Jour : 7 juin 2026

Konaakiri, ñannde 3 korse 2026 Ardiiɗo yaakitoraaɓe ɓen Aamadu wuuri Baa tolnii ka yaakitorde aranere jaagoraaɗo Dawla Beljik on Gine, Koohoo Oliwiyee Kinoo wonndude e gollideteeɓe makko.

Yewtereeji ɗin ko humondirɗi e naɓidal e banŋal faggudu hakkunde leyɗe ɗen ɗiɗi e noone huuwondiral e banŋeeji yowondirɗi e ɓantal ngenndi ndin.

E ngal tummbondiral, jaagoraaɗo on hollii seenagol dental moolanaagal wintotooɓe e yeñinooɓe jawle Gine ɗoo gila ñannde 1 haa 15 yarkoma arooru. Ngal dental moftay wintotooɓe beljikinaaɓe e ginenaaɓe wonuɓe beljik faaleteeɓe wintagol e banŋeeji faggude Gine.

Koohoo Oliwiyee Kinoo ardinno ka yewtere makko ɓure wonuɗe ɗen e wintagol Gine tentinii immorde e eɓɓoore Simanndu 2040 woni ko demal, woni ko yulirɗe ɗate, woni ki ilan yiite ekn…

Ardiiɗo yaakitoraaɓe ɓen jarnii ndee eɓɓoore yaadunde e huulanɗe Gine fii waylugol faggudu ngenndi immorde e faandaareeji Ardiiɗo Hawtaandi ndin Maamadii Dummbuyaa. O heyɗintini angisannde laamu Gine ngun tammbitagol ɓen wintotooɓe e luujooɓe e banŋal faggudu faandiiɓe wallitagol e nder ko duumii ɓantal Gine ngal.

Konaakiri ñannde 3 korse 2026 Ardiiɗo yaakitoraaɓe ɓen Aamadu Wuuri Baa ardike e weerirde mawnde haaju uddigol weeɓitannde 5^ɓere nden fii tummbondiral ƴeñinooɓe e ligge Gine e ñoggannge faransiire SADEN.

E ley tiitoonde « Simanndu 2040 saa’i PME » ndee weeɓitannde 5^ɓere no ardini kuugal PME (anterpiriisi tosooki e hakindiiɗi) faadee e baylanduru faggudu Gine ndun e laatinal huulanɗe Simanndu 2040 ɗen.

E nder balɗe tati (gila 3 haa 5 korse) ngal tummbondiral mottindiray liggotooɓe ka laamu e jeytoral e luujotooɓe e banŋe karallaagal e jawle fii yewtidugol fiyaake e al-alaama ligge e nder leydi ndin.

Ka nder yewtere makko tolnirde, Seekubaa Maaraa ardiiɗo yiilide nden ka Saden no faandii jiñinngol timmbanngol hoore mun ligge e cincugol e hebulinngol PME woodaaɗi ɗin naftorgol eɓɓoore Simanndu 2040 nden.

Sonna Jeenabu Jallo koolaaɗo konngol anterepiriisiiji Gine ɗin, jarnii golleeji waɗaaɗi ɗin e banŋe ɓantugol lollina fii anterepiriisiiji Gine ɗin. O torii fii no ɗun ɓeyditiree e fii no ɓe heɓira ballal e banŋeeji heewuɗi tentinii fii ɓantal ngenndi ndin.

Ardiiɗo yaakitoraaɓe ɓen annditini wonndema Gine no anndiraa naamu ƴeñinngol jawle sukaaɓe fewndiiɓe ɓen no haani ronude ɗun layina heyɗintina noone yeñinal ngal fii yo ɓe waawu ballondirde e sukaaɓe goo e nder Afiriki.

O torii sukaaɓe ɓen, hoolagol hoore maɓɓe faadee e mbawdi maɓɓe ndin e banŋe yeñinngol jawle ɓe fiinoo e eɓɓoore mawnde nden nde tawnoo ko nde huulannde Ardiiɗo Hawtaandi ndin Maamadii Dummbuyaa : « hita on aamu, sabu aranun ɗun ko huunde mettunde fii », o inni sukaaɓe ɓen.

Ka hommbugol, Ardiiɗo yaakitoraaɓe ɓen holli wonnde eɓɓoore Simanndu 2040 nden yahataa e ɓaawo sukaaɓe yeñinooɓe jawle ɓen. O heyɗintini anngisannde laamu ngun fii tammbitagol kala eɓɓoore yaadunde e ngal banŋal ɗon fii cincugol liggorɗe.

Konaakiri ñannde 1 korse 2026 Ardiiɗo yaakitoraaɓe ɓen hendike e juuɗe yaakitoraaɗo fii eɓɓooreeji e huuwondiral winndereyakowal on Moodi Isma’el Naabee ɓural « Super Prix du Grand bâtisseur » yeɗaangal Ardiiɗo Hawtaandi ndin immorde e mojobere jayndeyankooɓe afirikinaaɓe (Consortium des journalistes africains d’Africa Road Builders) ɓaŋorɓe Kongoo. Ɗun non ko annditanngol mo golleeji ɗin faadee e eɓɓoore mawnde nden Simanndu 2040.

Ɓay o hewtinaama ngal ɓural yeɗaagal Ardiiɗo Hawtaandi ndin, Ardiiɗo yaakitoraaɓe ɓen e innde Ardiiɗo Hawtaandi ndin, jarni ɓe sabu annditeede ɓannginde ɓantal Gine ngal e nder Afiriki e tawɗe eɓɓoore nden no joopori mbaylanduruuji kenndeeji wonannde faggudu leydi ndin. O holliɓe wonnde ngal ɓural mawngal hewtinte Ardiiɗo hawtaandi ndin. O watti ɗon wonnde ɗun no jiñinaɓe faadee e ɓeydugol wakkilaare fii ɓantal leydi ndin.

Konaakiri ñannde 1 korse 2026 Bimmbi ñannde suɓo-suɓooji ɗin, Ardiiɗo yaakitoraaɓe ɓen  Aamadu Wuuri Baa tolnii ka jonnde yaakitorde aranere ɓaŋiiɓe immorde e CEDEAO, UA, e OIF seeniiɓe ƴewtagol suɓo-suɓooji ɗin.

Ɓe seenino Gine ñannde 26 duujal. Seeniiɓe ɓen ko yeru 70, no e ɓen 47 immorɓe ka CEDEAO, 15 immorɓe ka UA e 8 immorɓe ka OIF. Ɓee ɗoo fow ƴewtino jarni noone no suɓgooji ɗin laatiniraa non. Ɓe jarni angisannde jamaa Gine on ko ɓe suɓii kon e nder deeƴere. Seeniiɓe ɓen heyɗintini hettaare maɓɓe nden faadee e tammbitagol Gine e kuuɗe arooje ɗen fii no ngenndi ndin rutora e nder laatal e leyde sariyayankooje ɗen.

Seeniiɓe ɓen holli wonnde ɓe tintiduno e tawaaɓe ɓen fow ka foolotiro, ɓe watti ɗon wonnde ɓe toppitoto e ƴewtagol ngol haa yalundi ndin feeñinee. Ɓe watti ɗon wonnde ndee teere ɗo ko hittunde wanaande genndi ndin fii no Gine ruttora e njuɓɓudiiji kawtitte winndereyankooje ɗen.

E nder nden jonnde, Ardiiɗo Yaakitoraaɓe ɓen, weltorii suɓngooji hawtindiraaɗi ɗin, sabu ɗun ɗoo ko arannde e nder taariika heyɗo Gine. O holli wonndema ɗun no yaadi e faandaare Ardiiɗo Hawtaandi ndi faadee e ruttugol ngenndi ndin e leydi sariyayankoori. « Polgal mawngal jamaa Gine on  hinaa tawnde ɓe ñinnii suɓo-suɓo kono ko ñinnugol ɗun e nder deeƴere, e nder ɓuttu e nder nanondiral ».

Ardiiɗo yaakitoraaɓe ɓen jarnii, balal kawtitte winndereyankooje tammbitiiɗe ɗen Gine fewndo laamu ƴanngal ɗun ko wano OIF sabu ɓe newinanii Gine ruttagol e nder Kawtital ngal.

Ka lannoode, ardiiɗo yaakitoraaɓe ɓen anndintinii faale laamu ngun toppital e tiiɗingol ɓure humondirɗe e njuɓɓudi suɓo-suɓooji ɗin e nder leydi ndin. Hiwugol ɓure dañaaɗe ɗen e banŋal demokarasii fii suɓngooji arooji ɗin.

Bimmbi ñannde suɓo-suɓo ngon fii ka mbatu mawngu e ka komiinuuji, caggal sakkitoral ngal fii ruttugol ngenndi ndin e laawol sariyayankewol, Ardiiɗo yaakitoraaɓe ɓen Aamadu Wuuri Baa nodditii liggotooɓe ka laamorde makko fii jarnugol ɓe faadee e ndarannde nden e oo saa’i fewndiiɗo ɗoo jeyaaɗo e taarika genndi ndin e weeɓitugol kuugal laamu ngun. « Ko ɗaɓɓaa kon, ko deeƴere duumiinde, huunde yawitataake, huutoren gannde heɓiiɗe ɗen fow fewndo oo saa’i ɗoo ». holli Ardiiɗo yaakitoraaɓe ɓen.

Gila ka njuɓɓudi eɓɓoore ngenndiyankoore fii winnditugol ɓii-leydi en (PN6RAVEC) e hitaande 2024 haa e suɓungo fii Ardiigu Hawtaandi ndin e ngoo ka mbatu mawngu e komiinuuji, Ardiiɗo yaakitoraaɓe ɓen anndintinii ligge waɗaaɗe ɗen e hoore himo annditina caɗeele bugitoraaɗe ɓaawo sabu ɗun no ardii kala kuugal. O torii gooto kala etugol manngu kuugal ngal. Damal goo udditike ɗoo e yeeso : ko ñinnugol eɓɓoore renndo Ardiiɗo Hawtaandi ndin Maamadii Dummbuyaa.

« Gine e nder ɗii duuɓi jappanɗe jowi aroji ko fewndo ɗoo timmbetee » o anndintini ko dolnorgol lo’e ngenndi ndin  wano : ilan yiite, laaɓal, alhaaliiji yulirɗe, caɗee jamaaji, newinaare ngurndan jamaa on.

Tippude e ɗun ɗoo fow, Ardiiɗo hawtaandi ndin no torii jamaa on jogondiral e needi e ardinngol ɓure : « hiɗen mari golle, en alaa saa’i wedditeteeɗo ».

Aamadu Wuuri Baa heyɗintini kugal makko fadee e sar’inaaɗi farliiɗi immorde Sariya Mawɗo on o anndintini faadaare Ardiiɗo Hawtaandi ndin, ko ɓantugol Gine, moƴƴintina hakkunde jamaaji ɗin, fewtina fow faadee e aroore moƴƴere. « No farlii en gaynugol » hommbiri Ardiiɗo yaakitoraaɓe ɓen.

Konaakiri ñannde 30 duujal 2026 Ardiiɗo yaakitoraaɓe ɓen Aamadu Wuuri Baa seenino ka labutaani Donkaa fii hiwragol sumuɓe ɓen Kangoliyaa ka suuperefektiir Diberekaa ka otowal adoowal kuɓɓan ngal yani huɓɓi ɗon.

On kaawee ɓittinii moƴƴa non jamaaji ngal kawtal e ɗuuɗuɓe sonjike. Yaakitoraaɗo fii cellal ngal sonna Khaitee Saal hollii wonndema yiitete ngen hewtuno yimɓe noogayo e maɓɓe  sappo e ɗiɗo barme mun tiiɗuno. Ɓen ɗon addano ko ɓuri e yaawude ka labutaani Donkaa fii no ɓe ñawndiree.

Ka ɓe waalii hiɓe ñawndaade ɗon, Ardiiɗo yaakitoraaɓe ɓen yurminii toranii ɓe cellal e hoore himo weltanii jamaa on faadee wakkilaare maɓɓe nden fii hita bone on layu ɓuri non e wakkilaare njuɓɓudiiji ɗin fow fii no barmuɓe ɓen dankoree ko ɓuri e yaawude.

Ardiiɗo yaakitoraaɓe ɓen hollii wonndema ɗee taƴƴalle ɗoo ko e kaawee ɗe jeyaa, O torii yo jamaa on yacco e waajuuji gasayɗi adintinde haɗugol sifa oo kaawee tentinii layingol waajuuji ɗin kala ka  wununnde mun, e  kawtirɓe ɓen njane ɗen sifa ɗii piiji .

Nde tawnoo kiwal ɓii-leydi ko farluyee neɗɗo fow, haray hino haani ka tawata gooto kala no waawi waajaade yimɓe ɓen ardingol kuuɗe moƴƴe gasayɗe hiwude wonkiiji maɓɓe ɗin.

Ardiiɗo yaakitoraaɓe ɓen, holli fahin wonndema Ardiiɗo hawtaandi ndin hummpitaama no woni e yaarude non. Wonnde o hollii laamu ngun yo ngu fawto ñawndugol barmuɓe ɓen. E innde maggu, o yaalinii ɓeynguure faatoraande nden e jamaa Kangoliyaa on e hoore himo toroo yo Alla hayfiniran barmuɓe ɓen cellal.

Konaakiri ñannde 31 duujal 2026 Ardiiɗo yaakitoraaɓe ɓen tottii haqqee mun faade e ñinnugol suɓo-suɓo ngon, ka komiin Lammbanñi. Ɗun ko suɓo humondirngo e mbatu mawngu ngun e ardotooɓe Komminuuji ɗin. E nder Hawtaandi Gine ndin.

Ɓay o yaltii ko biroo suɓorɗo, Ardiiɗo yaakitoraaɓe ɓen, jammi ndee ñalaande jeyaande e ɓuruɗe hittude wonannde taariika ngenndi ndin. O anndintini wonndema ngoo suɓo ɗoo hommbay rutannde Gine nden e laawol ngenndi Sariyayankoori. Gila ka winditagol jamaa on e wununndeeji maɓɓe ɗin. (RGPH-4), eɓɓoore ngenndiyankoore fii winnditugol ɓii-leydi en ka (PN-RAVEC), daginngol Sariya Mawɗo on immorde e laatinal (referandoom) e suɓo Ardiiɗo Hawtaandi ndin.

Ardiiɗo yaakitoraaɓe ɓen torii jamaa on, yaltugol tawdee e ngoo suɓo-suɓo. E ɓe tottaali taho haqqeeji mun suɓagol ngol yo hewtu ka haani suɓaade ɗon suɓoo. Fii no leydi ndin ruttora e laawol sariyayankewol.

« fewndo ka fewndii ɗoo, ɗaaniiɓe ɓen yo finu seenoo suɓoo », o ɓanngini e hoore himo ɓeyditi wonnde ittiri jamaa suiiɓe ɓen no tawaa e ko dagini suɓo-suɓo ngon.

Ardiiɗo yaakitoraaɓe ɓen, tentinino e nafoore wonunde e suɓo-suɓo komiinuji ɗin nde tawnoo ko nokku ekkitorɗo ardagol. Wonannde jamaa on. Daginngol ɗun non no humondiri e yaltugol jamaa on seenoo suɓoo.

Anndintinen wonndema suɓo ko tugalal deeƴere e innoreede e ndimu. Koohoo Aamadu Wuuri Baa hollii wonndema duhiiɓe e sonnaaɓe aroyayɓe ardagol e ɗi suɓooji, no haani fewjoyde e innde ɓii-leydi e nder ndimu yottiingu.

Ardiiɗo yaakitoraaɓe ɓen, jarnii fota angisannde Ginenaaɓe ɓen, gila ka laamu ƴanngal haa ka fewndii ɗoo nde tawnoo ɓe jogitike giyaa gooto on fii no ngenndi ndin ruttora e laamu sariyayankoohu : « Miɗo torooɓe tawdeede e ngoo suɓo fewndiingo ɗoo. », o hommbiri.

 

 

Konaakiri ñannde 29 duujal 2026 – Ardiiɗo yaakitoraaɓe ɓen Aamadu Wuuri Baa hewtitii ɓaawo balɗe sappo hajju ka ca’e hormorɗe diina islaamu wonndude e sanna makko.

Ɓay ɓe hewtitii, Ardiiɗo yaakitoraaɓe ɓen weltanino jamaa Gine on, ɓe senndodi e makko waajuuji heɓiiɗi ɗin ka hajju.

« Men feƴƴinii ɗee balɗe sappo ɗoo e nder dewal, tooraare e micaaku. Ko saa’i fodduɗo e toraare, toranoo ngenndi ndin, toranoo jamaa on, toranoo lanɗo on, toranoo laamu ngun fii ɓantal Gine fow » Ɓe ɓanngini.

Ardiiɗo yaakitoraaɓe ɓen holluno wonndema ɓe waɗuno toraare Alla fii no golle ngenndi ndin toppitoree e nder ɓuttu e nder deeƴere.

Fii suɓo-suɓo saatiingo ngon, o torii alla yo ɗun laato no moƴƴiri e nder ɓuttu e nder nanondiral ngenndi ndin.

« meɗen torii yo ɗun feƴƴu e jam moƴƴere e nder nanondiral hakkunde ginenaaɓe ɓen fow », o ɓanngini.

Ɓay ɓe ruttike e yewtere fii hajju ngun, Ardiiɗo yaakitoraaɓe ɓen tiiɗinorno e ɓannginngol newaare e nanondiral ɗowungal hajju ngun. E wi’e makko, ɗun no haani ɗowugol ngendi ndin.

Ardiiɗo yaakitoraaɓe ɓen, jarnuno baylanduru mawndu ndu dawla Sa’udi Arabiiya dañi ndun, e banŋal hajju ngun. O weltaniiɓe tentinii koohoojo lontotooɗo on ka dawla Mohammed ben Salmaan fii pehe ƴettaaɗe ɗen e banŋe jaɓɓagol sanna miliyooji jamaa seeniiɓe ɓen immorde e aduna on fow.

Ka lannoode o holli wonndema yaadu makko ndun ka hajju nde tawnoo ko o julɗo, ko tottugol haqqee tugalal diinaa e nde tawnoo ko o ardiiɗo, ko nootagol e innde Gine fadee e ardiigu Sa’udii ngun.