Konaakiri ñannde 27 collite 2026, immorde e yiitidal naɓidal mawngal, yaakitoraaɗo ginenaaɓe ɓen ka alhaaliiji jananiri Dfru Morisanndaa Kuyaatee ardii e nanndo makko mo Saralon on Alhajji Muusaa Timotii Kabaa wonndude e gollideteeɓe makko ɗuuɗuɓe ka Ardiiɗo yaakitoraaɓe ɓen Aamadu Wuuri Baa.
Timmbondiral ngal ko e tawnde gollideteeɓe ɗuuɗuɓe e ƴellitiiɓe ka konu. Ngal tummbundiral ko waɗiraa ko sabu ko waɗi kon ka keerol hakkunde Gine e Saralon.
E nder yewtere nden yaakiraaɗo mo Firiton on yottinno maakuuji immorde e Ardiiɗo Mada Bi’o, maakuuji hiwrannde, naɓidal, e ɓannginannde faale makko ardinngol yewtere hakkundeeji maɓɓe. O jarni ginenaaɓe ɓen sabu haqqille ɗe ɓe ardini ɗen fii ruttugol ɓe konunkeeɓe 16 nanngaaɓe ɓen ka keerol.
Senngo Gine yaakitoraaɗo Mori Sanndaa Kuyaatee ɓanngini yamiroore Ardiiɗo hawtaandi ndin Maamadii Dummbuyaa fii yo haaju on ƴettitire haqqille e nder yurmondiral. O anndini wonnde ɓe haldii yo tooke ɗen ñippe ka hoore taaɓal yewtere e nder ɓuttu e huuwondiral.
Mori Sanndaa holli wonndema leyɗe ɗen ɗiɗi haldii timmbugol mojobere kununkeeɓe jinndidayɓe ka hoore keerol hakkunde Gine e Saralon fii humpitugol kala ella mo nde tini. O tentinii non wonndema ndee eɓɓoore ɗoo ko immorde e leyɗe ɗen ɗiɗii non fii hiwugol ɓuttu, ɓeyda hoolaare wanannde hoɗuɓe ɓen ka sera keeri e nder naɓidal duumiingal hakkunde Konaakiri e Firiton
