ߞߏ߲ߞߏߘߌ߬ߓߌ ߕߟߋ߬ ߁߀/ ߂߀߂߆
ߊ߬ߟߎ߬ ߘߏ߲߬ ߘߊ߫ ߡߊ߯ߡߎ߲߫ ߖߡߊ߬ ߞߐ߲߬ߙߐ߲߬ߜߐ߲߬ߜߐ߲ ߕߘߍ߬ ߟߊߘߍ߬ߣߍ߲߫ ߊߟߌߡߊߡߌ߲ߦߊ߫ ߘߐ߬ߝߐ ߕߌ߲ߓߌߘߌ߲ߘߊ ߟߊ߫߸ ߞߵߊ߬ ߓߍ߲߬ ߟߊ߰ߖߌ߬ ߊߟߌߝߊ߫ ߌߓߎߙߡߊ߫ ߖߍ߯ߟߊߖߍ߯ߖߌ߬ ߓߊߙߌ߬ ߛߎ߬ߞߏ߬ߦߊ ߡߊ߬߸ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲߬ߠߊ߬ߓߊ ߡߍ߲ ߛߌ߬ߞߛߊߓߌ ߕߘߍ߬ ߦߋ߫ ߛߊ߲߬ ߉߁ ߘߐ߫. ߏ߬ ߡߍ߲ ߞߊ߬ ߡߊ߰ߙߌ ߟߊ߫ ߞߟߌߟߌ ߟߊߡߌ߬ߘߊ߬ ߞߏ߲ߞߏߘߌ߬ߓߌ ߕߟߋ߬ ߄/ ߂߀߂߆ ߣߌ߲߬ ߠߊ߫. ߞߊ߲ߓߍ߲ ߞߊ߲ߕߌ߮ ߞߊ߬ߝߏ ߞߎ߲߬ߕߌ߮ ߛߟߊߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߕߐ߯ ߘߐ߫߸ ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߞߊ߬ ߞߎ߲߬ߠߊ߬ߛߌ߮ ߟߊ߫ ߗߋߦߊߟߌ߫ ߘߏ߫ ߢߍߡߌ߬ߘߊ߬ ߡߍ߲ ߣߊ߬ߣߍ߲߫ ߓߍ߲߬ ߠߊ߫ ߡߊ߲߬ߕߏ߲ ߠߊ߫ ߛߎ߬ߞߏ߬ߦߊ ߡߊ߬، ߞߐߙߍ߫ ߢߊߖߌߞߎ߲ߘߎ߲ߕߐ ߟߎ߬ ߝߍ߬، ߊ߬ ߣߌ߫ ߡߊ߯ߡߎ߲߫ ߡߌ߬ߙߌ߲߬ߘߌ ߓߍ߯ ߟߊߘߍ߬ߣߍ߲ ߝߍ߬. ߗߋߦߊߟߌ ߘߐ߫ ߡߊ߬ߘߏ߬ߠߌ߲߬ߠߌ߲ ߣߌ߫ ߞߎ߲߬ߠߊ߬ߛߌ߮ ߓߋߟߋ߲ߕߌ߮ ߕߘߍ߬ ߞߣߍ ߞߊ߲߬ ߣߊߟߌ߬ߡߎ߲߫ ߎߛߎߡߊߣ ߜ߭ߥߊߟ ߖߊߟߏ߫ ߘߌ߫. ߊ߬ ߣߌ߫ ߓߐ߰ߝߍ ߣߌ߫ ߥߙߎߞߌ ߘߎ߲ߡߕߊ ߞߏߕߌ߮ ߖߊߣߌ߬ ߖߊߟߏ߫، ߊ߬ ߣߌ߫ ߣߊߡߎ߲ߞߏ ߟߎ߬ ߝߘߏ߬ߓߊ߫ ߞߟߊ߬ߕߌ߰ ߛߙߍߞߍ ߟߊ߰ߖߌ߬ ߌߓߎߙߊߤߌߡߊ߬ ߓߊ، ߊ߬ ߣߌ߫ ߞߏߕߌ߯ߝߟߐߘߊ ߞߎߓߋߘߐ ߞߎ߲߬ߕߌ߮ ߞߵߏ߬ ߟߊ߫ ߞߏߕߌ߯ ߝߟߐ ߟߊ߫ ߞߏߟߊߕߍ߮ ߘߏ߫ ߟߎ߫ ߞߊ߲߬߸ ߡߊ߬ߡߙߊ߬ߟߌ ߡߙߊ߬ߦߊ ߛߌߦߊߡߊ߲߫ ߝߣߊ߫ ߕߘߍ߬ ߞߣߍ ߞߊ߲߬߸ ߊ߬ ߣߌ߫ ߘߌ߯ߣߊ ߕߊ ߟߎ߬، ߞߵߏ߬ ߓߍ߯ ߟߊ߫ ߊ߲ ߠߊ߫ ߟߊ߲߬ߘߊ߬ߕߌ߮ ߟߎ߬ ߞߊ߲߬،ߡߐ߰ߓߊ ߛߌߦߊߡߊ߲߫ ߞߊ߬ ߛߎ߬ߞߏ߬ߦߊ ߣߌ߲߬ ߢߣߊߓߊ߯ߦߊ߫ ߟߋ߬. ߏ߬ ߟߎ߬ ߘߐ߫ ߝߎߕߊ߫ ߡߏߙߌߡߙߊ ߞߊ߬ߞߘߐ ߡߐ߰ߓߊ ߟߎ߬ ߕߘߍ߬ ߞߣߍ ߞߊ߲߬. ߟߊߓߋ߬ ߕߌ߲ߓߌߘߌ߲ߘߊ߫ ߢߍߓߊ߯ ߝߟߐ، ߊ߬ ߣߌ߫ ߖߎ߬ߟߊ߬ߦߊ ߓߏ߲ߘߋ߲ ߞߐߦߌߘߊߓߊ߮ ߟߎ߬، ߊ߬ ߣߌ߫ ߝߎߟߊߞߊ߲߫ ߝߐߟߊ ߟߎ߬ ߟߊ߫ ߞߊ߲ߕߌ߮، ߞߵߏ߬ ߟߊ߫ ߝߐߙߐ߲ߘߍߛ ߞߊ߲ߕߌ߮ ߞߊ߲߬. ߟߊ߰ߖߌ߬ ߊߟߌߝߊ߫ ߌߓߎߙߊߤߌߡߊ߬ ߖߍߟߑߖߍ߯ߖߌ߬ ߓߊߙߌ߬ ߊ߬ ߝߏ߲߬ߝߏ߲ ߠߎ߬ ߘߐ߫ ߊ߬ ߟߊ߫ ߖߘߍ߬ߘߌ ߟߊߛߘߋߦߊ߫ ߘߊ߫ ߡߐ߰ ߛߌߦߊߡߊ߲߫ ߓߟߏ߫. ߊ߬ ߣߴߊ߬ ߢߍߡߌߙߌ߲ ߣߴߊ߬ ߘߍ߬ߡߍ߲߬ߠߌ߲ ߠߊߛߘߋߦߊ߫ ߖߡߊ߬ߣߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߕߏ߰ߝߏ ߡߊ߬ߡߊ߬ߟߊ ߘߐ߫. ߞߐߣߊߞߙߌ߫ ߞߎߡߌ߫ ߖߎ߬ߟߊ߬ߦߊ߫ ߕߊ߲ߓߊ߲ ߟߊߖߊ߲ߞߏߟߊ، ߊ߬ ߞߊ߬ ߓߊ߯ߙߊ ߛߌ߲ߞߐ߲ߡߌߘߊ ߕߏ߫ ߊ߲ ߓߟߏ߫. ߊ߬ ߣߌ߫ ߞߎ߲߬ߕߋߟߋ߲߫ ߖߐ߲ߖߐ߲߫. ߛߦߊ߬ ߞߐ߲ߘߐ߲߫ ߛߙߊߣߎ߲ ߡߍ߲ ߞߍ߫ ߘߊ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߓߟߏ߫߸ ߞߊ߬ߝߏ ߞߎ߲߬ߕߌ߮ ߕߐ߯ ߘߐ߫ ߊߟߊߡߊ߬ ߊߟߊ߫ ߤߌߣߊ߫ ߘߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߡߊ߬ߘߎ߮ ߓߊ߲߬ߘߊ߲߬ߖߎ߬ߓߊ ߓߋ߬ߣߍ߲ ߠߊ߫. ߊ߬ ߞߏ߬ߣߌ߲߬ ߓߘߊ߫ ߝߏ߲߬ߝߏ߲߫ ߞߙߐ߬ߛߌ߬ߕߊ ߕߏ߫ ߊ߲ ߓߟߏ߫ ߦߊ߲߬߸ ߞߵߊ߬ ߓߍ߲߬ ߥߙߎߞߌ ߗߋߢߊ ߝߊ߬ߛߏ߬ߟߊ߬ߞߊ ߡߊ߬.
