Konaakiri, ñannde 2 jolal 2026 – Ardiiɗo yaakitoraaɓe ɓen Aamadu Wuuri Baa ardike haaju fuɗɗagol eɓɓoore heyɗintingol hunndaari ndin ka jiddere Daare-Salaam, ka nder Komiin Beesiya. Haaju ngun moftuno liggotooɓe buy ka laamu e waajotooɓe ka Ardiigu hawtaandi e ka yaakitorde aranenre e jeyaaɓe buy ka kartiyee e kawte mun arɓe tawdegol e haaju ngun.
Seeniiɓe fii haaju ngun, ardinno deeƴere yeru ngoƴomaare fii faatiiɓe ɓen fewndo jiddere nden worgitii ñannde 23 silto feƴƴundu. Eɓɓoore nden happaama fii hitaande e hoore ndelo ngo ektaaru 28,8. Wintaari mun ndin, ko Winning International Group fawtii.
E innde jamaa makko on, lanɗo komiin on Mammadu Saliw Fofana jarnii eɓɓoore nden e weltanike laamu ngun. O ɓanngini wonndema heyɗintingol ndee nokkuure no tontii jaabawol mawngol wonannde cellal jamaa on e tontannde lanndal ndimu neɗɗanke.
Guwerneer saare Konaakiri nden Maahawa Sire Sillaa tentinike e nafa ngal kuugal tentinii e banŋal kiwal hunndaari ndin, kiwal cellal jamaa on e newinngol nokkugol ñoogeeli ɗin.
Wonannde ardiiɗo Winning International Group, Sun kiwshun, ɓannginii angisannde mojobere maɓɓe nden faade e noddaadu Ardiiɗo Hawtaandi ndin Maamadii Dummbuyaaa e laamu makko ngun. O holli eɓɓoore wano ballal anterepiriisi on faadee e ɓantal, o inni wonndema happu waɗugol gole ɗen feƴƴitataa e kadi ɓe tippay e sartiiji kiwal hunndaari ndin.
Ɓay yakitoraaɗo fii laaɓal ngal Abuubakaar Kamaraa anndintinii mawnde bone wonugol binnde ɗee bille ɗe miliyon 9 meeter kibbu tuuɗe e duggal curki ko nde accitata kon.
O holli kadi no golle ɗen yaarata non, huɓindagol jiddere nden, howa nde, timmbugol noone no tuuɗe ɗen sottiniree tentinii huɓindagol duggal curki kin, si ɗen golle ɗon gasii nokkuure nden waɗete liikere ka jamaa on fowtoo fijora.
Ardiiɗo yaakitoraaɓe ɓen Aamadu Wuuri Baa wattii ɗee golle ɗo e uuyannde baylanduru immorde e Ardiiɗo Hawtaandi ndin Maamadii Dummbuyaa faadee e eɓɓoore Simanndu 2040. O anndintini wonndema heyɗintinannde leydi ndin no haani ɓanngirde neweende ngurndan neɗɗanke on wano kiwal faadee e cellal, kiwal huɓindiiɓe ɓen e wuurugol e hunndaari newiindi.
Ardiiɗo yaakitoraaɓe ɓen, tentinike e huɓindagol taƴƴalle ɗen faadee e huɓindagol nokkuure nden, e di’e tuunuɗe ɗen, e curkiwii ngin fii no wuurirɓe binnde ɗon wonu e jam kamɓe e kawtal maɓɓe. o lanndii jagge ɗe ɗun fewti ɗen e laamu kartiyee on teddina happuuji ɗin e anndina ka lawɗi si caɗeele no yalti e mun.
E nder ɗun, o holli wonndema kanko tigi o ƴewtoto eɓɓoore nden wonndude e waajotooɗo on ka ardiigu hawtaandi Moodi Usmaani Dummbuyaa. E yaakitoraaɗo fii laaɓal ngal.
Faadee e kawtal ngal, Aamadu Wuuri Baa hollii hitteendi tawtannde maɓɓe nden e golle ɗen fow faadee e toppitagol e caɗeele ɗen wano hiwugol nokkuure nden. O watti ɗon wonndema laamu ngun wallitoto ɓeynguureeji ɗin ɗi tawata no jeyaa e lo’uɗi maa ɗi eɓɓoore nden hawri e mun ɗin.
Faandaare nden ko waɗugol huunde heyre e ndee jiddere wattande nokkuure liikere ka fowtetee, fijee faadee e nafa jamaa on.
E ndee eɓɓoore, laamu ngun no miijii waɗude Daaru-Salaam misal wurnitugol hunndaari e maande angisannde faadee e cellal jamaa on e newinannde nguure kañun jamaa on.
