Konaakiri ñannde 8 Morso 2026 Ardiiɗo yaakitoraaɓe ɓen Aamadu Wuuri Baa sannii seeniiɓe e innde mojobere ginenaaɓe fii Sambo e ko nannditata e mun. Ko ardii seeniiɓe ɓen ko ardo maɓɓe on Aamadu Saajaliw Jallo
Ngal tummbondiral, wonuno sabu fii hollugol Ardiiɗo yaakitoraaɓe ɓen mbuuñaaje ɗe ginenaaɓe ɓen yeɗoyaa ɗen ka ponngondiro 20ɓo innaango Sammbo ka saare Keer ɗun ko leydi Misira, gila ñannde 11 haa ñannde 15 korse. Ginenaaɓe ɓen fooluno geɓii mbuuñaaje nayi wootiri kanŋe, wootiri kaalise e ɗiɗi sila. Ɗun no ɓanngini ƴellitaare Sambo nden Gine e nder Afiriki.
Ardiiɗo mojobere ginenaaɓe nden fii Sambo e ko nannditata e mun weltanino Ardiiɗo Hawtaandi ndin e laamu ngun sabu wakkilaare maɓɓe nden faadee e ɓantugol eltere ɓanndu e nder leydi ndin. O holli wonndema ko ɗun walli Gine tawdeede e ngoo ponngondiro Afirikinaawo fii no raaya Gine on toowiraa hakkunde ɗi ɗeya leyɗe ɗin.
E nder yewtereji, Mojobere nden bannginii faaleeji mun ɗin wonannde ponngondiro aroowo ngon e noone no ɓe faalirtee non layinnde Sambo fii no ɓe hebuliroo no haaniniri.
Ardiiɗo yaakitoraaɓe ɓen jarnii seeniiɓe ɓen tentinii sonaajo bajjo wonnduɗo on e maɓɓe e dañuɗo mbuuñaari kanŋe. O jarni mo wakkilaare nden o torii yo sifa mun wattu e no ɓuriri nii. O wotti ɗon yo ɗun ɗoo wonu misal wonannde sukaaɓe ɓen tentinii jiwɓe ɓen.
