Konaakiri ñannde 5 mbooy 2026 – Ardiiɗo yaakitoraaɓe ɓen Aamadu Wuuri Baa tawaama ka jonnde mbatu Mawngu fii daginngol ɗeri pehinorɗi huuɓuɗi kuugino eɓɓoore Simannde 2040 nden. Ndee eɓɓoore bunjinay baylanduru faggudu Gine ndun e nder ɗii duuɓi sappo e jowi arooji.
No tawanoo ka jonnde koolaaɗo mawɗo ka ardiigu e yaakitoraaɗo ardiiɗo kabinee on ka ardiigu hawtaandi e huɓindiiɓe goo e jaagoraaɓe e nootaniiɓe kawtitte winndereyankooje.
Ardiiɗo yaakitoraaɓe ɓen jarnii faandunnde nden e Ardiiɗo Hawtaandi ndin Maamadii Dummbuyaa nde tawnoo ndee eɓɓoore ko immorde e makko e hinde huuli wonugol tugalal mawngal fii ɓantal duumiingal wonannde ngenndi ndin fii jeere aroore nden.
O anndintini kisan wonndema, ndee eɓɓoore no faawii e tugaale buy ɗuɗɗinayɗe laawi faggudu ndun fadee e ngenndi ndin, ɓeydita ɓure keɓal yimɓe ɓen ɓeyɗita wintaari maɓɓe ndin ko duumi. Faale ɗen ko : « ɗuytugol ŋakkereeji humondirɗi e faggudu ndu tawata leyɗe hettiiɗe ɗen, no ndaarira ɗun wa faggundu tawaandi ».
Ardiiɗo yaakitoraaɓe ɓen, tiiɗinii ko tawii kon si tawii ndee eɓɓoore laati no tamƴinaa telen miliyaaruuji 300 dola amerikinaaɓe, timmbugol pehinorde yaandunde e Sariya mawɗo leydi ndin tabintinaaɗo e hitaande 2024.
Saa’iiji hittuɗi e ndee jonnde ɗin ko tawde pehinorde nden daginaama e ley suɓo ɓuruɓe e ɗuuɗude ɓen faadee e ɓantal ngenndi ndin.
Ka lannoode, Ardiiɗo yaakitoraaɓe ɓen noddii jaamaa on e nanondiral mawngal wonannde ɓii leydi en fii no ndee faandaare ngenndi wonira ɓantal goongawal duumingal e nder deeƴere.
