Konaakiri ñannde 17 morso 2026- Ardiiɗo yaakitoraaɓe ɓen Aamadu Wuuri Baa tawaama ka ka jonnde aranere fii tolnugol mbatu mawngu ngun e ley ngenndi jowaɓiri. Ɗun ko ka huuɓeere palee di peepul waɗi.
Ngal kuugal, fuuɗorno gallol hormorgol ngenndi ndin e toraaje Alla. Ɗun ko waɗi ko tawnde hooreeɓe ka diina e ka dawla, nootiiɓe e innde njuɓɓudiiji janani, hooreeɓe ka laamu, ardiiɓe kiɗɗun ka mbatu mawngu e hooreeɓe ka konu e ardiiɓe kinnɗun ka yaakitorde aranere.
Doftooru Akoy Sowogii waajo ka ardiigu hawtaandi, e nder yewtere makko o innuno wonndema ngal kuugal wonii sommbo hommbugol artiro ngenndi ndin e laawol sariyayankewol o torike mbatuɓe ɓen ñinnugol golle nafay ɗe ngenndi fow yaaduɗe e faandaareeji jamaa on.
Ko ardii jonnde tolno ngon ko Foodee Bannguraa ardiiɗo arano ka Cour suprême. Ka yewtere makko o anndintinno taariika mbatu mawngu ngun Gine e maandeeji tabimtingol ngenndi sariyayankoori e senndo laamu ngun faadee e terre ɗen tati
Tippude e toɓɓere 36 nden ka sar’inorde mbatu mawngu, ko huuri kuugal ngal ko Iburaahiima Abe Silla wonndude e ɓuruɓe lo’ude duuɓi ɓen ɗiɗo Hajja Idiriisa Baa e Hajja Maymuuna Bari
Ka timmoode golle ɗen ko Doftooru Dansaa Kurumaa ardinaa nde tawnu o alaa ballondirteeɗo 129 suɓii mo e nder 147 suɓiiɓe. Ɗun ko fii duuɓi jowi.
