Maaferenyaa ñannde 29 juko 2029 Ardiiɗo yaakitoraaɓe ɓen Aamadu Wuuri Baa wonndude e yaakitoraaɗo fii needi e jannde on Moodi Alfaa Baakar Bari hurmbitii lannde arne saato Bakaloriyaa bajjo hitaande 2026 on.
Haaju ngun ko ka duɗal ente Maaferenyaa sentir 2 ka suuperefektir Maaferenyaa perefektiir Forekariyaa. Ko ɗon e nder ngal duɗal Ardiiɗo yaakitoraaɓe ɓen hurmbiti lannde satino ngon e nder leydi ndin fow.
Fii ndee hitaande 2026, saatayɓe 94 392 no winndii : worɓe 52 720 e jiwɓe 41 672. No e maɓɓe inaaɓe kandidii liibur (ɓe tawata humaaki e duɗal) 32 248.
E nder ngun haaju hurmbito, Yaakitoraaɗo fii needi e jannde on heyɗintinii faandaare laamu ngun faadee e ñinnugol saatino laaɓungo e nder fotondiral e nder leydi ndin fow. O jarni wakkilaare jeyaaɓe e jagge jannde nden fow o toriiɓe etagol no saatino ngon laaɓira ko aldaa e yurmeende wonannde kala miijiiɗo janfagol.
Nde o fewti janngooɓe ɓen , o inni ɓe, Ardiiɗo yaakitoraaɓe ɓen no torii janngooɓe ɓen saatugol e nder laaɓal e nder nunɗal, o watti ɗon kala ko ko to’i kon soñata ko ɗun woni ɗoworde jannde nden.
« Bakaloriyaa ko saatino ganndal ngal dañuɗon hinaa fii sakkagol goɗɗo. Ñentinee sartiiji ɗin hoolee golle ɗe tottuɗon ɗen e nder hitaande nden », ɓanngini Ardiiɗo yaakitoraaɓe ɓen.
O wattaniɓe ɓure wonuɗe e ñentingol sartii saato ngon : « janngooɓe haanaa ɗaɓɓitugol daɓɓal, huutora talifon maa alaa wujjirɗo goo. Ko faalaɗen ko eltugol jannguɓe worɓe e rewɓe tedduɓe nunɗuɓe yaadude e ɓure ngenndi ndin. »
Ardiiɗo yaakitoraaɓe ɓen weltori fahin nde tawunoo sukaaɓe jiwɓe no ɗuuɗi ka saatinteeɓe fayda yeru feccere tawaaɓe ɓen. O holli wonndemma jannde maɓɓe nden ko tugalal mawngal wonannde ɓantal faggudu leydi ndin.
« Miɗo weltii tawde ko ɓadii 50% saatooɓe ɓen ko jiwɓe. Sonaaɓe ɓen ko no ɓe janngiriwoo ɓeynguureeji ɗin ɓantori e ko non kadi ngendi ndin alɗiri ».
