߛߏ߬ߟߊ߬ߞߊ ߞߏߕߌ߯ ߟߊ߬ߛߌ߰ߘߋ߲ ߊߓߎߓߞߊߙ ߛߘߌ߬ߞߌ߬ ߞߡߊ߬ߙߊ߫ ߞߊ߬ ߘߋ߲ߡߌߛߍ߲ ߠߎ߬ ߞߎߟߎ߲ߖߋ߫ ߜߘߌߛߌ߯ߞߎߘߊ ߘߐ߫، ߏ߬ ߡߍ߲ ߖߌ߰ߣߍ߲ ߡߊ߲߬ߕߏ߲߬ ߓߟߏߡߊߛߌ߮ ߟߊߞߎߣߎ߲ߣߍ߲ ߘߌ߫، ߞߟߍ߬ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߛߘߍ ߞߎߘߎ߲ ߓߋߟߋ߲ߕߌ߮ ߕߊ ߡߊ߬ߝߊ߲ ߘߐ߫ ߛߘߍ ߝߊ߭ ߕߐ߯ ߘߐ߫ ߡߎߤߊ߲ߡߍߘ ߡߜ߭ߊ߬ߛߎߓߊ߫ ߞߊ߬ ߟߊ߬ߤߘߌ ߖߍ߬ߘߍ ߖߍ߬ߘߍ ߕߊ߬ ((ߡߍ߲ ߟߐ߬ߕߐ߫ ߗߋߢߊߟߌ ߡߊ߬ ߡߊ߬ߝߊ ߣߌ߫ ߟߊ߬ߛߐ߲ ߘߐ߫)) ߞߊ߬ ߛߘߍߞߎߘߎ߲ ߣߌ߲߬ ߞߍ߫ ߕߐ߰ߡߊ߬ߛߙߋ ߓߘߍ ߘߌ߫ ߖߌ߬ߣߍ߬ ߝߘߏ߬ߓߊ߬ ߗߋߢߊ ߘߐ߫. ߊ߬ ߞߊ߬ ߞߊ߬ߝߏ ߞߎ߲߬ߕߌ߮ ߞߟߊߓߎߡߦߊ߫ ߊ߬ ߞߍ߫ ߟߊ߫ ߡߊ߬ߡߌ߬ߘߊ߬ߟߌ߬ߟߊ ߘߌ߫ ߞߊ߲ߕߌ߯ ߢߣߊߕߊߟߌ߫ ߣߊ߬ߕߐ߫ ߘߐ߫ ߞߏߟߌ߲ߞߏߟߌ߲߫ ߂߈/ ߂߀߂߅. ߞߊ߬ ߕߊ߬ߡߌ߲߬ ߟߊ߬ߞߎ߬ߘߦߊ߬ߟߌ ߥߙߍ ߘߊߝߟߐߣߍ߲ ߠߎ߬ ߞߍ߫ ߟߊ߫ ߊ߬ ߢߌ߬ߡߊ ߟߊ߫.

ߞߐߣߊߞߙߌ߫ ߞߏ߲ߓߌߕߌ߱ ߕߟߋ߬ ߃߀

 ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߞߊ߬ ߢߐ߲߯ߦߋ߫ ߘߏ߫ ߟߊߘߌ߬ߢߍ߬ ߞߵߊ߬ ߓߍ߲߬ ߦߙߐߕߐߕߐߦߊ ߛߌ߲߬ߝߏ߲߬ߧߊ߬ߟߌ ߘߍ߬ ߡߊ߬߸ (ߞߏߡߖߌ) ߏ߬ ߡߍ߲ ߢߍߡߌ߬ߘߊ߬ߣߍ߲ ߕߘߍ߬ ߊ߬ ߞߊ߲ߕߌ߮ ߓߐ߬ߟߐ߲߬ߞߊ ߊߡߌߣߊߕߊ߬ ߖߊߟߏ߫ ߓߟߏ߫߸ߊ߬ ߡߊߟߐ߬ ߘߊ߫ ߂߀߂߄ ߦߙߐߕߐߕߐ߫ ߓߟߊ߬ߡߊ߬ߖߏ߲ߞߊ ߕߌߘߊ߲ߞߋ߫ ߓߙߋߕߋ߫ ߟߋ߬ ߓߟߏ߫. ߊ߬ ߣߴߊ߬ ߟߊ߫ ߛߊ߬ߘߋ߲߬ߣߍ߲ ߝߟߐ ߓߟߊ߬ߡߊ߬ߖߏ߲ߞߊ ߦߛߎߝ ߓߊߟߑߘߋ߬ ߡߍ߲ ߞߊ߲ߕߐ߮ ߦߋ߫ ߦߎߦߎ ߘߌ߫. ߢߐ߲߯ߦߋ ߣߌ߲߬ ߞߎ߲߭ ߠߋ߬ ߕߘߍ߬ ߦߋ߫ ߓߟߏߘߐߓߍ߲ ߘߌ߫ ߜߛߊ߬ ߡߊ߲߬ߕߏ߲߬ߕߍ߬ߟߊ߬ߞߊ ߣߊ߬ߕߐ ߢߍ߫߸ ߓߟߊ߬ߡߊ߬ߖߏ߲ߞߊ ߕߌߘߊ߲ߞߋ߫ ߓߙߋߕߋ߫ ߥߊߕߐ߫ ߖߌ߬ߣߍ߬ ߞߐߦߌ߬ߘߊ߬ ߟߊ߫ ߖߊ߯ߓߊ ߦߙߐߕߐߕߐ߫ ߜߛߊ ߘߐ߫ ߡߍ߲ ߞߍߕߐ߫ ߣߍߣߍߓߊ ߕߟߋ߬ ߂߁ ߕߊߦߌߟߊ߲ߘ، ߕߎ߬ߡߊ߬ ߞߋߟߋ߲ ߏ߬ ߟߊ߫ ߓߟߊ߬ߡߊ߬ߖߏ߲ߞߊ ߦߛߎߝ ߓߊߟߑߘߋ߬ ߞߍߕߐ߫ ߓߍ߲߬ ߝߊ߬ߛߏ߬ߟߞߊ߬ߦߊ ߦߙߐߕߐߕߐߦߊ ߞߐߦߌ߬ߘߊ߬، ߏ߬ ߡߍ߲ ߞߎ߲߬ߝߊ߮ ߞߍߕߐ߫ ߞߏߟߌ߲ߞߏߟߌ߲߫ ߕߟߋ߬ ߄ ߡߌߦߊߡߌ߫ ߊߡߋߙߌߞ ߞߊ߬ߝߏ߬ ߟߊߘߍ߬ߣߍ߲ ߞߣߐ߫ ߞߏߡߖߌ ߕߐ߯ ߘߐ߫، ߓߐ߬ߟߐ߲߬ߞߊ ߖߊߟߏ߬ ߞߊ߬ ߞߎ߲߬ߠߊ߬ߛߌ߮ ߝߏ߬ ߊ߬ߟߎ߬ ߛߋ߲߬ߞߘߐ߬ߓߌ߲ߓߌ߲ ߠߊ߫. ߊ߬ ߣߌ߫ ߞߊ߬ ߢߐ߲߯ߦߋ ߣߌ߲߬ ߕߐ߬ߣߐ ߦߌ߬ߘߊ߬ ߟߐ߲ߠߌ߲ߦߊ ߡߐ߬ߟߐ߲߬ߡߊ߬ߦߊ ߘߐ߫، ߊ߬ ߣߌ߫ ߖߌ߬ߣߍ߬ ߕߐ߯ ߟߊߦߍ߬ߟߍ ߘߐ߫ ߡߊ߲߬ߕߏ߲߬ߕߍ߬ߦߊ ߛߌߟߊ ߝߍ߬. ߖߍ߬ߝߙߍ߬ߕߌ߮ ߝߌ߬ߟߊ߬ ߞߵߊ߬ߟߎ߬ ߟߊ߫ ߥߞߊ߬ߟߌ ߦߌ߬ߘߊ߬ ߞߟߐ߬ ߝߊ߬ߛߏ߬ߟߊ߬ߞߊ ߛߊ߲ߞߘߐߕߊ߭ ߘߐ߫. ߞߏߕߌ߯ ߝߟߐ ߝߣߊ߫ ߞߊ߬ ߞߎ߲߬ߠߊ߬ߛߌ߮ ߟߊ߫ ߞߐߡߊߓߌ߲ߓߌ߲ ߞߏ ߣߐ߬ߡߛߊ߬ߦߌ߬ ߞߎ߲߬ߦߌ߬ߘߊ߬ߟߌ ߢߌ߲߬ ߠߊ߫ ߞߏ ߘߐ߫. ߞߵߊ߬ ߓߍ߲߬ ߞߊ߲ߓߍ߲ ߞߊ߲ߕߌ߮ ߞߟߍ߬ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߞߎ߲߬ߕߋߟߋ߲ ߡߊ߬. ߊ߬ ߣߌ߫  ߖߌ߬ߣߍ߬ ߟߊ߫ ߡߣߍߡߣߍߟߌ ߡߊ߬ ߡߊ߲߬ߕߏ߬ߕߍ߬ߦߊ ߞߊߓߋ ߟߊ߫.

ߞߐߣߊߞߙߌ߫ ߞߏ߲ߓߌߕߌ߱ ߕߟߋ߬ ߂߉/ ߂߀߂߅

 ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߞߊ߬ ߊߟߌߖ߭ߋߙߌ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߠߊߓߊ߯ߙߟߊ ߟߎ߬ ߟߊߛߣߍ߫߸ ߡߍ߲ ߢߍߡߌ߬ߘߊ߬ߣߍ߲ ߛߟߊߕߌ߯ ߡߋߖ߭ߊߊߛ߭ ߝߊߙߌߘ ߊ߬ߟߌߖ߭ߋߙߌ߫ ߝߘߏ߬ߓߊ߬ߓߊ߯ߙߊ ߞߛߍߞߛߍߘߊ ߞߊ߲ߕߌ߯ ߝߘߏ߬ߓߊ߬ ߗߋߕߌ߮ ߊ߬ ߣߌ߫ ߊߟߌߖ߭ߋߙߌ߫ ߗߋߦߊߟߌ߫ ߞߙߎ߫ ߞߎ߲߬ߕߌ߮. ߏ߬ ߟߊߘߏ߲߬ ߘߊ߫ ߛߟߊߕߌ߯ ߎߛߎߡߊߣ ߞߊ߬ߓߊ ߟߋ߬ ߓߟߏ߫، ߖߌ߬ߣߍ߬ ߗߋߝߦߊ ߞߊ߲ߕߌ߮ ߣߌ߫ ߖߌߕߍ߯ߙ ߛߊ ߞߙߎ ߗߋߕߌ߮ ߟߋ߬ ߓߟߏ߫. ߢߐ߲߯ߦߋ߫ ߣߌ߲߬ ߦߋ߫ ߞߊߓߋ߫ ߞߎߘߊ߫ ߟߋ߬ ߘߊߓߕߐ ߘߌ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߝߊ߬ߢߐ߲߰ߦߊ ߣߌ ߛߋ߲ߞߏߟߦߊ ߛߌߟߊ ߝߍ߬ ߖߌ߬ߣߍ߬ ߣߌ߫ ߊߟߌߖ߭ߋߙߌ߫ ߕߍ߫. ߛߟߊߕߌ߯ ߡߋߖ߭ߊߛ߭ ߝߊߙߌߘ ߞߵߊ߬ ߕߌ߲ߕߌ߲߫ ߊ߬ ߞߊ߲߬ ߞߏ߫ ߣߝߊ߬ߢߐ߲߰ߦߊ ߣߌ߲߬ ߞߍߕߐ߫ ߖߌ߬ߣߍ߬ ߘߍ߬ߡߍ߲߬ ߠߊ߫ ߟߋ߬ ߖߎ߬ߓߐ߫ ߖߊ߬ߕߋ߬ߘߐ߬ߛߌ߰ ߞߎ߲ߓߊ ߟߎ߬ ߓߐߒߢߟߊ߫ ߘߐ߫߸ ߊ߬ ߣߌ߫ ߞߊ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߝߊ߬ߢߐ߲߰ߦߊ ߘߐߞߢߊߕߊ߫ ߟߊߘߊ߲߸ ߡߍ߲ ߜߘߌߛߌ߰ߣߍ߲ ߘߊ߲߬ߠߊ߬ߛߋߟߌ ߣߌ߫ ߢߐ߲߯ߘߍߡߍ߲ ߞߊ߲߬ ߝߘߊ߬ߝߌ߲߬ߠߊ߫ (( ߊ߲ ߣߊ߬ߣߍ߲߫ ߢߝߍߕߊ߮ ߘߐߕߟߊߕߊ ߟߋ߬ ߘߌ߫߸ ߊ߲ ߠߊ߫ ߞߍߟߌ ߛߋߞߏߦߊ ߟߎ߬ ߊ߬ ߣߌ߫ ߞߊ߬ ߛߍ߬ߘߏ߲ ߞߍ߫ ߢߐ߲߮ ߝߍ߬ ߞߊ߬ ߖߌ߬ߣߍ߬ ߥߙߎߞߌߕߐߟߊ ߟߐ߬. ߓߍ߲߬ߒ߬ߘߐ ߏ߬ ߕߍߣߊ߬ ߘߊ߲߬ ߠߊ߫ ߖߌ߬ߣߍ߬ ߡߊ߬: ߊ߬ ߘߌߣߊ߬ ߘߊߦߟߍߟߌ ߞߍ߫ ߘߍ߬ߡߊ߬ ߞߎ߲߬ߦߌߘߊߟߌ ߟߎ߬ ߢߍ߫)) ߊ߬ ߘߐߞߣߍ߫ ߘߊ߫ ߛߟߊߕߌ߯ ߡߋߖ߭ߊߊߛ߭ ߝߊߙߌߘ ߓߟߏ߫ ߞߏ߫ ߣߊ߬ߟߌ ߓߍ߲߬ߣߍ߲߬ ߞߏ߫ ߖߌ߬ߣߍ߬ ߦߋ߫ ߥߟߏߞߎߘߊߘߌ ߖߍ߬ߘߍ ߖߍ߬ߘߍ ߟߋ߬ ߞߊ߲߬ ߕߋ߲߬. ߡߍ߲ ߛߌ߰ߣߍ߲ ߢߝߍߕߊ߯ ߣߌ߫ ߥߙߎߞߌ ߛߌߟߊ ߞߊ߲߬: ((ߊߟߌߖ߭ߋߙߌ߫ ߓߊ߲ߓߊ߲ߣߍ߲ ߊ߬ ߤߊ߲ߞߟߌߣߊ߲ ߣߴߊ߬ ߟߊ߫ ߢߝߍߕߊ߮ ߘߐ߫. ߡߍ߲ ߛߏ߯ߙߏߦߊߕߐ߫ ߊ߲ߠߎ߬ ߓߟߏ߫ ߕߍߓߊ߯ߦߊ߫ ߝߊ߲߬ߝߘߊ߬ߡߊ ߘߐ߫ ߝߘߏ߬ߓߊ߬ ߓߟߏߡߊ߬، ߊ߲ ߧߋ߫ ߊ߲ ߛߌ߰ ߞߊ߬ ߖߘߌߒߞߊ߲ߕߊ ߡߊߝߟߍ߫ ߊ߬ ߣߌ߫ ߣߝߊ߬ߢߐ߲߰ߦߊ ߛߊ߫ ߞߊ߬ ߕߍߓߊ߯ߦߊ߫ ߓߊ߲ߓߊ߲ߣߍ߲ ߕߣߐ߬ߡߊ ߛߐ߬ߘߐ߲߬))

ߞߐߣߊߞߙߌ߫ ߞߏ߲ߓߌߕߌ߱ ߕߟߋ߬ ߂߈/ ߂߀߂߅

ߖߌ߬ߣߍ߬ ߓߘߊ߫ ߛߋ߲߬ߕߊ߮ ߞߍ߫ ߥߙߏ߬ߘߎ߮ ߕߊ߬ߡߌ߲߬ߦߙߐ ߥߙߊߞߘߊ ߓߊ߯ߙߊ ߘߐ߫، ߖߊ߬ߕߋ߬ߘߐ߬ߛߌ߮ ߝߊ߲߬ߝߘߊ߬ߡߊ ߡߍ߲ ߞߎߘߍ߫ ߦߋ߫ ߥߊ߫ ߟߊ߫ ߤߊ߲߯ ߇߇߀، ߣߴߊ߬ ߦߋ߫ ߕߌ߲߬ߞߎߘߎ߲߫ ߣߊ߯ߣߌ߲߫ ߓߍ߯ ߘߐߛߊ߲߬ ߠߊ߫. ߏ߬ ߓߟߏ ߟߋ߬ ߡߊ߬߸ ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߞߊ߬ ߗߋߦߊߟߌ ߘߏ߫ ߟߊߛߣߍ߫ ߞߏߕߌ߯ߝߟߐߘߊ ߟߊ߫߸ (ߛߌߣ ߊߙߊߦߌߟߑߥߊߦ ߞߐ߲ߛߙߌߞߑߛߌߦߐ߲ ߞߏߔߋߙߊߛߌߦߐ߲) ߞߙߎ߫ ߦߋ߫ ߛߓߍߘߊ߫ ߁߄ ߠߋ߬ ߘߌ߫، (ߛߋ ߍߙ ߛߋ ߛߋ ߁߄) ߏ߬ ߡߍ߲ ߢߍߡߌ߬ߘߊ߬ߣߍ߲߫ ߝߊ߬ߙߊ߲߬ߛߎߥߊ߫ ߤߊߟߌߦߋ߫ ߛߌ߲ߘߌߓߊ߯ ߝߌߟߊߣߊ߲ ߣߌ߫ ߟߊ߬ߞߊ߬ߙߊ߲߬ߠߌ߲ ߛߓߍߘߊ ߗߋߕߌ߮ ߍߝ ߍߛ ߘߋ ߌ ߖߊ߬ߕߋ߬ߘߐ߬ߛߌ߮ ߛߋ߲ߞߏߟߦߊ߫ ߕߍߓߊ߯ߦߟߊ. ߞߎ߲߬ߠߊ߬ߛߌ߮ ߞߵߊ߬ ߦߌ߬ߘߊ߬ ߞߏ߫ ߖߊ߬ߕߋ߬ߘߐ߬ߛߌ߮ ߕߣߐ߬ߡߊ ߝߊ߬ߛߏ߬ߟߊ߬ߞߊ ߟߋ߬ ߣߌ߲߬ ߘߌ߫. ߓߊ߯ߙߊߞߣߍ ߘߐߦߙߌߥߊߣߍ߲ ߣߌ߫ ߞߏ߲ߞߏߘߐߟߊ ߟߎ߬ ߘߊߦߟߍߟߌ ߦߋ߫ ߡߍ߲ ߘߐ߫. ߞߊ߬ ߟߊߛߎߟߌ ߞߍ߫ ߖߎ߬ߟߊ߬ߦߊ ߕߌ߲߬ߞߎ߬ߘߎ߲߬ߠߊ߬ߞߊ ߡߊ߬߸ ߊ߬ ߣߌ߫ ߞߊ߬ ߖߡߊ߬ߣߊ ߣߊ߲߬ߝߟߏ߬ߦߊ߬ߟߌ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߟߊߘߏ߲ߠߌ߲ ߟߊߣߐ߰ߦߊ߬. ߕߍߞߎߘߎ߲ ߝߌߟߊ ߝߟߐ ߦߋ߫ ߞߐ߰ߦߊ ߣߌ߫ ߡߊ߰ߙߋ߬ߟߊ ߟߋ߬ ߓߌ߬ߟߊ߬ ߟߴߌ ߢߐ߲߮ ߡߊ߬ ߝߙߊߣߊ߫ (ߝߙߊߣߊ߫ ߡߙߊ߬ߓߊ߰ߘߊ ߞߣߐ߫) ߛߊ߲߬ ߟߏ߯ߟߎ߫ ߞߎ߲߬ߕߊ߮ ߞߘߐ߫. ߞߵߊ߬ ߓߍ߲߬ ߢߐ߲߯ߦߋ߫ ߖߊ߬ߓߌ ߡߊ߬ ߛߟߊߕߌ߯ ߤߊߟߌߦߋ߫ ߞߊ߬ ߞߐߡߊߓߌ߲ߓߌ߲ߠߌ߲ ߝߏ߬ߟߌ ߟߊߛߋ߫ ߞߏߕߌ߯ ߝߟߐ ߟߊ߫ ߞߟߊߓߎߟߊ߲ߘߌ ߟߎ߬ ߡߊ߬. ߊ߬ ߣߌ߫ ߛߋ߲ߞߏߟߦߊ ߞߙߎ ߟߊ߫ ߞߟߊߓߎߡߦߊ ߝߊ߲߬ߝߌ߬ߟߊ ߓߍ߯ ߘߐ߫. ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߦߌ߬ߘߊ߬ ߞߊ߲ߓߍ߲߫ ߞߊ߲ߕߌ߮ ߣߌ߫ ߞߊ߬ߝߏ ߞߎ߲߬ߕߌ߮ ߞߟߍ߬ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߕߐ߯ ߘߐ߫. ߞߊ߬ ߞߎ߲߬ߠߊ߬ߛߌ߮ ߟߊ߫ ߥߞߊ߬ߟߌ ߦߌ߬ߘߊ߬ ߞߵߊ߬ ߓߍ߲߬ ߕߌߙߌ߲ߠߌ߲ ߠߊߓߊ߲ ߡߊ߬، ߊ߬ ߣߌ߫ ߖߊ߬ߕߋ߬ߘߐ߬ߛߌ߮ ߓߙߍ߬ߦߊ ߘߊߡߌ߬ߣߊ ߕߍߓߊ߯ߦߊ ߝߊ߲߬ߝߘߊ ߓߊ߲ߓߊ߲ ߕߐ߰ߡߊ߬ߛߙߋ ߖߌ߬ߣߍ߬ ߣߌ߫ ߛߌߣ ߕߍ߫ ߞߵߊ߬ ߓߍ߲߬ ߥߙߎߞߌ߫ ߝߊ߬ߛߏ߬ߟߊ߬ߞߊ ߞߊߓߋ ߡߊ߬.    

ߞߐߣߊߞߙߌ߫ ߞߏ߲ߓߌߕߌ߱ ߕߟߋ߬ ߂߉/ ߂߀߂߅.

ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߞߊ߬ ߢߐ߲߯ߦߋ ߘߏ߫ ߟߊߘߌ߬ߢߍ߬߸ ߏ߬ ߡߍ߲ ߦߋ߫ ߝߘߊ߬ߝߌ߲߬ߠߊ߫ ߕߟߋ߬ߓߋ ߓߊߛߌߦߊ߫ ߞߊ߬ߙߊ߲߬ߠߊ߬ߘߋ߲ ߠߎ߬ ߟߊ߫ ߞߙߏ߬ߝߏ ߟߊ߫ ߗߋߦߊߟߌ ߘߌ߫. (ߙߋߡߊߥߏ) ߢߐ߲߯ߓߍ߲ ߢߌ߲߬ ߞߎ߲߭ ߠߋ߬ ߓߊ߬ߘߌ߬ߟߊ߲ ߟߊ߫ ߘߴߊ߬ ߝߊ߲߬ߓߊ߬ߦߊ ߞߊ߲߬. ߛߊ߫ ߞߊ߬ ߞߏ߲߬ߓߏ߬ߦߊ߫ ߞߎ߲߬ߜߙߊ߬ ߂߀߲ ߟߊ߬ߘߌ߬ߢߍ߬ ߖߌ߬ߣߍ߫ ߖߍ߬ߝߙߍ߬ߕߌ߮ ߟߎ߬ ߢߍ߫ ߛߣߍ߬ߜ߭ߊߟߌ߬ ߞߵߊ߬ߟߎ߬ ߟߊ߫ ߞߐߝߟߌ ߘߝߐ߬ߡߊ ߟߎ߬ ߦߌ߬ߘߊ߬߸ ߊ߬ ߣߌ߫ ߞߊ߬ ߖߌ߬ߣߍ߬ ߕߐ߯ߦߊ߫ ߖߡߊ߬ߣߊ ߞߘߐߕߊ߬ߣߍ߲ ߘߌ߫ ߂߀߂߆ ߘߐ߫. ߏ߬ ߡߍ߲ ߛߌ߲ߘߌ ߛߊ߲߬ ߂߀ ߦߋ߫ ߣߌ߲߬ ߥߊ߰ߘߎ߰ ߓߙߎߞߌߣߊ߫ ߝߊ߬ߛߏ߬. ߙߋߡߊߥߏ ߦߋ߫ ߝߘߊ߬ߝߌ߲߬ߠߊ߫ ߕߟߋ߬ߓߋ ߞߊ߬ߙߊ߲߬ߠߊ߬ߘߋ߲ ߓߍ߯ ߞߙߎߝߊߣߍ߲ ߠߎ߬ ߟߋ߬ ߘߌ߫ ߓߊߛߌߦߊ ߞߊߡߊ߲ ߘߐ߫. ߞߊ߬ߓߌ߯ ߊ߬ ߟߊߘߊ߲߫ ߕߎߡߊ ߊ߬ ߦߋ߫ ߞߎ߲߬ߜߙߊ ߛߌ߲߬ߝߏ߲߬ߧߊ߬ߟߌ ߞߍ߫ ߟߵߊ߬ ߛߌ߲߬ߝߏ߲ ߖߡߊ߬ߣߊ ߟߎ߬ ߘߐ߫ ߛߊ߲߬-ߊ-ߛߊ߲߬. ߞߊ߬ ߞߍ߫ ߟߐ߲ߞߏ߫ ߘߊߘߐߝߙߊߢߐ߲߯ߦߊ߫ ߞߣߍ ߣߌ߫ ߟߐ߲ߠߌ߲ߦߊ ߕߊ ߣߌ߫ ߓߊߘߋ߲ߧߊ ߕߊ ߘߌ߫. ߞߙߏ߬ߝߏ ߛߌ߲ߘߟߌ߫ ߛߌ߲ߝߏ߲، ߖߌ߬ߣߍ ߦߴߏ߬ ߕߘߍ߬ߒ߬ߘߐ߬ߦߊ߬ ߟߊ߫ ߊ߬ ߟߊ߫ ߘߋ߲ߡߌߛߍ߲ ߓߊߛߌߦߟߊ ߟߊߞߐ߯ߣߍ߲ ߠߎ߬ ߛߌߟߊ߫ ߝߍ߬. ߂߀߂߅ ߓߐߞߏߣߊ߲ ߡߍ߲ ߞߎߡߘߊߞߎ߲ ߛߋ߲߬ߝߍ߬، ߕߎߟߊߝߌ߲ ߈ ߣߌ߫ ߁߇، ߖߌ߬ߣߍ߬ ߟߊ߫ ߗߋߦߊߟߌ߫ ߡߊߦߋߙߋ߲ߣߍ߲ ߣߊ߬ ߘߊ߫ ߛߊߦߌ߲߬ ߞߎ߲߬ߝߊߟߋ߲ ߘߌ߫. ߡߊ߬ߦߋߙߋ߲ ߏ߬ ߞߊ߬ ߞߊ߬ߙߊ߲߬ߠߊ߬ߘߋ߲ ߠߎ߬ ߦߟߌ߫ ߓߌ߬ߟߊ߬ ߞߊߙߏ߫ ߛߌߦߊߡߊ߲߫ ߘߐ߬ߖߊ ߞߐߡߊߓߌ߲ߓߌ߲ ߣߌ߫ ߓߟߏߘߐߓߍ߲ ߞߍߗߌߦߡߊ ߞߐ߫. ߗߋߦߊߟߌ߫ ߕߐ߯ ߘߐ߫.ߖߌ߬ߣߍ߬ ߙߋߡߊߥߏ ߓߏ߲ߘߋ߲ ߞߊ߲ߕߌ߮ ߘߊߝ߭ߌߘ ߟߏ ߞߎߙߑߕߎߥߊ߫ ߊߣߊߣߌ ߞߵߊ߬ ߕߊ߫ ߝߊ߲߭ ߥߊߟߢߌߡߊߟߐ߲ ߞߍ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߢߍ߫. ߞߵߊ߬ ߓߍ߲߬ ߊ߬ ߟߊ߫ ߡߊ߬ߘߍ߬ߡߍ߲߬ߠߌ߲ ߡߊ߬ ߞߵߊ߬ ߟߐ߬ ߘߋ߲ߡߌߛߍ߲ ߠߎ߬ ߡߊ߬߸ ߊ߬ ߣߌ߫ ߞߏ ߓߘߍ߬ ߡߊ߬ߝߊ߲ ߠߊ߫ ߖߊ߲ߞߏ ߡߊ߬.ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߞߊ߬ ߞߊ߬ߙߊ߲߬ߠߊ߬ߘߋ߲ ߠߎ߬ ߞߎߟߎ߲ߖߋ߫ ߣߐ߬ߡߊ߬ߢߌ߲߬ߧߊ ߘߐ߫ ߞߵߊ߬ ߓߍ߲߬ ߘߐ߬ߖߊ ߣߌ߫ ߡߊ߬ߝߊ ߡߊ߬.ߊߡߊߘߎ߫ ߎߙߌ߬ ߓߊ ߞߵߊ߬ ߛߌ߲ߛߌ߲߫ ߟߊ߬ߞߐ߬ߟߌ ߣߌ߫ ߖߘߍ߬ߘߌ ߕߐ߬ߣߐ ߞߊ߲߬ ߓߊߛߌߦߊ߫ ߞߊߡߊ߲ ߞߣߐ߫. ߖߊ߲߬ߓߌ߬ߟߊ߬ߟߌ ߘߐ߫ ߞߊ߬ ߞߐ߲߬ ߞߏ ߓߍ߯ ߢߍ߫ ߓߊߛߌߦߊ ߦߋ߫ ߘߌߒߡߊߟߌ߫ ߞߙߍߞߙߍߣߍ߲ ߠߋ߬ ߘߌ߫ ߡߐ߰ߦߊ ߢߍ߫. ߊ߬ ߞߊ߬ ߞߎߟߎ߲ߖߋߟߌ ߖߍ߬ߘߍ ߖߍ߬ߘߍ ߝߣߊ߫ ߞߍ߫ ߡߏ߬ߛߏ ߟߊ߫ ߛߌߦߊߦߊ ߘߐ߫ ߗߋߦߊߟߌ ߘߐ߫߸ ߞߊ߬ ߡߊ߬ߕߊ߲߰ߦߊ ߦߌ߬ߘߊ߬ ߟߐ߲ߞߏ ߓߏߟߏ߲ߝߘߊ ߝߣߊ߫ ߘߐ߫. ߊ߬ ߞߊ߬ ߖߡߊ߬ߙߌ ߘߌ߫ ߞߏ߫ ߞߊ߬ ߓߟߏߘߐߓߍ߲ ߘߊߡߌ߬ߣߊ߬ ߂߀߂߆ ߞߎ߲߬ߜߙߊ߫ ߟߊ߫ ߤߊߟߌ߬ ߡߊ߬ߞߐ߬ߣߐ߲߬ߠߌ߲ ߕߍ߫. ߊ߬ ߣߌ߫ ߟߊ߬ߞߊ߬ߙߊ߲߬ߠߌ߲ ߛߊ߲ߘߐߕߊ ߣߌ߫ ߟߐ߲ߞߏ߫ ߕߌߙߌ߲ߠߌ߲ ߣߌ߫ ߟߊ߬ߞߎ߬ߘߦߊ߬ߟߌ ߞߏߕߌ߮ ߟߊ߫ ߓߟߏߘߏ߲ߢߐ߲߰ߓߟߏ ߞߣߐߡߊ߬.

ߞߐߣߊߞߙߌ߫ ߞߏ߲ߓߌߕߌ߱ ߕߟߋ߬ ߂߉/ ߂߀߂߅

ߞߊ߲ߓߍ߲ ߞߊ߲ߕߌ߯ ߣߌ߫ ߞߊ߬ߝߏ ߞߎ߲߬ߕߌ߮ ߞߟߍ߬ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߕߐ߯ ߘߐ߫، ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߞߊ߬ ߟߐ߬ߟߐ߲߬ߠߌ߲߬ߦߊ߬ߟߌ ߡߙߊ߬ߦߊ ߛߊ߲ߘߐ ߟߊ߫ ߛߊ߲߬ ߃߃߲ ߘߊߦߟߍߟߌ ߢߊ߰ߢߊ߮ ߢߍߡߌ߬ߘߊ߬ (ߤߊߞ). ߞߵߊ߬ ߓߍ߲߬ ߘߍ߬ߞߙߏߝߏ ߟߎ߬ ߡߊߡߙߊ߬ ߞߏ ߡߊ߬ ߢߣߊߕߊߟߌ ߕߎ߬ߡߊ ߟߊ߫߸ ߏ߬ ߟߋ߬ ߞߍ߫ ߘߊ߫ ߖߊ߲߬ߖߏ߲ ߞߎ߲߬ߕߐ߮ ߟߊߖߊ߲ߞߏߕߊ ߘߌ߫ ߢߌ߬ߣߊ߲߬. ߘߐ߬ߕߊߡߌ߲ ߞߏߟߊߕߍ߯ߘߊ ߝߊ߬ߛߏ߬ߟߊ߬ߞߊ ߞߊ߲ߕߌ߯ ߞߏ߲߬ߓߏ ߘߊ߲߬ߛߊ߫ ߞߙߏ߬ߡߊ߫ ߕߘߍ߬ ߞߣߍ ߞߊ߲߬߸ ߛߋ ߍߣ ߛߋ ߣߌ߫ ߤߊߞ ߛߌ߲߬ߝߏ߲߬ ߞߘߐ ߘߏ߫ ߟߎ߫ ߕߘߍ߬ ߞߣߍ ߞߊ߲߬߸ ߊ߬ ߣߌ߫ ߟߊ߬ߟߐ߲߬ߠߌ߲ߦߊ߬ߟߌ ߞߟߊ߬ߡߊ߬ߓߊ߰ ߛߌߦߊߡߊ߲߫. ߤߊߞ ߞߊ߲ߕߌ߯ ߓߎߓߞߊߙ ߦߊߛߌߣ ߖߊߟߏ߫߸ ߞߵߏ߬ ߓߍ߲߬ߒ߬ߛߋ߲߬ߡߊ ߕߣߐ߬ߓߐ߬ ߞߊ߲ߠߊߓߌߟߊ ߦߌ߬ߘߊ߬ߞߏ ߘߌ߫ ߖߌ߬ߣߍ߬ ߞߣߐ߫߸ ߞߣߊ߬ߕߏ߫ ߞߊ߬ߝߏ ߞߎ߲߬ߕߌ߯ ߞߟߍ߬ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߞߎߟߎ߲ߖߋ߫ ߟߊ߫ ߞߵߊ߬ ߓߍ߲߬ ߊ߬ ߟߊ߫ ߞߐߡߊߓߌ߲ߓߌ߲ߠߌ߲ ߣߴߊ߬  ߘߐ߬ߞߣߍ߬ߟߌ ߡߊ߬ ߸ ߞߎ߲߬ߠߊ߬ߛߌ߮ ߞߎ߲߬ߕߌ߯ ߞߵߊ߬ ߦߌ߬ߘߵߊ߬ ߟߊ߫ ߓߋߟߋ߲ߠߊ ߘߐ߫߸ ߞߏ߫ ߊ߬ ߦߋ߫ ߝߏ߬ߟߌ ߖߍ߬ߘߍ ߖߍ߬ߘߍ ߟߊߛߋ߫ ߟߊ߫ ߖߌ߬ߣߍ߫ ߟߊ߬ߟߐ߲߬ߠߌ߲߬ߦߊ߬ߟߌ ߞߊ߲ߠߊߓߌߟߊ ߛߌߟߊߓߐߟߊ ߟߎ߬ ߡߊ߬߸   ߊ߬ ߣߌ߫ ߞߊ߬ ߟߊ߬ߟߐ߲߬ߠߌ߲߬ߦߊ߬ߟߌ ߥߊ߬ߣߊ ߟߎ߬ ߝߏ߬ ߞߵߊ߬ ߓߍ߲߬ ߓߍ߯ߦߊ ߣߌ߫ ߞߍߒߢߐ߲߯ߒߝߍ ߟߊߛߓߊ߬ߕߌ ߡߊ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߝߐ߰ߓߍ߬ߦߊ߬ߟߌ ߦߋ߫ ߘߍ߬ߞߏ߬ߦߊ ߛߊ߬ߡߊ߲߬ߛߋ߲ ߓߟߋߓߟߋ ߘߌ߫. ((ߝߊ߲߬ߞߊ ߣߊ߯ߣߌߣߊ߲ ߖߍ߬ߘߍ ߖߍ߬ߘߍ ߟߋ߬)) ߊ߬ ߞߊ߫ ߞߊ߲߫ ߞߵߊ߬ ߟߊߓߊ߯ߙߊ߫ ߓߟߏߟߊߕߎ߲߮ ߢߌߣߌ߲ߞߏ ߣߌ߫ ߖߊ߬ߓߌ߬ߦߊ߬ߟߌ ߘߏ߫ ߘߌ߫. ߞߏߕߌ߯ ߝߟߐ ߝߣߊ߫ ߞߵߌ ߕߌ߲ߕߌ߲߫ ߖߊ߯ߓߊ ߟߊ߬ߟߐ߲߬ߠߌ߲߬ߦߊ߬ߟߌ ߓߊߖߎ ߡߊ߬ߦߟߍ߬ߡߊ߲߬ ߞߏ ߞߊ߲߬߸ ߞߵߊ߬ ߕߌ߲ߕߌ߲ ߝߊ߲߬ߝߘߊ ߛߏ߯ߙߏߦߢߊ ߡߊߦߟߍߡߊ߲ ߕߐ߬ߣߐ ߞߊ߲߬ ߢߎߡߍߙߋ߲ߦߊߟߌ ߣߌ߫ ߘߍ߬ߞߙߏ߬ߝߏ߬ ߞߏ ߕߎ߬ߡߊ ߣߌ߲߬ ߠߊ߫. ߊ߬ ߞߊ߬ ߞߎ߲߬ߠߊ߬ߛߌ߰ ߟߊ߫ ߞߐߡߊߓߌ߲ߓߌ߲ߠߌ߲ ߦߌ߬ߘߊ߬ ߝߐ߰ߓߍ߬ߦߊ߬ߟߊ ߟߎ߬ ߢߍ߫߸ ߞߊߕߙߍ߬ߕߍ߫ ߝߐ߰ߓߍ߬ ߜߙߊ ߓߏ߲ ߠߎ߬ ߟߐ߮ ߡߊ߬ ߕߌ߲߬ߞߎߘߎ߲ ߠߎ߬ ߘߐ߫. ߞߵߊ߬ ߟߊߥߟߌ߬ ߘߎ߰ߘߋ߲ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߟߊߘߍ߲߬ߞߣߍ߬ߦߊ ߡߊ߬ ߟߊ߬ߟߐ߲߬ߠߌ߲߬ߦߊ߬ߟߌ߬ ߓߘߍ߫ ߡߊ߲߬ߕߊ߰ߦߊ߬ߣߍ߲ ߟߊߛߐ߬ߘߐ߲ ߣߐ߰ߦߊ ߟߊ߫.