Jour : 27 juillet 2026

Konaakiri ñannde 24 morso 2026 Cukko Ardiiɗo Kabinee on ka yaakitorde Moodi Lancine Hawaa Dummbuyaa e innde Ardiiɗo yaakitoraaɓe ɓen ardike ka jonnde yaakitorde aranere  jonnde fii daginngol pehe ƴettaaɗe fii haɓugol VIH, Tiberkiloosi e Hepatit.

Ngal tummbundiral moftuno njuɓɓudiiji buy ka banŋe cellal, no e maɓɓe : CNLS, UCN, REGAP, PCG e woɓɓe wonnduɓe e nawnaare VIH.

Ka yewtere makko kanko cukko ardiiɗo kabinee on, o adorno hewtinngol ɓe hiwraango e jarnoore ardiiɗo yaakitoraaɓe ɓen. O weltori ngal tummbondiral sabu ɗuuɗugol tawaaɓe iwruɓe cenɗe buy fii haɓugol ñabbeeli e o weltori angiisannde maɓɓe nden faadee e haɓɓugol ñabbeeli lintaaɗi dow ɗoo ɗin.

E innde Ardiiɗo yaakitoraaɓe ɓen, o weltanii waajo on e banŋal cellal ka yaakitorde aranere fii ko o huuri kon ngal kuugal.

O tentinii e ɓeydugol eɓɓooje ɗen fii haɓugol ɗii ñabbeeli fii hita jaalo e ngenndi ndin fow. O holli wonnde ɗee pehe ɗoo no haani wonude aala huutorteeɗo fii huurugol faandaare timmbande nden e muu ɗun.

Cukko Ardiiɗo kabinee on holli fahin no haani ka ɓe wattana hilla fii ɗee pehe, timba eɓɓoore golle wonndude e dumunne fii ñinnugol ɗe.

O sakkitori heyɗintingol e innde ardiiɗo yaakitoraaɓe ɓen, anniyee tammbitagol ngal kuugal. O inni : « kala ko humondiri e cellal no haanaa yaccineede, ɗun haanaaka habboreede tentinii si no humondiri e jamaa on ».

Konaakiri ñannde 24 morso 2026 Hooreejo kabinee on ka yaakitorde aranere Sonna Binta Jallo sannii tato e gollideteeɓe makko yahunooɓe ɓeyduru ganndal fii koolaaku (sekereteeri) wonuɓe e liggaade ka yaakitorɗe. ndun ɓeyduru ganndal ko Lome waɗi, saare laamorde Hawtaandi Togoo. Gila ñannde 23 korse haa 2 morso 2026.

Ko e ley tiitoonde « mbawdi, yankinaare e kuulanɗe 9 kese koolaaɗo : aala fii ñinnugol no haaniri golle ardiiɗo ɗun on ». Nduu ɓeyduru ganndal, no faandii yeɗugol tawaaɓe ɓen alaa no ɓe waawira e nder yaccaare e newaare huɓindagol ñalɗinkooje e kuuɗe ardiiɗo ɓe on.

E nder ngal tummbondiral, sannaaɓe ɓen holli hooreejo kabinee on ɓure ɗe ɓe dañi e nder ndun ɓeyduru ganndal tentini ko tawi kon ɗun newinay ɗoo e yeeso golle maɓɓe ɗen ka yaakitorde aranere. Ko ɓawto ɗun ɓe holli mo seedeeji maɓɓe ɗin.

E innde Ardiiɗo yaakitoraaɓe ɓen, hooreejo kabinee on Sonna Binta Jallo jarnii ɓe sanne-sanne sabu wakkilaare maɓɓe nden e ndun ɓeyduru ganndal. O toriiɓe huutorgol ko ɓe janngi kon fii no kuugal ardiigu ngun ɓurtira yaarirde yeeso.

Konaakiri ñannde 23 morso 2026 Ardiiɗo yaakitoraaɓe ɓen Aamadu Wuuri Baa ardike tummbundiral mojobere halfinaande timmbugol eɓɓoore jawle winteteeɗe ɗen CNBP fii ƴewtagol huura eɓɓoore jawle ɗen.

Ngal tummbondiral ko fii ƴewtagol annda ko honto ɓe fewndii e eɓɓoore nden, taskoo e ko eɓɓaa kon, jonnindira hakkille maa waajoo faadee e ko waɗaaka kon. No jeyaa kadi e maggal heyɗintingol anngisannde yaakitorɗe ɗen fii ardiigu fawiingu e yaltudi, humondirdi e Ardiigu moƴƴu, laaɓal e luujondiral.

E nder ɗun, Ardiiɗo yaakitoraaɓe ɓen ɓanngini wonndema eɓɓoore jawle ɗen ko tugalal fii newinngol winntaaje ngenndi ndin, fenñina ko huutoora e ko habbaa. Ka raɓɓinɗingol no ɓanngina ardiigu moƴƴu.

O heyɗinti angisannde laamu ngun toppitagol heyɗintinannde nden  fii timmbugal ardiigu wawngu, laaɓungu fewntungu ɓure yaltudi ndin yaandungu e huulanɗe Simanndu 2040.

No tawanoo e ngal tummbondiral, jeyaaɓe ka ardiigu, jeyaaɓe e njuɓɓudiiji tawaaɗi ɗin e tawaaɓe e kañun mojobere halfinaande fii waɗugol eɓɓoore jawle ɗen.

Konaakiri ñannde 22 morso 2026 Ardiiɗo yaakitoraaɓe ɓen ardike hurmbito NimbaPay, njuɓɓudi ngenndiyankoori fii yoɓo yaawungo e huuɓungo e nder Hawtaandi Gine.

Haaju ngun moftono jeyaaɓe ka laamu, e waajooɓe ka ardiigu hawtaandi. Ardiiɓe bank mawɗo on BCRG kawtitte humondirɗe e bankiiji ɗin yeñinirooɓe jawle rewroore, njuɓɓuduuji fagguduyankooji e luujooɓe e banŋe karallaagal maa jawle.

Ɗun ɗoo ko dimɗe kuugal BCRG kono ñinno ngon ko kuugal njuɓuudiiji bankiiji ɗin fow. NimbaPay ko kuugal mawnngal fii heyɗintingol njuɓɓudi jawle Gine ɗen. NimbaPay no ɓanngini faandaare laamu ngun yeɗugol jamaa noone no ɓe yoɓira ka woniwoo e nder kiwal e neweende.

Ardiiɗo mawɗo saldu Guinéenne de Monétique, Moodi Alii Badara Beretee, holli wonnde ndii njuɓɓudi ɗoo hinaa aala karallaaku tun, kono ko kuugal kafaangal ngal faandaare wootere. O anndintini wonnde eɓɓoore nden ko e nder balɗe 127 ko hewtaa lebbi jeegoo tippude e moftugol kippuuji karalɓe ɓen njuɓɓudiiji jawle ɗin e luujooɓe goo.

Ɓen luujooɓe ko wano : Mojaloop Foundation et AfricaNenda, Thitsa Works. ɓee ɗoo ɓe ardini yeɗugol Gine aala on taho. Ɓe takki ɗon anngisannde maɓɓe nden jokkugol tammbitoo haa njuɓɓudi ndin ñiiɓa

Ardiiɗo ñinnugol NimbaPay on, cukko guwerneer on ka BCRG e ardiiɗo Guinéenne de Monétique, Mohammed Lamine Kontee, hollii wonndema taskannɗe sifaaji mun ɗen ka jananiri wano Pix e nder Beresil, UPI e nder Indiya no ɓanngini wonnde njoɓɓudi yoɓo no fawii e tugaale tati : ardiigu fii mbuuɗi ɗin, alhaaliiji karallaaku, e angisannde mawnde.

Guwerneer BCRG on Moodi Karamoo Kabaa hollii wonndema huutorgol NimbaPay no ɓanngini faandaare ñiɓugol yoɓiro noone heyɗintinaaɗo e nder dimu. O anndintini wonndema ɓure yaltuɗe e sifaa oo alhaali no ɓanngi e linto ɓeydoral 4 % e hitaande 2011 haa hewti telen 36 % e hitaande 2024, e ɗun fow ko tawde no yoɓireede rewrere.

Konakiri ñannde 22 morso, 2026 Yaakitoraaɗo ardiiɗo kabinee on ka jonnde yaakitorde aranere, Doftooru Dawda Kamisokoo tawaama e innde Ardiiɗo yaakitoraaɓe ɓen ka jonnde CCIAG nde ɓe timmbi e werde mawnde ka saare Konaakiri.

Ngal tintidal wonuno sommbo yo ƴettidu pehe tippude e kuuɗe waɗaaɗe ɗen ka nder mojebere. Ɓe yewti fii baɗe e saatiiji e ŋakkereeji fow, ɓe ɓanngini pehe no ɓe yiilirta mojebere nden wonndude e yeñinooɓe jawle ɓen.

E konngol ardiiɗo Saambur ngeegu ngun Alhajji Mammadu Balde, ngal tummbundiral ko fii ɓanngingol faandaareeji ardiigu moƴƴu e fii toppitagol e anngisannde faadee yeñinooɓe jawle jeytoraaɗe fii no ɓen ginenaaɓe tammbitora ɓantal leydi Gine ndin.

Ka nder yewtere makko, Yaakitoraaɗo ngeengu ngun, suluuji ɗin e ñeeñal ngal Sonna Faatumata kamara ɓannginii yewtere holnunde wonannde jeyaɓe ɓen fow ka saambur ngeengu (CCIAG), o ɓanngini ɓure heewuɗe tentininn wano timmbugol calɗi mojobere nden wano Kankan e Serekore. E heyɗintine fewndiiɗe ɗen Boke, Faraanaa e Labe.

E banŋe goo o jarni ɓaŋorɓe ɓen senngo Seregore sabu angisande maɓɓe nden fii huurugol golleeji kenndeeji.

Yaakitoraaɗo ardiiɗo kabinee on ka yaakitorde aranere, Doftooru Dawda Kamisokoo hewtinii e tawaaɓe ɓen hiwraango Ardiiɗo yaakitoraaɓe ɓen wonndude e du’aaji makko fii no haaju ngun laatora no haaniri.

O anndintini wonndema laamu ngun no hatonjini CCIAG deeƴuɗo, dolnuɗo, moftuɗo haqqilaaji yeñinooɓe duuɗuɓe fii ɓantal ngenndi ndin.

Konaakiri ñannde 21 morso 2026 ardiiɗo yaakitoraaɓe ɓen Aamadu Wuuri Baa saanii Koohoo Mohammad S Elhalawanii jaagoraaɗo Hawtaandi Ejipt ndin Gine wonndude e Moodi Hesham Medhat Elavokato konsul keso on Ejipt e nder Gine.

Ngal tintidal no fawii e ɓeyditugol huuwondire hakkunde leyɗe ɗen ɗiɗi e banŋe faggudu. Tentinii e banŋe ɗate, demal e baylanduru faggudu.

Jaagoraaɗo Ejipt on no weltori huuwondiral hakkunde Konaakiri e Keer ngal. O anndintini wonnde ɗun no humondiri e weldigal hakkunde leyɗe ɗen ɗiɗi gila duuɓi arani hettugol ndimu afirikinaaɓe.

Faadee e fokkitande Gine nden e banŋal baylanduru faggudu, immorde e eɓɓoore Simanndu 2040 nden jaagoraaɗo ejipnaajo on holli angisannde ledi makko ndin tammbitagol fokkitannde Gine nden immorde e ɓeyditugol wintotooɓe ejiptnaaɓe.

Yewtere nden yaadi fahin e ɓanngingol faale no Ardiiɗo yaakitoraaɓe ɓen seenora ƴewtoyoo leydi Ejipt ndin fii sollintingol huuwondire kese hakkunde leyɗe ɗen ɗiɗi.

Ardiiɗo yaakitoraaɓe ɓen anndintini taariika huuwondire ɗen hakkunde leyɗe ɗen ɗidi, o linti duɗal mawngal ngal Gamal abdel Naseer Konaakiri waa maande ngal huuwondiral. O fodi waɗugol ngal huuwondiral kesal faandaare ngenndi ndin wonndude e faandaareeji Gine fewndiiɗi ɗin e banŋe ɓantal.

Fii winntagol Gine, Ardiiɗo yaakitoraaɓe ɓen holli wonnde Hawtaandi ndin no sanni kala luujo yiɗuɗo tawndeede e baylanduru faggudu leydi ndin.

Konaakiri ñannde 20 morso 2026 Ardiiɗo yaakitoraaɓe ɓen sannii ko jonnde yaakitorde aranere nootiiɓe e innde YILONGHE Plantation et Développement Agricole Guinée SARL, seeniiɓe ɓannginngol eɓɓoore ɓantal faade e demal maaro jillaako e nder leydi Gine ndin.

Ngal tummbondiral no humondiri e tintidal hakkunde Ardiiɗo yaakitoraaɓe Gine on Aamadu Wuuri Baa e mo Siin on Moodi Lii Qiang ka tummbundiral 17^ɓal winndereyankewal e nokku wi’eteeɗo Dawos ka ɓe gunndodi fii demal maaro jillaako e nder leydi Gine.

E nder yewtereeji maɓɓe ɗin, seeniiɓe e innde mojobere nden ɓannginii tasakuyee mo ɓe waɗi on gila hitaande 2019 e nder leydi Gine ndin. Nden taskannde no ɓanngini noone no demal koo maaro jillaako reworta e nder leydi Gine ndin.

Ardiiɓe kañun mojobere nden no lanndii tammbiteede faadee e laamu Gine ngun fii no ndee eɓɓoore maɓɓe laatora nde tawnee ko ɗoworde ngenndi ndin fii haɓugol heege e mayri.

Wonannde seeniiɓe ɓen, ngal kuugal no tontii faandaaje ɗiɗi mawɗe : nootagol noddaandu Ardiiɗo Siin on fii tammbitagol Gine no heege haɓiree e nder leydi ndin, e faandaare wallitagol tayre mawnde jamaa winndere nden fii no nde waawira faggitaade immorde e sincannde maɓɓe nden.

Mojobere nden holli wonnde nde tinii yaasi Gine kin no yaadi e ñinnugol eɓɓoore maɓɓe nden, fii kala ɗun no lanndii yeɗugol ginenaaɓe ñeeñal e mbawdi fii no ndii awdi jillaandi yo hewtu remooɓe ɓen ko dowri.

Ngal kuugal newinanay remooɓe ginenaaɓe ɓen huutorgol aalaaji fewndiiɗi ɗin wonndude e ñeeñal. Fii lollingol ɗun ɗoo ɓeyda awdi ndin, no haandi e hektaaru 1000.

Ardiiɗo yaakitoraaɓe ɓen, jarnii ngal kuugal e yamirii naɓidal. Naɓidal hakkunde karalɓe siinnaaɓe e remooɓe ginenaaɓe. O heyɗintini fahin angisannde makko nden fii tammbitagol ndee eɓɓoore mawnde. O tentinii e ɓure dañotooɗe e eɓɓoore nden sabu waawugol faggitaande no jeyaa e faandaaje arane ngenndi ndin.

O holli wonnde, wonannde laamu Gine ngun, newinay no ɗun laatora tentinii wano yeɗugol nokkuure ka ɗun fuɗɗee.

Konaakiri ñannde 20 morso 2026 Ardiiɗo yaakitoraaɓe ɓen seenike ƴewtagol taƴalle waɗuɗe ɗen ka kartiyee Deemudulaa, ka koore mo fawindire jeenay yani ɗon.

Ardiiɗo yaakitoraaɓe ɓen seenonduno e yaakitoraaɗo on fii sonnaaɓe ɓen e ɓeynguureeji ɗin wonndude e yaakitoraaɗo fii ca’e e wonunndeeji ɗin. Ndee ƴewtannde ko seenditagol yurmina yarlina faatoraɓe ɓen e humpitoo ko honno ɗun feƴƴiri e ittiri bonunnde waɗunde nden e ko honno ƴettitirta ɓay yanii.

Ɓay ɓe tinii kaawee on, Ardiiɗo yaakitoraaɓe ɓen jarnuno jagge laamu adiiɓe hewtude ɓen ka nokkuure.

« en tinii bonundeeji buy ko feƴƴi. Men yiɗa yo palje men ɗen rutto e men », ɓanngini Ardiiɗo yaakitoraaɓe ɓen. O watti ɗon wonndema laamu ngun humpitano fewndo ka waɗi ɗon tun e no humpiteede nokku kala ka fewndiɗon e tinnaare luujooɓe ɓen.

Ardiiɗo yaakitoraaɓe ɓen jarni kippuuji reenooɓe jamaa ɗin e konunkeeɓe ɓen faadee e kiwal ngal ɓe huuri ngal e dendamannii seeniiɓe faabagol sabu ko ɗun danndi buy wontirnooɓe ka ley tuufe.

O watti ɗon wonndema Yaakitoraaɗo fii sonnaaɓe e ɓeynguure on wonndude e njuɓɓudiiji goo fawtoto fii yaccino danndo ngon e ñawndugol barmuɓe ɓen

E innde Ardiiɗo hawtaandi ndin, ardiiɗo yaakitoraaɓe ɓen torike faatoraaɓe ɓen yarlagol. Taƴƴalle kala ko fiinannde wonani neɗɗo ». O anndinti jamaa on no haani teddinnde sartiiji darnugol ngol fii adintinngol piiji goo.

Konaakiri ñannde 18 morso 2026 yaakitoraaɗo ardiiɗo kabinee on ka jonnde yaakitorde aranere Doftooru Dawda Kamisokoo e innde ardiiɗo yaakitoraaɓe ɓen Aamadu Wuuri Bah, ardike haaju hewtineede dokkal neema mo toonu 2 450 maaro immorde e Hawtaandi Siin faade e Hawtaandi Gine.

Ɗun ko waɗi ko ka yaakitorde fii eɓɓooje e huuwondire winndereyankooje e ɓantal. Haaju ngun moftuno huɓindiiɓe ɗuuɗuɓe e jaagoraaɗo Sinn on Gine.

Yaakitoraaɗo fii sonnaaɓe ɓen e ɓeynguureeji ɗin e yurmondiral ngal, Sonna Patiriisiyaa Lamaa, jarnii  dokkal ngal nde tawnoo ngal wallitoto ɓeynguureeji lo’uɗi buy.

Yaakitoraaɗo fii eɓɓooje ɗen Moodi Isma’el Naabee holli wonndema ngal dokkal no humondiri e aadi ndi Ardiiɗo Hawtaandi ndin ƴettodi e yeruujo makko mo Siin on Sii Jinping, ko ɓe yiidunoo e  hitaande 2024. O holli wonndema himo seeditoo manngu huuwondiral ngal hakkunde ɗee leyɗe ɗoo ɗiɗi.

Yaakitoraaɗo ardiiɗo kabinee on ka yaakitorde aranere, yottini weltaare e jarnoore Ardiiɗo yaakitoraaɓe ɓen e ardiiɓe Siin ɓen. O holli wonndema ngal dokkal tammbitoto ɓeynguureeji lo’uɓe ɗuuɗuɓe wano faandorii non eɓɓoore Simanndu 2040 nden.