ߞߐߣߊߞߙߌ߫ ߞߏ߲ߞߏߜߍ߫ ߕߟߋ߬ ߄/ ߂߀߂߆
ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߞߊ߬ ߞߐߣߊߞߙߌ߫ ߞߊ߬ߝߏ߬ߙߋ߲ ߥߎߢߊ߲ߓߍ߲ ߘߊߦߟߍߟߌ ߢߊ߰ߢߊ߮ ߢߣߊߓߊ߯ߦߊ߫. ߁߀߅.߅ ߍߝ ߍߡ ߞߏ߲ߓߌߕߌ߱ ߕߟߋ߬ ߂ ߣߊߞߐ ߘߐ߫. ߞߎ߲߬ߦߌ߬ߘߊ߬ߟߌ ߣߌ߲߬ ߦߋ߫ ߞߐߣߊߞߙߌ߫ ߛߏ ߞߎ߲߬ߠߊ߬ߛߌ߰ߟߊ ߟߎ߬ ߟߊ߫ ߢߍߥߟߊ ߟߋ߬ ߘߌ߫. ߞߵߊ߬ ߓߍ߲߬ ߞߎߓߋߘߊ ߝߘߏ߬ߓߊ߬ ߦߙߐ ߡߊ߬ߡߊ߬ߟߊ ߟߎ߬ ߢߊߞߎߘߦߊ ߢߍߥߟߊ ߡߊ߬. ߞߐߣߊߞߙߌ߫ ߛߏ ߞߎ߲߬ߠߊ߬ߛߌ߰ߟߊ ߒߡߊߥߊ߬ ߛߌ߬ߟߊ߫ ߞߵߊ߬ ߦߌ߬ߘߴߊ߬ ߟߊ߫ ߘߊߦߟߍߟߌ ߓߋߟߋ߲ߠߊ ߘߐ߫، ߞߏ߫ ߊ߬ߟߎ߬ ߦߋ߫ ߝߏ߬ߟߌ ߖߍ߬ߘߍ ߖߍ߬ߘߍ ߟߊߛߋ߫ ߟߊ߫ ߞߊ߲ߓߍ߲ ߞߊ߲ߕߌ߮ ߡߊ߬ߡߊߘߌ߫ ߘߎ߲ߓߎߦߊ߫ ߡߊ߬. ߞߵߊ߬ ߓߍ߲߬ ߓߍ߲߬ߒ߬ߛߋ߲߬ߡߊ ߘߌ߫ ߡߊ߬ ߘߌ߲߬ߞߌߙߊ ߡߙߊ߬ߦߊ ߟߎ߬ ߡߊ߬߸ ߊ߬ߟߎ߬ ߕߊ ߝߊ߲߭ ߞߍ ߘߐ߫ ߘߌ߲߬ߞߌߙߊ ߟߎ߬ ߟߊ߫ ߥߙߎߞߌ ߟߊ߬ߣߌ߬ߡߊ߬ߦߊ߬ߟߌ ߘߐ߫. ߊ߬ ߞߊ߬ ߞߍߕߊ ߏ߬ ߟߎ߬ ߓߌ߬ߟߊ߬ ߞߎ߲߬ߠߊ߬ߦߋ߬ߙߋ߲߬ ߖߎߓߐ ߓߐߢߟߊߕߊ ߟߎ߬ ߞߊߡߊ߲ ߠߋ߬ ߘߐ߫ ߏ߬ ߡߍ߲ ߞߍ߫ ߘߊ߫ ߞߏ߲ߓߌߕߌ߱ ߕߟߋ߬ ߂ ߣߊߞߐ ߘߐ߫ ߞߎ߲߬ߠߊ߬ߛߌ߰ߟߊ ߟߎ߬ ߓߟߏ߫. ߏ߬ ߡߍ߲ ߞߎ߲߬ ߖߐ߲ߖߐ߲ ߦߋ߫ ߞߍߣߍ߲ ߞߐߣߊߞߙߌ߫ ߞߊ߬ߝߏ߬ߙߋ߲߫ ߥߎߢߊ߲ߓߍ߲߫ ߝߢ ߁߀߅. ߅. ߘߊߦߟߍߟߌ ߘߌ߫. ߊ߬ ߣߌ߫ ߞߏ߬ߟߌ߬ߦߙߐ ߣߌ߫ ߝߊ߬ߘߌ߬ߡߊ߬ߞߟߏ ߦߙߐ ߓߐߣߍ߲ߢߐ߲߰ߡߊ، ߞߎߓߋߘߊ ߘߎ߰ߘߋ߲ ߓߍ߯ ߟߊ߫ ߣߊ߬ߝߊ ߘߐ߫. ߟߊ߬ߟߐ߲߬ߠߌ߲߬ߦߊ߬ߟߌ ߤߏߞߌ ߤߊߞ ߞߊ߲ߕߌ߮ ߛߟߊߕߌ߯ ߊߓߎߓߞߊߙ ߦߊߛߌߣ ߖߊߟߏ߫ ߞߵߊ߬ ߕߌ߲ߕߌ߲߫ ߓߟߏߡߞߊߟߌ ߣߌ߫ ߖߊ߬ߓߌ߬ߦߊ߬ߟߌ ߞߊ߲߬ ߞߏߛߓߍ߫. ߊ߬ ߣߌ߫ ߢߊ߰ߘߐ߬ߘߌ߬ߦߊ߬ߟߊ ߟߎ߬ ߟߊ߫ ߖߊ߬ߓߌ߬ߦߊ߬ߟߌ ߣߌ߫ ߝߐ߰ߓߍ߬ߦߊ߬ߟߌ ߡߊ߬ߞߍ߬ߟߌ. ߞߊ߬ ߞߐߣߊߞߙߌ߫ ߛߏ߫ ߞߎ߲߬ߠߊ߬ߛߌ߰ߟߊ ߟߊ߫ ߞߎ߲߬ߦߌ߬ߘߊ߬ߟߌ ߞߎߟߎ߲ߖߋ߫. ߞߵߊ߬ ߡߊ߲߬ߞߕߎ߬ߦߊ߫ ߦߟߌߡߊߛߙߋ ߘߌ߫ ߛߌ߲ߘߟߌ ߥߟߊ߬ߘߊ߬ ߘߐ߫. ߊ߬ ߣߌ߫ ߥߊߟߌߘߊ߫ ߟߊ߬ߖߊ߲߬ߞߏ߬ߟߌ ߝߐ߰ߓߍ߬ߦߊ߬ߟߌ ߛߌߟߊ ߝߍ߬ ߞߵߊ߬ ߓߍ߲߬ ߡߌ߬ߙߌ߲߬ߘߌ ߗߋߢߊ ߡߊ߬. ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߞߊ߬ ߞߏ߲ߓߌߕߌ߱ ߕߟߋ߬ ߝߌ߬ߟߊ߬ ߣߊߞߐ ߘߊߘߐߓߍ߲ ߞߘߎ߬ߜߟߍ߬ߦߊ߬ ߞߏߛߓߍ߫، ߞߏ߫ ߦߙߐ ߓߘߊ߫ ߞߍ߫ ߡߐ߱ ߟߎ߬ ߡߊߛߊ߬ߡߊ߲߬ ߘߌ߲ߞߌߙߊ ߘߌ߫. ߡߍ߲ ߕߊ߲߬ߘߏ߬ߣߍ߲߫ ߘߎ߰ߘߋ߲ ߝߊ߲߬ߓߊ ߓߟߏ߫. ߊ߬ ߞߵߊ߬ ߕߌ߲ߕߌ߲߫ ߊ߬ ߞߊ߲߬ ߞߏ߫ ߞߎ߲߬ߦߌ߬ߘߊ߬ߟߌ ߣߌ߲߬ ߦߋ߫ ߕߐ߰ߡߊ߬ߦߋߙߋ߲ ߠߋ߬ ߘߌ߫، ߖߊ߲߬ߓߌ߬ߟߊ߬ߟߌ ߘߐ߫ ((ߞߎߡߊߓߏ߲ ߦߋ߫ ߟߊ߬ߟߐ߲߬ߠߌ߲ߦߊ߬ߟߌ߬ ߓߟߏߟߊߕߎ߲߰ߕߊ ߟߋ߬ ߘߌ߫. ߊ߬ ߦߋ߫ ߓߌ߬ߟߊ߬ߢߐ߲߰ߡߊ ߟߋ߬ ߘߌ߫ ߞߐߣߊߞߙߌ߫ ߡߌ߬ߙߌ߲߬ߘߌ ߣߌ߫ ߡߙߊ߬ߦߊ ߕߍ߫)) ߖߊ߲߬ߖߏ߲ ߞߊ߬ ߖߊ߬ߓߌ߬ߦߟߊ߬ ߛߌߦߊߡߊ߲߫ ߠߊߘߍ߬ ߞߵߏ߬ ߓߍ߯ ߟߊ߫ ߟߊ߬ߟߐ߲߬ߠߌ߲߬ߦߊ߬ߟߌ ߡߙߊ߬ߦߊ߬ ߤߏߞߌ ߟߎ߬ ߞߊ߲߬، ߛߊ߲ߡߊ߫ ߣߊ߲߬ߕߌ߰ߘߊ ߘߊ߯ߘߐ ߞߎ߲߬ߕߌ߮ ߞߵߏ߬ ߓߍ߯ ߟߊ߫ ߞߐߣߊߞߙߌ߫ ߞߊ߬ߝߏ߬ߙߋ߲ ߗߋߦߊߟߌ߫ ߞߙߍߞߙߍߣߍ߲߫ ߞߊ߲ߕߌ߮ ߟߎ߬ ߞߊ߲߬.
