Jour : 11 mai 2026

Konaakiri ñannde 6 duujal 2026 Ardiiɗo yaakitoraaɓe ɓen ardike maandiniro batte junngo haldigal ñinnugol e dankagol (C&MA) eɓɓoore MEDUSA AFRICA nden. Eɓɓoore nden ko jooporde ɓeyditugol alhaaliiji e banŋe rewrorɗi ngenndi ndin.

Ngal kuugal newinanay Gine dañugol ɓoggol (kaabul) rewrungol e nder maayo fii ɓeydugol tabintina seŋagol ngol e enterneet, ɓeydita fahin faandaareeji e huutorgol faade e seŋagol fii no waylira faggudu ndun tippude e huulanɗe Simanndu 2040.

Hooreejo mawɗo GUILAB on Ahmed Karifa Jaawaraa. Anndintinii wonndema ndee eɓɓoore ɗoo ko fii tontagol caɗeele humondirɗe e ko tawi kon ko e ɓoggol gootol sukkiɗen. Ndee eɓɓoore ɗimmitay ɓoggol rewrorde newinana kala ko humondiri e rewreden e ɓantal humondirgal e mun e banŋe karalaagal.

Cukko hooreejo mawɗo on ka anterepiriisi MEDUSA ɓannginii wonndema ndee maandinirde batte junngo no ɓangini faale ɓantugol siŋorɗe ɗen. O anndintini wonndema MEDUSA ko njuɓɓundi fii ñinnugol ɓoggi rewroɗi rewuɗi e nder maayo. Hiɗi humindiri Erop e nan-naange e ñam-naange e hir-naange Afiriki e leyɗe aarabu fii huuwondiral yottiingal.

Yaakitoraaɗe fii kumpiti e faggudu rewrorɗi, Muraana Sumaa holli kañun wonndema ɗun ɗoo no yaadi e faandaareeji lanɗo on, o anndintini wonndema eɓɓoore MEDUSA AFRICA no jaaboo hawjiraaɗi e kiwal faadee e siŋagol e nder ngenndi ndin e saa’i mo tawata ko e ɓoggol gootao sukkii. Sabu ɗun no waawi ɓanginnde ŋakkereeji heewuɗi e banŋe faggudu rewrereyankeere tiiɗunde.

Ardiiɗo yaakitoraaɓe ɓen, Aamadu Wuuri Baa weltorii ko tawi kon ndee eɓɓoore hawjiraande no newina kiwal ngenndi ndin. O anndintini wonndema ɓantal rewrorɗe  no jeyaa e sartiiji gasayɗi ɓantude faggudu ngenndi ndin. O heyɗintini wonndema ɓantal rewrorɗi ɗin no dañinana ngenndi ko  ɗuuɗi.  O jarni kala tawaaɗo, o torii kala  yo waawu hewtitude sabu seenayee makko mawninii tinntidal ngal.

Konaakiri ñannde 5 duujal 2026 Ardiiɗo yaakitoraaɓe ɓen tolnii ka jonnde mun seeniiɓe e innde Chambre de Commerce, d’Industrie et d’Agriculture de Dakar (CCIAD), wonndude e ardiiɗo ɓe on Moodi Abdullaayi Soo laamiiɗo fahin Union nationale des Chambres de Commerce, d’Industrie et d’Agriculture du Sénégal (UNCCIAS).

Ngal tummbondiral no humondiri e ɓeydugol huuwondiral e banŋe faggudu hakkunde Gine e Senegaali.  Kuugal ngal ko yaadu ngal e ko fuɗɗanoo kon gila lewru mbooyi 2025

Ɓay yewtere nden gasii, Abdullaahi Soo holli wonndema yewtere maɓɓe nden no yowitii e nooneeji moftindirgol yeñinooɓe jawle e nooneeji naɓidal hakkunde luujotooɓe, eɓooree ɓe anterepiriisiiji fii no ɓe waawira yeeyugol ka jananiri.

No jeyaa e banŋeeji yewtaaɗi fii mun ɗin, demal tentinii awruuji ngenndiyankooji ɗin wano mango, piya ɗii tawata no ɗuuɗi Gine.  Timmbugol njuɓɓudiiji no ɗin ñaameteeji wayliree e no mariree tippude e sartiiji europpunaaɓe ɓen ko e ɗun hoorejo CCIAD on tentinii

Immorɓe Senegaali ɓen no wonndunoo e yimɓe noogay e pawdi hooreeɓe anterpiriisi. Ɓe tintiduno e hooreeɓe Gine buy, e yeñinooɓe jawle e hooreejo Chambre de Commerce, d’Industrie et d’Artisanat de Guinée, Mammadu Balde. Ngal yiitidal no humondiri e taariika e faandaare naɓidugol e fii ɓantal wonannde leyɗe ɗen ɗiɗi.

Konaakiri ñannde 06 duujal 2026 – Ardiiɗo yaakitoraaɓe ɓen Aamadu Wuuri Baa ardike welo-welo didugol duɗal yottiingal Bambetoo ka komiin Ratonma. Ɗun non ko e tawnde liggotooɓe buy ka laamu e luujooɓe e banŋe karallaagal.

Ko ardii kuugal ngal ko BDB Group. Anndtintenen wonndema ɗun ɗoo no humondiri e huulanɗe Ardiiɗo Hawtaandi ndin Maamadii Dummbuyaa fii newinangol paykun kala fotondiral e banŋe jannde e nder ngenndi ndin.

Ko e hoore ndelo ngo hektaaruuji tati duɗal ngal timmbetee fii jannde ente (pirimeer), hakundeeje (koleesi e liisee) yeru saaluji 36 fii janngooɓe 1500, e nder maggal fahin alhaaliiji wano suudu defte, loŋordu, ñawndirdu, e ñaamirdu e werde liggotooɓe e jannooɓe ɓen.  Fow-fow    wonoyay emmbere kuɓeeje cappanɗe-tati e jeegoo e kuɓeeje ɗiɗi goo fii gollooɓe ɓen.
takkoyto ɗon fugutulde ka elter ɓanndu waɗa. Golle ɗen fow ko e nder lebbi 18.

E innde jamaa on koolaaɗo konngol ka komiin Ratoma Jeli Mori Kurumaa jarnii weltorii eɓɓoore nden sabu nde tontoto annde mawnde jamaa nokkuure ka nde timmbetee ɗon.

Ka yewtere makko, Ardiiɗo yaakitoraaɓe ɓen anndintini wonndema « darnugol duɗal ko newinngol wonndigal e nder deeƴere ». O anndintini angisannde laamu ngun faadee e ñawndugol ɓurdindinal humondirngal e mbaaloodi duɗe ɗen fii no gooto kala nafitorora jannde nden.

Ndee eɓɓoore ko maande tayre mawnde yawtaande immorde e ɗoworɗe heyɗintinal njuɓudi jannde nden

Konaakiri ñannde 6 duujal 2026 Ardiiɗo yaakitoraaɓe ɓen ardike ka jonnde mun tummbondiral hittungal fii eɓɓoore darnugol e heyɗintingol maakitiiji ɗin e nder leydi ndin fow. Jeyaaɓe ka laamu buy tawano e yewtere nden.

Eɓɓoore nden no huuli yeɗugol leydi ndin fow maakitiiji heyɗintinaaɗi yeeyotooɗi e mun e nder kisal gasayɗi tontagol lannde humondirɗe e ngeengu ngun fow. Ɗun kadi hara ngurndan neɗɗanke on no newinanaa jamaaji ɗin tentinii wonannde sonnaaɓe ɓen.

Winntaari mun ko miliyonji eroo 550, eɓɓoore nden ko fii darnugol maakitiiji 21 heyɗintinaaɗi, no e ɗin maakitiiji 13 fii komiinuuji ɗin e maakitiiji 8 fii lare ɗen.

Eɓɓoore nden ñinnay nokkeeli ka yeeyee, ka otooje daroo, kurle, ƴoogirɗe ndiyan bille e cuuɗi ɓuɓɓinaaɗi ka piiji kecci maree.

Konaakiri ñannde 7 duujal 2026 Ardiiɗo yaakitoraaɓe ɓen tolnii ka jonnde mun mojobe seenoduɗe  Banki Aarabu fii Ɓantal faggudu e nder Afiriki (BADEA), e Fonds de l’OPEP e  Shelter Afrique, seeniiɗe Gine gila leereeji 48 fii ɓeyditugol huuwondire e banŋe faggudu hakkunde majje e Hawtaandi Gine ndin e saltuɗi banŋe faggudu e luujondirteeɓe ɓen.

Yaakitoraaɗo fii eɓɓooje ɗen e huuwondire e nder winndere nden e ɓantal Moodi Isma’el Naabee udditirii yewtere nden ɓannginngol nafoore seenaayee ɓee mojobe e nder leydi Gine ndin wonndude e faandaare tammbitagol ɓantal Gine tentinii ko humondiri e eɓɓoore Simanndu 2040.

Seeniiɓe ɓen weltorii angisannde Gine ko yaadi e ɓantal alhaaliiji fii werdeeji e heyɗintingol ca’e ɗen. Ɓe ɓanngini huulanɗe Ardiiɗo Hawtaandi ndin Seneral Maamadii Dummbuyaa e ardinade laamu ngun fii ñinnugol eɓɓoore mawnde Simanndu 2040 nden. Ɓe sakkitori bannginngol angisannde maɓɓe nden fii tammbitagol Gine e nder ko duumii winntagol eɓɓooje battinayɗe e faggudu ndun  e rendo ngun.

Ardiiɗo yaakitoraaɓe ɓen anndintinii wonnde Gine no angisii e laawol kesol wurtayngol taariika mun kan, ɗun no ɓanngi e faandaare ngenndi ndin e waylugol ko hitti e nder ko duumii. O ɓanngini huurugol eɓɓoore simanndu 2040 nden e takkiingal nannaagewal ngal ko ɓural mawngal wonani ngenndi ndi. Ɗun no ɓanngini wonndema Gine e luujooɓe mun no waawi timmbude ɓantal e kadi ɗoo e yeeso jawle oogirɗe ɗen wonay tugalal fii bantal faguudu layundu immorde e suluuji yaaduɗi e ɓantal rendo.

Ardiiɗo yaakitoraaɓe ɓen tentinike fii ɓeyditugol huuwondiral ngal wonndude e ɗee mojobe araabu e afirikinaaje fii tammbitagol Gine e banŋeeji ɓantal ca’e ɗen e demal e newinal ngurndan jamaaji ɗin. O ɓanngini faandaare Gine e feeɓitanagol kala ballo tammbitotooɗo ɓantal yottiingal wonannde leydi ndin.

Nde o ɓannginno ɓure ngenndi e banŋe ɓantal, Aamadu Wuuri Baa hollii wonnde Gine no jogii ɓure mawɗe newinayɗe timmbugol suluuji e ɓantal faggudu ndun wonndude e luujotooɓe ɓen. Himo torii huuwondiral nafaygal fow yaadungal e haɓugol baasal newina ngurndan neɗɗanke.

Konaakiri ñannde 7 duujal 2026 Ardiiɗo yaakitoraaɓe ɓen Aamadu Wuuri Baa tolnii foolotiroyayɓe ɓen e innde Gine, ɗun ko Kariimata Balde e Tijaani keytaa notooytooɓe e innde Gine ka foolotiro 35^ɓo fito waɗayngo Monreyal leydi Kanadaa.

Ko ardii foolotiro ngon Gine, ko kawtital duɗe jeytoralje e jonnde Pol Geren Lasuwa (PGL). Ngoo foolotiro ko tintorgal mawngal wonannde jannde nden Gine e banŋe jiñinngol fii ɗenngal faransi ngal e nder winndere nden.

Notiiɓe e innde Gine ɓen ɗiɗo no ari henndagol e juuɗe Ardiiɗo yaakitoraaɓe ɓen raaya ngenndi ndin e wakkilineede e du’aneede immorde e ardiiɗo yaakitoraaɓe ɓen adi ɓe yahude.

E nder ngal tummbondiral o torike yahayɓe ɓen, townugol dow norɗi Gine ɗin ɓanngina wakkilaare e ɓural : « Miɗo hewtina on oo raaya, o wallay on nokku kala ka wonuɗon, miɗo toroo on townugol mo dow, Alla yo on fooloy ». Ɓanngini Ardiiɗo yaakitoraaɓe ɓen.

Konaakiri ñannde 7 duujal 2026 ardiiɗo kabinee on ka yaakitorde aranere Sonna Faatumata Binta Jallo ardike jonnde golle wonndude e duɗal ngendiyankewal fii ɓeyduru ganndal (CNPG). Ko ardii seeniiɓe ɓen ko Moodi Maamadii Kondee fii ɓanngingol ɗate luujondiral wonannde njuɓɓudiiji ɗin ɗiɗi.

Yewtereeji ɗin ko fii ɓeyduru ganndal wonannde liggotooɓe ɓen ka jonnde yaakitorde aranere. Ko fii kadi, jonnitugol seedeeji jannguɓe jeyaaɓe e yaakitorde nden : ndun ɓeyduru ganndal ko waɗi ko gila ñannde 02 haa ñannde 13 collite 2026

Ɗun ɗoo no yaadi e faandaare Ardiiɗo yaakitoraaɓe ɓen fii yeɗugol ardiigu Gine ngun kelɗere e heyɗintinannde ɓaarorde e yaltidi nafoori.

Tippude e ɗun Sonna F. Binta Jallo e ley konngol Aamadu Wuuri Baa heyɗintinii anngisannde laamu ngun tippude e huulanɗe Ardiiɗo hawtaandi ndin Maamadii Dummbuyaa fi newinangol neɗɗo kala no o janngira fii mawninngol ngalu neɗɗanke on ka jonnde yaakitorde.