ߞߐߣߊߞߙߌ߫ ߣߍߣߍߓߊ߫ ߕߋ߬ߟߋ߫ ߂߄/ ߂߀߂߅
ߖߌ߬ߣߍ߬ ߞߎߓߋߘߊ ߕߘߍ߬ ߓߘߊ߫ ߡߊߛߍ߰ ߞߵߊ߬ ߓߍ߲߬ ߝߘߏ߬ߓߊ߬ ߞߍ߲ߘߍߦߊ ߞߟߍ߬ߦߊ ߕߌ߲߬ߞߎ߬ߘߎ߲߬ߠߊ߬ߞߊ ߡߊ߬. ߞߏߕߌ߯ ߝߟߐ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߞߊ߬ ߘߊߦߟߍߟߌ ߢߊ߰ߢߊ߮ ߢߍߡߌ߬ߘߊ߬ ߞߵߊ߬ ߓߍ߲߬ ߝߘߊ߬ߝߌ߲߬ߠߊ߫ ߕߟߋ߬ߓߋ ߣߛߌ߬ߘߐ߬ߦߊ ߢߍߥߟߊߦߊߟߌ ߘߐߦߙߌߥߊߣߍ߲ ߗߋߕߌ߯ ߟߎ߬ ߟߊ߫ ߢߐ߲߯ߦߋ ߡߊ߬
(ߣ ߘ ߢ).
ߞߎ߲߬ߕߐ߯ ߞߟߍ߬ߦߊ߬ߡߊ ((ߝߘߊ߬ߝߌ߲߬ߠߊ߫ ߕߟߋ߬ߓߋ ߣߛߌ߬ߘߐ߬ߦߊ ߖߘߍ߬ߕߌ߰ߦߊ ߛߏ߬ߓߌ߬ߟߊ߬ߞߎߣߎ߲))
ߣߍߣߍߓߊ߫ ߕߋ߬ߟߋ߫ ߂߄ ߣߌ߫ ߂߈ ߕߍߟߊ ߢߐ߲߯ߦߋ ߢߊ߬ߕߣߐ߬ߡߊ ߣߌ߲߬ ߞߊ߬ ߞߙߎߝߊߟߌ ߞߍ߫ ߕߌ߲߬ߞߎߘߎ߲߫ ߖߡߊ߬ߣߊ ߁߆ ߞߐߦߌߘߊߓߊ߯ ߟߎ߬ ߟߋ߬ ߟߊ߫ ߞߵߏ߬ ߟߊ߫ ߊߟߌߖ߭ߋߙߌ߫ ߞߊ߲߬.
ߢߌߣߌ߲ߞߏ߫ ߘߐߞߣߍߣߍ߲߫: ߞߊ߬ ߟߊߥߟߌ߬ ߞߘߐߓߐߟߌ ߝߊ߲߬ߞߊ߬ߡߊ ߡߊ߬߸ ߞߵߊ߬ ߟߐ߬ ߣߛߌ߬ߘߐ߬ߦߊ ߞߍߝߊߘߌ ߡߊ߬ ߡߊ߲߬ߕߏ߲ ߕߘߍ߬ߒ߬ߘߐ߬ߓߊ߮ ߟߎ߬ ߓߟߏ߫. ߞߊ߬ ߟߊ߬ߢߌ߬ߣߌ߲߬ߠߌ߲߬ ߞߣߐߘߐ ߕߏ߲ߘߋ߲ ߟߎ߬ ߛߌ߰ ߞߟߊ߬ ߞߋߟߋ߲߫ ߞߊ߲߬. ߊ߬ ߣߌ߫ ߞߊ߬ ߓߐߒߘߊ߫ ߕߌ߲߬ߞߎ߬ߘߎ߲߬ߠߊ߬ߞߊ ߖߘߍ߬ߞߊ߬ߣߌ߲߬ߕߊ ߘߏ߫ ߘߍ߬ߡߍ߲߬ߘߌ߫ ߊ߬ ߟߊ߫. ߞߊ߬ ߞߘߎ߬ߜߍߟߍ߲ ߝߛߊ߬ߡߊ߲ ߠߎ߬ ߠߊߥߟߌ߬ ߣߊ߲߬ߝߟߏ߬ߦߊ߬ߟߌ ߛߌߟߊ ߝߍ߬.
ߞߏߕߌ߯ ߝߟߐ ߞߊ߬ ߞߎߡߊ ߕߊ߬ ߞߵߊ߬ ߕߌ߲ߕߌ߲߫ ߢߝߍߕߊ߮ ߘߞߊߓߊߣߊ߲ߞߏߡߊ ߣߌ߲߬ ߞߊ߲߬ ߡߍ߲ ߓߐߣߍ߲߫ ߢߊ߫ ߟߊ߫ ߖߌ߬ߣߍ߬ ߓߟߏ߫ ߣߛߌ߬ߘߐ߬ߦߊ ߢߍߥߟߊ ߘߐ߫߸ ߞߵߊ߬ ߟߐ߬ ߟߊ߬ߝߏ߬ߟߌ ߞߘߍߜߍ ߡߊ߬ ߞߊߙߏ߫ ߕߊ߲߫ ߣߌ߫ ߝߌ߬ߟߊ߬ ߕߊ߬ߡߌ߲߬ߣߍ߲ ߞߘߐ߫. ߖߡߊ߬ߣߊ ߞߊ߬ ߟߊ߬ߞߎ߲߬ߘߎ߲߬ߟߌ߬ ߢߊ߬ߕߣߐ߬ߡߊ߬ߓߊ ߟߋ߬ ߞߍ߫߸ ߞߊ߬ ߓߐ߫ % ߄߇ ߤߊ߲߯ % ߆߃ ߛߊ߲߬ ߞߋߟߋ߲߫ ߘߐߙߐ߲߫ ߞߘߐ߫. ߥߟߊ߫ ߡߍ߲ ߛߍߥߊߣߍ߲ ߥߊ߯ߣߍ߲߫ ߤߊ߲߯ ߕߏ߲ߘߋ߫߁߆. ߞߐߝߟߌ ߏ߬ ߕߊ߲߬ߘߏ߬ߣߍ߲ ߠߋ߬ ߦߏ߫ (ߛߏ߬ߘߊ߲߬ߛߏ߬ߦߊ). ߞߏߟߊߘߍߢߐ߲߯ ߛߋ߲ߞߏߟߊ ߣߌ߫ ߣߊ߲߬ߝߟߏ߬ߦߊ߬ߟߊ ߢߣߊߓߊ߯ ߟߎ߬ ߕߍߡߊ߬.
ߊߡߊߘߎ߫ ߎߙߌ߬ ߓߊ ߞߵߊ߬ ߦߌ߬ߘߵߌߞߐ߫ ߞߏ߫ ߞߊ߬ߝߏ ߟߊ߫ ߖߘߍ߬ߘߏ߲߬ߒ߬ߞߊ߲߬ߡߊ ߝߊ߲߬ߞߊ߬ߡߊ ߦߴߊ߬ ߣߐ߭ ߘߐ߫: ߂߀߂߆ ߟߊ߫ ߞߵߊ߬ ߓߍ߲߬ ߡߐ߰ߦߊ ߛߐ߬ߘߐ߲߬ߘߊ ߣߌ߫ ߖߐ߯ߙߊ߲ ߞߏ ߟߎ߬ ߡߊ߬߸ ߊ߬ ߓߍߣߊ߬ ߞߍ߫ ߝߟߐߦߊ ߘߌ߫ ߝߛߎߞߎߦߊߟߌ ߝߊ߲߬ߓߊ ߘߐ߫. ߞߵߊ߬ ߟߊߥߟߌ߬ ߓߊ߲ߓߊ߲ߠߌ߲ ߡߊ߬ߡߊ߬ߟߊ ߡߊ߬ ߕߍ߰ߒ߬ߞߊ߲߬ ߓߟߏߡߊ߬߸ ߞߊ߬ ߕߊ߬ߡߌ߲߬ ߢߌߣߌ߲ߞߏ ߛߎߡߊ߲ߣߍ߲߫ ߝߊ߬ߛߏ߬ߟߊ߬ߞߊ ߟߊ߫ ߘߊߞߎ߲ ߏ߬ ߟߎ߬ ߘߐ߫.
ߞߵߊ߬ ߓߍ߲߬ ߖߌ߬ߣߍ߫ ߞߎ߲߬ߠߊ߬ߛߌ߮ ߣߊ߬ߕߊ ߡߊ߬ ߸ ߛߋ߲ߞߏߟߦߊ߫ ߞߏߟߊߘߍߢߐ߲߮ ߣߊ߲߬ߝߟߏ߬ߦߊ߬ߟߊ ߟߎ߬ ߕߊ ߝߊ߲߭ ߘߐ߫ ߞߊ߬ ߖߡߊ߬ߣߊ ߟߊ߫ ߞߐߡߊߓߌ߲ߓߌ߲ߠߌ߲ ߦߌ߬ߘߊ߬ ߞߣߍ ߞߊ߲߬. ߞߵߊ߬ ߓߍ߲߬ ߊ߬ߟߎ߬ ߟߊ߫ ߖߘߍ߬ߘߏ߲߬ߒ߬ߞߊ߲߬ߡߊ ߟߊߘߏ߲߰ߘߐ߬ߣߍ߲ ߣߌ߫ ߟߊߢߌߣߌ߲ߣߍ߲ ߡߊ߬ ߜߍ ߘߐ߫ ߞߵߊ߬ ߓߊ߲ߓߊ߲߫. ߞߊ߬ ߡߌ߬ߙߌ߲߬ߘߌ ߟߊ߫ ߟߊ߲ߒߠߊߦߊ ߛߐ߬ߘߐ߲߬ ߞߵߊ߬ ߓߍ߲߬ ߣߛߌ߬ߘߐ߬ߦߊ ߘߐߦߙߌߥߊߣߍ߲ ߢߍߥߟߊ ߡߊ߬. ߏ߬ ߡߍ߲ ߦߋ߫ ߘߌ߲߬ߞߌߙߊ ߞߍ߲ߘߍߦߊ ߘߍ߬ߞߏ߬ߦߊ ߛߊ߬ߡߊ߲߬ߛߋ߲ ߘߌ߫.
ߢߐ߲߯ߦߋ ߣߌ߲߬ ߢߊ߬ߕߣߐ ߥߙߊ߬ ߘߊ߫ ߟߋ߬ ߞߘߐߓߐߟߌ ߜߊ߲ߛߊ߲ ߡߊ߬: ߊ߬ ߞߊ߬ ߓߊ߯ߙߊ ߟߋ߬ ߦߌ߬ߘߊ߬ ߣߛߌ߬ߘߐ߬ߦߊ ߖߘߍ߬ߕߌ߰ߦߊ ߕߌ߲߬ߞߎ߬ߘߎ߲߬ߠߊ߬ߞߊ ߘߐ߫߸ ߞߊ߬ ߛߋ߫ ߝߘߊ߬ߝߌ߲߬ߠߊ߫ ߕߟߋ߬ߓߋ߫ ߣߛߌ߬ߘߐ߬ߦߊ ߡߊ߬ߞߊ߲߬ߞߊ߲߬ߠߌ߲ ߘߎ߲ߡߕߊ ߞߍ߫ ߟߊ߫ ߖߊ߲߬ߞߊ߬ߙߏ߬ ߡߊߕߊ߲߬ߞߊ߬ߕߊ ߟߎ߬ ߘߐ߫.
