Konaakiri ñannde 8 morso 2026, Ardiiɗo yaakitoraaɓe ɓen Aamadu Wuuri Baa ardike weeɓitannde taskaande ɗerol renndo moftaangol ngol faadee e jamaaji ɗin e faggundu ndun wonnannde kala suudu winnditiindu e ngol ɗerol innaangol e faransiire Registre social unifié (RSU). Ɗun ko waɗi, ko e werde mawnde ka saare Konaakiri.
RSU no huuli yeɗugol laamu ngun rewrinorde laaɓunde ko ardoo ɗoworde renndo ngon e nder laaɓal, ɓanngina, ardina winnditaaɓe lo’uɓe ɓen, ardina eɓɓooje renndo yottiingo ngo ittitaa hay e gooto.
Ɓay jonnde nden fuɗɗaama, ardiiɗo jawle fii ɓantal renndo e lo’uɓe e faransiire (FDSI), Moodi Lansine Diawaraa, anndintini wonndema ngol ɗerol renndo moftaanngol wonay ɗoo e yeeso tuugorgal fii ɗoworɗe ngenndi ndin e hiwugol renndo ngon. O ɓanngini wonndema RSU winnditii galleeji 977 610 yeru yimɓe milionji 4,8 e pawdi. E nder ɗun lo’uɓe fewtaaɓe ɓen hiworte e nder eɓɓooje renndo ngon fow.
Nootaniiɗo UNICEF on, Maddalena Bertolotti, holli wonndema RSU on no yawti wonude rewrinorde ko aala mawɗo wonannde ardiigu fii ɗoworde ngenndi ndin. E wi’i makko, woodeede ndee rewrinorde laatiinde newinay fii yiilugol jawle ɗen faadee e galleeji ɓuruɗi lo’ude ɗin. O heyɗintinini angisannde UNICEF nden faadee e tammbitagol laamu ngun fii ñinnugol ngal kuugal ɗoo.
Ɓay yaakitoraaɗo fii sonnaaɓe ɓen e ɓeynguureeji ɗin Sonna Patrisi’a Lamaa ƴetii konngol, o holli Ñunndal e banŋe renndo e yurmondiral ngenndi ndin no jeyaa e faandaareeji ardiigu ngun. O watti ɗon wonndema ɗerol renndo moftaangol ngol jooporngol yamiroore yarkoma 2024 wa damal bajjal eɓɓooje ngenndiyankooje hiwirɗe renndo ngon.
Ka nder yewtere makko Ardiiɗo yaakitoraaɓe ɓen Aamadu Wuuri Baa, HOLLI WONNDEMA ɓantal haaɗaa e timmbugol alhaaliiji. O watti ɗon, heyɗintinngol ngenndi no humondiri e moƴƴinngol aalaaji newinayɗi ngal heyɗintinal. O hommbiri innugol ngol ɗerol bajjol moftungol renndo ngon newinay ɓannginngol faleeji kenndeeji jamaa on, newinana laamun ngun huurugol ɗoworɗe ngenndi ndin.
Ardiiɗo yaakitoraaɓe holli wonndema oo RSU no jooporaa ɗoworɗe senngooje, ko aalaa ngenndi ndin fow, mo laamu ngun huutorta e nder neweende kala ka haaju mun yani.
