Konaakiri ñannde 21 silto 2026 ardiiɗo yaakitoraaɓe ɓen aamadu Wuuri Baa ardike ka saare kalum haaju yeɗugol aalaaji ɗi yeñinooɓe jawle ɗun ko mojobere CGE-GUI e Chambre des Mines de Guinée, jonni laamu ngun fii laɓɓinngol saare nden ka anital hettal ndimu leydi ndin ñannde 2 yarkoma arooru. Ɗun ko waɗi, ko tawnde yaakitoraaɗo fii laaɓal on Abuubakaar Kamaraa.
Ngal dokkal no ɓanngini faale yeñinooɓe jawle ɓen tammbinntagol wakkilaare laamu ngun faadee e laɓɓinngol saare Konaakiri nden. Ɗun ko waɗi, ko tippude e yewtere hakkunde laamu ngun e yeñinooɓe jawle ɓen.
E nder ɗun, CGE-GUI on hollitii aalaaji moftaaɗi ɗin immorde e mojoɓe jeyaaɗe ɗen e mojobere maɓɓe mawnde nden. Ɗun ko kamiyonje-been 25 no e ɗen ɗe 11 loowaaɗe kuɓɓan, adoowal-nokka gootal, loowirgal, buruyeetiiji 50, fittirɗi 30, ganji 175 e liitir kuɓɓan 36 000.
Wonannde Chambre des Mines de Guinée on e nder balɗe tati hari ɓe mottindirii kamiyonje-been 17 loowaaɗe kuɓɓan. Ɗun hewtinaama laamu ngun fii yo golle ɗen jokke kisan.
Ardiiɗo yaakitoraaɓe ɓen jarni kuugal ngal ko tawi kon ɓe nootike noddaandu laamu ngun. E wi’i makko anitannde hettaare ndimu ngenndi ndin e laɓɓinngol saare nden ko kafu wonannde jamaa leydi ndin fow
«Ngal anital ngenndiyankewal, ko haaju jamaa on fow ko wano non laɓɓinngol saare mawnde nden hinaa kuugal laamu ngun tun » o anndintini.
Aamadu Wuuri Baa holli kadi, tammbitannde yeñinooɓe jawle ɓen no jeyaa e kuugal renndo takkiingal e kuugal faggudu maɓɓe ndun. « Ɗii aalaaji moftaaɗi ɗoo sennditete haa ñannde jowi yarkoma hara hi ɗi jokki tun hiɗi laɓɓina saare nden fii no yontere anital hettaare ndim ngun latora e jam ».
Immorde e ngal tummbondiral, laamu ngun no aadii ɓeydiugol nanondiral hakkunde ardiigu ngun e yeñinooɓe jawle ɓen faadee e faandaare wootere : haɓugol tuuɗe ɗen.