Catégorie : Actualités en N’Ko

ߞߐߣߊߞߙߌ߫ ߕߙߊߓߊ߫ ߕߟߋ߬ ߃߀/ ߂߀߂߆

ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߖߊ߲߬ߖߏ߲ ߘߏ߫ ߘߊߦߟߍ߬ ߞߐߟߐ߲ߓ ߞߎߓߋ ߞߣߐ߫، ߡߍ߲ ߞߍߣߍ߲߫ ߛߊ߬ߙߌ߬ߦߊ߬ ߞߎߘߊ߫ ߞߟߊ߬ߣߐ߰ߦߊ߬ߟߌ ߘߌ߫ ߞߏߟߊߕߍ߮ ߟߎ߬ ߟߊ߫ ߞߏ ߘߐ߫، ߡߎ߬ߕߎ߲߬ ߡߍ߲ ߛߌ߲߬ߝߏ߲߬ߢߊ߬ߕߐ߫ ߓߊ߯ߙߊ ߞߏ ߟߎ߬ ߘߐߞߣߍ߫ ߞߊ߲ߡߊ߬. ߘߊߘߐߓߍ߲ߠߌ߲ ߞߎߘߊ ߣߌ߲߬ ߓߘߊ߫ ߛߋ߲߬ߕߊ߰ߓߊ ߞߍ߫ ߸ ߞߵߊ߬ ߟߐ߬ ߟߥߊ߬ߟߌ߬ ߞߊ߲ߞߋߦߊ ߡߊ߬ ߛߌ߲߬ߝߏ߲߬ߘߊ ߛߏ߯ߙߏߦߊߣߍ߲ ߠߎ߬ ߞߎ߲߬ߠߊ߬ߛߌ߰ߦߊ߬ߟߌ ߛߌߟߊ ߝߍ߬، ߡߍ߲ ߞߎ߲߬ߛߌ߲߬ߣߍ߲߫ ߞߎ߲߬ߞߊߟߌߦߊ ߣߌ߫ ߞߐߝߟߌ߫ ߟߊߥߟߏ ߟߊ߫. ߕߏ߰ߝߏ ߏ߬ ߟߎ߬ ߞߎ߲߬ߛߌ߲ߣߍ߲߫ ߝߟߐߦߊ߫ ߝߊ߬ߛߏ߬ߟߊ߬ߞߊ ߞߊߡߊ߲ ߠߋ߬ ߡߊ߬. ߦߏ߫ ߛߌߡߊ߲ߘߎ߯ ߂߀߄߀ ߢߍߥߟߊ߫ ߏ߬ ߡߍ߲ ߣߐ߬ ߛߊ߬ߙߌ߬ߦߊ ߘߏ߫ ߟߊߘߌ߬ߢߍ ߛߋ߲ߛߋߘߋ߲ߧߊ߫ ߟߊ߫ ߓߊ߯ߙߊ ߞߍߗߌߦߊ ߟߎ߬ ߘߏ߲߬ߖߟߎ߬ߡߊ߬ߟߌ ߞߏߢߌߡߊ ߘߐ߫ ߝߘߏ߬ߓߊ߬ ߞߏ ߟߎ߬ ߟߥߊߟߌߟߌ ߛߌߟߊ ߝߍ߬. ߊ߬ ߓߊߛߌ߰ߣߍ߲߫ ߘߐ߬ߜߟߍ߬ߦߊ߬ߟߌ ߞߍߝߊߘߌ ߞߎߘߊ ߡߊ߬߸ ߞߵߏ߬ ߟߐ߬ ߓߊ߯ߙߊ߫ ߞߏߟߊߘߍߢߐ߲߯ߦߊ ߛߌߟߊ ߡߊ߬. ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߕߌ߲ߕߌ߲߫ ߡߊ߬ߝߊ ߟߊߛߓߊ߬ߕߌ ߢߊ߬ߒ߬ߞߐ߬ߓߊ߬ߟߌ߬ߦߊ ߞߊ߲߬ ߘߐ߬ߛߙߋ ߟߎ߬ ߓߊ߯ߙߊ ߘߐ߫ ߊ߬ ߣߌ߫ ߖߡߊ߬ߦߊ ߛߏ߬ߓߌ߬ߟߊ߬ߞߎߣߎ߲ ߢߊ߬ߕߣߐ߬ߡߊ ߓߊ߯ߙߟߊ ߟߎ߬ ߣߌ߫ ߢߐ߲߯ ߕߍ߫. ߊ߬ ߞߊ߬ ߖߊ߲߬ߓߌ߬ߟߊ߬ߟߌ ߞߍ߫ ߕߞߌߦߊ ߓߊ߯ߙߊ ߟߎ߬ ߟߊ߫ ߛߊ߬ߙߌ߬ߦߊ ߡߊ߫ ߘߌ߬ߢߍ߬ ߡߍ߲ ߡߊ߬߸ ߞߵߊ߬ ߟߐ߬ ߥߊ߯ߕߌ ߣߌ߲߬ ߡߊ߬ߜߟߍ߬ߦߊ߬ߟߌ ߟߎ߬ ߡߊ߬߸ ߏ߬ ߡߍ߲ ߦߋ߫ ߖߊ߲߬ߓߌ߬ߟߊ߬ߟߌ ߞߍ߫ ߟߊ߫ ߕߏ߰ߝߏ ߘߏ߲߬ߖߟߎ߬ߡߊ߬ߣߍ߲ ߠߊ߫ ߢߌߣߌ߲ߞߏ߫ ߞߋߟߋ߲ߢߐ߲߯ߦߊ ߘߐ߫. ((ߡߐ߰ ߛߌ߫ ߛߋߞߏߦߊ߫ ߕߍ߫ ߝߘߏ߬ߓߊ߫ ߞߎ߲߬ߕߋߟߋ߲߫ ߠߎ߬ ߡߊߟߐ߲ ߘߐ߫ ߝߏ߫ ߡߞߊ߬ߝߏ߬ߟߌ ߓߊ߯ߙߊ ߘߏ߫ ߟߎ߫ ߦߋ߫ ߞߍ߫)) ߛߊ߬ߙߌ߬ߦߊ߬ߛߋ߲ ߟߊߘߊ߲ߣߍ߲ ߦߋ߫ ߞߘߐߓߐߟߌ ߓߟߏߟߊߕߎ߲߰ߕߊ ߟߋ߬ ߘߌ߫ ߞߵߊ߬ ߓߍ߲߬ ߓߟߏߡߊߢߌ߲ߦߊ ߡߊ߬ߝߊ߲ ߡߊ߬ ߞߵߊ߬ ߟߐ߬ ߓߊ߯ߙߊ ߓߐߣߍ߲ߢߐ߲߰ߡߊ ߟߎ߬ ߡߊ߬ ߡߍ߲ ߓߊߛߌ߰ߣߍ߲ ߞߎ߬ߙߎ߲߬ߘߎ ߘߣߊ߬ߕߍ߰ߣߍ߲ ߘߏ߫ ߞߊ߲߬. ߞߊߕߙߍ߬ߕߍ߫ ߖߎ߯ߓߍߟߌ ߛߎ߯ߦߊ ߟߎ߬ ߡߊ߬. ߞߏ߫ ߟߎ߫ ߞߍ߫ ߥߊ߯ߕߌ ߟߎ߬ ߡߊߓߏ߬ߢߊ ߣߌ߫ ߞߎ߲߬ߦߌ߬ߘߊ߬ߟߌ ߟߎ߬ ߟߊߞߍ߲ߘߍߡߦߊ ߘߐ߫. ߊ߬ ߟߊߢߌߣߌ߲ ߠߋ߬ ߟߊ߬ߥߟߏ߬ߟߌ ߓߟߏߡߦߊߟߌ߫ ߛߏ߯ߙߏߦߊߣߍ߲ ߘߌ߫. ߡߍ߲ ߘߌ߫ ߛߋ߫ ߘߐߛߏߘߏ߲ߜߊ߫ ߟߊ߫ ߡߙߊ߬ߦߊ ߟߊ߫ ߡߙߌߣߊ߲ ߠߎ߬ ߟߊ߫ ߞߋߟߋ߲ߘߌ߫. ((ߛߊ߬ߙߌ߬ߦߊ߬ߛߋ߲ ߦߋ߫ ߡߐ߰ ߞߍ߫ ߟߊ߫ ߖߊ߬ߓߌ߬ߦߊ߬ߟߊ ߟߋ߬ ߘߌ߫ ߌ ߞߍߥߊߟߌ߫ ߟߎ߬ ߘߐ߫، ߓߊ߯ߙߊ߫ ߘߌߦߊ ߕߍ߫ ߞߎߡߊ ߘߌߦߊ߫ ߓߘߍ ߘߌ߫ ߓߊ߯ߙߊ߫ ߦߙߐ ߟߋ߬، ߞߐߝߟߌ ߟߊߓߐ ߦߙߐ ߟߋ߬، ߊ߬ ߣߌ߫ ߡߍ߲ ߦߴߊ߬ ߞߊ߲߬ ߞߊ߬ ߞߍ߫)) ߦߊ߯ߟߊ߫ ߊ߬ ߞߵߏ߬ ߡߊߜߟߍ߬ߦߊ߬ ߓߊ߬؟

ߞߏߕߌ߯ ߝߟߐ ߓߘߊ߫ ߘߐ߬ߞߣߍ߬ߟߌ ߞߍ߫ ߞߎ߲߬ߠߊ߬ߛߌ߮ ߛߋߞߏߦߊ ߣߴߊ߬ ߞߍߥߊߟߌ ߟߎ߬ ߟߊ߫ ߓߊ߯ߙߊ ߘߊߞߎ߲ ߠߎ߬ ߘߐ߫. ߞߵߊ߬ ߓߍ߲߬ ߞߐߝߟߌ߫ ߢߣߊߡߊ ߟߎ߬ ߟߊߥߟߏ ߡߊ߬߸ ߊ߬ ߣߌ߫ ߞߊ߬ ߓߍ߲߬ߒ߬ߡߊ߬ߞߊ߲ ߠߎ߬ ߟߥߊߟߌ߫. ߊ߬ ߞߵߊ߬ ߕߌ߲ߕߌ߲߫ ߓߍߓߊ߯ߦߊ߫ ߡߌ߬ߙߌ߲߬ߡߊ ߞߊ߲߬. ߡߍ߲ ߓߍ߲߬ߕߐ߫ ߟߊ߬ߥߟߏ߬ߟߌ ߞߎ߲߬ߕߊ߮ ߡߊ߬. ߡߍ߲ ߘߐߖߊ߬ߣߍ߲ ߞߵߊ߬ ߞߣߐ߬ߜߍ߲߫ ߓߟߏߓߘߍߡߦߊ߫ ߞߏ ߘߐ߫. ߞߎ߲߬ߦߌ߬ߘߊ߬ߟߌ߫ ߟߊߥߟߏߣߍ߲ ߦߋ߫ ߡߙߊ߬ߦߊ ߥߊ߬ߣߌ߲߬ߞߋ ߟߋ߬ ߘߌ߫، ߞߵߊ߬ ߟߐ߬ ߝߘߏ߬ߓߊ߫ ߓߘߍ߬ߓߘߍ߬ߟߌ ߡߊ߬ ߡߊ߬ߡߙߊ߬ߟߌ ߛߋ߲߬ߠߞߊ߬ߟߌ߬ߦߊ ߘߐ߫، ߞߍߢߊ ߓߟߏߦߊߣߍ߲ ߦߋ߫ ߝߊ߲߬ߝߘߊ߬ߦߊ߬ߟߌ߫ ߝߟߐߦߊ ߟߋ߬ ߘߌ߫߸ ߞߵߊ߬ ߟߐ߬ ߢߎߡߍߦߊߟߌ ߡߊ߬ ߞߵߊ߬ ߟߐ߬ ߟߛߊ߬ߣߌ߲߬ߧߊ߬ߟߌ ߣߌ߫ ߖߎ߬ߓߐ ߟߎ߬ ߟߊ߫ ߞߏ ߡߊ߬. ((ߣߴߊ߲ ߗߌߙߏ߲ ߘߊ߫ ߖߡߊ߬ߣߊ ߟߋ߬ ߗߌߙߏ߲ߣߍ߲ ߖߡߊ߬ߦߊ ߓߟߏߡߊ߬ ߊ߲ ߕߍߣߊ߬ ߛߐ߲߬ ߣߴߏ߬ ߡߊ߬ ߢߊ߫ ߛߌ߫ ߡߊ߬. ߣߴߏ߬ ߕߍ߫ ߟߏ߲ ߘߏ߫ ߢߌ߬ߣߌ߲߬ߞߊ߬ߟߌ߬ ߓߘߍ ߓߍߣߊ߬ ߞߍ߫ ߡߊ߬ߞߏ ߘߌ߫ ߞߍ߫ ߓߊ߯ߙߊߟߊ߲߫ ߓߘߍ ߟߊ߫ ߞߵߊ߬ ߕߘߍ߬ ߓߊ߯ߙߊߝߋ߲߫ ߕߍ߫ ߦߋ߲߬))

ߞߐߣߊߞߙߌ߫ ߕߙߊߓߊ ߕߋ߬ߟߋ߫ ߂߇/ ߂߀߂߆

ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߞߊ߬ ߖߌ߬ߣߍ߬ ߓߊߛߌߦߊ ߝߊ߲ߓߏ߲߫ ߝߟߐ ߘߊߦߟߍߟߌ ߖߊ߲ߖߏ߲ ߢߣߊߓߊ߯ߦߊ߫ ߡߍ߲ ߕߐ߯ ߞߏ߫ ߝߘߊ߬ߝߌ߲߬ߠߊ߫ ߓߊߛߌߦߊ (ߡߋߘߌߣ ߊߝߙߌߞߊ߬) ߏ߬ ߡߍ߲ ߡߊߞߍߣߍ߲߫ ߡߏ߬ߙߌ߬ߓߊ߬ߦߊ߫ ߝߏߘߋߞߊߙߌߦߊ߫ ߡߙߊ߬ߓߊ߰ߘߊ ߞߣߐ߫. ߣߴߊ߬ ߟߐ߬ߣߍ߲ ߜߟߊ߬ߜߟߊ߬ ߆߀߀߀ ߘߎ߰ߞߣߍ ߞߊ߲߬ ߡߍ߲ ߓߊ߯ߙߊ߫ ߛߙߊ߫ ߥߊߣߍ߲߫ ߝߏ߫ ߘߟߊ߫ ߗߋ߲߬ߥߟߎ߬ ߄ ߘߍ߲߰ߦߊ߬ߟߌ ߞߍߝߊߘߌ ߣߌ߲߬ ߦߋ߫ ߞߟߍ߬ߦߊ ߣߝߊ߬ߢߐ߰ߦߊ ߘߏ߫ ߟߋ߬ ߞߐߝߟߌ ߘߌ߫ ߖߌ߬ߣߍ߬ ߣߊ߲߬ߝߟߏ߬ߘߏ߲߬ߘߊ߬ߟߊ ߟߎ߬ ߣߌ߫ ߍ߲ߘߎߞߊ ߟߎ߬ ߣߌ߫ ߟߌ߲ߓߊ߲ߞߊ ߟߎ߬ ߣߌ߫ ߢߐ߲߯ ߕߍ߫. ߊ߬ ߟߐ߬ߣߍ߲ ߝߘߏ߬ߓߊ߬ ߓߊߛߌ߫ ߟߎ߬ ߟߋ߬ ߟߊߘߊ߲߫ ߠߊ߫. ߞߵߊ߬ ߓߍ߲߬ ߝߊ߬ߛߏ߫ ߣߊ߬ߕߊ߫ ߡߊ߬ߞߏ ߟߎ߬ ߡߝߊ ߡߊ߬، ߘߊ߫ ߣߐ߯ߡߊ߲ ߛߐ߬ߘߐ߲߬ ߞߏ ߡߊ߬، ߞߵߊ߬ ߓߍ߲߬ ߕߌ߲߬ߞߎߘߎ߲ ߟߐ߯ߝߍ ߟߎ߬ ߡߊ߫ ߛߐ߬ߘߐ߲߬ ߞߏ ߡߊ߬߸ ߝߘߏ߬ߓߊ߬ ߛߊߣߌߧߊ ߣߌ߫ ߞߍ߲ߘߍߦߊ ߞߏߕߌ߮ ߞߊߦߌߕ ߛߊߟ ߞߵߌ ߕߌ߲ߕߌ߲߫ ߞߐߝߟߌ߫ ߞߎ߲߬ߞߋߟߋ߲߫ ߣߊ߬ߝߊ ߟߋ߬ ߞߊ߲߬߸  ߞߵߊ߬ ߟߐ߬ ߖߎ߬ߓߐ ߟߎ߬ ߞߏ ߡߊ߬ ߡߌ߬ߙߌ߲߬ߘߌ ߞߊ߲߬. ߖߊ߲߬ߓߌ߬ߟߊ߬ߟߌ ߘߐ߫ ߞߏ߫ ߘߌ߲߬ߞߌߙߊ ߡߌ߬ߙߌ߲߬ߘߌ ߟߎ߬ ߟߊ߫ ߥߙߎߞߌ ߟߐ߬ߛߋ߲ ߢߊ߬ߒ߬ߞߐ߬ߓߊߟߌ ߟߋ߬ ߖߌ߬ߣߍ߬ߞߊ ߟߎ߬ ߡߊ߬ߞߏ߬ߡߊ߬ ߓߊߛߌ߫ ߓߘߍ߫ ߘߎ߲ߡߕߊ ߟߎ߬ ߟߊߛߐ߬ߘߐ߲߬ ߖߏߣߊ ߣߴߊ߬ ߛߐ߲߬ߞߐ ߟߊߣߐ߰ߦߊ ߘߌ߫.

ߖߎ߬ߟߊ߬ߦߊ ߣߌ߫ ߘߍ߲߰ߦߊ߬ߟߌ ߞߏߕߌ߮ ߝߊߕߌߡߊ߫ ߞߡߊ߬ߙߊ߫ ߞߵߊ߬ ߡߊߜߟߍ߬ߦߊ߫ ߞߏ߫ ߝߊ߲ߓߏ߲ ߢߌ߲߬ ߦߋ߫ ߡߙߊ߬ߦߊ ߟߎ߬ ߥߍ߬ߣߍ ߟߋ߬ ߟߊߛߘߋߦߊ߫ ߟߊ߫، ߞߵߊ߬ ߓߍ߲߬ ߘߌ߲߬ߞߌߙߊ ߢߡߊߦߟߍߡߊ߲߫ ߟߊ߬ߖߊ߲߬ߞߏ߬ߟߌ ߡߊ߬߸ ߊ߬ ߣߌ߫ ߘߍ߲߰ߦߊ߬ߟߌ ߝߊ߬ߛߏ߬ߟߊ߬ߞߊ ߝߊ߲߬ߞߊߘߏ߲߭ ߡߊ߬. ߡߍ߲ ߘߌ߫ ߖߌ߬ߣߍ߬ ߓߌ߬ߟߊ߬ ߟߊ߬ߥߟߏ߬ߟߌ ߞߊߓߋ ߟߊ߫، ߞߵߊ߬ ߟߐ߬ ߞߣߐߟߊ ߡߊ߬ߞߟߌ߬ߟߌ ߡߊ߬ ߞߵߊ߬ ߓߍ߲߬ ߕߌ߲߬ߞߎߘߎ߲ ߟߐ߯ߝߍ߫ ߜߛߊߢߐ߲߰ߦߊ߬ ߞߏ ߡߊ߬. ߞߏߕߌ߯ ߝߟߐ ߞߵߊ߬ ߦߌ߬ߘߊ߬ ߞߏ߫ ߓߊ߯ߙߊ߫ ߣߌ߲߬ ߦߋ߫ ߘߍ߲ߖߘߍߟߦߊ߫ ߕߐ߰ߡߊ߬ߛߙߋ߬ ߓߘߍ ߟߋ߬ ߘߌ߫)) ߊ߬ ߞߵߊ߬ ߦߌ߬ߘߊ߬ ߞߏ߫ ((ߘߍ߲ߖߘߍߟߦߊ ߘߊߡߌ߬ߣߊ ߟߋ߬ ߞߊ߬ ߛߋ߫ ߌ ߖߘߍ߬ߓߊߟߏ߫ ߟߊ߫ ߞߵߌ ߖߘߍ߬ ߘߊ߲ߘߊ߫)) ߊ߬ ߞߊ߬ ߕߊ߲߬ߘߏ߬ߟߌ ߞߍ߫ ߞߵߊ߬ ߓߍ߲߬ ߣߊ߲߬ߝߟߏ߬ߘߏ߲߬ߘߟߊ߬ߟߊ ߟߎ߬ ߟߊ߫ ߓߊ߯ߙߊ߫ ߡߊ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߛߌߓߟߏߡߦߊ߫ ߛߌߟߊ ߝߍ߬. ߡߍ߲ ߘߌ߫ ߛߋ߫ ߓߊ߯ߙߊ߫ ߟߊߥߟߏ߫ ߟߊ߫، ߞߵߌ ߢߊߛߌ߲߯ ߜߛߊ߬ߢߐ߲߰ߦߊ ߟߎ߬ ߡߊ߬. ߞߏߕߌ߯ ߝߟߐ ߞߊ߬ ߝߟߐߦߊ ߘߌ߫ ߢߎߡߍߞߏ ߟߊ߫ ߢߝߍߕߊ߯ ߡߊ߬ ߞߍ߲ߘߍߦߊ ߞߊߡߊ߲ ߘߐ߫ ߛߊ߲߬ ߘߊ߲ߘߐ߫ ߣߌ߲߬ ߞߣߐ߫. ߞߊߕߙߍ߬ߕߍ߫ ߛߋߞߏߦߊ߫ ߡߞߊߝߏ ߞߏ߫ ߟߎ߫ ߘߊ߲ߘߊߛߏ߫ ߟߎ߬ ߞߣߐ߫، ߞߊ߬ ߘߏ߫ ߓߐ߫ ߡߐ߰ ߛߊ߬ߕߊ ߦߙߌߞߊ ߟߊ߫. ߏ߬ ߡߍ߲ ߦߋ߫ ߞߟߍ߬ߦߊ ߣߝߊ ߟߎ߬ ߦߌ߬ߘߊ߬ ߟߊ߫ ߥߙߎߞߌ ߓߟߏߡߊ߬. ߝߊ߲ߓߏ߲߫ ߘߍ߲߰ߦߊ߬ߟߌ ߝߊ߬ߛߏ߬ߟߞߊ߬ߦߊ ߝߊ߲߬ߞߊߘߏ߲߭ ߛߌߟߊ ߝߍ߬. ߡߍ߲ ߣߊ߬ߕߐ߫ ߓߊ߲ߓߊ߲ߠߌ߲ ߞߍ߫ ߟߊ߫ ߓߊߛߌ߫ ߟߊߛߐߘߐ߲ ߘߐ߫. ߞߊ߬ ߖߊ߲߬ߓߌ߬ߟߊ߬ߟߌ ߞߍ߫ ߡߙߌߘߐ ߏ߬ ߟߎ߬ ߟߊ߫߸ ߞߵߊ߬ ߓߍ߲߬ ߡߙߊ߬ߦߊ ߟߎ߬ ߡߙߌߦߊ ߡߊ߬ ߖߌ߬ߣߍ ߞߍ ߞߏ ߘߐ߫ ߟߊ߬ߥߟߏ߬ߟߌ ߣߌ߫ ߟߊ߬ߝߏ߬ߦߌ߬ߟߌ   ߖߡߊ߬ߣߊ ߘߌ߫. ߦߏ߫ ߛߌߡߊ߲ߘߎ߯ ߂߀߄߀ ߢߍߥߟߊ߫ ߞߊ߬ ߝߐ߫ ߢߊߡߍ߲ ߊ߬ ߣߌ߫ ߞߊ߬ ߡߊ߬ߜߟߍ߬ߦߊ߬ߟߌ ߞߍ߫ ߥߙߎߞߌ ߞߏ ߟߊ߫ ߞߵߊ߬ ߓߍ߲߬ ߘߌ߲߬ߞߌߙߊ ߡߐ߬ߟߐ߲߬ߡߦߊ߬ߟߌ ߖߟߐ߬ߞߐ ߡߊ߬ ߊ߬ ߣߌ߫ ߞߊ߬ ߘߏ߫ ߓߐ߫  ߟߊ߬ߛߣߍ߬ߟߌ ߘߍ߲ߜߘߍߟߦߊ ߟߊ߫.

ߞߐߣߊߞߙߌ߫ ߕߙߊߓߊ߫ ߕߟߋ߬ ߂߅/ ߂߀߂߆

ߛߌ߰ߞߊ߲ ߢߡߊߦߟߍߡߊ߲߫ ߞߏ ߟߎ߬ ߓߊ߲ߣߍ߲ ߞߐ ߞߏߕߌ߯ ߝߟߐ ߓߘߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߝߙߋߞߋ ߡߊߝߊ߰ߢߊ ߝߊ߲߬ߝߘߊ߬ ߝߊ߲߬ ߜߘߍ߫ ߦߌ߬ߘߊ߬ ߊ߬ ߟߊ߫ ߓߋߟߋ߲ߠߊ ߘߐ߫. ߛߌ߰ߘߊ߫ ߏ߬ ߘߐ߫ ߊ߬ ߞߊ߬ ߝߘߏ߬ߓߊ߬ ߛߐ߬ߘߐ߲߬ߘߊ ߡߞߊ߬ߝߏ߫ ߡߊ߬ߜߟߍ߬ߦߊ߬ߟߌ ߞߍ߸ ߞߊ߬ ߓߍ߲߬ ߖߐ߰ߣߍ߬ߦߊ߬ߟߌ ߟߎ߬ ߕߟߊߢߊ ߡߊ߬ ߞߊ߬ ߝߙߍߕߍߦߊߟߌ ߞߍ߫ ߣߊ߲߬ߝߟߏ߬ߦߊ ߝߙߋ߬ߛߓߍ ߟߎ߬ ߟߊ߫ . ߏ߬ ߡߍ߲ ߢߊ߬ߞߏ߬ߓߊ ߦߋ߫ ߝߛߎߞߎߦߊߟߌ ߡߊ߬ߝߊ ߟߊ߫ ߛߓߊ߬ߕߌ ߘߐ߫ ߊ߬ ߣߌ߫ ߞߊ߬ߝߏ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲߬ߓߊ ߟߤߊߕߍ߬ߦߊ߬ߟߌ ߘߐ߫.(( ߝߘߏ߬ߓߊ߬ ߛߐ߬ߘߐ߲ߘߊ ߟߎ߬ ߕߊ߬ߡߌ߲߬ ߘߊ߫ ߖߌ߬ߣߍ߬ ߕߊߡߊ߲߫ ߥߟߎߡߊ߫ ߁߈ ߈߅߉ ߟߊ߫ ߂߀߂߀ ߠߊ߫ ߞߊ߬ ߕߊ߬ߡߌ߲߬ ߥߟߎߡߊ߫ ߄߅߀߀߀ ߟߊ߫ ߂߀߂߅ ߟߊ߫ ߏ߬ ߦߋ߫ % ߁߃߉ ߡߞߊ߬ߝߏ߬ߟߌ ߟߋ߬ ߦߌ߬ߘߊ߬ ߟߊ߫. ߣߊ߲߬ߝߟߏ߬ߦߊ߬ ߛߙߋߓߍ ߟߎ߬ ߢߡߊߦߟߍߡߊ߲ ߊ߬ ߣߌ߫ ߡߛߍ߬ߞߍ߬ߡߛߍߞߍ ߟߎ߬ ߝߙߍߕߍߦߊߟߌ ߊ߬ ߣߌ߫ ߡߊ߬ߡߙߊ߬ߟߌ߫ ߘߐ߬ߛߙߋ ߞߎ߲߬ߞߋߟߋ߲߫ ߠߎ߬ ߘߊߘߐߓߍ߲ߠߌ߲ ߏ߬ ߞߊ߬ ߖߊ߬ߕߋ ߡߞߊ߬ߝߏ ߞߊ߲߬ ߤߊ߲߯ ߞߊ߬ ߛߋ߫ ߖ. ߕ. ߥߟߎߡߊ߫ ߂߄߆ ߘߐ߫. ߊ߲ ߘߏ߲߬ ߓߍ߯ ߞߵߊ߬ ߟߐ߲߫ ߞߏ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߠߋ߬ ߝߛߎߞߎߦߊߟߌ ߡߊ߬ߝߊ ߝߊ߲߬ߞߊߘߏ߲߬ ߠߊ߫. ߊ߬ ߣߌ߫ ߟߤߊ߬ߕߍ߬ߦߊ߬ߟߌ ߞߊ߬ߝߏ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲߬ߓߊ ߟߎ߬ ߡߊ߬)) ߞߎߡߊ ߞߎ߲߬ߘߏ߲ ߘߐ߫ ߊ߬ ߞߊ߬ ߘߐ߬ߞߣߍ߬ߟߌ ߞߍ߫ ߞߏ߫ ߝߘߏ߬ߓߊ߬ ߝߛߎߞߎߦߊߟߌ ߟߊߕߊ߬ߡߌ߲ ߓߘߊ߫ ߞߍ߫ ߛߊߓߎ߫ ߘߌ߫، ߞߊ߬ ߡߐ߬ߟߐ߲߬ ߞߎߘߊ߫ ߘߌ߫ ߝߊ߬ߛߏ ߓߣߊ߬ߦߊ߬ ߛߌߟߊ ߟߎ߬ ߡߊ߬ ߞߊ߬ ߥߊ߫ ߛߋ߫ ߤߊ߲߯ ߘߟߊ߫ ߥߟߎߡߊ߫ ߃߆ ߘߐ߫ ߥߟߊ߫ % ߅߁، ߂ ߞߊ߬ ߖߌ߬ߣߍ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߠߊ߫ ߦߟߍ߬ ߞߵߊ߬ ߓߊ߲ߓߊ߲߫ ߊ߬ ߣߌ߫ ߞߵߊ߬ ߛߌߓߟߏߡߦߊ߫ ߡߊ߬ߡߊ߬ߟߌ ߘߐ߫ ߡߐ߰ ߕߘߍ߬ ߕߍ߫ ߡߍ߲ ߖߌ߱ ߟߊ߫ ߞߊ߬ߞߘߐ߬.

ߞߐߣߊߞߙߌ߫ ߕߙߊߓߊ߫ ߕߋ߬ߟߋ߫ ߂߄/ ߂߀߂߆

ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߞߊ߬ ߟߊ߬ߞߢߐ߬ߡߊ߬ߟߌ ߘߏ߫ ߟߊߘߌ߬ߢߍ߬߸ ߊ߬ ߞߊ߬ ߓߙߌߕߊ߲ߓߊ߫ ߣߊ߲߬ߝߟߏ߬ߘߏ߲߬ߘߊ߬ߟߊ ߗߋߦߊߟߌ߫ ߢߊ߬ߕߣߐ߬ߡߊ߬ߓߊ ߘߏ߫ ߟߊߛߣߍ߫ ߡߍ߲ ߢߍߡߌ߬ߘߊ߬ߣߍ߲ ߕߘߍ߬ (ߎ ߞ ߍߛ ߍߝ) ߛߟߊߕߌ߯ ߛߊߡߌߡ ߔߊߙߑߞߊߛ ߓߟߏ߫. ߏ߬ ߡߍ߲ ߠߊߘߏ߲߬ ߘߴߊ߬ ߘߐ߫ ߕߍߓߊ߯ߦߊ ߡߊ߲߬ߕߏ߲߬ߕߍ߬ߟߊ߬ߞߊ ߣߌ߫ ߝߊ߲߬ߝߘߊ߬ߦߊ߬ߟߌ ߣߌ߫ ߥߙߎߞߌ ߞߏߕߌ߮ ߌߛߑߡߊߦߍߟ ߣߊ߰ߓߋ߬ ߓߟߏ߫. ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߟߐ߬ߒ߬ߗߋ߬ߟߊ ߣߌ߲߬ ߟߊ߬ߢߌߣߌ߲ ߠߋ߬ ߞߟߍ߬ߦߊ߫ ߣߝߊ߬ߢߐ߲߰ߦߊ ߘߌ߫ ߖߌ߬ߣߍ߬ ߣߌ߫ ߝߊ߰ߡߊ߬ߟߊ߫ ߟߊߘߍ߬ߣߍ߲ ߕߍ߫. ߊ߬ ߞߎ߲߭ ߠߋ߬ ߣߕߊ߬ߘߐ߬ߛߌ߮ ߖߍ߬ߘߍ ߖߍ߬ߘߍ ߟߎ߬ ߘߌ߫ ߡߍ߲ ߘߌ߫ ߖߌ߬ߣߍ߬ ߡߙߊ߬ߦߊ ߟߎ߬ ߘߍ߲߬ߞߣߍ߬ߦߊ߫ ߛߊ߫ ߊ߬ߟߎ߬ ߘߌ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߛߌߓߟߏߡߦߊߣߍ߲ ߛߐ߬ߘߐ߲߬، ߡߝߊ߬ߣߍ߲ ߣߌ߫ ߜߛߊ߬ߢߐ߲߰ߦߊ߬ߕߊ ߛߐ߬ߘߐ߲߬ ߘߐ߫. ߏ߬ ߡߍ߲ ߣߌ߫ ߛߌߡߊ߲ߘߎ߯ ߂߀߄߀ ߢߍߥߟߊ߫ ߦߋ߫ ߥߊߢߐ߲߯ߡߊ ߘߌ߫. ߘߡߊߝߊߟߋ߲ ߛߋ߲߬ߝߍ߬ ߖߊ߬ߕߋ߬ߘߐ߬ߛߌ߰ ߛߏ߯ߙߏߦߊߣߍ߲߫ ߛߌߦߊߡߊ߲߫ ߛߌ߰ ߘߊ߫ ߛߋ߲߬ߞߊ߲߬. ߞߊߕߙߍ߬ߕߍ߫ ߡߊ߬ߡߙߊ߬ߟߌ߬ߟߌ ߟߎ߬ ߡߊ߬ߞߍߘߊ ߟߐ߬ ߞߏ ߡߊ߬ ߞߟߏߡߊ߬. ߊ߬ ߣߌ߫ ߢߌߣߌ߲ߞߏ ߞߘߎ߬ߜߍߟߍ߲ ߠߎ߬ ߘߐ߫ ߞߊߕߙߍ߬ߕߍ߫ ߛߌߟߊ ߖߎ߬ߓߐ ߟߎ߬ ߡߊ߬ߘߎ߮ ߡߊ߬߸ ߛߊ߫ ߖߌ ߛߐ߬ߘߐ߲߬ ߞߏ ߣߌ߫ ߢߎߡߍ ߟߊ߫ ߖߌ߰ߣߌ߬ߦߟߍ ߘߌ߫ ߣߐ߰ߦߊ߬ ߖߊ߬ߕߋ߬ߘߐ߬ߛߌ߮ ߢߌ߲߬ ߠߎ߬ ߝߊ߲߬ߓߊ ߕߘߍ߬ ߓߘߊ߫ ߓߊ߲߫ ߓߐ߫ ߟߊ߫ ߢߊ߫ ߟߊ߫. ߏ߬ ߡߍ߲ ߦߋ߫ ߞߎ߲߬ߠߊ߬ߛߌ߮ ߥߍ߬ߣߍ ߦߌ߬ߘߊ߬ ߟߊ߫߸ ߞߊ߬ ߢߡߊߦߟߍߡߊ߲߫ ߛߏ߯ߙߏߦߊߣߍ߲ ߓߌ߬ߟߊ߬ ߖߡߊ߬ߣߊ ߞߣߐ߫. ߞߏߕߌ߯ ߝߟߐ ߞߊ߬ ߝߟߐߦߊ ߘߌ߫ ߖߊ߬ߕߋ߬ߘߐ߬ߛߌ߰ ߕߐ߰ߡߊ߬ߛߙߋ߬ߡߊ ߟߎ߬ ߟߋ߬ ߡߊ߬. ߏ߬ ߟߎ߬ ߡߍ߲ ߠߎ߬ ߦߋ߫ ߓߊ߯ߙߊ߫ ߞߎ߲ߓߊ ߟߎ߬ ߘߐ߫ ߖߊ߬ߕߋ߬ߘߐ߬ߛߌ߮ ߓߐߒߢߟߊ ߛߌߟߊ ߝߍ߬. ߞߊߕߙߍ߬ߕߍ߫ ߖߎ߬ߓߐ ߟߎ߬ ߞߊߡߊ߲ ߡߊ߬. ߢߎߡߍߦߊߟߌ ߣߌ߫ ߘߊ߬ߡߊ߲߬ߞߏ ߡߊ߬ߘߎ߮ ߘߐ߫. ߛߐ߬ߘߐ߲߬ߘߊ߫ ߛߎ߲ߞߎ߲ߡߊ ߟߎ߬ ߘߐߛߏ߲ߘߏ߲ߜߊ ߛߌߟߊ ߝߍ߬، ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߖߡߊ߬ߙߌ ߘߌ߫ ߞߏ߫ ߞߊ߬ ߢߡߊߦߟߍߡߊ߲߫ ߘߐߘߎ߲߬ߧߊ߬ߣߍ߲ ߘߊߡߌ߬ߣߊ߬ ߞߵߊ߬ ߟߐ߬ ߖߌ߬ߣߍ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߡߊ߬. ߏ߬ ߛߊߓߎ߫ ߟߊ߫ ߊ߬ ߞߊ߬ ߥߙߎߞߌ ߞߍߕߊ ߖߏߣߊ ߟߎ߬ ߡߊߜߟߍ߬ߦߊ߫ ߞߏߛߓߍ߫. ߊ߬ ߣߌ߫ ߡߊ߬ߘߎ߮ ߡߍ߲ ߠߎ߬ ߝߊ߲߬ߞߊ ߞߊ߫ ߓߏ߲߬ ߓߐ߰ߝߍ߬ߞߊ߲߬ߞߋ߬ߦߊ ߘߐ߫ ߦߏ߫: ߛߣߍ߬ߞߍ، ߡߊ߬ߘߏ߬ߠߌ߲߬ߠߌ߲، ߊ߬ ߣߌ߫ ߢߎߡߍߦߊߟߌ، ߞߵߊ߬ ߓߍ߲߬ ߞߊ߲ߞߋߦߊ ߝߊ߲߬ߝߌ߬ߟߊ߬ߡߊ ߕߎ߬ߡߊ߬ߣߍ߲߬ ߘߌߡߊ߲ ߡߊ߬߸ ߏ߬ ߦߋ߫ ߢߝߍߕߊ߯ ߘߎ߲ߡߊߣߍ߲ ߢߐ߲߰ ߛߐ߬ߘߐ߲߬ ߜߏߡߊ߲ ߠߋ߬ ߘߌ߫. ((ߊ߲ ߧߋ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߛߌߓߟߏߡߦߊߣߍ߲ ߠߋ߬ ߝߍ߬، ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߡߍ߲ ߘߎ߲ߣߍ߲ ߕߍ߫ ߘߊ߬ߡߊ߲ ߡߊ߬ߘߎ߮ ߟߊ߫)) ߊ߬ ߞߵߏ߬ ߟߊ߲ߞߣߍߡߦߊ߫ ߓߊ߬؟ ߕߏ߰ߝߏ߬ ߞߋߟߋ߲߫ ߏ߬ ߛߋ߲߬ߝߍ߬ ߊߡߊߘߎ߫ ߎߙߌ߬ ߓߊ ߞߊ߬ ߖߌ߬ߣߍ߬ ߞߏߢߊ ߡߝߊߣߍ߲ ߠߊ߫ ߡߐ߰ ߡߊߛߊ߲߬ߡߊ߲߬ ߦߌ߬ߘߊ߬. ߏ߬ ߡߍ߲ ߦߋ߫ ߡߐ߰ ߡߊߞߟߌ߫ ߟߊ߫ ߖߊ߬ߕߋ߬ߘߐ߬ߛߌ߮ ߘߊߦߟߍߟߌ ߡߊ߬߸ ߏ߬ ߦߋ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߓߐ߰ߝߍ߬ ߟߊ߫ ߓߘߍ߬ߦߊ ߟߋ߬ ߦߌ߬ߘߊ߬ ߟߊ߫. ߘߎߢߊ߫ ߞߊߓߋ ߟߊ߫ ߡߝߊ߬ߟߋ߲߬ߠߌ߲ ߛߘߊ߫ ߘߐ߫: ((ߖߌ߬ߣߍ߬ ߓߌߣߍ߲߫، ߖߌ߬ߣߍ߬ ߦߋ߫ ߞߏߢߊߟߊ߲ߘߌ ߟߋ߬ ߘߌ߫، ߡߍ߲ ߘߊߦߟߍ߬ߣߍ߲ ߣߊ߲߬ߝߟߏ߬ߘߏ߲߬ߘߊ߬ߟߊ ߢߍ߫)) ߊ߬ ߞߵߏ߬ ߞߐߡߊߓߌ߲ߓߌ߲ ߓߊ߬؟ ߓߙߌߕߊ߲ߓߊ߫ ߗߋߦߊߟߌ߫ ߘߐߘߏ߲߰ߣߍ߲ ߕߘߍ߬ ߥߊߟߌߘߊ߫ ߄߀ ߣߌ߫ ߞߐ߫ ߟߋ߬ ߟߊ߫߸ ߊ߬ ߣߌ߫ ߣߊ߲߬ߝߟߏ߬ߦߊ߬ߟߌ ߛߌ߲߬ߝߏ߲߬ߘߊ ߡߍ߲ ߠߎ߬ ߞߐߦߌ߬ߘߊ߬ߣߍ߲߫ ߣߊ߲߬ߝߟߏ߬ߦߊ߬ߟߌ ߛߓߍ ߟߎ߬ ߞߣߐ߫. ߊ߬ ߣߴߊ߬ ߘߌ߫ ߛߋ߫ ߥߊ߫ ߟߊ߫ ߝߏ߫ ߥߟߎߡߊ߫ ߁، ߈ ߊ߲ߜ߭ߟߍߘߎ߯ ߝߊ߬ߘߊ߲߬ߞߊ ߛߌߕߊߟߌߟߌ߲ߜ߭ ߘߐ߫. ߏ߬ ߦߋ߫ ߢߝߍߕߊ߮ ߕߐ߬ߣߐ ߟߊߛߘߋߦߊߟߊ߲߫ ߠߋ߬ ߘߌ߫ ߣߝߊ߬ߢߐ߲߰ߦߊ ߡߊ߲߬ߕߏ߲߬ߕߍ߬ߟߊ߬ߞߊ ߞߊߡߊ߲ ߘߐ߫. ߏ߬ ߡߍ߲ ߦߋ߫ ߓߐߒߘߊ߫ ߡߊߟߐ߬ߣߍ߲ ߘߌ߫ ߖߌ߬ߣߍ߬.

ߞߐߣߊߞߙߌ߫ ߕߙߊߓߊ ߕߋ߬ߟߋ߫ ߂߅/ ߂߀߂߆

ߖߡߊ߬ߣߊ ߘߍ߬ߞߏ߬ߦߊ ߣߌ߫ ߛߋ߲ߞߏߟߊߘߐߦߊ ߟߌ߬ߤߟߊ ߟߎ߬، ߞߵߏ߬ ߟߊ߫ ߣߕߊ߬ߘߐ߬ߛߌ߮ ߣߐ߬ߣߐ߬ߣߍ߲ ߠߎ߬ ߞߊ߲߬߸ ߡߍ߲ ߟߐ߬ߣߍ߲ ߛߌߡߊ߲ߘߎ߯ ߂߀߄߀ ߢߍߥߟߊ߫ ߞߊߡߊ߲ ߡߊ߬. ߏ߬ ߟߎ߬ ߓߊ߲ߓߊ߲ߣߍ߲ ߞߎ߲߬ߠߊ߬ߛߌ߮ ߞߎ߲߬ߕߌ߮ ߛߟߊߕߌ߯ ߊߡߊߘߎ߫ ߎߙߌ߬ ߓߊ ߟߊ߫ ߓߋߟߋ߲ߠߊ ߝߊ߲߬ ߛߓߊߣߊ߲ ߠߋ߬ ߞߣߐ߫ ߘߐ߬ߕߊߡߌ߲ ߞߏߟߊߕߍ߮ ߝߊ߬ߛߏ߬ߟߊ߬ߞߊ ߟߎ߬ ߢߊߞߘߐ߫. ߊ߬ ߞߎߡߊ߫ ߘߊ߫ ߘߍ߬ߞߏ߬ߦߊ ߞߍߣߍ߲ ߠߎ߬ ߞߊ߲߬߸ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߟߊ߲ߞߣߍߡߦߊ߫ ߞߏ߫ ߝߘߏ߬ߓߊ߫ ߥߛߊ߬ߘߊ߬ߕߌ߮ ߟߎ߬ ߟߊ߫ ߛߊߣߌߧߊ߫ ߖߐ߰ߣߍ ߕߊ߬ߟߌ ߓߘߊ߫ ߛߋ߫ % ߈߀ ߘߐ߫. ߊ߬ ߦߋ߫ ߞߊ߬ߝߏ ߟߊ߫ ߥߣߍ߬ߡߊ߬ߦߊ ߦߌ߬ߘߊ߬ߟߊ߲ ߠߋ߬ ߘߌ߫߸ ߞߊ߬ ߘߍ߬ߞߏ߬ߦߊ ߟߊ߬ߞߊ߲߬ߘߊ߬ߟߌ ߝߊ߲߬ߞߊߘߏ߲߬ ߊ߬ ߣߌ߫ ߞߊ߬ ߘߎ߰ߘߋ߲ ߠߎ߬ ߟߊ߫ ߓߊߟߏ ߗߏ߯ߦߊ ߦߟߍ߬ߡߊ߲ ߛߣߍ߬ߞߍ ߡߊ߬ߘߎ߮ ߘߐ߫. ߛߣߍ߬ߞߍ߬ ߘߎ߰ߞߎߘߎ߲ ߁߄ ߇߀߀ ߘߊߘߐߓߍ߲߬ ߘߊ߫߸ ߣߍ߰ߕߎߙߊ ߅߀߇ ߘߐߕߟߊ߫ ߘߊ߫. ߖߌ߬ߣߍ߬ ߞߵߊ߬ ߓߊ߲ߓߊ߲߫ ߊ߬ ߟߊ߫ ߛߝߊ ߘߐ߫ ߣߴߏ߬ ߦߋ߫ ߝߏߣߌ߲ ߟߊߥߟߏߟߊ ߝߟߐ ߘߌ߫ ߘߎߢߊ߫ ߡߎ߰ߡߍ ߘߐ߫. ߡߍ߲ ߛߊ߲߭ ߟߊ߬ߥߟߏ߬ߟߌ ߥߊߣߍ߲߫ ߤߊ߲߯ ߞߙߌߕߌ߫ ߅߆߀ ߀߀߀. ߞߏߕߌ߯ ߝߟߐ ߞߊ߬ ߛߋ߲ߞߏߘߐߦߊ ߢߝߍߕߊ߮ ߟߎ߬ ߝߣߊ߫ ߢߊߝߐ߫ ߡߍ߲ ߠߎ߬ ߞߍߣߍ߲߫ ߖߡߊ߬ߣߊ ߞߣߐ߫. ߡߍ߲ ߢߊ߬ߕߣߐ ߦߋ߫ ߡߊ߬ߡߙߊ߬ߟߌ ߢߊߞߎߘߦߊߟߌ ߘߐ߫. ߊ߬ ߣߌ߫ ߞߊ߬ ߢߎߡߍߙߋ߲ߦߊߟߌ ߞߐߝߟߌ߫ ߟߎ߬ ߡߊߘߐ߯ߦߊ߫. ߢߎߡߍߛߎߓߊ߮ ߛߋ߫ ߘߊ߫ ߓߌ߬ߟߊ߬ ߟߊ߫ ߞߎߘߍ߫ ߁߂߀߀߀ ߣߌ߫ ߞߐ ߟߋ߬ ߘߐ߫، ߊ߬ ߣߌ߫ ߞߏ߲ߞߏߘߐߟߊ߫ ߘߌ߲߬ߞߌߙߊ߫ ߃߀߀ ߓߌ߬ߟߊ߬ ߘߊ߫ ߢߐ߲߮ ߡߊ߬ ߢߎߡߍߦߊ ߖߎ߬ߓߐ ߟߎ߬ ߟߊ߫߸ ߝߘߏ߬ߓߊ߬ ߗߋߢߊ ߟߎ߬ ߖߐ߯ߙߊ߲ߒߕߊ߲ߧߊ ߢߡߊߦߟߍߡߊ߲ ߝߙߍߕߍߦߊߟߌ ߡߊ߬ߡߙߊ߬ߟߌ ߞߊ߬ ߛߌߟߊ ߘߊߦߟߍ߬ ߖߌ߬ߣߍ߬ ߟߊ߫ ߢߝߍߕߊ߮ ߢߍ߫ ߛߌ߰ ߦߙߐ߫ ߂߃ ߟߊ߫ ߡߊ߲߬ߕߏ߲߬ ߠߊߘߍ߬ߣߍ߲ ߠߊ߫. ߡߍ߲ ߓߍ߲߬ߣߍ߲߫ ߢߎߡߍߙߋ߲ߦߊߟߌ ߞߎ߲߬ߠߊ߬ߛߌ߰ߟߌ ߡߊ߬ ߏ߬ ߞߍ߫ ߘߊ߫ ߛߌ߰ߦߌߟߊ߫ ߁߈߃߲ ߘߌ߫ ߂߀߂߀ ߠߊ߫. ߞߊ߬ ߞߍ߫ ߁߆߀߲ߘߌ߫ ߂߀߂߅ ߟߊ߫. ߏ߬ ߘߐ߫ ߊ߬ ߞߵߊ߬ ߦߌ߬ߘߊ߬ ((ߞߐߖߊߓߌ ߣߌ߲߬ ߦߴߊ߬ ߦߌ߬ߘߊ߬ ߟߊ߫ ߞߏ߫ ߘߐ߬ߕߊߡߌ߲߫ ߞߍ߫ ߘߊ߫ ߞߍߗߌߦߊ߫ ߟߋ߬ ߟߊ߫ ߡߍ߲ ߘߌ߫ ߛߋ߫ ߞߊ߬ߝߏ ߟߊ߫ ߝߊ߲߬ߞߡߊ߬ߦߊ ߟߊߛߊ߬ߦߌ߬ ߟߴߊ߬ ߡߊ߬. ߞߵߊ߬ ߕߏ߫ ߊ߬ ߓߟߏ߫. ߞߊ߬ ߟߊ߫ ߝߘߏ߬ߓߊ߬ ߟߊ߲ߒߣߦߊ ߓߊߛߌ߮ ߞߊ߲߬߸  ߞߊ߬ ߊ߲ ߠߊ߫ ߖߡߊ߬ߣߊ ߟߊߘߏ߲߭ ߓߟߏߘߐߓߍ߲ ߞߍ߫ ߥߙߎߞߌ ߛߋ߲߬ߕߊ߰ ߞߎߘߊ ߘߐ߫)) ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߖߊ߲߬ߓߌ߬ߟߊ߬ߟߌ ߞߍ߫ ߞߏ߫ ߛߌ߰ߞߊ߲ ߓߊߛߌ߮ ߢߊ߬ߕߣߐ ߟߋ߬ ߢߍߛߎߡߊ ߟߊߥߟߏ ߘߌ߫. ߊ߬ ߘߏ߲߬ ߖߏߙߏ߲ߘߏߟߌ ߦߋ߫ ߞߏ ߢߊ߬ ߟߊ߫ ߟߋ߬ ߣߌ߫ ߛߊ߬ߙߌ߬ߦߊ߬ߦߊ߬ߟߌ ߞߍ߫ ߘߊ߫ ߢߊ߬ߒ߬ߞߐ߬ߓߊߟߌ ߘߌ߫ ߊ߬ ߞߵߏ߬ ߡߊߜߟߍ߬ߦߊ߬ ߓߊ߬؟ ((ߛߐ߬ߘߐ߲߬ߘߊ߫ ߛߎ߲ߞߎ߲ߡߊ ߟߎ߬ ߦߋ߫ ߓߘߍ߬ߓߘߍ߬ߟߌ ߡߐ߬ߟߐ߲ ߠߋ߬ ߘߌ߫߸ ߣߴߊ߬ ߞߊ߬ ߞߏߢߊ߬ ߡߐ߰ߦߊ ߡߊߣߊ߲ߞߎ߲ ߘߐߖߘߌ ߘߐ߫߸ ߊ߬ ߣߌ߫ ߞߊ߬ ߖߡߊ߬ߣߊ ߜߛߊ߬ߢߐ߲߰ߦߊ ߢߊߞߎߘߦߊ߫: ߝߘߏ߬ߓߊ߬ ߖߊ߬ߕߋ߬ߘߐ߬ߛߌ߮ ߦߋ߫ ߓߘߍ߬ߦߊ ߟߋ߬ ߦߌ߬ߘߊ߬ ߟߊ߫ ߘߎ߰ߘߋ߲ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߟߊ߫ ߞߎ߲߬ߠߊ߫)) ߞߎ߲߬ߕߋߟߋ߲ ߏ߬ ߟߋ߬ ߦߋߗߏ߮ ߞߏߛߐ߲߬ ߛߌߡߊ߲ߘߎ߯ ߂߀߄߀ ߢߍߥߟߊ߫ ߦߋ߫ ߥߊ߫ ߟߊ߫، ߏ߬ ߡߍ߲ ߦߌ߬ߘߊ߬ߣߍ߲ ߦߏ߫ ߛߌߡߊ߲ߘߎ߯ ߂߀߄߀ ߢߍߥߟߊ߫ ߞߟߍ߬ߦߊ߫ ߟߐ߬ߛߋ߲ ߞߵߊ߬ ߓߍ߲߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߘߍ߬ߞߏ߬ߦߊ ߢߡߊߦߟߍߡߊ߲ ߡߊ߬ ߖߌ߬ߣߍ߬ ߞߣߐ߫. ߢߍߥߟߊ߫ ߦߋߗߏ߯ ߓߘߍ߬ߦߊ߫ ߕߏ߲ߘߋ߫ ߥߊߣߍ߲߫ ߠߋ߬ ߝߏ߫ % ߁߀، ߃. ߞߣߐߟߊ ߥߟߏߒߘߐ ߢߊ߲ߞߌߛߊ߲ ߥߊߣߍ߲ ߠߋ߬ ߤߊ߲߯ ߘߟߊ߫ ߥߟߎ߬ߡߊ߫ ߁߅߂ ߞߵߊ߬ ߓߍ߲߬ ߂߀߄߀ ߝߊ߲߬ߝߍ߬ߟߊ ߡߊ߬. ߏ߬ ߡߍ߲ ߦߋ߫ ߥߟߎߡߊ߫ ߃߅ ߝߊ߲߬ߝߍ߬ߟߊ ߘߐ߫ ߓߌ߬. ߊ߬ ߣߌ߫ ߞߊ߬ ߓߊ߯ߙߘߊ߫ ߅߀߀ ߘߊߦߟߍ߬. ߏ߬ ߦߋ߫ ߝߘߏ߬ߓߊ߫ ߓߐ߰ߟߐ߬ߦߊ ߟߋ߬ ߘߌ߫. ߏ߬ ߡߍ߲ ߦߋ߫ ߓߍ߲߬ ߠߊ߫ ߖߊ߬ߕߋ߬ߘߐ߬ߛߌ߰ߓߊ߫ ߁߂߂ ߡߊ߬. ߖߙߎߡߎ߲ߦߟߍߡߊ߲߫ ߛߏ߯ߙߏߦߊߣߍ߲߫ ߃߉ ߣߊ߲߬ߝߟߏ߬ߘߏ߲߬ߘߊ߬ߟߊ ߞߛߊߞߊ߫ ߖߊ߬ߕߋ߬ߛߌ߰ߣߍ߲ ߡߍ߲ ߥߊߕߐ߫ ߤߊ߲߯ ߘߟߊ߫ ߥߟߎߡߊ߫ ߃߃߀ ߛߊ߲߬ ߕߊ߲߫ ߣߌ߫ ߟߏ߯ߟߎ߫ ߞߘߐ߫. ߝߊ߲߬ ߝߟߐ ߦߋ߫ ߂߀߂߆ ߣߌ߫ ߂߀߃߀ ߕߍߟߊ ߘߌ߫. ߏ߬ ߡߍ߲ ߞߋߟߋ߲߫ ߞߍߕߐ߫ ߞߙߎߝߊߟߌ ߞߍ߫ ߟߊ߫ ߘߟߊ߫ ߥߟߎߡߊ߫ ߇߅ߟߊ߫. ߞߵߏ߬ ߟߊ߫ ߥߟߎߡߊ߫ ߂߀ ߞߊ߲߬ ߡߍ߲ ߘߏ߲߭ ߓߘߊ߫ ߓߊ߲߫ ߘߊߡߌ߬ߣߊ߬ ߟߊ߫ ߖߊ߬ߕߋ߬ߘߐ߬ߛߌ߮ ߠߊߘߊ߲ߣߍ߲ ߘߐ߫ ߛߌߡߊ߲ߘߎ߯ ߥߟߊ߫ ߖߎ߬ߓߐ߬ ߟߊߘߍ߬ߣߍ߲ ߠߎ߬ ߘߐ߫. ߣߊ߲߬ߝߟߏ߬ߦߊ߬ߟߌ ߓߊߛߌ߰ߣߍ߲ ߕߍߞߢߊߟߌ ߘߐߘߏ߲߬ߣߍ߲ ߘߏ߫ ߟߋ߬ ߞߊ߲߬ ߡߍ߲ % ߃߈ ߦߋ߫ ߓߍ߲߬ ߠߊ߫ ߘߎ߲߬ߘߎ߲߬ߡߊ߫ ߛߐ߬ߘߐ߲߬ߘߊ ߟߎ߬ ߘߐ߫. % ߁߁ ߦߋ߫ ߛߋ߲ߞߏߟߊ߫ ߣߝߊ߬ߢߐ߲߮ ߣߊ߲߬ߝߟߏ߬ߦߊ߬ߟߊ ߟߎ߬ ߕߊ ߘߌ߫ % ߁߉ ߦߋ߫ ߖߘߍ߬ߕߌ߰ߦߊ߬ ߡߊߣߊ߲ߞߎ߲ ߘߌ߫. ߊ߬ ߣߌ߫ % ߃߂ ߦߋ߫ ߝߛߎߞߎ߫ ߝߊ߬ߛߏ߬ߟߊ߬ߞߊ ߘߌ߫. ߛߣߍ߬ߞߍ ߡߊ߬ߘߎ߮ ߘߐ߫، ߘߊߥߎ߲ߠߌ߲ߝߋ߲ ߣߌ߫ ߖߎ߬ߟߊ߬ߦߊ ߘߍ߲߰ߦߊ߬ߟߌ ߟߎ߬ ߘߐ߫، ߖߊ߬ߕߋ߬ߘߐ߬ߛߌ߰ߓߊ ߃߂ ߊ߬ ߣߌ߫ ߢߡߊߦߟߍߡߊ߲߫ ߁߀ ߖߊ߬ߕߋ߬ߛߌ߰ߣߍ߲߫ ߝߘߏ߬ߓߊ߫ ߣߊ߲߬ߝߟߏ߬ߦߊ߬ߟߌ ߟߎ߬ ߢߍ߫ ߡߍ߲ ߥߊߣߍ߲߫ ߤߊ߲߯ ߘߟߊ߫ ߥߟߎߡߊ߫ ߆߅ ߊ߬ ߞߵߊ߬ ߦߌ߬ߘߊ߬ ߞߏ߫ ߛߍ߬ߣߍ ߟߊ߫ ߖߊ߲ߞߏ߫ ߟߊ߫ ߄߅߀߀߀ ߡߊߘߍ߬ߡߍ߲߬ ߘߊ߫. ߏ߬ ߡߍ߲ % ߆߀ ߦߋ߫ ߡߏ߬ߛߏ ߟߎ߬ ߘߌ߫. ߏ߬ ߓߍ߯ ߣߴߊ߬ ߕߊ ߖ.ߕ ߥߟߎߡߊ߫ ߂߉߈،߅ ߛߋ߫ ߘߊ߫ ߟߊߘߍ߬ ߟߊ߫. ߞߊ߬ ߓߍ߲߬ ߛߍ߬ߣߍ ߟߊ߫ ߥߙߎߞߌ߫ ߡߊߣߊ߲ߞߎ߲ ߛߘߊ߫ ߘߐ߫(ߝߏߘߊ) ߊ߬ ߣߌ߫ ߖߌ߬ߣߍ߫ ߛߍ߬ߣߍ ߣߌ߫ ߖߎ߬ߟߊ߬ߦߊ ߟߊ߫ ߥߙߎߞߌ ߢߍߥߟߊ (ߔߋ ߘߋ ߊ ߛߋ ߖ߭ߋ) ߞߵߏ߬ ߞߍ߫ ߞߊ߬ ߞߐߞߊ߲߫ ߣߊ߲߬ߝߟߏ߬ߦߊ߬ߟߌ ߟߎ߬ ߞߊ߲߬ ߟߊ߫ ߢߍߥߟߊ ߣߌ߫ ߖߊ߬ߕߋ߬ߘߐ߬ߛߌ߰ ߂߀. ߊ߬ ߞߵߊ߬ ߡߊߜߟߍ߬ߦߊ߬ ߞߏ߫ ߝߘߏ߬ߓߊ߫ ߓߘߍ߬ߓߘߍ߬ߟߌ ߦߋ߫ ߏ߬ ߡߍ߲ ߛߊ߬ߡߊ߲߬ߛߋ߲ ߦߋ߫ ߛߣߍ߬ߞߍ ߢߊߞߎߘߦߊߟߌ ߘߎ߲ߡߕߊ ߘߌ߫. ߞߊ߬ ߘߎ߰ߕߌ߰ߦߊ ߟߊߞߊ߲ߘߊߟߌ ߞߍ߫، ߞߊ߬ ߕߙߏ߬ߞߏ߬ߦߊ߬ߟߌ ߓߟߏߟߊߕߎ߲߰ ߡߊ߬ߟߏ߬ ߟߊ߬ߘߊ߲߬ߘߊ (ߙߌߖ߭ߋߙߌ) ߟߊ߫. ߞߊ߬ ߟߊ߬ߘߊ߲߬ߠߌ߲ ߓߐ߬ߣߐ ߟߎ߬ ߡߊߕߊ߲߬ߞߊ߬، ߞߊ߬ ߛߍ߬ߣߍ ߘߍ߲߰ߦߊ߬ߟߌ ߟߎ߬ ߝߊ߲߬ߞߊߘߏ߲߬ ߛߊ߫ ߖߡߊ߬ߣߊ ߘߌ߫ ߛߴߊ߬ ߖߘߍ߬ߓߊߟߏ߫ ߟߊ߫. ߞߊ߬ ߞߏ߲ߞߏߘߐߟߊ ߛߐ߬ߘߐ߲߬ߘߊ ߟߎ߬ ߡߐ߬ߟߐ߲߬ߡߊ߬ߦߊ߫ ߞߊ߬ ߖߌ߬ߣߍ߬ ߞߍ߫ ߕߌ߲߬ߞߎߘߎ߲ ߥߊ߬ߣߊ ߘߌ߫ ߟߐ߯ߝߍ ߟߎ߬ ߘߐ߫.

ߞߐߣߊߞߙߌ߫ ߕߙߊߓߊ ߕߋ߬ߟߋ߫ ߂߀/ ߂߀߂߆

ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߞߵߊ߬ ߕߊ ߘߌ߯ߣߊ߫ ߞߍߕߊ ߓߐ߫ ߊ߬ ߡߊ߬ ߝߊߦߌߛߊߟ ߡߛߌ߬ߙߌ߬ߓߊ ߟߋ߬ ߟߊ߫ ߛߎ߲ߞߊߙߏ߫ ߛߊߟߌ߫ ߓߍ߲߬ߒ߬ߛߋ߲߬ߡߊ ߛߋ߲߬ߝߍ߬. ߊ߬ ߛߋ߲߬ߘߏ߲߬ߢߐ߲߮ ߕߘߍ߬ ߝߊ߬ߘߌ߬ߡߊ߬ߞߟߏ ߣߌ߫ ߘߋߡߌߛߍ߲ߧߊ ߞߏߕߌ߮ ߟߋ߬ ߘߌ߫. ߊ߬ ߞߊ߬ ߛߙߊ߬ߣߎ߲ ߦߌ߬ߘߊ߬ ߡߍ߲ ߘߐߞߍߣߍ߲߫ ߦߟߌߛߌ߮ ߣߌ߫ ߖߊ߬ߓߌ߬ߦߊ߬ߟߌ ߟߎ߬ ߟߊ߫߸ ߊ߬ ߞߵߊ߬ ߦߌ߬ߘ ߊ߬ ߞߏ߫ ߛߌ߬ߟߊ߬ߡߊ ߟߎ߬ ߟߊ߫ ߞߏ߫ ߊ߬ߟߎ߬ ߦߴߊ߬ߟߎ߬ ߖߊ߲߬ߕߏ߬ ߞߊߙߏ߫ ߛߊߣߌߡߊ߲ ߢߌ߲߬ ߘߐ߫ ߣߊߟߌ߬ߡߎ߲߫ ߛߎ߲ߞߊߙߏ ߘߌ߫ ߛߣߐ߬ߡߍ ߣߌ߫ ߤߌߣߊߢߐ߲߯ߠߊ ߘߐ߫ ߊߟߊ߫ ߓߙߊߞߊ ߘߐ߫. ߊ߬ ߞߊ߬ ߕߊ߲߬ߘߏ߬ߟߌ ߞߍ߫ ߖߐ ߟߊ߫ ߛߓߊ߬ߕߌ ߟߊ߫ ߖߌ߬ߣߍ߫ ߡߌ߬ߙߌ߲߬ߘߌ ߓߟߏ߫߸ ߊ߬ ߞߵߊ߬ ߡߊߜߟߍ߬ߦߊ߬ ߝߣߊ߫ ߞߏ߫ ߥߊ߯ߕߌ߫ ߝߌ߬ߟߊ߬ ߟߋ߬ ߣߐ߬ ߢߐ߲߮ ߓߍ߲߬ ߠߊ߫ ߛߌ߬ߟߊ߬ߡߊ ߟߎ߬ ߟߊ߫ ߛߎ߲ߞߊߙߏ߫ ߣߌ߫ ߟߍߙߊߟߞߊ ߟߎ߬ ߕߊ. ߞߏ߫ ߏ߬ ߦߋ߫ ߘߍ߭ ߓߟߏߘߏ߲ߢߐ߲߰ߓߟߏ ߕߐ߰ߡߊ߬ߛߙߋ߬ ߓߘߍ ߟߋ߬ ߘߌ߫߸ ߕߋߙߌߦߊ ߣߌ߫ ߓߊߟߏߢߐ߲߯ߒߝߍ ߟߊߥߙߎߞߌ ߘߐ߫، ߗߍ߭ ߣߌ߫ ߡߏ߬ߛߏ ߟߎ߬ ߣߌ߫ ߢߐ߲߯ ߕߍ߫. ߞߎߡߊ ߓߟߏߟߊߕߎ߲߰ ߘߐ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߥߊߟߢߌߡߊߟߐ߲߫ ߝߏߟߌ ߟߊߛߋ߫ ߡߌ߬ߙߌ߲߬ߘߌ ߡߊ߬ ߊ߬ߟߎ߬ ߟߊ߫ ߡߊ߬ߝߊ ߣߴߊ߬ߟߎ߬ ߟߊ߫ ߖߘߍ߬ߡߊ߬ߓߐ ߘߐ߫. ߞߊߕߙߍ߬ߕߍ߫ ߞߍߣߍ߲ ߠߎ߬ ߡߊ߬ ߟߊ߲߬ߖߙߎ߬ߕߐ ߟߎ߬ ߢߍ߫ ߜߟߍ߬ߦߊ ߥߊ߯ߕߌ ߟߎ߬ ߘߐ߫. ߊ߬ ߞߊ߬ ߡߊ߬ߞߟߌ߬ߟߌ ߞߍ߫ ߞߍߞߋߟߋ߲ߘߌ߫ ߝߊ߬ߛߏ߬ߟߊ߬ߞߊ ߡߊߜߟߍ߬ߦߊ ߡߊ߬ ߢߊ߫ ߓߍ߯ ߡߊ߬. ߊ߬ ߞߵߊ߬ ߦߌ߬ߘߊ߬ ߞߎߡߊ ߞߎ߲߬ߝߊ߮ ߘߐ߫ ߞߊ߲ߓߍ߲ ߞߊ߲ߕߌ߯ ߕߐ߯ ߘߐ߫ ߞߏ߫ ߊ߬ ߦߋ߫ ߘߌ߯ߣߊ߫ ߢߍߡߐ߮ ߟߎ߬ ߝߏ߬ ߟߊ߫ ߸ ߞߊ߬ ߘߎߓߊ߫ ߓߍ߲߭ ߠߊ߫ ߛߓߊ߬ߕߌ ߟߊ߫ ߣߌ߫ ߟߊ߬ߞߊ߲߬ߘߊ߬ߟߌ ߣߌ߫ ߖߐ ߟߊ߫ ߛߓߊ߬ߕߌ ߟߊ߫ ߖߌ߬ߣߍ߬ ߖߡߊ߬ߣߊ ߞߣߐ߫. ߊ߬ ߣߌ߫ ߝߘߊ߬ߝߌ߲߬ߠߊ߫ ߕߟߋ߬ߓߋ ߝߊ߲߭ ߓߍ߯.

ߞߐߣߊߞߙߌ߫ ߕߙߊߓߊ ߕߟߋ߬ ߁߈/ ߂߀߂߆

ߞߏߕߌ߯ ߞߎߓߋߘߐ ߗߋߕߌ߮ ߞߏ߲߬ߓߏ ߘߊߎߘߊ߫ ߞߊ߬ߡߌ߬ߛߞߏ߫ ߥߊ߫ ߘߊ߫ ߡߊߟߐ߬ ߊ߬ ߟߊ߫ ߛߙߍߞߍ ߟߋ߬ ߓߟߏ߫، ߞߵߏ߬ ߟߊ߫ ߞߟߍ߬ߦߊ ߝߊ߲߬ߝߘߊ߬ߦߊ߬ߟߌ ߟߊ߬ߟߌ߬ߟߌ߬ߟߊ ߞߊ߲߬. ߞߊ߬ ߗߋߦߊߟߌ ߘߏ߫ ߟߊߛߣߍ߫ ߡߍ߲ ߝߘߊߣߍ߲߫ ߝߘߊ߬ߝߌ߲߬ߠߊ߫ ߥߙߎߞߌ ߜߍߓߏ߲ ߠߊ߫ (ߓߊߘ) ߞߏ߫ ߞߊ߬ ߗߋߦߊߟߌ ߟߎ߬ ߟߊߛߌߦߊߦߊ߫ ߛߊ߫ ߞߊ߬ ߣߊ߲߬ߝߟߏ߬ߘߏ߲߬ߘߊ߬ߟߊ ߜߍߓߏ߲߫ ߞߋߟߋ߲߫ ߛߐ߬ߘߐ߲߬. ߞߊ߬ ߓߍ߲߬ ߘߋ߲ߡߌߛߍ߲ ߠߎ߬ ߟߊ߫ ߥߊߟߌߝߦߊ ߡߊ߬ ߖߌ߬ߣߍ߬ ߞߊ߲ߓߍ߲ ߞߣߐ߫. ߓߊߘ ߟߊ߫ ߞߎ߲߬ߦߌ߬ߘߊ߬ߟߌ ߣߝߊ߬ߡߊ ߏ߬ ߟߊ߬ߢߌߣߌ߲ ߠߋ߬ ߣߊ߲߬ߝߟߏ߬ߦߊ߬ߟߌ ߝߌ߲߬ߞߌ߲߬ߝߊ߲ߞߊ߲ ߓߊ߬ߟߌ߬ߟߌ ߝߊ߲߬ߞߊ߬ߘߏ߲߬ߠߌ߲ ߘߌ߫، ߊ߬ ߣߌ߫ ߞߊ߬ ߞߐߡߊߓߌ߲ߓߌ߲ߠߌ߲ ߞߍ߫ ߓߊ߯ߙߊ߫ ߛߐߘߐ߲ ߘߐ߫ ߘߎ߲ߡߊ߫ ߓߟߏߡߊ߬. ߘߡߊߝߊߟߋ߲ ߠߎ߬ ߞߎ߲߬ߕߊ߮ ߞߘߐ߫߸ ߓߊߘ ߟߊ߫ ߗߋߦߊߟߌ ߞߊ߬ ߢߌߣߌ߲ߞߏ ߟߎ߬ ߦߌ߬ߘߞߊ߬ߟߌ ߞߍ߫ ߞߵߊ߬ ߓߍ߲߬ ߊ߬ ߟߊ߫ ߗߋߦߊߟߌ ߡߊ߬. ߏ߬߫ ߡߍ߲ ߞߎ߲߭ ߦߋ߫ ߡߊ߬ߘߍ߬ߡߍ߲߬ߠߌ߲ ߣߌ߫ ߟߊ߬ߛߌ߲߬ߠߌ߲ ߝߊ߲߬ߝߘߊ߬ߡߊ ߘߌ߫ ߖߌ߬ߣߍ߫ ߡߙߊ߬ߦߊ ߟߎ߬ ߓߟߏ߫. ߊ߬ ߣߌ߫ ߞߊ߬ ߥߙߎߞߌ ߝߟߐߦߊ ߝߊ߬ߛߏ߬ߟߊ߬ߞߊ ߘߌ߫ ߖߊ߬ߕߋ߬ߘߐ߬ߛߌ߮ ߛߙߍߘߍߦߊߟߌ ߓߟߏߡߦߊ߫ ߡߊ߬. ߘߊߘߐߖߊߥߏ ߟߎ߬ ߟߊߘߌ߬ߢߍ߬ ߘߊ߫ ߞߊ߬ ߡߙߊ߬ߦߊ ߟߎ߬ ߟߊ߫ ߘߐ߬ߞߐ߬ߣߐ߲߬ߠߌ߲ ߠߎ߬ ߟߊߛߐ߬ߘߐ߲߬. ߞߊ߬ ߟߊ߲ߞߣߍߡߦߊߟߌ ߞߍ߫ ߓߐߒߘߊ߫ ߞߏ ߟߎ߬ ߘߐ߫ ߓߟߏߘߏ߲ߢߐ߲߰ߓߟߏ ߛߌߟߊ ߝߍ߬. ߞߊ߬ ߘߐ߬ߛߏ߰ߙߋ߬ߟߌ ߕߙߏ߬ߞߏ߬ߦߊ߬ߣߍ߲ ߠߎ߬ ߞߍ߫ ߡߍ߲ ߠߎ߬ ߘߌ߫ ߓߍ߲߬ ߢߐ߲߮ ߡߊ߬. ߞߊ߬ ߛߋߞߏߦߊ ߟߎ߬ ߓߟߏߡߦߊ߫ ߊ߬ ߣߌ߫ ߞߊ߬ ߝߏ߲߬ߝߏ߲ ߞߍ߫ ߛߌߣߌ߲ߢߍߛߌ߮ ߓߟߏߘߐߓߍ߲߬ ߠߎ߬ ߟߊ߫.

ߞߐߣߊߞߙߌ߫ ߕߙߊߓߊ ߕߟߋ߬ ߁߄/ ߂߀߂߆

ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߕߊ߫ ߡߊ߬ߝߊ߲ ߞߍ߫ ߟߐ߲ߞߏߕߌ߯ߦߊ ߞߎ߲߬ߜߙߊ ߘߐ߫ ߡߍ߲ ߞߎ߲߬ߕߐ߮ ߦߋ߫ ߞߏ߫ ((ߝߘߊ߬ߝߌ߲߬ߠߊ߫ ߦߋ߫ ߓߘߍ߬ߓߘߍ߬ߟߌ ߖߙߎߡߎ߲ߞߎߘߦߊ ߣߌߞߎ߲ ߞߊ߬ߞߎ߬ߘߟߊ߬ߞߊ ߟߋ߬ ߘߌ߫: ߖߘߍ߬ߕߌ߰ߦߊ ߣߌ߫ ߟߊ߬ߞߊ߲߬ߘߊ߬ߟߌ ߣߌ߫ ߘߍ߬ߒ߬ߡߊ߬ߞߏ ߟߎ߬ ߣߌ߫ ߝߏ߲߬ߝߏ߲߬ߟߊ ߘߐ߫ ߥߙߎߞߌ ߛߌߟߊ ߝߍ߬)) ߡߍ߲ ߛߌ߲߬ߝߏ߲߬ߧߊ߬ ߘߊ߫ ߖߌ߬ߓߙߌߟ ߕߊߡߎߛߌߙ ߢߊߣ ߘߊ߬ߣߊ߲߬ߥߊ߮ ߝߏ߯ߓߊ ߞߣߐ߫ ߞߐߣߊߞߙߌ߫ ߖߊ߯ߓߘߊ߫ ߞߟߍ߬ߕߌ߯ ߟߊ߲߰ߛߣߍ߬ ߞߐ߲ߕߍ߫ ߟߊ߫ ߛߏ߲߬ߝߏߣߌߦߊ߫. ߢߐ߲߯ߦߋ߫ ߘߎ߲ߓߎߟߞߊ ߣߌ߲߬ ߦߋ߫ ߞߕߌߦߊ ߣߌ߫ ߓߘߍ߬ߓߘߍ߬ߟߌ ߣߌ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߟߐ߲ߞߏ ߞߏ߲߬ߓߏ߬ߦߊ ߞߊ߬ߙߊ߲߬ߕߊ ߣߌ߫ ߡߊ߬ߡߙߊ߬ߟߌ ߕߊ ߟߋ߬ ߘߌ߫. ߖߊ߯ߓߘߊ߫ ߞߟߍ߬ߕߌ߯ ߟߊ߲߬ߛߣߍ߫ ߞߐ߲ߕߍ߫ ߞߟߍ߬ߦߊ ߕߌߙߌ߲ߠߌ߲ ߞߵߏ߬ ߟߊ߫ ߔߊߙߌ߫ ߣߊ߲߬ߕߌ߰ߦߊ ߞߊ߬ߙߊ߲߬ߕߊ ߞߊ߲߬. ߖ ߞ ߟ ߞ ߗߋߕߌ߯ߓߊ ߘߊߣߌߦߍߟ ߟߡߊ߫ ߞߵߊ߬ ߦߌ߬ߘߊ߬ ߞߏ߫ ߜߊ߬ߙߊ ߣߌ߲߬ ߦߋ߫ ߞߟߍ߬ߦߊ ߤߊ߲ߞߟߌ ߟߊߡߙߌ ߞߣߍ ߟߋ߬ ߘߌ߫߸ ߞߵߊ߬ ߓߍ߲߬ ߓߏߟߏ߲ߓߐߟߌ ߓߘߍ߬ߓߘߍ߬ߟߌ߬ߞߊ߲ߞߋ ߓߟߏߦߊ ߡߊ߬ ߝߘߊ߬ߝߌ߲߬ߠߊ߫. ((ߊ߬ ߦߴߊ߲ ߠߊ߫ ߛߊ߬ߦߌ߬ ߟߊ߫ ߓߘߍ߬ߓߘߍ߬ߟߌ߬ߞߊ߲ߞߋ ߞߘߎ߬ߜߍߟߍ߲ ߠߎ߬ ߟߋ߬ ߡߊ߬. ߞߎ߲߬ߠߊ߬ߝߎ߬ߟߋ߲߬ߟߊ߲ ߣߌ߫ ߘߍ߭ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߞߊߡߊ߲ ߞߣߐ߫. ߞߵߊ߬ ߓߍ߲߬ ߊ߲ ߠߊ߫ ߞߊ߬ߝߏ ߟߊ߫ ߓߍ߲߬ߢߐ߲߰ߡߊ߬ߦߊ ߡߊ߬ ߟߌ߬ߤߟߊ߫ ߡߊ߲߬ߕߏ߲߬ߕߍ߬ߟߊ߬ߞߊ ߟߊ߫ ߞߏ ߘߐ߫ ߏ߬ ߡߍ߲ ߟߐ߬ߣߍ߲ ߓߏߟߏ߲ߓߐߟߌ ߡߊ߬)) ߞߏߕߌ߯ ߝߟߐ ߞߵߊ߬ ߡߊߜߟߍ߬ߦߊ ߞߏ߫ ߖߌ߬ߣߍ߬ ߓߘߴߊ߬ ߥߞߊ߬ߟߌ߫ ߓߘߍ߬ߓߘߍ߬ߟߌ ߣߌ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߢߡߊߦߟߍߡߊ߲ ߕߎ߬ߡߊ߬ ߞߎߘߊ ߟߊ߫ ߞߵߏ߬ ߓߍ߯ ߟߊ߫ ߛߌ߲߬ߝߏ߲߬ߘߊ ߟߎ߬ ߟߌ߬ߤߟߊ ߞߊ߲߬. ߞߊ߬ ߡߊ߬ߞߟߌ߬ߟߌ ߞߍ߫ ߘߎߢߊ߫ ߖߊ߯ߓߘߊ ߓߟߏߦߊߟߌ ߟߎ߬ ߟߌ߬ߤߟߊ ߡߊ߬. ߟߥߊ߬ߟߌ߬ߟߌ ߣߌ߫ ߟߊ߬ߛߌ߲߬ߠߌ߲ ߘߐ߫ ߝߘߏ߬ߓߊ߫ ߓߘߍ߬ߓߘߍ߬ߟߌ ߡߊ߬ߘߎ߮ ߞߊߡߊ߲ ߘߐ߫. ߏ߬ ߞߏߛߐ߲߬ ߊ߬ ߞߵߊ߬ ߡߊߜߟߍ߬ߦߊ߫ ߞߏ߫ ߡߙߌߘߐ ߕߊ߫ ߦߙߐ߫ ߕߊ߲ߓߊ߲ ߠߎ߬ ߣߌ߫ ߖߊ߯ߓߘߊ ߟߎ߬ ߘߎ߲ߓߎߟߞߊ ߟߎ߬ ߕߍ ߛߎߘߎ߲ߧߊ ߦߋ߫ ߢߊ߬ߒ߬ߞߐ߬ߓߊ߬ߟߌ ߟߋ߬ ߘߌ߫. ߞߵߏ߬ ߟߊ߫ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߞߊ߲߬ ߝߊ߬ߛߏ߬ߟߊ߬ߞߊ ߞߊ߲߬ ߞߵߊ߬ ߓߍ߲߬ ߕߎ߬ߡߊ ߘߍ߬ߞߏ߬ߦߊ ߓߘߍ߬ߓߘߍ߬ߟߌ ߞߍߗߏ߮ ߡߊ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߣߌ߫ ߛߋ߲ߒߞߏߟߦߊ ߞߊߡߊ߲ ߠߎ߬ ߘߐ߫߸ ߡߍ߲ ߣߊ߬ߕߐ߫ ߖߊ߬ߕߋ߬ߘߐ߬ߛߌ߰ ߛߏ߯ߙߏߦߊߣߍ߲ ߠߎ߬ ߟߊߥߟߌ߬ ߟߊ߫ ߞߊߕߙߍ߬ߕߍ߫ ߛߌߡߊ߲ߘߎ߯ ߂߀߄߀ ߖߊ߬ߕߋ߬ߘߐ߬ߛߌ߮ ߟߎ߬ ߡߊ߬. ߞߏߕߌ߯ ߝߟߐ ߞߵߊ߬ ߦߌ߬ߘߊ߬ ߞߏ߫ ߛߎߘߊ߲ߠߌ߲ ߓߕߐ߫ ߡߐ߰ߦߊ ߥߙߎߞߌ ߡߊߣߊ߲ߞߎ߲ ߠߋ߬ ߘߐ߫. ߊ߬ ߣߌ߫ ߖߊ߯ߓߘߊ ߟߎ߬ ߛߋߞߏߦߊ߫ ߟߥߊߟߌߣߍ߲ ߠߎ߬ ߞߟߍ߬ߦߊ ߘߐ߬ߡߙߌ߬ߟߌ ߘߐ߫ ߞߵߊ߬ ߓߍ߲߬ ߖߡߊ߬ߣߊ ߢߡߊߦߟߍߡߊ߲ ߞߐߡߊߓߌ߲߲ߓߌ߲ ߡߊ߬. ߊ߬ ߟߊ߫ ߕߘߍ߬ߒ߬ߘߐ߬ߟߌ ߞߎ߲߬ߕߐ߮ ߛߌߟߊ ߝߍ߬ ߊ߬ ߞߊ߬ ߟߐ߲ߞߏ߫ ߜߙߊ ߣߌ߲߬ ߞߎߟߎ߲ߖߋߟߌ ߞߍ߫. ߊ߬ ߣߌ߫ ߞߊ߬ ߕߘߍ߬ߒ߬ߘߐ߬ߓߊ߮ ߟߎ߬ ߡߊߞߟߌ߫ ߊ߬ ߟߊ߫ ߦߙߐ߫ ߡߊߜߟߍ߬ߦߊ߬ߣߍ߲ ߠߎ߬ ߖߙߎߡߎ߲ߦߊߟߌ ߡߊ߬ ߡߍ߲ ߓߍ߫ ߛߋ߫ ߛߣߐ߬ߦߊ߫ ߟߊ߫߸ ߞߊ߬ ߡߌ߬ߙߌ߬ߘߌ ߟߊ߫ ߝߊ߲߬ߝߘߊ ߟߎ߬ ߡߞߊ߬ߝߏ߬. ߊ߬ ߣߌ߫ ߖߌ߬ߣߍ߬ ߞߊ߲ߓߍ߲ ߠߊ߫ ߥߙߎߞߌ ߓߘߍ߬ߓߘߍ߬ߟߌ.

ߞߍߢߐ߲߯ߒߝߍ ߡߙߌߣߊ߲ ߣߌ߫ ߕߋߙߌߦߊ ߟߊߛߓߊ߬ߕߌ ߟߊ߫ ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߣߴߊ߬ ߞߏߢߐ߲߯ߦߊ ߠߎ߬ ߦߋ߫ ߕߎ߬ߡߊ߬ ߟߊߕߊߡߌ߲ ߠߊ߫ ߢߐ߲߮ ߝߍ߬ ߊ߬ ߣߌ߫ ߞߏߕߌ߯ߝߟߐߘߊ ߓߊ߯ߙߟߊ ߟߎ߬. ߘߋ߲ߡߌߛߍ߲ ߠߎ߬ ߟߊ߫ ߘߍ߬ߒ߬ߡߊ߬ ߛߎ߲ߕߍ߮ ߘߏ߫ ߛߋ߲߬ߝߍ߬ ߡߍ߲ ߛߌ߲߬ߝߏ߲߬ߧߊ߬ߣߍ߲ ߛߌ߲߬ߝߏ߲߬ߘߊ ߓߟߏ߫. ߢߐ߲߯ߓߍ߲ ߣߌ߲߬ ߞߍߣߍ߲߫ ߥߊ߯ߕߌ߫ ߞߙߍߞߙߍߣߍ߲ ߠߋ߬ ߘߌ߫ ߞߊߙߏ߫ ߛߊߣߌߡߊ߲ ߢߌ߲߬ ߞߣߐ߫ ߖߘߍ߬ߞߟߏ߬ߓߊ߮ ߟߎ߬ ߢߍ߫. ߊ߬ ߣߌ߫ ߟߍߙߊߟߞߊ ߟߎ߬ ߝߣߊ߫ ߟߊ߫ ߛߎ߲߫ ߕߎߡߊ ߟߋ߬߸ ߛߣߐ߬ߡߍ߬ߘߐ߬ߦߊ߫ ߝߌ߬ߟߊ ߡߍ߲ ߦߋ߫ ߡߐ߱ ߟߎ߬ ߡߊߞߟߌ߫ ߟߊ߫ ߢߊ߬ߟߌ ߡߊ߬ ߊ߬ ߣߌ߫ ߞߍߢߐ߲߯ߒߝߍ ߣߌ߫ ߞߍߕߊ ߘߣߊ߬ߕߊ߬ߡߌ߲߬ߓߊ߬ߟߌ߬ߦߊ ߡߊ߬. ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߊ߬ ߡߙߌߣߊ߲ ߢߌ߲߬ ߞߐ߲߬ߘߐ߲߬ߠߌ߲ ߞߍ߫ ߞߵߊ߬ ߟߐ߬ߘߎ߮ ߦߌ߬ߘߊ߬ ߓߟߏߘߏ߲ߢߐ߲߰ߓߟߏ ߟߊߛߓߊ߬ߕߌ ߘߐ߫ ߛߌ߲߬ߝߏ߲߬ߘߊ ߓߊ߯ߙߟߊ ߟߎ߬ ߕߍ߫ ((ߢߌ߲߬ ߦߋ߫ ߞߍߞߋߟߋ߲ߘߌ ߡߙߌߣߊ߲߫ ߢߌ߬ߡߊ߬ߓߊ߫ ߟߋ߬ ߘߌ߫߸ ߞߊ߬ ߞߏߕߌ߯ߝߟߐߘߊ ߓߊ߯ߙߟߊ ߟߎ߬ ߟߊߘߍ߬ ߦߊ߲߬ ߓߌ߬ ߞߵߊ߬ ߓߍ߲߬ ߛߎ߲ߕߍ߮ ߢߌ߲߬ ߡߊ߬. ߢߌ߲߬ ߦߴߊ߬ ߛߋ߬ߢߊ߫ ߝߟߐ ߟߋ߬ ߘߌ߫ ߏ߬ ߦߋ߫ ߞߍ߫߸ ߒ ߘߏ߲߬ ߟߊߣߍ߲߫ ߊ߬ ߟߊ߫ ߢߌ߲߬ ߦߋ߫ ߦߋߢߐ߲߯ߠߊ߫ ߘߊߡߌ߬ߣߊ߬ߣߍ߲ ߘߎ߲ߡߕߊ ߟߋ߬ ߘߌ߫)) ߏ߬ ߘߐߞߣߍ߫ ߘߊ߫ ߓߊ߬؟ ߞߏ߫ ߗߍ߭ ߣߌ߫ ߡߏ߬ߛߏ ߡߍ߲ ߠߎ߬ ߦߋ߫ ߞߏߕߌ߯ߝߟߐߘߊ ߡߊߛߐ߫ ߟߊ߫ ߓߟߏߕߍ߯ߓߊߟߌߦߊ ߘߐ߫߸ ߓߊ߯ߙߊߢߐ߲߯ߦߊ߫ ߓߘߊ߫ ߏ߬ ߟߎ߬ ߞߍ߫ ߞߐߙߍ ߞߋߟߋ߲ ߘߌ߫. ߞߵߊ߬ ߓߍ߲߬ ߊ߬ߟߎ߬ ߟߊ߫ ߓߊ߯ߙߘߊ ߟߎ߬ ߡߊ߬. ߞߵߊ߬ߟߎ߬ ߟߊߘߍ߬ ߞߍߕߊ ߣߌ߫ ߖߘߍ߬ߘߏ߲߬ߒ߬ߞߊ߲߬ߡߊ ߟߊ߫ ߡߊ߲߬ߕߏ߲ ߗߋߢߊ ߛߌߟߊ ߝߍ߬߸ ߏ߬ ߦߋ߫ ߕߌ߲ߕߊ߲߫ ߞߘߎ߬ߜߍߟߍ߲ ߠߋ߬ ߘߌ߫ ߞߊ߬ ߡߐ߰ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߡߊߞߟߌ߫ ߢߐ߲߯ߘߍߡߍ߲ ߡߙߌߣߊ߲ ߠߎ߬ ߓߊ߲ߓߊ߲ߠߌ߲ ߡߊ߬߸ ߞߵߏ߬ ߞߍ߫ ߘߍ߬ߒ߬ߡߊ߫ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߘߌ߫ ߞߣߊ߬ߕߏ߫ ߖߙߎߡߎ߲ߦߟߍߡߊ߲߫ ߞߏ ߟߎ߬ ߞߐߡߊߓߌ߲ߓߌ߲ ߠߊ߫ ߡߍ߲ ߘߊߓߐߣߍ߲߫ ߡߙߊ߬ߦߊ ߓߟߏ߫. ߥߊ߯ߕߌ߫ ߢߌ߲߬ ߦߋ߫ ߞߘߎ߬ߜߍߟߍ߲ ߠߋ߬ ߘߌ߫ ߡߍ߲ ߦߋ߫ ߓߍ߯ ߟߊߘߏ߲߭ ߓߟߏߦߊߟߌ ߖߊ߬ߕߋ߬ ߛߌ߰ ߟߊ߫. ߞߵߌ ߕߊ ߝߊ߲߭ ߞߍ߫ ߛߎߘߊ߲ߠߌ߲ ߘߐ߫ ߞߵߊ߬ ߓߍ߲߬ ߢߡߊߦߟߍߡߊ߲ ߓߊ߯ߙߊ ߘߊߡߌ߬ߣߊ߬ߣߍ߲ ߠߎ߬ ߡߊ߬߸ ߡߍ߲ ߟߐ߬ߣߍ߲ ߞߟߍ߬ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߟߊ߫ ߥߣߊ߬ߦߊ ߞߎ߲߬ߕߋߟߋ߲ ߡߊ߬ ߞߎ߲߬ߠߊ߬ߛߌ߮ ߞߎ߲߬ߕߌ߮ ߞߵߊ߬ ߕߐ߭ ߟߊߓߊ߲߫ ߘߎߓߊ ߟߋ߬ ߡߊ߬ ߓߍ߲߭ ߣߌ߫ ߟߊߞߊ߲ߘߊߟߌ ߣߌ߫ ߢߝߍߕߊ߮ ߟߊ߫ ߛߓߊ߬ߕߌ ߟߊ߫ ߖߌ߬ߣߍ߬ ߞߣߐ߫. ߊ߬ ߣߌ߫ ߞߐߙߍ ߞߋ߬ߟߋ߲߬߬ߞߋ߬ߟߋ߲߬ߠߊ ߣߌ߫ ߡߊ߬ߛߎ߬ߘߎ߲߬ߧߊ߬ߓߊ߮ ߟߎ߬ ߓߍ߯ ߢߍ߫.

ߞߐߣߊߞߙߌ߫ ߕߙߊߓߊ ߕߟߋ߬ ߁߂/ ߂߀߂߆ ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߓߘߊ߫ ߘߌ߲ߜ߭ߌߙߊߌ ߡߐ߰ߓߊ ߟߎ߬ ߟߊ߫ ߗߋߦߊߟߌ ߟߊߛߣߍ߫. ߏ߬ ߟߎ߬ ߡߍ߲ ߠߎ߬ ߣߊ߬ߣߍ߲ ߥߊߟߢߌߡߊߟߐ߲߫ ߞߐ߲ߘߐ߲ߠߌ߲ ߠߊ߫ ߞߵߊ߬ ߓߍ߲߬ ߞߎ߲߬ߠߊ߬ߛߌ߮ ߟߊ߫ ߘߐ߬ߖߊ߬ ߞߍߣߍ߲ ߠߎ߬ ߡߊ߬ ߡߙߊ߬ߓߊ߰ߘߊ ߟߊ߫ ߥߙߎߞߌ ߘߐ߫. ((ߓߐߒߡߊߟߌ߫ ߣߌ߲߬ ߞߍߣߍ߲߫ ߛߊߓߎ߫ ߘߌ߫ ߞߊ߬ ߝߊ߰ߡߎ߲߬ߦߊ߬ߟߌ߬ ߓߘߍ ߛߐ߬ߘߐ߲߬ ߓߐߒߘߊ ߣߌ߫ ߖߊ߬ߕߋ߬ߘߐ߬ߛߌ߮ ߟߎ߬ ߡߊ߬ ߊ߲ ߠߊ߫ ߡߙߊ߬ߓߊ߰ߘߊ ߓߊ߯ߙߊ߫ ߞߏߢߌ߲߬ ߘߐ߫))

ߏ߬ ߦߌ߬ߘߊ߬ ߘߊ߫ ߡߎ߬ߤߊ߲ߡߍߘ ߟߊ߬ߡߌߣߌ߲߫ ߕߎ߬ߙߋ߬ ߟߋ߬ ߓߟߏ߫ ߗߋߦߊߟߌ߫ ߓߋߟߋ߲ߠߊ ߞߏߕߌ߯ ߝߟߐ ߞߊ߬ ߞߎ߲߬ߠߊ߬ߛߌ߮ ߥߊ߬ߣߌ߲߬ߞߋ߬ ߓߘߍ ߦߌ߬ߘߊ߬ ߞߵߊ߬ ߟߐ߬ ߓߟߏߟߊߕߎ߲߯ߠߌ߲ ߣߌ߫ ߝߊ߲߬ߞߊ߬ߘߏ߲߬ߠߌ߲ ߡߊ߬ ߘߌ߲ߜ߭ߌߙߊߦߌ߫ ߟߊ߫ ߥߙߎߞߌ ߞߏ ߘߐ߫. ߏ߬ ߛߊߓߎ߫ ߟߊ߫ ߊ߬ ߞߊ߬ ߖߊ߬ߕߋ߬ߘߐ߬ߛߌ߰ ߛߏ߯ߙߏߦߊߣߍ߲߫ ߛߌߦߊߡߊ߲߫ ߠߊߥߟߌ߬߸ ߞߊ߬ ߕߘߍ߬ߕߍ߫ ߛߌߟߊ߫ ߓߊ߯ߙߊ ߡߊ߬ ߞߊ߬ ߡߙߊ߬ߓߊ߰ߘߊ ߣߌ߫ ߖߡߊ߬ߣߊ ߘߌ߲߬ߞߌ߬ߙߊ߫ ߕߐ߬ߡߊ ߟߎ߬ ߓߌ߬ߟߵߌ ߢߐ߲߮ ߡߊ߬.