Catégorie : Actualités en N’Ko

ߞߐߣߊߞߙߌ߫ ߕߙߊߓߊ ߕߟߋ߬ ߉/ ߂߀߂߆

ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߛ߭ߌߓߊ ߞߙߎ ߟߊ߫ ߗߋߦߊߟߌ ߘߏ߫ ߟߊߞߢߐ߬ߡߊ߬، ߞߐ߲ߜ߭ߟߏߡߋߙߊ߫ ߌߝ߭ߎߥߊߙߌߦߍ߲ߣ ߡߟߌߕߌߛߍߞߑߕߏߙߌߦߊߟ ߏ߬ ߡߍ߲ ߢߍߡߌ߬ߘߊ߬ߣߍ߲ ߊ߬ ߝߘߏ߬ߓߊ߬ ߞߊ߲ߕߌ߯ ߗߋߕߌ߮ ߛߟߊߕߌ߯ ߣߌߖߊߓߋߖߊ߲߫ ߛߙߏ ߓߟߏ߫. ߓߊ߬ߘߏ߬ߢߐ߲߰ߦߊ  ߕߊ߬ߡߌ߲߬ ߘߊ߫ ߦߟߌߣߐߞߝߊ ߖߊ߬ߕߋ߬ߘߐ߬ߛߌ߰ ߟߋ߬ ߞߊ߲߬ ߢߐ߲߯ ߢߊߦߋ ߞߣߐ߫ ߡߍ߲ ߦߌߟߌ߲ߦߊ ߘߌ߫ ߛߋ߫ ߝߊ߲߬ ߝߌ߬ߟߊ ߓߍ߯ ߡߊ߬߸ ߦߏ߫ ߛߌߟߊ ߖߎ߬ߓߐ߬ ߞߏ ߟߎ߬، ߘߊߘߐߝߙߊߢߐ߲߯ߦߊ ߟߊ߬ߢߌߣߌ߲ ߕߘߍ߬ ߛߌߟߊ߫ ߝߊ߬ߛߏ߬ߟߊ߬ߞߊ ߝߙߍߕߍ߫ ߂߇߲ ߟߐ߬ ߞߏ ߟߋ߬ ߞߊ߲߬ ߛߋߟߎߡߊ߫ ߣߌ߫ ߓߊߝߌ߲ (ߞߎߘߍ߫ ߅߃) ߊ߬ ߣߌ߫ ߛߌߟߊ߫ ߝߊ߬ߛߏ߬ߟߊ߬ߞߊ ߝߙߍߕߍ߫ ߃߀߲ ߘߌ߲ߜ߭ߌߙߊߦߌ߫ ߣߌ߫ ߛߌ߯ߙߌ߲߫ ߕߍ (ߞߎߘߍ߫ ߂߆߆) ߡߊ߬ߘߏ߬ߠߌ߲߬ߠߌ߲ ߡߊ߬ߘߎ߮ ߘߐ߫߸ ߗߋߦߊߟߌ߫ ߞߊ߬ ߞߊߟߎߡ ߞߎߟߎ߲ߞߎߟߎ߲ߠߌ߲ ߞߍߗߏ߯ ߓߘߍ ߖߊ߬ߕߋ߬ߘߐ߬ߛߌ߮ ߝߊ߲߬ߝߘߊ ߝߊ߲߬ ߝߟߐߡߊ ߦߌ߬ߘߊ߬( (ߔߋ ߘߋ ߎ߳) ߞߵߏ߬ ߟߊ߫ ߓߍ߲߬ߒ߬ߘߐ ߟߊ߬ߢߌ߬ߣߌ߲߬ߛߓߍ ߞߊ߲߬ ߡߍ߲ ߟߐ߬ߕߐ߫ ߝߊ߲߬ ߝߌ߬ߟߊ߬ߣߊ߲ ߞߍߢߊ ߡߊ߬. ߢߎߡߍߦߊߟߌ ߛߌߟߊ ߝߍ߬ ߖߊ߬ߕߋ߬ߘߐ߬ߛߌ߰ ߡߊߝߟߍߣߍ߲ ߡߍ߲ ߓߌ߬ߟߊ߬ߣߍ߲ ߗߋߢߊ ߘߐ߫ ߏ߬ ߟߋ߬ ߕߟߋ߬ߥߎߢߊ߲߫ ߕߊ߲ߓߊ߲ߘߊ ߟߐ߬ ߞߏ ߘߌ߫ ߡߍ߲ ߛߋߞߏߦߊ߫ ߥߊߣߍ߲߫ ߤߊ߲߯ ߥߊߕ ߂߀߀. ߞߎߘߍ߫ ߂߀߀ ߘߐ߫ ߞߵߏ߬ ߟߊ߫ ߢߎߡߍߙߋ߲߫ ߞߙߏߝߏ ߤߊߛ ߕߋ ߓߋ ߣߌ߫ ߤߊߛ ߕߋ ߊ ߞߊ߲߬. ߞߵߏ߬ ߟߊ߫ ߖߡߊ߬ߣߊ߫ ߞߣߐߟߊ ߝߊ߲߬ߞߣߐ߫ ߂߅߀ ߟߊߡߍߣߍ߲ ߞߊ߲߬. ߞߎ߲߬ߠߊ߬ߛߌ߮ ߞߎ߲߬ߕߌ߮ ߟߊ߫ ߟߊ߬ߟߐ߲߬ߠߌ߲߬ߠߌ߲ ߘߐ߫߸ ߊ߬ ߞߊ߬ ߜߋ߲ߞߐ߰ߖߌ߬ߘߊ ߗߋߦߊߟߌ߫ ߝߏ߬ ߞߵߊ߬ ߓߍ߲߬ ߕߐ߬ߣߐ߫ ߦߌ߬ߘߊ߬ߣߍ߲ ߡߊ߬ ߡߍ߲ ߞߎ߲߬ߛߌ߲߯ߣߍ߲ ߢߡߊߦߟߍߡߊ߲ ߡߊ߬ߡߊ߬ߕߊ ߟߊ߫ ߖߌ߬ߣߍ߬ ߞߣߐ߫ ߛߊ߲߬ ߣߊ߬ߕߐ ߟߎ߬ ߘߐ߫. ߘߐ߬ߞߣߍߟߌ ߘߐ߫ ߞߏ߫ ((ߜߋ߲ߞߐ߰ߖߌ߬ߘߊ ߦߋ߫ ߦߟߌߡߊߛߙߋ ߟߋ߬ ߘߌ߫ ߊ߲ ߠߊ߫ ߕߌ߲߬ߞߎߘߎ߲ ߞߣߐ߫ ߦߊ߲߬ ߓߌ߬)) ߊ߬ ߞߊ߬ ߝߟߐߦߊ ߘߐߞߣߍߣߍ߲ ߘߌ߫ ߛߌߡߊ߲ߘߎ߯ ߂߀߄߀ ߢߍߥߟߊ ߡߊ߬ ߞߏ߫ ߝߏ߲߬ߝߏ߲ ߣߌ߲߬ ߦߋ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߛߌߟߊ߫ ߘߊߦߟߍ ߡߊ߬ߡߊ߬ߟߊ ߟߋ߬ ߘߌ߫، ߡߍ߲ ߦߋ߫ ߥߙߎߞߌ ߟߞߊߟߌߦߊ߫ ߓߍ߲߬ߒ߬ߛߋ߲߬ߡߊ ߘߌ߫. ߞߎߡߊ ߞߎ߲߬ߝߊ߮ ߘߐ߫ ߊ߬ ߞߵߊ߬ ߕߌ߲ߕߌ߲߫ ߊ߬ ߞߊ߲߬ ߞߏ߫ ߞߊ߬ ߓߍ߲߬ߒ߬ߘߐ߬ ߛߓߍ ߞߣߐߘߐ ߟߥߊߟߌ߫ ߖߊ߬ߕߋ߬ߘߐ߬ߛߌ߮ ߓߟߏߦߊߟߌ ߘߐ߫ ߊ߬ ߢߊ ߡߊ߬. ߞߏ߫ ߊ߬ ߟߊ߫ ߟߊ߬ߟߌ߬ߟߌ ߟߊߓߊ߲ ߢߌ߲߬ ߓߐ ߊ߬ ߛߌߟߊ ߝߍ߬، ߏ߬ ߞߍߕߐ߫ ߞߐߡߊߓߌ߲ߓߌ߲ߠߌ߲ ߘߐߜߟߍ߬ߦߊ߫ ߟߴߊ߬ ߡߊ߬ ߟߋ߬ ߊ߬ ߢߊ߬ ߖߍ߬ߘߍ ߖߍ߬ߘߍ ߡߊ߬. ߞߵߊ߬ ߞߘߎ߬ߜߟߍ߬ߦߊ ߡߛߍ߬ߞߍ߬ߡߛߍߞߍ ߟߥߊߟߌߕߊ ߟߎ߬ ߘߐ߫ ߊ߬ ߣߌ߫ ߡߊ߬ߘߎ߮ ߓߏߟߏ߲ߝߘߊߕߌ߮ ߟߎ߬ ߣߌ߫ ߢߐ߲߯ ߕߍ߫.

ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߞߵߊ߬ ߕߊ ߡߊ߬ߝߊ߲ ߞߍ߫ ߘߐ߬ߕߊߡߌ߲ ߞߏߟߊߕߍ߯ ߝߊ߬ߛߏ߬ߟߊ߬ߞߊ ߟߊ߫ ߢߐ߲߯ߦߋ ߘߐ߫. ߡߍ߲ ߟߐ߬ߣߍ߲ ߞߟߏߜߍ ߝߌ߬ߟߊ߬ ߞߛߍߞߛߍߟߌ ߟߊ߬ߘߌ߬ߢߍ߬ߟߌ ߡߊ߬ ߛߊ߬ߙߌ߬ߦߊ߬ߦߊ߬ߟߌ ߛߏ߯ߙߏߦߊߣߍ߲ ߛߌߟߊ ߝߍ߬، ߡߍ߲ ߞߎ߲߬ߕߋ߬ߟߋ߲߬ߣߍ߲߫ ߛߌߡߊ߲ߘߎ߯ ߂߀߄߀ ߢߍߥߟߊ߫ ߓߊ߯ߙߊ ߟߊ߬ߞߊ߲߬ߘߊ߬ߟߌ ߟߊ߫، ߞߎ߲߬ߦߌ߬ߘߊ߬ߟߌ ߝߊ߲߬ߝߘߊ߬ߡߊ ߡߍ߲ ߦߋ߫ ߡߊ߬ߞߟߌ߬ߟߌ ߞߍ߫ ߖߌ߬ߣߍ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߢߡߊߦߟߍߡߊ߲ ߕߎ߲߬ߕߎ߲߬ߠߌ߲ ߡߊ߬߸ ߛߊ߲߬ ߕߊ߲߫ ߣߌ߫ ߟߏ߯ߟߎ߫ ߣߊ߬ߕߐ ߞߘߐ߫. ߖߊ߲߬ߖߏ߲ ߞߍ߫ ߘߊ߫ ߞߊ߲ߕߌ߯ߘߊ ߝߘߏ߬ߓߊ߫ ߞߟߊ߬ߕߌ߰ ߞߏߕߌ߮ ߢߣߊ߫. ߊ߬ ߣߌ߫ ߞߊ߲ߕߌ߯ߘߊ ߞߎߓߋߘߐ ߗߋߕߌ߮ ߞߏߕߌ߮ ߊ߬ ߣߌ߫ ߞߎ߲߬ߠߊ߬ߛߌ߮ ߛߌ߲߬ߝߏ߲ ߠߎ߬߸ ߊ߬ ߣߌ߫ ߡߊ߬ߡߙߊ߬ߟߌ ߝߘߏ߬ߓߊ߫ ߡߊ߬ߞߟߐ߬ ߛߊ߲ߘߐ߫ ߛߌߦߊߡߊ߲߫. ߊ߬ ߣߌ߫ ߕߍߓߊ߯ߦߟߊ ߟߎ߬ ߞߵߏ߬ ߓߍ߯ ߟߊ߫ ߛߌ߲߬ߝߏ߲߬ߘߊ ߡߊ߲߬ߕߏ߲߬ߕߍ߬ߟߊ߬ߞߊ ߟߎ߬ ߞߐߦߌߘߊߓߊ߯ ߟߎ߬ ߞߊ߲߬.  ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߞߎ߲߬ߕߋߟߋ߲߫ ߢߌ߲߬ ߞߎߟߎ߲ߖߋߟߌ ߞߍ߫ ߞߊ߲ߓߍ߲ ߞߊ߲ߕߌ߮ ߡߊ߬ߡߊߘߌ߫ ߘߎ߲ߓߎߦߊ߫ ߢߍ߫ ߥߣߊ߬ߦߊ ߟߊ߫߸ ߊ߬ߟߋ ߡߍ߲ ߦߋ߫ ߛߌߡߊ߲ߘߎ߯ ߘߊ߬ߡߊ߲߬ ߢߍߥߟߊ ߣߌ߲߬ ߖߎ߬ߓߌ߬ߟߊ߬ߓߊ ߘߌ߫ ߢߍߥߟߊ ߡߍ߲ ߦߋ߫ ߛߌߡߊ߲ߘߎ߯ ߞߍ߫ ߟߊ߫ ߥߙߎߞߌ ߘߎ߲ߡߊߣߍ߲ ߝߊ߲߬ߞߊ߬ߡߊ ߘߌ߫ ߓߌ߬ ߓߐ߲ߛߐ߲ߘߊ ߣߌ߫ ߓߐ߲ߛߐ߲ߘߊ ߣߊ߬ߕߐ ߟߎ߬ ߓߍ߯ ߢߍ߫. ߊ߬ ߞߊ߬ ߖߊ߲߬ߓߌ߬ߟߊ߬ߟߌ ߞߍ߫ ߝߣߊ߫ ߞߏ߫ ߛߌߡߊ߲ߘߎ߯ ߂߀߄߀ ߛߌ߰ߣߍ߲ ߕߍߞߢߊߟߌ ߛߏ߯ߙߏߦߊߣߍ߲ ߘߏ߫ ߟߋ߬ ߞߊ߲߬߸ ߡߍ߲ ߓߎ߲ߓߎ߲ߣߍ߲ ߟߐ߬ߛߋ߲߬ ߝߊ߲߬ߝߘߊ߬ߡߊ ߛߌߦߊߡߊ߲߫ ߡߊ߬ ߡߍ߲ ߠߎ߬ ߟߊߢߌߣߌ߲ ߦߋ߫ ߡߊ߬ߞߐ߬ߙߐ߬ߞߐ߬ߙߐ߲߬ߠߌ߲ ߝߊ߬ߛߏ߬ߟߊ߬ߞߊ ߓߏߟߏ߲ߓߐߟߌ ߘߌ߫. ߞߊ߬ ߡߐ߰ߦߊ ߡߊߣߊ߲ߞߎߦߊ ߗߏ߯ߦߊ ߟߊߢߊ߬߸ ߊ߬ ߣߌ߫ ߞߊ߬ ߟߊ߬ߖߊ߲߬ߞߏ߬ߟߌ ߞߍ߫ ߢߝߍߕߊ߯ ߢߐ߲߰ ߛߐ߬ߘߐ߲߬ ߜߏߡߊ߲ ߠߎ߬ ߣߴߊ߬ ߘߎ߲ߡߕߊ ߟߊ߫. ߣߊ߬ߕߊ ߦߋ߫ ߡߍ߲ ߘߌ߫: ((ߞߊ߬ ߣߐ߬ ߘߐ߬ߞߏߟߏ߲ ߠߎ߬ ߡߊߕߊ߲߬ߞߊ ߡߍ߲ ߠߎ߬ ߓߍ߲߬ߣߍ߲ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߛߋ߲߬ߠߊ߬ߕߎ ߟߊ߫ ߡߍ߲ ߠߊߞߙߐ߬ߛߌ߬ߣߍ߲߫ ߖߡߊ߬ߣߊ ߞߣߐ߫ ߘߎ߰ߞߘߐ߬ߝߋ߲ ߛߎ߲ߞߎ߲ߡߊ ߟߎ߬ ߟߊ߫ ߓߣߊ߬ߦߊ߬ߟߌ ߛߌߟߊ ߝߍ߬))

ߞߏߕߌ߯ ߝߟߐ ߞߵߊ߬ ߕߌ߲ߕߌ߲߫ ߢߍߥߟߊ ߣߌ߲߬ ߠߊ߫ ߛߎߘߊ߲ߠߌ߲ ߞߏ ߞߊ߲߬߸ ߏ߬ ߡߍ߲ ߦߋ߫ ߘߌ߫ ߛߋ߫ ߥߊ߫ ߟߊ߫ ߝߏ߫ ߘߟߊ߫ ߥߟߎ߬ߡߊ߫ ߃߀߀ ߏ߬ ߡߍ߲ ߓߊ߲ߓߊ߲ߣߍ߲ ߛߊ߬ߙߌ߬ߦߊ߬ߦߊ߬ߟߌ ߣߌ߫ ߛߌ߰ߞߊ߲߬ߠߞߊ߬ߦߊ ߞߊߡߊ߲ ߘߐ߫ ߡߍ߲ ߘߐߖߊ߬ߣߍ߲. ߡߍ߲ ߟߐ߬ߣߍ߲ ߖߌ߬ߣߍ߫ ߛߌ߰ߞߊ߲ ߓߟߏߘߐߓߍ߲ ߡߊ߬ ߂߀߂߄ ߠߊ߫. ߊ߬ ߓߊ߲߫ ߞߊ߬ ߦߋߗߏ߯ ߓߘߍ ߓߟߏߡߦߊ߫ ߝߘߏ߬ߓߊ߬ ߞߍߥߊߟߌ ߟߎ߬ ߘߊߞߎ߲ ߘߐ߫. ߊ߬ ߣߌ߫ ߞߊ߬ ߓߊ߯ߙߊ߫ ߡߌ߬ߙߌ߲߬ߡߊ ߓߟߏߡߦߊ߫ ߞߎ߲߬ߠߊ߬ߛߌ߮ ߓߘߍ߬ߓߘߍ߬ߟߌ ߞߎ߲߬ߞߊߟߌߦߊ ߘߐ߫. ߢߐ߲߯ߦߋ߫ ߝߊ߲߬ߞߊ߬ߡߊ ߣߌ߲߬ ߕߎ߬ߡߊ ߟߊ߫߸ ߘߐ߬ߕߊߡߌ߲ ߞߏߟߊߕߍ߯ ߝߊ߬ߛߏ߬ߟߊ߬ߞߊ ߞߊ߬ ߢߍߓߌߟߊߟߌ ߘߏ߫ ߞߍ߫ ߞߵߊ߬ ߓߍ߲߬ ߞߟߏߜߍ ߣߌ߲߬ ߠߊ߫ ߘߌ߬ߢߍ ߡߊ߬ ߝߊ߲߬ߓߊ߬ߦߊ߫ ߞߏߟߌߞߏߟߌ ߓߟߏ߫. ߞߵߊ߬ ߟߐ߬ ߥߞߊ߬ߟߌ ߥߙߎߞߌ ߡߙߌߣߊ߲ ߡߊ߬ ߡߍ߲ ߦߋ߫ ߛߋ߲߬ߕߊ߰ߓߊ ߘߌ߫ ߞߌ߬ߛߍ߬ߡߊ߬ߦߊ ߘߐ߫. ߞߎߡߊ ߞߎ߲߬ߝߊ߮ ߘߐ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߡߊ߬ߞߟߌ߬ߟߌ ߞߍ߫ ߘߍ߬ߞߏ߬ߦߊ ߞߙߎߝߊߟߌ ߡߊ߬. ߞߵߊ߬ ߓߍ߲߬ ߡߊ߲߬ߕߏ߲ ߝߊ߲߬ߞߊ ߟߊߘߍ߬ߣߍ߲ ߣߌ߫ ߘߎ߰ߘߋ߲ ߞߙߎߞߙߍ ߟߊߘߍ߬ߣߍ߲ ߝߘߏ߬ߓߊ߬ ߓߟߏߡߊ߬ ߞߊ߬ ߛߋ߫ ߥߣߍ߬ ߝߊ߬ߛߏ߬ߟߊ߬ߞߊ ߣߌ߲߬ ߞߍ߫ ߟߊ߫ ߜߍߘߐߞߏ ߘߌ߫. ߞߊ߬ ߖߌ߬ߣߍ߬ ߟߊߛߌ߲߯ ߥߙߎߞߌ ߛߌߟߊ ߞߊ߲߬ ߘߎ߲ߡߊ߫ ߓߟߏߡߊ߬ ߖߐ ߣߌ߫ ߡߊ߬ߝߊ ߣߌ߫ ߢߝߍߕߊ߮ ߜߍߞߟߐ ߟߊ߫.

ߞߐߣߊߞߙߌ߫ ߞߏ߲ߞߏߜߍ߫ ߕߟߋ߬ ߂߇/ ߂߀߂߆

ߞߵߊ߬ ߓߍ߲߬ ߞߎ߲߬ߦߌ߬ߘߊ߬ߟߌ ߕߍߓߊ߯ߦߊ߫ ߛߊ߲ߘߐ ߡߊ߬߸ ߖߌ߬ߣߍ߬ ߞߐߞߊ߲ߞߏ ߟߎ߬ ߣߌ߫ ߝߘߊ߬ߝߌ߲߬ߠߊ߫ ߝߙߊ߬ߢߐ߲߰ߞߊ߲ ߣߌ߫ ߕߎ߲ߞߊ߲ߒߠߊߞߏ ߟߎ߬ ߞߏߕߌ߮ ߞߏ߲߬ߓߏ ߡߏ߬ߙߌ߬ߛߊ߲߬ߘߊ߫ ߞߎߦߊߕߍ߫ ߣߌ߫ ߛߙߊ߬ߟߏ߲߬ ߗߋߦߊߟߌ߫ ߓߟߋߓߟߋ ߘߏ߫ ߛߣߍߡߊ߫ ߘߊ߫ ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߕߍ߰ߟߊ ߘߐ߫߸ ߡߍ߲ ߢߍߡߌ߬ߘߊ߬ߣߍ߲ ߟߊ߰ߖߌ߬ ߡߎߛߊ߫ ߕߌ߲ߡߏߕߌ߫ ߞߊ߬ߓߊ ߓߟߏ߫߸ ߏ߬ ߟߊ߬ߘߍ ߞߍ߫ ߘߊ߫ ߞߎ߲߬ߠߊ߬ߛߌ߮ ߛߌ߲߬ߝߏ߲ ߠߎ߬ ߢߊߞߘߐ߫. ߊ߬ ߣߌ߫ ߣߊ߲߬ߕߌ߰ ߛߊ߲ߘߐ߫ ߛߌߦߊߡߊ߲߫ ߢߣߊ߫. ߞߟߍ߬ߦߊ߬ ߢߐ߲߯ߦߋ ߣߌ߲߬ ߞߎ߲߭ ߠߋ߬ ߓߌ߬ߟߊ߬ߒ߬ߘߐ ߘߌ߫߸ ߡߍ߲ ߞߍߣߍ߲߫ ߞߏ߲ߞߏߜߍ߫ ߕߟߋ߬ ߂߂/ ߂߀߂߆ ߟߊ߫ ߖߌ߬ߣߍ߬ ߣߌ߫ ߛߙߊ߬ߟߏ߲߬ ߓߐߕߏ߲ ߠߊ߫߸ ߘߡߊߝߊߟߋ߲ ߘߐ߫ ߝߙߌߕߐ߲ ߕߍߓߊ߯ߦߊ ߞߎ߲߬ߕߌ߮ ߡߍ߲ ߗߋߟߊߣߍ߲ ߛߙߊ߬ߟߏ߲ ߞߊ߲ߕߌ߮ ߗ߭ߎߟߌߛ ߡߘߊߓߌߥߏ߫ ߓߟߏ߫ ߏ߬ ߞߊ߬ ߝߏ߬ߟߌ߬ ߞߙߍߞߙߍߣߍ߲ ߛߙߊ߬ߞߊ߲߬ߠߊ ߟߊߛߋ߫ ߊ߬ ߣߌ߫ ߞߊ߬ ߞߎ߲߬ߠߊ߬ߛߌ߮ ߡߙߌߘߐ ߦߌ߬ߘߊ߬ ߞߊ߬ ߓߍ߲߬ ߘߌ߬ߢߍ ߡߴߊ߬ߟߎ߬ ߢߍ߫ ߞߊ߬ ߓߐ߫ ߞߏ ߘߌ߫ ߕߍߓߊ߯ߦߊ ߛߌߟߊ ߞߊ߲߬߸ ߊ߬ ߞߊ߬ ߖߌ߬ߣߍ߬ ߡߙߊ߬ߦߊ ߞߎߟߎ߲ߖߋߟߌ ߞߵߊ߬ ߓߍ߲߬ ߘߊߦߟߍߟߌ ߡߴߊ߬ߟߎ߬ ߢߍ߫߸ ߊ߬ ߞߊ߬ ߥߊߟߌߢߌߡߊߟߐ߲߫ ߝߏ߬ߟߌ ߞߍ߫ ߞߵߊ߬ ߓߍ߲߬ ߛߙߊ߬ߟߏ߲ ߡߊ߬ߞߊ߲߬ߞߊ߲߬ߠߌ߲߬ ߝߊ߲ߞߊ ߡߐ߰ ߁߆ ߓߌ߬ߟߊ߬ ߡߊ߬. ߊ߬ ߣߌ߫ ߝߊ߰ߡߊ ߟߎ߬ ߞߍ߫ ߞߵߊ߬ߟߎ߬ ߖߎ߬ߛߎ ߓߌ߬ߟߊ߬ ߞߎߟߎ߲߫ ߠߊ߫.  ߞߏߕߌ߯ ߡߏߙߌߛߊ߲ߘߊ߫ ߞߎߦߊߕߍ߫ ߞߵߊ߬ ߦߌ߬ߘߊ߬ ߞߊ߲ߓߍ߲ ߞߊ߲ߕߌ߮ ߡߊ߬ߡߊߘߌ߫ ߘߎ߲ߓߎߦߊ߫ ߟߊ߫ ߖߡߊ߬ߙߌ ߞߣߐ߫߸ ߞߏ߫ ߓߐߒߘߊ߫ ߓߘߊ߫ ߛߐ߬ߘߐ߲߬ ߖߊ߬ߓߌ߬ߦߊ߬ߟߌ ߡߙߌߣߊ߲ ߘߏ߫ ߞߊ߲߬߸ ߘߐ߬ߡߌ߬ߘߊ߬ߟߌ ߘߐ߫، ߊ߬ ߣߌ߫ ߝߘߊ߬ߝߌ߲߬ߠߊ߫ ߕߋߙߌߦߊ ߛߌߟߊ ߝߍ߬. ߊ߬ ߞߊ߬ ߖߊ߲߬ߓߌ߬ߟߊ߬ߟߌ ߞߍ߫ ߞߏ߫ ߝߊ߲߭ ߝߌ߬ߟߊ ߓߍߣߊ߬ ߓߐߒߘߊ߫ ߛߐ߬ߘߐ߬ߣߍ߲ ߠߎ߬ ߓߟߏߦߊ߫.

((ߕߍߓߊ߯ߦߊ ߥߊ߬ߟߊ ߕߌ߲ߕߊ߲ߡߊ ߞߊ߲߬)) ߞߊ߬ ߓߍ߲߬ ߡߊ߬ߝߊ߰ߟߌ ߣߌ߫ ߣߝߊ߬ߢߐ߲߰ߦߊ ߡߊ߬ ߖߌ߬ߣߍ߬ ߕߍߓߊ߯ߦߊ ߞߎ߲߬ߕߌ߮ ߞߵߊ߬ ߦߌ߬ߘߊ߬ ߝߣߊ߫ ߞߏ߫ ߓߍ߲߬ ߓߘߊ߫ ߞߴߊ߬ ߡߊ߬ ߞߏ߫ ߞߊ߬ ߥߛߊ߬ߓߊ߰ߦߊ߫ ߝߊ߲߬ߝߌ߬ߟߊ߬ߡߊ ߘߏ߫ ߟߊߘߊ߲߫ ߞߊ߬ߝߏ ߝߌ߬ߟߊ ߓߟߏ߫ ߘߎ߲ߡߊ ߓߟߏߡߊ߬߸ ߡߍ߲ ߠߊߢߎ߲߯ߣߍ߲ ߓߐߕߏ߲߫ ߠߊ߫ ߞߏ ߟߎ߬ ߟߊ߫߸ ߊ߬ ߣߌ߫ ߞߊ߬ ߡߊ߬ߕߊ߲߬ߞߊ߬ߟߌ ߞߍ߫ ߓߌ߬ߟߊ߬ߒ߬ߘߐ ߞߎߘߊ ߓߍ߯ ߡߊ߬. ߘߐ߬ߞߣߍ߬ߟߌ ߘߐ߫ ߥߍ߬ߣߍ ߏ߬ ߦߋ߫ ߘߍ߬ߒ߬ߡߊ߬ ߖߐ ߟߊߛߓߊ߬ߕߌ ߟߋ߬ ߘߌ߫. ߊ߬ ߣߌ߫ ߞߊ߬ ߕߍߓߊ߯ߦߊ߫ ߝߊ߲߬ ߝߌ߬ߟߊ߬ߡߊ ߟߊߘߊ߲߫ ߞߊ߬ ߘߐ߬ߝߐ ߦߟߌߡߊߛߌ߮ ߟߊߞߊ߲ߘߊ߫ ߞߐߣߊߞߙߌ߫ ߣߌ߫ ߝߙߌߕߐ߲ ߣߌ߫ ߢߐ߲߯ ߕߍ߫.

ߞߐߣߊߞߙߌ߫ ߕߙߊߓߊ ߕߟߋ߬ ߂/ ߂߀߂߆

 ߢߐ߲߯ߦߋ߫ ߘߏ߫ ߟߊߘߌ߬ߢߍ߬ ߘߊ߫ ߊ߬ߟߎ߬ ߣߌ߫ ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߕߍ߫. ߞߊ߬ ߓߍ߲߬ ߖߎ߬ߟߊ߬ߦߊ ߓߏ߲ߘߋ߲ ߣߌ߫ ߖߌ߬ߣߍ߫ ߘߍ߲߰ߦߊ߬ߟߌ ߣߌ߫ ߞߍߞߎߛߊ߲ߧߊ ߟߊ߫ ߗߋߦߊߟߌ ߡߊ߬ ((ߛߋ ߛߋ ߊ ߖ߭ߋ)) ߊ߬ߟߎ߬ ߞߵߊ߬ߟߎ߬ ߟߊ߫ ߞߐߡߊߓߌ߲ߓߌ߲ߠߌ߲ ߦߌ߬ߘߊ߬ ߡߙߊ߬ߦߊ ߟߎ߬ ߟߊ߫، ߊ߬ ߣߌ߫ ߞߊ߬ ߞߊ߬ߝߏ߬ ߟߊߘߍ߬ߣߍ߲ ߞߐߦߌߘߊߓߊ߯ ߞߎߘߊ ߦߌ߬ߘߊ߫ ߝߘߏ߬ߓߊ߬ ߓߟߏߡߊ߬߸ ߏ߬ ߡߍ߲ ߢߍߡߌ߬ߘߊ߬ߣߍ߲߫ ߛߋ ߛߋ ߌ ߊ ߖ߭ߋ ߡߊ߲߬ߡߊߘߎ߫ ߓߊߟߑߘߋ߬ ߓߟߏ߫، ߓߐߓߊߞߎ߲ߕߌ߮ ߞߐߦߌߘߊߓߊ߮ ߟߎ߬ ߣߊ߬ ߘߊ߫ ((ߞߏ߫ ߞߊ߬ ߥߊߟߢߌߡߊߟߐ߲߫ ߢߊߞߎߘߦߊ߫ ߊ߬ ߣߌ߫ ߞߊ߬ ߞߏߢߐ߲߮ ߥߊ߬ߣߊ ߓߍ߯ ߟߊ߫ ߥߊ߬ߛߊ ߦߌ߬ߘߊ߬ ߝߘߏ߬ߓߊ߬ ߓߟߏߡߊ߬ ߘߎ߲߬ߘߎ߲߬ߡߊ߬ ߡߊߘߎ߮ ߟߎ߬ ߘߐ߫. ߞߎ߲߬ߠߊ߬ߛߌ߮ ߞߎ߲߬ߕߌ߮ ߟߊ߫ ߕߏߒߣߐ߬ߘߐ ߞߐ ߘߐ߫ ߖߌ߬ߣߍ߬ ߗߋߝߊ ߟߎ߬ ߕߐ߯ ߘߐ߫߸ߊ߬ ߞߵߊ߬ ߟߊ߫ ߥߞߊ߬ߟߌ ߦߌ߬ߘߊ߬ ߛߌ߲߬ߝߏ߲߬ߧߊ߬ߟߌ ߘߐ߫، ߞߵߊ߬ ߓߍ߲߬ ߞߎ߲߬ߠߊ߬ߛߌ߮ ߞߍߥߊߟߌ ߟߎ߬ ߡߊ߬߸ ߊ߬ ߣߌ߫ ߞߵߊ߬ ߕߊ ߡߊ߬ߝߊ߲ ߞߍ߫ ߞߎ߲߬ߠߊ߬ߛߌ߮ ߟߊ߫ ߞߏ߫ ߞߍߕߊ ߟߎ߬ ߘߐ߫. ߊ߬ ߣߌ߫ ߞߵߊ߬ ߕߊ߫ ߝߊ߲߭ ߞߍ߫ ߞߏ ߟߎ߬ ߟߊ߫ ߛߎߘߊ߲ ߣߌ߫ ߢߡߊߦߟߍߡߊ߲߫ ߘߊߓߐߣߍ߲ ߘߐ߫. ߢߐ߲߯ߦߋ ߏ߬ ߞߵߊ߬ ߕߊ߫ ߡߊ߬ߝߊ߲ ߞߍ߫ ߓߐ߬ߟߐ߲߬ߞߊ߬ ߖߊߟߏ߫ ߤߊߥߊ߬ ߓߊߙߌ߬ ߟߊ߫ ߞߏ ߟߎ߬ ߘߐ߫. ߏ߬ ߡߍ߲ ߦߋ߫ ߖߌ߬ߣߍ߫ ߖߎ߬ߟߊ߬ߦߊ ߓߏ߲ߘߋ߲ ߞߐߦߌߘߊߓߊ߮ ߘߌ߫ ߞߊ߬ߝߏ߬ ߟߊߘߍ߬ߣߍ߲ ߞߊ߲߬ ߡߎ߬ߕߎ߲߬. ߦߌ߬ߘߞߊ߬ߟߌ ߣߌ߲߬ ߦߋ߫ ߞߟߍ߬ߦߊ ߟߊߥߟߌ߬ߣߍ߲ ߘߏ߫ ߟߋ߬ ߘߌ߫߸ ߞߊ߬ ߡߊ߬ߞߐߙߐ߲߬ߞߐ߬ߙߐ߲߬ߠߌ߲ ߓߘߍ߬ߓߘߍ߬ߟߌ ߝߊ߲߬ߞߊߘߏ߲߬ ߞߊ߬ ߓߌ߬ߟߊ߬ߢߐ߲߰ߡߊ ߓߟߏߡߦߊ߫ ߥߊ߲ߛߌ߲ߕߐ߲ߣ ߣߌ߫ ߖߌ߬ߣߍ߬ ߕߍ߫. ߞߵߊ߬ ߓߍ߲߬ ߖߌ߬ߣߍ߬ ߕߎ߲ߞߙߊߒߞߋ ߟߎ߬ ߛߏ߬ߓߌ߬ߟߊ߬ߞߎߣߎ߲ ߣߴߊ߬ߟߎ߬ ߞߙߎߝߊߟߌ ߡߊ߬.

 ((ߓߐߓߊ߯ߞߎ߲ߕߌ߮ ߞߐߦߌߘߊߓߊ߮ ߟߎ߬ ߞߊ߬ ߖߎ߬ߟߊ߬ߦߊ߫ ߓߏ߲ߘߋ߲ ߖߊ߬ߥߏ ߘߐߦߙߌߥߊ ߞߏ ߟߋ߬ ߝߐ߫߸ ߊ߬ ߢߌߣߌ߲ߞߏ ߟߋ߬ ߕߍߓߊ߯ߦߊ ߟߊ߬ߖߊ߲߬ߞߏ߬ߟߌ ߣߌ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߓߊ߲ߓߊ߲ߠߌ߲ ߘߌ߫ ߖߌ߬ߣߍ߬ ߣߌ߫ ߞߊ߬ߝߏ߬ ߟߊߘߍ߬ߣߍ߲ ߕߍ߫߸ ߞߊ߬ ߓߊ߲߫ ߝߣߊ߫ ߞߊ߬ ߊߡߋߙߌߞ ߥߊߟߌߘߊߟߋ߲ ߣߌ߫ ߡߊ߲ߞߊ߲ ߠߎ߬ ߞߟߊߓߎߡߦߊ߫ ߊ߬ߟߎ߬ ߘߐ߰ߘߏ߲߭ ߠߊ߫ ߖߌ߬ߣߍ߫ ߓߍ߲߬ߒ߬ߛߋ߲߬ߡߊ ߟߎ߬ ߟߊ߫)) ߏ߬ ߘߐߞߣߍ߫ ߘߊ߫ ߓߐ߬ߟߐ߲߬ߞߊ߫ ߖߊߟߏ߫ ߤߊߥߊ߬ ߓߊߙߌ߬ ߓߟߏ߫ ߊ߬ ߞߵߊ߬ ߦߌ߬ߘߊ߬ ߞߏ߫ ߕߎ߲ߞߙߊߒߞߋ ߟߎ߬ ߟߐ߬ߘߎ߰ ߓߏ߲߬ߓߊ߬ߓߊ ߟߋ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߝߊ߲߬ߞߊߘߏ߲߭ ߘߐ߫. ߡߍ߲ ߠߎ߬ ߘߌ߫ ߛߋ߫ ߣߊ߲߬ߝߟߏ߬ߘߏ߲߬ߘߟߊ߬ߟߊ ߛߏ߯ߙߏߦߊߣߍ߲ ߠߎ߬ ߡߊߞߟߌ߫ ߟߊ߫߸ ߏ߬ ߦߋ߫ ߕߊ߯ߛߌߟߊ߫ ߟߋ߬ ߦߌ߬ߘߊ߬ ߟߊ߫ ߡߍ߲ ߓߘߊ߫ ߓߊ߲߫ ߘߡߊߝߊߟߋ߲߫ ߝߊ߲߬ߞߊߘߏ߲߬ ߠߊ߫، ߞߊ߬ ߥߊߟߌߘߊ ߟߎ߬ ߡߊ߬ߞߍ߬ߟߌ ߟߊ߫ ߣߐ߰ߦߊ߬. ߊ߬ ߣߌ ߞߊ߬ ߖߎ߬ߟߊ߬ߦߊ ߓߏ߲ߘߋ߲ ߞߍ߫ ߘߏ߲߬ߘߊ߫ ߣߝߊ߬ߡߊ ߘߌ߫. ߞߊ߬ ߣߊ߬ߝߊ ߦߌ߬ߘߊ߫ ߣߊ߲߬ߝߟߏ߬ߘߏ߲߬ߘߟߊ߬ߟߊ ߘߏ߲߬ߕߐ ߟߎ߬ ߟߊ߫ ߤߊߕߍߦߊ߫߸ ߛߊ߫ ߊ߲ ߘߌ߫ ߝߊ߬ߟߋ߲߬ߢߐ߲߰ߘߐ ߞߍ߫ ߢߐ߲߮ ߝߍ߬ ߞߵߊ߬ ߓߍ߲߬ ߖߌ߬ߣߍ߬ ߕߊ߯ߛߋ߲ ߡߊ߬.

ߞߐߣߊߞߙߌ߫ ߞߏ߲ߞߏߜߍ߫ ߕߟߋ߬ ߂߃/ ߂߀߂߆

ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߛߘߋߦߊߏ ߥߙߎߞߌ ߣߌ߫ ߣߊ߲߬ߝߟߏ߬ߘߏ߲߬ߘߊ߬ߟߊ ߜߍߓߏ߲ ߠߊ߫ ߗߋߦߊߟߌ ߟߊߛߣߍ߫( ߓߋ ߊ ߘߋ ߛߋ) ߏ߬ ߡߍ߲ ߢߍߡߌ߬ߘߊ߬ߣߍ߲ ߛߟߊߕߌ߯ ߜ߭ߎߊߣߎ߫ ߓߟߏ߫. ߓߐߒߡߊߟߌ ߣߌ߲߬ ߞߎ߲߬ߕߋߟߋ߲ ߕߘߍ߬ ߕߋߙߌߦߊ߫ ߞߟߍ߬ߦߊ߬ߡߊ ߝߊ߲߬ߞߊߘߏ߲߭ ߠߋ߬ ߘߌ߫ ߓߋ ߛߋ ߌ ߘߋ ߣߌ߫ ߖߌ߬ߣߍ߬ ߕߍ߫. ߊ߬ ߦߴߏ߬ ߡߍ߲ ߣߌ߬ߦߊ߬ ߖߡߊߣߊ ߘߏ߫ ߣߴߊ߬ ߛߌ߲߬ߝߏ߲ ߕߌ߲߬ߞߎ߬ߘߎ߲߬ߠߊ߬ߞߊ ߘߏ߫ ߘߌ߫. ߘߡߊߝߊߟߋ߲ ߠߎ߬ ߞߎ߲߬ߕߊ߮ ߞߘߐ߫߸ ߝߟߐߦߊ ߖߊߕߋߘߐߛߌ߮ ߛߌߦߊߡߊ߲߫ ߞߎ߲߬ߠߊߞߊ߬ ߘߊ߫. ߞߊ߬ ߓߍ߲߬ ߖߡߊ߬ߣߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߛߏ߯ߙߏߦߢߊ ߢߡߊߦߟߍߡߊ߲ ߡߊ߬ ߸(( ߊ߬ ߣߌ߫ ߖߌ߬ߣߍ߬ ߡߙߊ߬ߦߊ ߟߎ߬ ߟߊ߫ ߘߡߊߝߊߟߋ߲ ߘߐ߫ ߏ߬ ߞߍ߫ ߘߊ߫ ߛߊߓߎ߫ ߘߌ߫ ߦߋߝߊߘߌ ߢߣߊߡߊ ߟߊߘߏ߲߬ߠߌ߲ ߘߐ߫. ߞߊߕߙߍ߬ߕߍ߫ ߖߌߞߏ ߡߊ߬ߘߎ߮ ߡߊ߬ ߣߌ߫ ߜߟߐߡߌ߲ ߞߏ ߣߌ߫ ߛߌߟߊ ߖߎ߬ߓߐ߬ ߞߏ ߟߎ߬ ߡߊ߬))  ߏ߬ ߦߌ߬ߘߊ߬ ߘߊ߫ ߛߟߊߕߌ߯ ߡߊߟߞ ߓߊ ߓߟߏ߫، ߗߋߕߌ߯ ߕߌ߲߬ߞߎ߬ߘߎ߲߬ߠߞߊ߬ ߞߎߘߊ ߡߍ߲ ߡߊߞߍߣߍ߲ ߊߓߌߖߊ߲߬. ߗߋߦߊߟߌ ߘߐߘߏ߲߬ߣߍ߲ ߕߘߍ߬ ߘߎ߲߬ߘߎ߲߬ߡߊ߬ ߡߊߘߎ߮ ߟߎ߬ ߖߊ߬ߓߌ߬ߦߊ߬ߟߊ ߟߎ߬ ߊ߬ ߣߌ߫ ߕߋߟߋ߲ߓߊ߯ߦߊ ߞߏߢߊ ߟߎ߬ ߘߐ߫.  ߜߍߓߏ߲ ߡߙߌߣߊ߲ ߠߎ߬ ߦߟߍ߬ߡߊ߲߫ ߡߊ߬ߘߍ߬ߡߍ߲߬ߠߌ߲ ߟߊߘߏ߲߬ߠߌ߲ ߠߎ߬ ߡߊ߬ ߛߌߟߊ ߝߍ߬ ߞߊ߬ ߓߍ߲߬ ߖߊ߬ߕߋ߬ߘߐ߬ߛߌ߮ ߛߏ߯ߙߏߦߊߣߍ߲ ߡߊ߬. ߞߏߕߌ߯ ߝߟߐ ߞߊ߬ ߞߎ߲߬ߠߊ߬ߛߌ߮ ߟߊ߫ ߖߘߍ߬ߘߏ߲߬ߒ߬ߞߊ߲߬ߡߊ ߟߊ߫ ߛߘߋߦߊ߫. ߞߊ߬ ߕߋߙߌߦߊ߫ ߓߊ߲ߓߊ߲ߣߍ߲ ߘߏ߫ ߟߐ߬ ߞߵߊ߬ ߓߍ߲߬ ߊ߬ ߣߌ߫ ߓߋ ߌ ߘߋ ߛߋ ߕߍ ߡߊ߬. ߡߍ߲ ߓߎ߲ߓߎ߲ߣߍ߲ ߡߌ߬ߙߌ߲߬ߡߊ߬ߦߊ ߡߊ߬߸ ߞߊ߬ ߟߐ߬ ߖߊ߬ߕߋ߬ߘߐ߬ߛߌ߰ ߛߏ߯ߙߏߦߊߣߍ߲ ߓߊ߯ߙߊ ߟߞߊߟߌߦߊ ߡߊ߬߸ ߞߵߊ߬ ߓߍ߲߬ ߖߌ߬ߣߍ߬ ߥߙߎߞߌ߫ ߘߎ߲ߡߊߣߍ߲ ߗߋߢߊߟߌ ߛߌߟߊ ߡߊ߬.

ߞߐߣߊߞߙߌ߫ ߞߏ߲ߞߏߜߍ߫ ߕߋ߬ߟߋ߫ ߂߄/ ߂߀߂߆

ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߞߐߣߊߞߙߌ߫ ߛߏ ߞߎ߲߬ߠߊ߬ߛߌ߰ߟߊ ߟߊߛߣߍ߫ ߞߐߟߐ߲ߓ ߞߎߓߋ ߞߣߐ߫. ߊ߬ ߣߌ߫ ߘߎ߰ߞߣߍ ߣߌ߫ ߛߏߟߐ߮ ߞߏߕߌ߯ߘߊ ߝߘߏ߬ߓߊ߫ ߞߟߊ߬ߕߌ߮ ߞߵߏ߬ ߟߊ߫ ߞߎߓߋߘߊ ߗߋߦߊߟߌ߫ ߞߙߍߞߙߍߣߍ߲ ߞߊ߲ߕߌ߮ ߟߎ߬ ߞߊ߲߬. ߔߏߦߟߌ ߘߋߜ߭ߍߙߑߔߌߛߑߡߊ߲ ߡߍ߲ ߞߍߣߍ߲ ߞߐߣߊߞߙߌ߫ ߟߊ߫ ߡߙߊ߬ ߘߌ߲߬ߞߌߙߊ ߟߎ߬ ߘߐ߫. ߢߐ߲߯ߦߋ ߏ߬ ߛߋ߲߬ߝߍ߬ ߞߏߕߌ߯ ߝߟߐ ߣߌߛߐߘߌߦߊ ߘߴߏ߬ ߘߐ߫ ߟߋ߬ ߞߏߛߓߍ߫ ߞߵߊ߬ ߓߍ߲߬ ߡߐ߰ ߟߎ߬ ߕߊ ߝߊ߲߭ ߡߊ߬ ߊ߬ ߣߐ߬ ߡߍ߲ ߠߎ߬ ߡߊߛߐ߬ߘߐ߲߬ ߠߊ߫. ߞߊߕߙߍ߬ߕߍ߫ ߡߊ߲߬ߕߙߐ ߛߋߣߍ߲ ߝߙߋ߬ߞߍ߬ߟߊ ߡߍ߲ ߠߎ߬ ߡߊ߬߸ ߊ߬ ߣߴߊ߬ ߡߊ߫ ߛߋ߫ ߡߍ߲ ߠߎ߬ ߡߊ߬ ߞߋߟߋ߲ߘߌ߫. ߞߊ߬ ߛߌ߰ ߦߌߟߊ ߘߴߏ߬ ߟߎ߬ ߡߊ߬ ߊ߬ߟߎ߬ ߘߎ߲߬ߘߎ߲߬ߡߊ߬ ߦߙߐ ߟߎ߬ ߘߐ߫ ߥߟߊ߫ ߡߊ߬ߛߎ߬ߘߎ߲߬ߧߊ߬ ߦߙߐ ߟߎ߬ ߘߐ߫. ߊ߬ ߞߵߊ߬ ߦߌ߬ߘߊ߬ ߞߏ߫ ߟߌ߬ߤߟߊ ߏ߬ ߘߐߞߣߍߟߌ ߞߊ߫ ߢߌ߲߬ ߊ߬ ߞߊߣߊ߬ ߝߍ߭ ߟߊ߫ ߛߌ߲߬ߝߏ߲߬ߧߊ߬ߟߌ ߟߊ߫ ߞߵߊ߬ ߞߊߘߌߘߌߦߊ ߡߍ߲ ߓߍ߲߬ߣߍ߲߬ ߕߍ߫ ߢߝߍߕߊ߯ ߖߡߊ߬ߣߊ ߛߌ߫ ߞߣߐ߫ ߞߵߊ߬ ߓߍ߲߬ ߛߌ߰ߓߊ߰ߓߙߍ߬ߟߐ߲߬ߞߏ ߣߌ߫ ߛߏߓߊ ߘߐߥߊ߬ߙߊ ߡߊ߬ ߞߵߊ߬ ߟߐ߬ ߊ߬ ߢߊ߬ߕߣߐ ߡߊ߬. ߊ߬ ߞߵߊ߬ ߕߌ߲ߕߌ߲߫ ߊ߬ ߞߊ߲߬ ߞߏ߫ ߟߛߊ߬ߣߌ߲߬ߧߊ߬ߟߌ ߓߘߍ߬ߓߘߍ߬ߟߌ ߛߌ߫ ߡߊ߫ ߛߌߟߊ߫ ߛߐ߬ߘߐ߲߬ ߘߎ߲ߡߊߟߌ߫ ߓߟߏߡߊ߬. ߣߌ߫ ߢߍߓߌߟߊߟߌ ߕߍ߫ ߊ߬ ߣߌ߫ ߘߍ߬ߡߍ߲߬ߠߌ߲ ߛߎߡߊ߲ ߞߵߊ߬ ߓߍ߲߬ ߡߐ߱ ߟߎ߬ ߟߌ߬ߤߟߊ ߡߊ߬. ߞߏߕߌ߯ ߝߟߐ ߞߙߊ ߛߋ߫ ߘߊ߫ ߝߐߢߊ ߞߘߐ ߟߌ߬ߤߟߊ ߟߎ߬ ߡߊ߬߸ߝߣߊ߫ ߞߵߊ߬ ߟߐ߬ ߓߟߏߟߊߥߛߎ ߞߏ ߟߎ߬ ߡߊ߬߸ ߊ߬ ߣߌ߫ ߝߘߏ߬ߓߊ߬ ߦߙߐ ߟߎ߬ ߝߙߋ߬ߟߌ߬ ߟߊߘߌ߬ߢߍ߬ߓߊߟߌ ߟߎ߬. ߦߏ߫ ߟߐ߯ߝߍ، ߞߊߓߙߎߟߏ، ߊ߬ ߣߌ߫ ߘߌ߲߬ߞߌߙߊ ߟߊ߬ߕߏ߬ߣߍ߲ ߡߍ߲ ߠߎ߬ ߞߊ߫ ߞߊ߲߫ ߞߊ߬ ߟߐ߬ ߞߊ߬ߙߊ߲߬ߕߊ ߟߎ߬ ߣߌ߫ ߊ߬ ߖߡߊ߬ߞߏ߬ߦߊ ߖߎߓߐ ߟߎ߬ ߘߌ߫. ߊ߬ ߞߵߊ߬ ߦߌ߬ߘߊ߬ ߞߏ߫ ߊ߲ ߘߋ߬ߙߌ߬ߣߊ߲ ߓߘߊ߫ ߞߍ߫ ߛߌ߲߬ߝߏ߲߬ߧߊ߬ߟߌ߬ߓߊ߬ߟߌ߬ߦߊ ߘߌ߫. ߞߵߊ߬ ߓߍ߲߬ ߛߏߓߊ ߞߣߐߟߊ ߟߎ߬ ߘߊߘߐߓߍ߲ߠߌ߲ ߡߊ߬߸ ߏ߬ ߡߍ߲ ߞߐߝߟߌ ߦߋ߫ ߓߌ߬ ߜߟߍ߬ߦߊ ߢߌ߲߬ ߠߎ߬ ߘߌ߫. ߡߍ߲ ߦߋ߫ ߛߌߟߊ ߕߍ߰ ߟߊ߫ ߘߍ߭ ߞߏ ߞߘߎ߬ߜߍߟߍ߲ ߠߎ߬ ߢߍ߫. ߊ߬ ߞߊ߬ ߖߡߊ߬ߙߌ ߘߌ߫ ߞߊ߬ߝߏ߬ߙߋ߲ ߡߙߊ߬ߓߊ߮ ߟߎ߬ ߡߊ߬ ߞߏ߫ ߊ߬ߟߎ߬ ߦߋ߫ ߟߊ߲ߞߣߍߡߦߊߟߌ ߞߍ߫ ߛߊߣߌ߬ ߟߐ߯ߕߍ߫ ߞߋߟߋ߲߫. ߞߵߊ߬ ߓߍ߲߬ ߡߐ߰ ߟߊߥߟߌ߬ߣߍ߲ ߠߎ߬ ߕߊ߯ ߦߙߐ߫ ߓߘߍ߫ ߞߏ ߡߊ߬ ߸ ߞߊ߬ ߞߐ߲߬ ߓߐߒߘߊ߫ ߓߊ߲ߝߟߍߟߍ ߛߐ߬ߘߐ߲ ߢߍ߫. ߊ߬ ߞߵߊ߬ ߡߊߜߟߍ߬ߦߊ߬ ߞߏ߫ ߞߊ߬ߝߏ߬ߙߋ߲߫ ߛߌ߫ ߞߊߣߊ߬ ߓߊ߬ߟߊ߲ ߛߌ߰ߣߍ߲ ߢߌ߲߬ ߞߐߞߊߘߌ߫ ߛߌ߰ ߦߙߐ߬ ߕߊ߲ߧߊ ߞߏ ߘߊߘߐߡߌߣߊ ߞߎ߲ߧߊ ߓߟߏ߫. ߊ߬ ߞߊ߬ ߣߝߊ߬ߢߐ߲߮ ߠߎ߬ ߓߍ߯ ߡߊߞߟߌ߫ ߊ߬ ߘߌ߲߬ߞߌߙߊ߫ ߓߍ߬ߙߍ߲߬ߓߍ߬ߙߍ߲߬ߠߌ߲ ߡߊ߬ ߞߊ߬ ߞߐ߲߬ ߦߙߐ ߘߊߘߐߓߍ߲߬ߕߊ ߦߌ߬ߘߊ߬ߟߌ ߢߍ߫ ߟߕߊ߬ߡߌ߲߬ߒ߬ߡߊ߬ߟߌ ߝߊߘߌ ߘߐ߫. ߏ߬ ߞߐ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߡߊ߬ߜߟߍ߬ߦߊ߬ߟߌ ߞߍ߫ ߞߊ߬ߝߏ߬ߙߋ߲߫ ߁߃ ߢߊ߬ߒ߬ߞߐ߬ߓߊ߬ߟߌ߬ߦߊ ߞߏ ߟߎ߬ ߟߊ߫߸ ߞߏ߫ ߊ߬ߟߎ߬ ߦߋ߫ ߘߌ߲߬ߞߌߙߊ ߟߎ߬ ߘߐߛߏ߯ߙߋ߫ ߝߛߊߦߌ߫ ߡߍ߲ ߠߎ߬ ߟߊߕߏߣߍ߲߫ ߟߐ߯ߝߍߦߊ ߞߊ߲ߡߊ߬. ߞߐߣߊߞߙߌ߫ ߛߏ ߞߎ߲߬ߠߊ߬ߛߌ߰ߟߊ ߞߟߍ߬ߕߌ߯ ߒߡߊߥߊ߬ ߛߌ߬ߟߊ߫ ߞߏ߫ ߕߎ߬ߡߊ߬ ߞߎߘߎ߲ߣߍ߲ ߢߌ߲߬ ߓߐߒߘߊ߫ ߓߘߊ߫ ߛߐ߬ߘߐ߲߬ ߞߊ߬ߝߏ߬ߙߋ߲ ߘߏ߫ ߟߎ߫ ߞߣߐ߫. ߦߏ߫ ߡߊ߬ߕߏ߯ߕߏ߬ ߞߊ߬ߝߏ߬ߙߋ߲، ߊ߬ ߣߌ߫ ߊ߲ߞߏߛߍ߲ߞ ߟߐ߯ߝߍ، ߏ߬ ߟߎ߬ ߘߌ߲߬ߞߌߙߊ ߘߏ߫ ߟߎ߫ ߓߘߊ߫ ߘߊߘߐߓߍ߲߬ ߞߊ߬ ߖߎ߬ߟߊ߬ ߡߛߏ ߟߎ߬ ߟߊߛߌ߰ ߦߋ߲߬. ߊ߬ ߣߌ߫ ߛߊ߰ߣߐ߬ߦߊ߫ ߊ߬ ߣߌ߫ ߟߐ߯ߝߍ߫ ߟߏ߯ߟߎ߫ ߡߍ߲ ߟߐ߬ߣߍ߲ ߊ߬ ߞߊ߫ ߜߍ߬ߟߍ߲߬ ߞߊ߬ ߦߙߌߘߋ߲߫ ߝߙߋߟߊ ߟߎ߬ ߟߥߊ߫ ߦߙߐ ߘߐ߫߸ ߊ߬ߟߎ߬ ߟߊ߫ ߡߊ߬ߘߏ߬ߣߌ߲߬ߠߌ߲ ߕߴߛߋ߫ ߣߐ߰ߦߊ߬ ߟߊ߫ ߝߊ߲߭ ߡߍ߲߲. ߊ߬ ߣߌ߫ ߡߐ߰ ߕߴߛߋ߫ ߘߏ߬ߣߌ߲߬ ߠߊߛߋ߫ ߟߊ߫ ߊ߬ߟߎ߬ ߡߊ߬ ߦߙߐ ߡߍ߲. ((ߞߣߐ߬ߜߍ߲߬ߠߌ߲ ߓߟߏߟߊߕߎ߲߱ ߦߴߌߘߐ߫ ߞߊ߬ ߘߊߘߐߓߍ߲ߠߌ߲ ߠߊߕߊ߯ ߢߍ߫ ߘߌ߲߬ߞߌߙߊ ߢߊ߬ߒ߬ߞߐ߬ߓߊߟߌ ߟߎ߬ ߘߐ߫. ߦߏ߫ ߊߝ߭ߊߙߌߦߊ߫ ߡߍ߲ ߟߐ߬ߟߌ ߞߊ߫ ߞߊ߲߫ ߞߊ߬ ߟߞߊߟߌߦߊ߫  ߊ߬ ߘߏ߲߬ ߝߏ߫ ߞߊ߬ ߓߐ߫ ߝߙߍ߬ ߘߌ߫ ߡߍ߲ ߘߴߊ߬ ߞߍ߫ ߊ߬ߟߎ߬ ߟߊ߫ ߖߎ߬ߟߊ߬ߦߊ ߕߏ߰ߝߏ߬ߟߌ  ߟߎ߬ ߘߌ߫ ߛߋ߫ ߓߟߏߟߊߕߎ߲߰ ߠߊ߫߸ ߟߐ߬ߟߌ ߕߎ߬ߡߊ ߝߣߊ߫ ߟߊ߫ ߡߊ߬ߞߏ ߟߎ߬ ߦߋ߫ ߛߋ߫ ߟߊߢߊ߬ ߟߊ߫ ߟߌ߬ߤߟߊ߬ ߓߘߍ ߓߍ߯ ߘߐ߫.

ߞߐߣߊߞߙߌ߫ ߞߏ߲ߞߏߜߍ߫ ߕߋ߬ߟߋ߫ ߂߅/ ߂߀߂߆

ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߞߊ߬ ߞߎ߬ߙߣߊ߬ ߕߊ߲ߞߊ߫ ߜߊ߬ߛߊ߫ ߝߊ߬ߛߏ߬ߟߊ߬ߞߊ ߞߍߞߏ߫߄߄߲ ߘߊߦߟߍ ߞߎ߲߬ ߠߊ߫ ߛߌ߰. ߞߵߊ߬ ߓߍ߲߬ ߞߎ߬ߙߣߊ߬ ߞߊߙߊ߲ ߣߌ߫ ߘߟߊߡߌߘߊߟߌ ߡߊ߬، ߡߍ߲ ߛߌ߲߬ߝߏ߲߬ߧߊ߬ߣߍ߲߫ ߣߊ߯ߡߎ߲ ߞߏ ߟߎ߬ ߝߘߏ߬ߓߊ߬ ߞߟߊ߬ߕߌ߰ߘߊ ߓߟߏ߫. ߡߊ߬ߡߌ߬ߘߊ߬ߟߌ߬ߟߊ ߂߅߀ ߟߋ߬ ߕߊ߬ߣߍ߲߫ ߜߛߊ߬ ߝߊ߬ߛߏ߬ߟߊ߬ߞߊ ߣߌ߲߬ ߘߐ߫. ߡߍ߲ ߞߍߕߐ߫ ߞߏ߲ߞߏߜߍ ߕߟߋ߬ ߂߅ ߣߌ߫ ߕߙߊߓߊ ߕߟߋ߬ ߄ ߞߊ߬ ߛߎߘߊ߲ߓߊ߮ ߟߎ߬ ߟߊ߲ߞߣߍߡߦߊ߫، ߘߋ߲ߡߌߛߍ߲ ߞߎ߲߬ߡߊ ߢߍߡߌߙߌ߲ߡߊ ߟߎ߬ ߟߊ߫ ߖߘߍ߬ߘߏ߲߬ߒ߬ߞߊ߲߬ߡߊ ߞߝߊ߬ ߛߊߣߌ߲ ߘߐ߬ߞߊ߬ߙߊ߲߬ߠߌ߲ ߓߊߓߋߟߌ ߘߐ߫. ߞߏߕߌ߯ ߝߟߐ ߞߊ߬ ߞߎߟߎ߲ߖߋߟߌ ߟߊߛߋ߫ ߛߌ߲߬ߝߏ߲߬ߧߊ߬ߟߌ߬ߟߊ ߟߎ߬ ߣߌ߫ ߣߊ߯ߡߎ߲ ߝߘߏ߬ߓߊ߬ ߞߟߊ߬ߕߌ߰ߘߊ ߡߐ߱ ߟߎ߬ ߡߊ߬߸ߞߵߊ߬ߟߎ߬ ߞߟߊߓߎߡߦߊ߫ ߞߊ߲ߓߍ߲ ߞߊ߲ߕߌ߮ ߡߊ߬ߡߊߘߌ߫ ߘߎ߲ߓߎߦߊ߫ ߕߐ߯ ߘߐ߫. ߞߵߊ߬ ߓߍ߲߬ ߛߟߐߡߌ߲ߘߐߦߊ ߡߐ߬ߟߐ߲ ߠߎ߬ ߛߊ߲ߞߘߐߕߊ߭ ߡߊ߬ ߖߌ߬ߣߍ߬ ߞߣߐ߫. ߊ߬ ߣߌ߫ ߡߐ߰ߦߊ ߕߊ ߟߎ߬ ߖߌ߬ߣߍ߬ ߞߊ߲ߓߍ߲ ߞߣߐ߫. ߊ߬ ߞߵߊ߬ ߟߊ߫ ߥߊߟߢߌߡߊߟߐ߲ ߦߌ߬ߘߊ߬ ߣߝߊ߬ߢߐ߲߰ ߠߎ߬ ߝߣߊ߫ ߟߊ߫߸ ߞߊߕߙߍ߬ߕߍ߫ ߛߎ߰ߘߎ߬ߟߊ߫ ߊߙߊߓߎߟߊ߫ ߝߊ߰ߡߊ߬ߟߊ ߟߊߘߍ߬ߣߍ߲ ߡߊ߬(ߏߙߏߥߊߦߍ߲ߣ ߊߙߊߓߌ ߛߊߎߘߌߕ)

ߞߵߊ߬ ߓߍ߲߬ ߊ߬ ߟߊ߫ ߣߊ߯ߡߎ߲ߞߏ ߛߌ߲߬ߝߏ߲߬ߧߊ߬ߟߌ ߕߏ߰ߝߏ ߝߊ߲߬ߓߊ߬ߡߊ ߢߌ߲߬ ߡߊ߬. ((ߞߍߞߏߣߊ߲ ߢߌ߲߬ ߦߴߊ߬ ߘߊ߲߬ߒ߬ߠߊ߬ߞߏ ߟߋ߬ ߘߌ߫ ߡߍ߲ ߞߵߊ߬ ߓߍ߲߬ ߛߎ߲ߞߊߙߏ ߢߌ߲߬ ߡߊ߬. ߏ߬ ߦߋ߫ ߝߟߐߦߊ ߟߋ߬ ߘߌ߫ ߖߘߍ߬ߟߊ߬ߛߊߦߌ ߘߐ߫، ߡߊ߬ߝߊ ߣߌ߫ ߘߎߓߊ ߟߋ߬ ߘߌ߫ ߖߐ ߟߊ߫ ߛߓߊ߬ߕߌ ߣߌ߫ ߖߡߊ߬ߣߊ ߟߊ߫ ߢߝߍߕߊ߮ ߘߐ߫)) ߊ߬ ߞߵߏ߬ ߘߐߖߘߌ߫ ߞߏߢߊ߬ ߓߊ߬.

ߏ߬ ߞߐ߫ ߞߏߕߌ߯ ߝߟߐ ߞߎߡߊ߫ ߘߊ߫ ߖߌ߬ߣߍ߬ ߞߊ߬ߝߏ ߟߊ߫ ߞߎߛߍߦߊ ߓߟߏߟߊߕߎ߲߯ߠߌ߲ ߞߊ߲߬߸ ߊ߬ ߞߊ߬ ߣߊ߯ߡߎ߲߲ ߕߍߝߐ ߞߍ߫ ߟߊ߲ߒߡߊ ߘߌ߫ ߖߌ߬ߣߍ߬ ߞߣߐ߫ ߞߏ߫ ߟߍߙߟߞߊ ߣߌ߫ ߖߘߍ߬ߞߟߏ߬ߓߊ߮ ߟߎ߬ ߓߍ߯ ߦߋ߫ ߓߊߟߏ߫ ߟߊ߫ ߢߐ߲߮ ߝߍ߬ ߊ߲ ߓߘߊ ߦߊ߲߬ ߝߙߋߞߋ ߛߌ߫ ߕߴߊ߬ ߘߐ߫ ߞߵߊ߬ ߕߘߍ߬ ߓߊ߬ߟߊ߲ ߕߴߊ߬ߟߎ߬ ߕߍ߫. ߊ߬ ߞߊ߬ ߞߟߊߓߎߡߦߊߟߌ ߞߍ߫ ߏ߬ ߝߊ߲߬ߞߊߘߏ߲߭ ߠߊ߫ ((ߞߵߊ߬ ߓߍ߲߬ ߣߊ߯ߡߎ߲ ߕߍߓߊ߯ߦߊ ߟߌ߬ߤߟߊ ߟߎ߬ ߡߊ߬)) ߏ߬ ߦߋ߫ ߖߐ ߟߐ߬ߛߋ߲ ߣߌ߫ ߘߍ߭ ߓߟߏߘߏ߲ߢߐ߲߯ߓߟߏ ߟߋ߬ ߘߌ߫. ߞߊߕߙߍ߬ߕߍ߫ ߕߌ߲߬ߞߎ߬ߘߎ߲߬ߠߞߊ߬ߦߊ ߟߌ߬ߤߟߊ ߟߎ߬ ߡߊ߬߸ ߊ߬ ߣߌ߫ ߘߌ߯ߣߊ߫ ߖߘߍ߬ߟߊ߲߬ߞߣߍ߬ߡߊ߬ߦߊ ߞߐߕߊ߲ߠߌ߲.

ߞߐߣߊߞߙߌ߫ ߞߏ߲ߞߏߜߍ߫ ߕߟߋ߬ ߂߃/ ߂߀߂߆

ߞߏߕߌ߯ ߝߟߐ ߓߘߊ߫ ߛߣߌߥߊ߫ ߣߊ߲߬ߝߟߏ߬ߘߏ߲߬ߘߊ߬ߟߊ ߞߙߎ ߘߏ߫ ߟߊߞߢߐ߬ߡߊ߬ ߡߍ߲ ߢߍߡߌ߬ߘߊ߬ ߘߊ߫ ߥߊ߲ߖ߭ߌߊ߲ ߓߟߏ߫߸ ߊߟߌߡߌߣߎ߳ߡ ߞߐߙߑߔߐߙߊߛߌߦߐ߲ ߐߝ ߛߌߣߊ߬ ߟߎ߳ߡߌߕߍߘ(ߛߑߟߊߞߏ) ߊߟߌߡߌߣߎ߳ߡ ߞߙߎ ߓߏߟߏ߲ߝߘߊ. ߖߊ߯ߓߊ ߣߍ߰ߡߊ߫ ߘߊ߬ߡߊ߲ ߠߎ߬ ߥߊ߬ߣߊ. ߘߡߊߝߊߟߋ߲ ߠߎ߬ ߞߍ߫ ߘߊ߫ ߖߌ߬ߣߍ߫ ߘߊ߬ߡߊ߲߬ ߖߊ߬ߕߋ߬ߘߐ߬ߛߌ߮ ߘߊߡߌ߬ߣߊ߬ߣߍ߲ ߠߎ߬ ߟߊ߫ ߢߍߕߊ߮ ߞߊ߲߬߸ ߊ߬ ߣߌ߫ ߞߵߏ߬ ߟߊ߫ ߣߐ߬ߡߊ߬ߢߌ߲߬ߧߊ ߞߊ߲߬ ߣߊ߲߬ߝߟߏ߬ߘߏ߲߬ߘߊ߬ߟߊ ߣߊ߬ߕߐ ߟߎ߬ ߘߐ߫. ߛߊߟߑߞߏ ߛߋ߲߬ ߦߋ߫ ߓߏߝߊ߬ ߝߎߥߊ߲ߢߊߘߊ߲ ߞߏ ߖߊ߬ߕߋ߬ߘߐ߬ߛߌ߮ ߘߐ߫. ߊ߬ ߣߌ߫ ߛߌߡߊ߲ߘߎ߯ ߥߙߎߞߌ ߖߊ߬ߕߋ߬ߘߐ߬ߛߌ߰ ߥߎ߬ߣߊ߲߬ߞߏߙߏ߲، ߞߎ߲߬ߦߌ߬ߘߊ߬ߟߌ߫ ߞߟߍ߬ߦߊ߬ߡߊ߬ ߝߌ߬ߟߊ߬ߣߍ߲ ߞߊ߬ ߟߐ߬ ߘߊ߬ߡߊ߲߬ߞߏ ߡߊ߬ߘߎ߮ ߡߊ߬ ߖߌ߬ߣߍ߬ ߞߣߐ߫. ߗߋߦߊߟߌ ߞߵߊ߬ ߥߐ߬ߣߍ ߦߌ߬ߘߊ߬ ߣߝߊ߬ߢߐ߲߰ߦߊ ߓߊ߲ߓߊ߲ߠߌ߲ ߘߐ߫ ߊ߬ ߣߌ߫ ߖߌ߬ߣߍ߫ ߡߙߊ߬ߦߊ ߟߎ߬ ߕߍ߫. ߞߵߊ߬ ߓߍ߲߬ ߛߐ߬ߘߐ߲߬ߘߊ ߟߎ߬ ߘߐ߬ߛߏ߬ߘߏ߲߬ߜߊ߬ߟߌ߬ ߞߏ ߣߴߊ߬ߟߎ߬ ߢߡߊߦߟߍߡߊ߲߫ ߡߊ߬ ߊ߬ߟߎ߬ ߘߌ߲߬ߞߌߙߊ ߟߎ߬ ߘߐ߫. ߞߏߕߌ߯ ߝߟߐ ߞߵߊ߬ ߕߌ߲ߕߌ߲߫ ߣߊ߲߬ߝߟߏ߬ߘߏ߲߬ߘߊ߬ߟߊ ߛߏ߯ߙߏߦߊߣߍ߲ ߕߐ߬ߣߐ ߞߊ߲߬ ߞߵߊ߬ ߟߐ߬ ߡߐ߬ߟߐ߲߬ߡߊ߬ߦߊ ߓߐ߲ߛߐ߲ߘߦߊ ߡߊ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߝߊ߬ߛߏ߬ߟߊ߬ߞߊ ߘߐ߫. ߊ߬ ߣߌ߫ ߞߊ߬ ߣߝߊ߬ߢߐ߲߰ߦߊ߫ ߘߎ߲ߡߕߊ ߛߌ߰ ߛߋ߲߬ߞߊ߲߬ ߊ߬ ߣߌ߫ ߘߎ߲߬ߘߎ߲߬ߡߊ߬ ߡߊߘߎ߮ ߕߍ߫.

ߞߐߣߊߞߙߌ߫ ߞߏ߲ߞߏߜߍ߫ ߕߟߋ߬ ߂߅/ ߂߀߂߆

ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߞߊ߬ ߖߊ߲߬ߖߏ߲ ߢߌ߲߬ ߢߍߡߌ߬ߘߊ߬ ߝߘߏ߬ߓߊ߬ ߓߟߏߡߊ߬ ߞߵߊ߬ ߟߐ߬ ߘߎ߰ߘߋ߲ ߛߌ߰ߓߊ߬ߦߊ ߝߘߏ߬ߓߊ߬ ߛߙߍߘߍߦߊߟߌ ߣߊ߯ߣߌߣߊ߲ ߞߐߝߟߌ ߟߊߥߊ߲߬ߞߊ߲߬ ߢߍߓߌߟߊߟߌ ߡߊ߬ (ߍߙ ߖ߭ߋ ߔߋ ߤߊߛ ߄) ߏ߬ ߞߍ߫ ߘߊ߫ ߕߏ߲߬ߜߏ߬ߦߊ߬ ߝߊߘߌ ߟߋ߬ ߘߐ߫. ߏ߬ ߡߍ߲ ߢߍߡߌ߬ߘߊ߬ ߘߊ߫ ߝߊ߲߬ߝߘߊ߬ߦߊ߬ߟߌ ߣߌ߫ ߣߝߊ߬ߢߐ߲߰ߦߊ ߣߌ߫ ߥߙߎߞߌ ߡߊ߲߬ߕߏ߲߬ߕߍ߬ߟߊ߬ߞߊ ߞߏߕߌ߮ ߣߌ߫ ߖߊ߬ߕߋ߬ߛߎ߬ߓߐ ߘߋ߬ߙߌ߬ߘߊ߫ ߝߊ߬ߛߏ߬ߟߊ߬ߞߊ ߟߊ߫ ߛߐ߲ߞߐߟߐ߲ߧߊ ߝߍ߬߸ߞߍߥߊߟߌ ߏ߬ ߞߊ߬ ߛߋ߲߬ߕߊ߰ߓߊ ߟߋ߬ ߘߌ߫ ߝߘߏ߬ߓߊ߫ ߓߘߍ߬ߓߘߍ߬ߟߌ ߝߊ߲߬ߝߘߊ߬ߦߊ߬ߟߌ ߡߊ߬߸ߖߊ߲߬ߖߏ߲ ߕߊ߬ߡߌ߲߬ ߘߊ߫ ߘߐ߬ߕߊߡߌ߲ ߞߏߟߊߕߍ߯ߘߊ ߝߊ߬ߛߏ߬ߟߊ߬ߞߊ ߞߊ߲ߕߌ߮ ߢߣߊ߫. ߞߏ߲߬ߓߏ ߘߊ߲߬ߛߊ߫ ߞߙߏ߬ߡߊ߫ ߊ߬ ߣߌ߫ ߞߎ߲߬ߠߊ߬ߛߌ߮ ߛߌ߲߬ߝߏ߲߬ ߛߌߦߊߡߊ߲߫ ߞߵߏ߬ ߟߊ߫ ߛߋ߲ߞߏߟߦߊ ߣߝߊ߬ߢߐ߲߰ ߣߌ߫ ߣߊ߲߬ߝߟߏ߬ߦߊ߬ߟߊ ߟߎ߬ ߞߊ߲߬. ߓߙߍ߬ߦߊ߬ ߘߌߣߍ߲ ߝߟߐߡߊ ߟߋ߬ ߞߍ߫ ߘߴߊ߬ ߦߌ߬ߘߊ ߟߋ߬ ߘߌ߫߸ߞߏ߫ ߖߌ߬ߣߍ߫ ߡߌ߬ߙߌ߲߬ߘߌ ߓߘߊ߫ ߛߋ߫ ߁߇ ߅߂߁ ߁߆߇ ߘߐ߫. ߊ߬ ߣߌ߫ ߡߏ߬ߛߏ ߦߴߏ߬ ߘߐ߫ (%߅߁، ߈) ߗߍ߭ ߦߋ߫ % ߄߈، ߂ ߘߌ߫. ߢߐ߯ߢߐ߯ߦߊ ߦߙߌߞߊ ߦߋ߫ ߇߁ ߠߋ߬ ߘߌ߫ ߞߎߘߍ߫ ߞߋߟߋ߲߫ ߞߊ߲߬. ߛߌ߰ ߞߛߊ߬ߓߌ߬ߦߊ ߝߊ߲߬ߓߊ߬ߦߊ ߦߋ߫ ߛߊ߲߬ ߂߂، ߂. ߏ߬ ߘߴߊ߬ ߦߌ߬ߘߊ߬ ߝߊ߲ߞߊ߲ߠߌ߲ ߖߏ߮ ߘߐ߫، ߞߏ߫ ߡߊ߲߬ߕߏ߲ ߝߊ߲߬ߓߊ ߦߋ߫ ߘߋ߲ߡߌߛߍ߲ ߠߎ߬ ߟߋ߬ ߘߌ߫. ߖߌ߬ߣߍ߬ߞߊ % ߄߃ ߦߋ߫ ߛߊ߲߬ ߁߅ ߞߘߐ߫ ߟߋ߬. % ߇߁ ߦߋ߫ ߛߊ߲߬ ߃߅ ߘߎ߰ߡߊ߬ ߟߋ߬. ߏ߬ ߞߐ߫ ߝߣߊ߫ % ߆߁، ߃ ߦߋ߫ ߓߊߟߏ߫ ߟߊ߫ ߞߏ߲ߞߏ ߞߣߐߟߊ ߟߎ߬ ߟߋ߬ ߘߐ߫ % ߃߈، ߇ ߦߋ߫ ߛߏߓߊ ߟߎ߬ ߞߣߐ߫. ߞߏߕߌ߯ ߝߟߐ ߞߊ߬ ߓߊ߯ߙߊ ߓߘߍ ߣߌ߲߬ ߞߎߟߎ߲ߖߋߟߌ ߞߍ߫߸ ߡߍ߲ ߞߍߣߍ߲ ߛߋ߲ߞߏߟߦߊ ߞߙߎ ߓߟߏ߫߸ ߊ߬ ߣߌ߫ ߛߙߍߘߍߦߊߟߌ ߥߊ߬ߣߊ ߟߎ߬ ߏ߬ ߟߎ߬ ߡߍ߲ ߠߎ߬ ߞߙߎߝߊ߫ ߘߊ߫، ߖߡߊ߬ߣߊ ߘߎ߬ߞߣߍ ߝߊ߬ߛߏ߬ߟߊ߬ߞߊ ߡߎ߰ߡߍ ߞߊ߲߬. ߊ߬ ߞߵߊ߬ ߡߊߜߟߍ߬ߦߊ߫ ߞߏ߫ ߞߟߍ߬ߦߊ߫ ߖߐ߯ߙߊ߲ ߣߌ߲߬ ߦߋ߫ ߟߊ߬ߛߌ߲߬ߠߌ߲߬ߟߊ߲ ߠߋ߬ ߘߌ߫ ߝߘߏ߬ߓߊ߫ ߡߙߌߘߐ ߟߎ߬ ߕߊ߬ߟߌ ߘߐ߫߸ ߞߵߊ߬ ߓߍ߲߬ ߥߙߎߞߌ ߝߊ߲߬ߝߘߊ߬ߦߊ߬ߟߌ ߝߊ߲߬ߞߊߘߏ߲߭ ߡߊ߬ ߛߋߞߏߦߊ ߘߐ߫ ߞߎ߲߬ߠߊ߬ߛߌ߮ ߟߊ߫ ߓߊ߯ߙߊ ߟߎ߬ ߘߐ߫. ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߕߌ߲ߕߌ߲ ߛߙߍߘߍߦߊߟߌ ߢߊ߬ߒ߬ߞߐ߬ߓߊ߬ߟߌ߬ߦߊ ߞߊ߲߬ ߊߙߊߝ߭ߍߞ ߓߟߏ߫. ߞߏ߫ ߊ߬ߟߎ߬ ߦߋ߫ ߓߊ߯ߙߊ ߕߐ߭ ߟߊߓߊ߲߫ ߞߊ߬ ߞߐ߲߬ ߓߊߖߎ ߛߌ߰ߟߌ ߢߍ߫. ߞߵߊ߬ ߓߍ߲߬ ߣߊ߲߬ߒ߬ߕߊ߲ ߞߊ߲ߞߋߦߊ ߡߊ߬ ߟߊ߬ߝߙߍ ߣߌ߫ ߢߊߞߎߘߦߊߟߌ ߘߐ߫. ߞߊ߬ ߓߍ߲߬ ߞߎ߲߬ߠߊ߬ߛߌ߰ߟߌ ߣߌ߫ ߢߡߊߦߟߍߡߊ߲ ߗߋߢߊ ߡߊ߬.

ߛߌ߯ߙߌ߲߫ ߞߏ߲ߞߏߜߍ߫ ߕߟߋ߬ ߂߀/ ߂߀߂߆

ߣߌ߲߬ ߦߴߊ߬ ߟߊ߫ ߗߋߦߊߟߌ ߝߟߐ ߟߋ߬ ߘߌ߫ ߖߡߊ߬ߣߊ ߞߣߐߟߊ ߘߐ߫߸ ߞߊ߬ ߕߊ߬ ߞߊ߲ߓߍ߲ ߟߏ߯ߟߎߣߊ߲ ߞߎ߲߬ߠߊ߬ߛߌ߮ ߟߊߛߌ߱ ߕߊ߬ߡߌ߲߬ ߘߊ߫. ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߛߌ߯ߙߌ߲߫ ߡߙߊ߬ߓߊ߰ߘߊ ߟߋ߬ ߛߎߥߊ߲ߘߌ߫. ߦߋ߲߬ ߡߍ߲ ߦߋ߫ ߞߍߞߎߛߊ߲ߧߊ ߘߐ߬ߛߏ߬ߘߏ߲߬ߜߊ߬ߟߌ߬ ߦߙߐ߬ ߓߘߍ ߘߌ߫ ߖߡߊ߬ߣߊ ߞߣߐ߫. ߊ߬ ߕߘߍ߬ ߡߊߟߐ߬ߣߍ߲ ߘߎ߰ߞߣߍ ߡߊ߬ߡߙߊ߬ߟߌ ߣߌ߫ ߕߊ߲ߓߊ߲ߓߐߟߌ ߞߏߕߌ߮ ߟߋ߬ ߓߟߏ߫. ߞߟߍ߬ߕߌ߯ ߌߓߎߙߊߤߌߡߊ߫ ߞߊߟߌߟ ߞߐ߲ߘߍ߫ ߊ߬ ߣߌ߫ ߘߊ߬ߡߊ߲ ߣߌ߫ ߘߎ߰ߘߐ߬ߛߓߍ ߞߏߕߌ߮ ߓߎߣߊ߬ ߛߌ߬ߟߊ߫. ߊ߬ ߣߌ߫ ߓߐ߰ߝߍ ߖߊߣߌ߬ ߖߊߟߏ߫، ߞߵߏ߬ ߓߍ߯ ߟߊ߫ ߞߏߕߌ߯ߝߟߐߘߊ ߗߋߕߌ߮ ߞߎߓߋߘߐ ߞߏߕߌ߮ ߞߊ߲߬ ߞߏ߲߬ߓߏ ߘߊߎߘߊ߫ ߞߊ߬ߡߌ߬ߛߏ߬ߞߏ߫. ߞߎ߲߬ߠߊ߬ߛߌ߮ ߞߎ߲߬ߕߌ߮ ߖߍ߬ߘߍ ߟߋ߬ ߖߌ߰ߣߍ߲ ߞߣߍ ߞߊ߲߬. ߞߵߊ߬ ߓߍ߲߬ ߖߊ߬ߕߋ߬ߓߐ߬ߟߌ ߡߊ߬ ߡߍ߲ ߟߐ߬ߣߍ߲ ߛߊߣߌ߲ ߘߐ߬ߛߏ߬ߘߏ߲߬ߜߊ߬ߟߌ ߞߏ ߡߊ߬߸ ߊ߬ ߣߌ߫ ߓߐ߰ߝߍ ߟߌ߬ߤߟߊ ߟߎ߬ ߕߌߢߍ߲ ߞߏ. ߛߌ߯ߙߌ߲߫ ߡߙߊ߬ߓߊ߰ߘߊ ߡߊ߬ߡߙߊ߬ߟߌ߬ߘߊ ߞߊ߬ ߢߐ߲߯ߦߋ ߢߊ߬ߕߣߐ߬ߡߊ߬ߓߊ ߘߏ߫ ߞߍ߫ ߦߋ߲߬ ߊ߬ߟߎ߬ ߣߌ߫ ߡߙߊ߬ߦߊ ߡߐ߱ ߟߎ߬ ߕߍ߫. ߕߌ߲߬ߞߎߘߎ߲߫ ߡߊ߬ߡߙߊ߬ߟߌ߬ߟߊ ߟߎ߬ ߣߌ߫ ߘߌ߲߬ߞߌߙߊ ߕߊ ߟߎ߬، ߊ߬ ߞߣߐ ߘߐߥߙߊ߬ ߘߊ߫ ߗߋߦߊߟߌ ߛߌ߲߬ߝߏ߲ ߕߌ߲߬ߞߎ߬ߘߎ߲߬ߠߊ߬ߞߊ ߣߌ߫ ߡߙߊ߬ߓߊ߰ߘߟߊ߬ߞߊ ߟߎ߬ ߟߊ߫߸ߊ߬ ߣߌ߫ ߡߊ߬ߞߊ߲߬ߞߊ߲߬ߠߌ߲ ߣߌ߫ ߞߎ߲߬ߠߊ߬ߝߎ߬ߟߋ߲߬ߠߊ ߢߐ߲߯ߦߋ ߣߌ߲߬ ߞߍ߫ ߘߊ߫ ߛߊߓߎ߫ ߘߌ߫߸ ߞߏߕߌ߯ ߝߟߐ ߞߊ߬ ߘߐ߬ߞߣߍ߬ߟߌ ߓߘߍ ߞߍ߫߸ ߞߊ߬ ߞߏ ߟߎ߬ ߞߍߢߊ ߘߐ߬ߞߣߍ߫ ߘߊ߲߬ߠߊ߬ߕߍ߰ߟߌ ߓߟߏߡߊ߬߸ ߞߵߊ߬ ߓߍ߲߬ ߛߌ߯ߙߌ߲ ߟߌ߬ߤߟߊ ߟߎ߬ ߡߊ߬. ߞߊߕߙߍ߬ߕߍ߫ ߣߡߌߛߊߞߏ ߟߎ߬ ߡߊ߬ ߕߟߋ߬ ߝߌ߬ߟߊ߬ߣߍ߲ ߕߊ߬ߡߌ߲߬ߣߍ߲ ߢߌ߲߬ ߠߎ߬ ߘߐ߫. ((ߊ߲ ߠߊ߫ ߘߍ߬ߒ߬ߡߊ߬ ߖߊ߬ߓߌ߬ߦߊ߬ߟߌ ߦߋ߫ ߖߘߍ߬ߘߏ߲߬ߞߊ߲ ߠߋ߬ ߘߌ߫߸ ߞߵߊ߬ ߓߍ߲߬ ߟߌ߬ߤߟߊ ߢߌ߲߬ ߠߎ߬ ߡߊ߬)) ߊ߬ ߞߵߏ߬ ߞߘߐ ߞߍ߬ߙߍ߲߬ߘߍ ߊ߬ ߢߌ߬ߡߊ ߟߊ߫ ߓߊ߬؟ ߞߊ߬ ߓߊ߯ߙߊ ߞߍߢߊ ߘߐߞߣߍ߫ ߕߌ߲߬ߞߎߘߎ߲߫ ߡߊ߬ߡߙߊ߬ߟߌ ߣߌ߫ ߕߊ߲ߓߊ߲ߓߐߟߌ ߞߏߕߌ߮ ߢߍ߫. ߞߵߊ߬ ߦߌ߬ߘߊ߬ ߞߏ߫ ߖߊ߲߬ߕߏ߬ߟߌ ߓߍߣߊ߬ ߞߍ߫ ߡߌ߬ߙߌ߲߬ߘߌ ߟߊߞߊ߲ߘߊ ߝߊ߲߬ߞߊߘߏ߲߬ ߘߐ߫ ߊ߬ ߣߌ߫ ߞߊ߬ ߓߐ߰ߝߍ ߟߊߞߊ߲ߘߊ ߝߣߊ߫ ߛߊ߲ߞߘߐߕߊ߬. ߞߵߊ߬ ߓߍ߲߬ ߓߐ߰ߝߍ߬ߞߏ ߡߊ߲߬ߞߊ߲ ߞߘߎ߬ߜߍߟߍ߲ ߠߊߞߙߐ߬ߛߌ߬ߣߍ߲ ߢߌ߲߬ ߡߊ߬ ߛߌ߯ߙߌ߲߫. ߞߊ߬ ߞߎ߲߬ߠߊ߬ߛߌ߮ ߕߎ߲߬ߕߎ߲߬ ߖߙߎߡߎ߲ߦߟߍߡߊ߲ ߡߊ߬ߡߊ߬ߟߊ ߡߊ߬ ߡߍ߲ ߞߎ߲߬ߕߋߟߋ߲ ߦߋ߫ ߞߟߊߓߎߡߦߊߟߌ ߣߌ߫ ߢߊߞߎߘߦߊߟߌ ߘߌ߫. ߊ߬ ߣߌ߫ ߞߊ߬ ߛߌ߲߬ߝߏ߲߬ߢߊ߬ߟߌ߬ ߓߘߍ ߞߍ߫ ߞߍߞߎߛߊ߲ߧߊ ߛߊߣߌ߲ ߘߐߛߏߘߏ߲ߜߊߟߌ ߘߐ߫߸ ߛߌ߯ߙߌ߲ ߞߣߐ߫ ߊ߬ ߣߌ߫ ߜߍߞߊ߲߫ ߖߡߊߣߊ ߡߎ߰ߡߍ ߘߐ߫. ((ߊ߬ ߞߊ߬ ߖߡߊ߬ߙߌ ߘߌ߫ ߞߏ߫ ߞߊ߬ ߓߊ߯ߙߊ ߞߍ߫ ߝߘߏ߬ߓߊ߬ ߓߘߍߓߘߍߟߌ ߛߏ߯ߙߏߦߊߣߍ߲ ߘߎ߲ߡߕߊ ߞߊ߲߬)) ߏ߬ ߟߋ߬ ߞߍ߫ ߘߊ߫ ߞߎ߲߬ߝߊ߮ ߘߌ߫ ߞߏߕߌ߯ ߝߟߐ ߓߟߏ߫.