Konaakiri ñannde 15 duujal Ardiiɗo yaakitoraaɓe ɓen Aamadu Wuuri Baa udditii weeɓitannde jeegaɓere nden fii yontere ngendiyankoore fii ɓii-leydi e ɓuttu (SENACIP) ka jaabi-hattirde Gamal Abdel Naseer Konaakiri.
Ko ñinni tummbondiral ngal ko yaakitoraaɓe ɓen ka ardiigu immorde e yiilirde mawnde fii jiñinngol neɗankaaku e ɓuttu e ley tiitoonde « deeƴinngol nokkuure nden fii hettaare senndodaande ». Ɗun non ko fii tiiɗinngol yumondiral yewtidugol e nder teddungal e teddinngol ngenndi ndin wakkilina jamaa on faadee e ñinnugol ɓuttu e wonndigal newiingal.
Ndee weeɓitannde jeegaɓere ko gila ñannde 15 haa ñannde 21 duujal 2026 waɗata e hoore leydi ndin fow.
Ka yewtere makko, yaakitoraaɗo ardiigu leydi ndin, Iburaahiima Kalil Konde holli wonndema baɗe heewuɗe no eɓɓaa waɗeede e nder perfektiirji ɗin 33 fii no newinirana ɓii-leydi’en wuuridugol e nder ngenndi ndin.
Ardiiɗo yaakitoraaɓe ɓen anndintini kañun wonndema ɓuttu e nanondiral ɓii-leydi’en no jeyaa e tugaale ɓuruɗe hittude ɗen fii ɓantal ngenndi. Himo toroo ginenaajo kala gorko e sonnaajo faandorgol ndee yontere semmbina wonndigal ngal e nder yurmondiral e nder teddungal : « Gine mo faalaɗen timmbude on newike woo si gooto kala e men angisike no newora. Ɓuttu hinaa dokkal ko ko toppitetee ñannde woo ñannde ». O ɓanngini.
Ardiiɗo yaakitoraaɓe ɓen tenntini yo tawu hara ɓii-leydi kala no wawtii hoore mun faadee e tallallakke ɗee yulirɗe renndo : «En fow men, hiɗen haani : ngenndi, ɓeynguure, duɗal huutorde e nder ndimu gannde kese ɗen e haqqille tafaaɗe ɗen ».
