Jour : 28 octobre 2025

MAWƁE BOFA ƁEN NO LANNDII TAWDEGOL SENERAL MAAMADII DUMMBUYAA KA SUƁO-SUƁO FII ARDIIGU HAWTAANDI NDIN.

Bofa ñannde 23 yarkoma 2025 – e nder yaadu fii jarnugol jamaa ka laral Boke, Ardiiɗo yaakitoraaɓe ɓen Aamadu Wuuri Baa hiwroyino mawɗo musidal Bofa ngal.

Mawɗo musidal on wonndude e mbatulaaɓe makko ɓen, weltanino Ardiiɗo yaakitoraaɓe ɓen sabu teddungal ngal o juhiriɓe ngal e wakkilaare ardiigu ngun fii ɗii golleeji ɗi ngu woni e timmbude e nder laral ngal e newinaare ngurndan ɓii-leydi’en fow.

Mawɓe Bofa ɓen watti ɗon ɓannginannde maɓɓe tammbitagol kala kuugal waylayngal ngenndi ndin. Ɓe inni ɓe faamii deeƴere juutunde Ardiiɗo Hawtaandi ndin, ko fii no o jokkira golleeji mawɗi nafayɗi leydi ndin. Kono ɓe watti ɗon wonnde hiɓe karha mo tawegol ka suɓo-suɓo fii Ardiigu Hawtaandi ndin fii no o jokkitora golle ɗe o fuɗɗii ɗen gila duuɓi nayi.

LABE HOMMBIRDE ƳEWTANNDE ARDIIƊO YAAKITORAAƁE ƁEN FII JARNUGOL JAMAA GINE ON BATTE SUƁO NGON KA DAGINNGOL SARIYA MAWƊO ON

Mawnde ñannde 24 yarkoma 2025 – Ardiiɗo yaakitoraaɓe ɓen ɓay iwii Boke kanko e wonndiɓɓe makko ɓen ɓe yaaduno Labe, fii jarnugol ɓe, battane suɓo ngon ka lanndugal. Sare mawnde laral ngal waawuno juhirde ɓe jaɓɓo mawngo.

Koohoo Aamadu Wuuri Baa lollinɗo fii yo eyyo on suɓe, tawuno no jeyaa e aruɓe jaɓɓagol ɓen, hooreɓe ɓen ka diina e ka dawla. Yiltii o yiidi e mawɓe laral ngal, sonnaaɓe ben e sukaaɓe Labe ɓen, o ɓannginaniɓe faale Ardiiɗo Hawtaandi ndin yo ɓe jeyno Sariya Mawɗo daginaaɗo on.

No jeyaa e ɗowtunooɗo Ardiiɗo yaakitoraaɓe ɓen, yaakitoraaɗo on ka jannde e neeedi San Pol Sedii e gollideteeɓe makko goo.

ƁAY SUƁONDIRO FII LANNDUGAL GAL GASII, NGENNDI NDIN NO IWDE E MAANDE ARA SARIYAYANKOORI

Labe ñannde 24 yarkoma 2025 – Ardiiɗo yaakitoraaɓe ɓen hommbii yaadu makko ndun fii jarnugol ɓii-leydi’en battane suɓo ngon faade e yottinngol nellal Ardiiɗo Hawtaandi ndin Seneral Maamadii Dummbuyaa.

Ko ka huɓeere « Anfii » duɗal ganndal karallaagal kuruula ka saare Labe yewtere nden waɗi. Ɗun non ko e tawnde ardiiɓe laral ngal, mawɓe ɓen ka diina, sonnaaɓe ɓen e sukaaɓe saare nden waɗi.

Ardiiɗo yaakitoraaɓe ɓen koohoo Aamadu Wuuri Baa jarnuno ɓenndere faadee e demokarasii e ndimaagu ngu yimmbe Labe ɓen ardini, fewndo suɓo ngon ñannde 21 silto 2025 : « En hollii wonndema hiɗen waawi ñinnannde hoore men suɓo-suɓo » O ɓanngini.

O anndintini fahin wonndema Sariya Mawɗo suɓaaɗo on wonii ɗoo e yeeso finnde humindirde ngenndi ndin e jamaaji Gine ɗin fii naɓidal e nder ɓuttu e nder ɓandal.

Fii ɓannginngol ko fewndii Koohoo Aamadu Wuuri Baa ɓeydituno wonnde : « ngenndi ndin no iwde e maande ara sariyayankoori. Ko ñinnirɗe dolninaaɗe si ɗe yaarii yeeso Gine yaaray yeeso e nder ɓuttu ».

Ka joofinngol, o weltanino mawɓe ɓen sabu du’aaji maɓɓe fii ɓuttu e nder leydi ndin. O iwi Labe e hoore heyɗintinangol ɓen angisannde laamu ngun fii ɓuttu e demokarasii e weldinndingol jamaa on e nder ɓantal, wano miijori non Ardiiɗo Hawtaandi ndin Seneral Maamadii Dummbuyaa.