Konaakiri ñannde 13 duujal 2026 – Ardiiɗo yaakitoraaɓe ɓen Aamadu Wuuri Baa hurmbitii nokkuure winnditorde fii passports express Kipe.
Immorde e yaakitoraaɗo fii kiwal ngal, ngal kuugal no faandii newinanngol jamaa on ɗuyta dumunne heɓugol paaspoor e heyɗintinngol noone golle no keɓal kaydi safaari newora.
Yaakitoraaɗo fii kiwal ngal Ahmed Mohamed Wuuri Jallo ka nder yewtere makko, o ɓannginii wonndema nokkuure nden e aalaaji ɗin ko tontagol re’a caɗeele ɗe ɗuuɗuɓe fottata e mun tentinii si hawrii hino hawji.
« (…) hutorayɓe ɓen ɗoo e yeeso no waawi hettude kaydiiji mun ɗin e nder leereeji 24 ; ma 48 maa 72 ittiri no ontigi hawjiri non. », o holli e nder pellital.
Ardiiɗo yaakitoraaɓe ɓen Aamadu Wuuri Baa jarnii tinnaare nden e heyɗintinal ngal e banŋe ligge ardiigu Gine ngun. O anndintini falleeji jamaa on gila duuɓi heewuɗi ; tentinii iway ɓe ka jananiri ɓen, tawa hiɓe wonndi e caɗeele dañugol kayɗi safaari.
Ardiiɗo yaakitoraaɓe ɓen holli wonndema ngal kuugal ɗoo ko e laawol heyɗintingol noone golle ardiigu ngun immorde e huulannde Ardiiɗo hawtaandi ndin Maamadii Dummbuyaa. Wonndude e faale timmbugol ngenndi tinniindi rewrondirndi e fewtudi faale ɓii-leydi en.
E ɓanŋe goo Aamadu Wuuri Baa wattirii yeeso wakkilaare, angisannde jamaa on fii no ngal kuugal waawinira ñinnude winnditugol Konaakiri e ka laamorɗe lare e ka jaagorɗe leyɗi ndin fii no noworana ɓii-leydi nokku kala ka o woni si hawrii jaagorde Gine no hen.
Ka lannoode, o tentinii, yo toppite fii humindirgol winnditannde e rewroɗe ɗen e tentinii nanondiral hakkunde aalaaji ɗin e heyɗintingol noone ardiigu ngun e dow tama’u wonndema ɗun wonay aala mawɗo fii kiwal kuuɗe ngenndi ndin.
