Konaakiri ñannde 27 mbooyi 2026 Ardiiɗo yaakitoraaɓe ɓen Aamadu Wuuri Baa ardike hurmbitugol suluuru lekkeele MEDNEX Africa, wonundu Moribaayaa e nder suuperefektiir Forekariyaa.
Huɓeere nden darnaama e ndelo ngo m² 6 000 yeru jawle miliyon 4 dala. Ndee huɓere ko luujondiral ginenaaɓe e indiyanaaɓe e labannaaɓe. Ko moƴƴinngol lekkeele fii huɓindagol faale Gine ɗen wonndude e cogenel jaasungel e hoore huulannde maakiti laral ngal.
Yaakitoraaɗo fii cellal ngal, Sonna Kaytee Saal ɓannginii naafoore nduu suluuru wonannde jamaa on. O anndintini wonndema ɓantal kuugal ngenndi ndin no tawaa e tugaale ɓantal duumiingal newinanayngal ginenaaɓe ɓen keɓal lekkeele haara jaraa ko satti.
Yaakitoraaɗo suluuji ɗin e ngeegu ngun Sonna Fatima Kamaraa ɓanngini wonnde nduu suluuru no yaadi e faandaare laamu ngun fii ɓantugol ngenndi ndin immorde e suluuji fii no Gine hunnirana hoore mun e no yawtira keeri fii huɓindagol maakitiiji laral ngal.
Wonannde Ardiiɗo yaakitoraaɓe ɓen, ngal kuugal ko mawngal wonannde dimu « sabu ndimu no fuɗɗori waawugol faggitagol, e ñawnditagol » o jarni angisannde wintiiɓe ɓen fow fii yanñugol nooneeji faggudu leydi ndin timmba ballondiral.
Ardiiɗo yaakitoraaɓe ɓen ardini ɓantal dañaangal ngal e banŋe cellal ɗii duuɓi sakkitori ɗoo tintinii e timmbugol labutaaniiji, ɗuytugol maayeele ɗen ka labutaaniijie, ɓantal suluuji fii lekkeeli ɗin fii newinanngol jamaa on lekkeele.
Ka anndintingol o holli ndee faandaare ɗoo no humondiri e huulannde Gine nden fii ñinnugol moƴƴino e yeeyo ka jananiri wano faandorii non eɓɓoore Simanndu 2040 nden fii ɗuytugol humagol e jananiri ndin e banŋeeji goo.
