Konaakiri ñannde 28 setto 2026 Ardiiɗo yaakitoraaɓe ɓen ardike udditugol tummbondiral fii wuuruɗi ɗin, e tawnnde jeyaaɓe goo ka laamu, loojondirteeɓe goo e banŋe ñeeñal walla e faggudu. Ɗun ko waɗi ko e weerirde ka nder saare laamu Konaakiri.
Tummbondiral ngal ko e nder balɗe ɗiɗi 28 e 29 setto 2026 waɗata. Ngal tummbondiral ko ngenndiyankewal fii yewtidugol no hiwira hunndaari ndin (REGA) e timmbugol pehinorɗe no wuuruɗi ɗin fow hiwiree. Ɗun no yaadi e eɓɓooje njane Simanndu 2040 ɗen.
E innde Compagnie du TransGuinéen (CTG), Muusaa Beretee hollii wonndema laawol laana kan no rewi e nokkeeli nguuree duuɗuɗi nokkeeli haanaaɗi hiweede fii ɓanntal ngenndi ndin. O ɓanngini ɓe ƴettii anngisannde, wonndema CTG hiway hunndaari ndin.
E innde Banki winndere nden, Iisaa Jaawo jarnii eɓɓoore Gine nden mottindirgol oo jamaa ɗoo fow e nokkuure wootere fii yewtidugol alhaali no hunndaari ndin e wuuruɗi ɗin hiwirtee. Nde tawnoo ko ɗi ngalu ngenndi.
Yaakitoraaɗo fii Hunndaari ndin e ɓantal duumiingal anndintinii wonndema Gine no alɗi wuuruɗi ko aldaa e nanndo e kadi Gine no angisii hiwugol hunndaadaari ka ɗin duumii ɗon. Ɓe iway e 15% haa e 28 % e nder leydi ndin ɗoo e 2030 e dow ballal REGAP
Yaakitoraaɗo on ardinno ka nder yewtere makko ɓure dañaaɗe ɗen ka yaakitorde makko, e pehe heyɗintinaaɗe ɗen tentinii e banŋal ñinnugol pehinorde fii nokkeeli hiweteeɗi ɗin, eltugol janna ɓuri yimɓe 600 fii kiwal hunndaari ndin e binnimaa e alaaji humondirɗi e kiwal e timmbude mankirde jawle fii kiwal wuuruɗi ɗin Gine e yanñugol wintaari ndin fii kiwal hunndaari ndin.
Ardiiɗo yaakitoraaɓe ɓen kañun ɓannginiri yewtere mun nden annditinngol faandaare e huulannde Ardiiɗo Hawtaandi ndin. Tentinii e banŋal accanngol jeere aroore nden ndonndi nafoori e hunndaari yooɗundi ka ngurndan newii.
Ardiiɗo yaakitoraaɓe ɓen holli wonnde Gine no jogii ngenndi mawndi e nder hirnaange Afiriki ndi tawata si hiwaama nafay moƴƴa. E nder faale ɓantal leydi ndin, himo toro hita nokku yuppitor sabu ɓantal ko si fow yaadii, ɗun non gasataa si hunndaari ndin hiwaaka.
O ɓanngini hara yaltudi e ngal tummbondiral ɗoo wonay aala fewjinorteeɗo hooloraaɗo wonannde banŋeeji buy. Himo toroo tawaaɓe en tawtugol no haaniri e nder tinnaare fii no yaadiren e faandaare ngenndi ndin.
« en jeyaa ndii leydi, ko en halfinaaɓe ndi…», o hommbiri yewtere makko nden.
