Konaakiri ñannde 30 korse 2026 Ardiiɗo yaakitoraaɓen ɓen, ardike haaju maandino (siiñugol) eɓɓoore luujondiral ngenndi (PCP) hakkunde Hawtaandi Gine ndin e ONUDI.
Kañun eɓɓoore nden, ko fii huuwondiral no ɗoworɗe ngenndi ndin yaadira e noone moftugol jawle faadee e njuɓɓudiiji njani ɗin fii ɓantal Gine
E nder ɗun cukko Ardiiɗo ONUDI on Sonna Faatu Haydaraa jarnii ngoo hello arano ñinnaango e ngal huuwondiral ɗoo, o heyɗintini wonnde kawtital maɓɓe ngal tammbito Gine fii ñinnugol ɓantal suluuji e nder leydi ndin immorde e eltugol e jiñinngol e jiwɗingol faadee e wintotooɓe ɓen.
Yaakitoraaɗo fii suluuji e ngeegu ngun sonna Faatima Kamaraa, hollii wonnde ndee eɓɓoore ko nde tugalal mawngal wonannde ɓantal faggudu ndun. Hinde yuɓɓori juri tati : yuɓɓindirgol banŋeeji ɗin, tammbitagol PME/PMI e newinngol ballondiralgal immorde e laatinngol alhaaliiji gollirɗi ɗin.
Yaakitoraaɗo fii huuwondiral winndireyankowal ngal moodi Isma’el Naabee holli kañun wonndema ngal luujondiral no holli wonnde huulanɗe men ɗen no yaadi e ɗe ONUDI ɗen fii ñinnugol suluuji mawɗi e nder leydi ndin fii ɓantal faggudu Gine ngun.
Ardiiɗo yaakitoraaɓe ɓen, jarnii angisannde luujotooɓe ɓen e ballal njuɓɓudiiiji ngenndi ndin e yeñinooɓe jawle ɓen e duɗe mawɗe ɗen wonndude e wiɗorɗe ɗen. O anndintini wonndema ɗun ɗoo no humondiri e ɗii hakkilaaji ɗoo fow, ko ɗun si tawi hinaa senngo wooto tun ƴettitirtee.
O tentinii, no ndee eɓɓoore ñinnire kisan, yaltudi ndin tinee kisan, suluuji timmbee, golle heɓoo wonannde sukaaɓe ɓen fii ɓanntal leydi ndin. Ardiiɗo yaakitoraaɓe ɓen torii yeñinooɓe jawle ɓen jeynagol ndee eɓɓoore, huutora yaltudi ndin. O sakkitii innugol wonndema Ardiigu ngun no angisii tammbitagol eɓɓoore nden fii ɓantal faguudu ngenndi ndin.
