Konaakiri ñannde 15 morso 2026 Ardiiɗoo yaakitoraaɓe ɓen Aamadu Wuuri Baa hurbiitii nokkuure heyre fijirde waanindaraa nden ka Komiin sonfoniyaa
Ko yaakitorde fii sukaaɓe ɓen e eltere ɓanndu woni ko ñinni nokkuure nden. No e mayre teeren lato balon, restoran (ñaamirde) e nooneeji buy ka sukaaɓe gasata arde fija.
Meer on Sonfoniyaa Foode Imuraana Traworee jarnii kuugal ngal o tuumi semmba tama’u, moftondiral fii ɓantal sukaaɓe ɓen.
Nootiiɗo e innde UN on moodi Hasan Baa heyɗintinii angisande PNUD on faadee e tammbitagol Gine fii wallitagol sukaaɓe ɓen e banŋe naɓidal e hajagol fii woppugol kuuɗe inñinaaɗe ɗen.
Yaakitoraaɗo suukaaɓe ɓen e eltere ɓanndu moodi Sellu Balde hollii wonndema ndee nokkuure no huumondiri e huulannde Ardiiɗo on fii ɓeydugol nokkeeli eltirɗi ɓanndu e nder leydi ndin. O watti ɗon wonnde ko wintaari duumotoondii wonannde sukaaɓe ɓen fii bantal jamaa on waaninndara e Sonfoniyaa.
« Ko weltaare wonani lan arugol Waanindaraa » fuɗɗori Aridiiɗo yaakitoraaɓe Aamadu Wuuri Baa, o anndintin wonndema timmbugol ndee nokkuure no yaadi e faandaare lanɗo leydi ndin Seneral Maamadii Dummbuyaa e hino e dillere fii baylarundun wano eɓɓiri ka eɓɓoore Simanndu 2040 ka tawata sukaaɓe ɓen no wattiraa yeeso
O watti ɗon wonndema Waanindaraa no haani hollude misal faadee e ɓantal sukaaɓe ɓen e nder Komiin sonfoniyaa on « no woodi innaynooɓe wonndema waaninidaraa ko getoo, jooni non getoo on wonii fijirde » o inni.
Ardiiɗo yaakitoraaɓe ɓen inni sukaaɓe ɓen yo jeyino nokkuure nden waɗa nde nokkuure fijirde fii eltere ɓanndu. O torii ardiiɓe hesunɓe ka komiin sonfoniyaa toppitagol e eɓɓooje ɓantal fuɗɗaaɗe ɗen e nder Saare Konaakiri nden.
