Konaakiri ñannde 5 duujal 2026 Ardiiɗo yaakitoraaɓe ɓen Aamadu Wuuri Baa ƴewtike golle ɗen ka yaakitorde fii laaɓal, ilan e kuɓɓan. Ngal tintidal no humondiri e huulanɗe laamu ngun fii huɓindagol tuuɗe ɗen Gine.
Ko jaɓɓii mo tolni, ko yaakitoraaɗo laaɓal e ilan e kuɓɓan on Moodi Abuubakaar Kamara tigi, on holliti mo kuuɗe eɓɓaaɗe ɗen e ngal banŋal o fensitani mo eɓɓooje saatinaaɗe ɗen e banŋal kala e ɗoworɗe ñinnaaɗe ɗen e banŋe laaɓal
E nder nden ƴewtannde golle, yewtere maɓɓe nden ɓaarorno golle timmbaaɗe ɗen fii sokugol jiddere nden Daresalaami e newinngol huutorde nde Maaneyaa nden. Yewtere nden ɓaarorno fahin e njuɓɓundi ngenndiyankoori ndin fii haɓugol tuuɗe ɗen e nder leydi ndin. Wano hoositagol jooli ɗin adi fuɗɗaade ndunngu ngun.
Yaakitoraaɗo fii laaɓal ngal, ilan ɗan e kuɓɓan ɗan ruttii bannginani mo no fewndori gila e imminngol karalɓe ko ƴewtoo haa e yuɓɓondiral golle ɗen wonndude e yeñinooɓe yawle jeytoral.
Ardiiɗo yaakitoraaɓe ɓen ɓannginii faale laamu ngun tammbitagol ngal banŋal e tefugol fii laawi goo wano huɓindagol addo poore e nder leydi ndin, mofto ngaluuji ko tammbitoo ɗoworɗe ngenndi ndin e banŋe laaɓal.
