Abijan ñannde 6 juko 2026, ardiiɗo yaakitoraaɓe ɓen Gine no seenii e innde Ardiiɗo hawtaandi Gine ndin koohoo Maamadii Dummbuyaa ka welo-welo anital 66ɓal hettaare ndimu leydi Koddiwaaru ndin. Ko jaɓɓii Ardiiɗo yaakitoraaɓe ɓen ko yeruujo makko mo Koddiwaaru on Moodi Rober Beegere Mambe.
Yiitidal maɓɓe ngal wonuno sommbo heyɗintingol huwondire hakkunde Gine e Koddiwaaru nde tawnoo ko ɓe kawtal e ka tawwi hiɓe nanndi faandaare fii ɓantal.
E innde Ardiiɗo Hawtaandi Gine ndin, Ardiiɗo yaakittoraaɓe ɓen Aamadu wuuri Baa, hollii weltaare Gine nden tawdegol e ngoo welo-welo ñannde 7 juko Yupogon : « Ardiiɗo Hawtaandi Gine ndin no yiɗunoo hara ko kañun seenii battane nduu noddaandu yeruujo makko on, nde tawnoo o hettanaaki, ko min o immini wonndude e huɓindiiɓe ka kenndi amen buy wonndude e konu waɗayngu jarsiisi janngo fii ɓannginngol naɓidal ngal hakkunde men » ɓanngini Ardiiɗo yaakitoraaɓe ɓen Aamadu Wuuri Baa.
Fii tontagol maaku ngun, ardiiɗo yaakitoraaɓe Koddiwaaru on, Rober Beegere Mambe weltorii seenayee on o ɓanngini weltaare makko nden faadee e ko Gine ruttii kon e leydi sariyayankoori e ko Gine timmbi ko ndee eɓɓoore mawnde Simanndu 2040 nde o miijii ko huulannde mawnde fii baylanduru faggudu ngenndi Gine ndin : « Gine e Koddiwaaru no jogii ɓure heewuɗe e no nanndi faandaare e banŋe bantal ko ɗun si leyɗe ɗiɗi no haani yaadude fii nafoore jamaaji leyɗe ɗen ɗiɗi » ɓanngini Rober Beegere Mambe.
E tawu Yaakitoraaɗo fii eɓɓoore e huuwondire ɗen Isma’el Naabee e yaakitoraaɗo fii golle ngenndi ndin Fayyaa Burunoo e jaagoraaɓe leyɗe ɗen ɗiɗi, Ardiiɓe yaakitoraaɓe ɓen ɗiɗo heyɗintinii naɓidal e banŋee heewuɗi wano ; jannde, alhaali yulirɗe e kala eɓɓoore ɓantal nafoore leyɗe ɗen ɗiɗi.
