Konaakiri ñannde 4 silto 2026 Ardiiɗo yaakitoraaɓe ɓen Aamadu Wuuri Baa ardike e innde Ardiiɗo Hawtaandi ndin Maamadii Dummbuyaa battane faatiiɓe ɓen ka jiddere Daar-salaami.
E ɗee battane, Ardiiɗo hawtaandi ndin e laamu ngun yarlinii faatoraaɓe ɓen, Adiiɗo yaakitoraaɓe ɓen tawdaama e du’anagol fureeji ɗin.
No tawdanoo e seeniiɓe ɓen : Yaakitoraaɗo alhaaliiji jananiri ndin Saralon e huɓindiiɓe buy ka laamu e siɓɓe e yiɓɓe fattiiɓe ɓen.
Fureeji ɗin fow ko ɗi 36 no e majji saralonnaaɓe 17, ɗun no ɓanngini manngu kaawee on e sokola on e nder leydi Gine ndin e ndi Saralon ndin.
E innde ardiiɓe saare Konaakiri nden, sonnaajo Guwerner Saare nden, yarlinii faatoraaɓe ɓen woni siɓɓe woni yiɓɓe.
E nder yewtere makko nden, Moodi Lansee Tuuree ardiiɗo ANGUSH, on hollii wonnde faatiiɓe ɓen no timmi 36 sakkitoro ko faatiiɗo la ñawndirdu Donka O holli wonndema boyraaɓe ɓen no toppitaa e nder nokkeeli ɗiɗi , fewndo ɗon ko ɓe yeru 1 600.
Yaakitoraaɗo alhaaliiji jananiri ndin Saralon, Moodi Mohammed Rahman Suwaaree, e innde lanɗo Hawtaandi Saralon ndin yarlinii faatoraaɓe ɓen, o hollii wonndema sokola on ko kafaaɗo woni Gine woni Saralon, o holli wonndema Saralonnaaɓe hawraaɓe e mun, no dankoraa wa ginenaaɓe ɓen ka ñawndirɗe Gine gila ñannde kaawee on waɗi.
Ɓay juulaama fureejiɗin fewnaama, ɗi fow ɗi surrano ka berɗe Bammbetoo e nder teddungal wano woowiri e no haaniri.
