Konaakiri ñannde 13 morso 2026 – Ardiiɗo yaakitoraaɓe ɓen sannii Koohoo Sandeep Sood jaagoraaɗo hawtaandi Indiya ndin Gine.
E nder ngal tummbondiral, jaagoraaɗo Indiya on hiwrike, jarni e innde jamaa e ardiigu Indiya ngun Ardiigu Gine ngun faadee e suɓo-suɓo feƴƴungo ngon e ruttugol leydi ndin e ngendi sariyayankoori.
Jaagoraaɗo on heyɗintini angisannde leydi Indiya ndin faadee e tammbitagol Gine e banŋe deeƴere e ɓantal, o ɓeyditi wonnde leydi makko ndin no yiɗi naɓidugol kadi fahin e Gine e banŋe ladan.
Ardiiɗo yaakitoraaɓe ɓen, ɓaawo sannugol jarna jaagoraaɗo on, annditini taariika naɓidal Gine e Indiya Gila saa’i innaaɗo « ɓe saffinaaki » (non-alignés). O sifii no ngal huuwondiral yaari non haa no fewndorii non hannde. « E nder ɗii duuɓi sakkitori ɗoo no wa’i wa si tawii kala yaarii senngo kono en etoto no ngal huuwondiral artira ka wonunoo ɗon. », holli Ardiiɗo yaakitoraaɓe ɓen.
Ardiiɗo yaakitoraaɓe ɓen tentinii innugol no haani ka laawol kesol timmbee fii huuwondire mun ɗen : « meɗen haani wurnitugol naɓidal men ngal e banŋe buy sabu no woodi piiji buy ɗi men haani fiinaade e mon »
