ߞߐߣߊߞߙߌ߫ ߞߏ߲ߞߏߜߍ߫ ߕߟߋ߬ ߁߁/ ߂߀߂߆
ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߞߊ߬ ߟߊ߬ߞߢߐ߬ߡߊ߬ߟߌ ߘߏ߫ ߟߊߘߌ߬ߢߍ߬ ߛߣߍ߬ߜ߭ߊ߬ߟߌ߬ ߞߊ߲ߓߍ߲ ߟߊ߬ߛߌ߰ߘߋ߲ ߢߍ߫ ߖߌ߬ߣߍ߬ ߣߊߟߌ߬ߡߎ߲߫ ߎߛߑߡߊߣ ߛߌ ߘߌ߫. ߏ߬ ߓߍ߲߬ߒ߬ߛߋ߲߬ߡߊ ߞߏߛߐ߲߬߸ ߛߣߍ߬ߜ߭ߊߟߌ߫ ߕߍߓߊ߯ߦߟߊ ߞߊ߬ ߎߛߎߡߊߣ ߛߏ߲ߞߏ߫ ߟߊ߫ ߗߋߛߓߍ߫ ߘߍ߬ߡߍ߲߬ߘߌ߬ߣߍ߲ ߠߊߛߋ߫ ߊ߬ ߡߐ߬ߟߐ߲߬ߞߋ߬ߟߋ߲߬ߢߐ߲߮ ߡߊ߬߸ߊ߬ ߟߊ߫ ߕߐ߯ߦߊߟߌ߫ ߓߟߏߟߊߕߎ߲߰ߠߌ߲ ߠߊ߫ ߖߌ߬ߣߍ߬ ߞߊ߲ߓߍ߲ ߞߎ߲߬ߠߊ߬ߛߌ߮ ߞߎ߲߬ߕߌ߰ߦߊ ߘߐ߫. ((ߞߎߟߎ߲ߖߋߟߌ߫ ߘߐߛߥߊ߬ߣߍ߲ ߠߊ߫)) ߛߣߍ߬ߜ߭ߊߛߌ߫ ߞߏߕߌ߯ ߝߟߐ ߞߵߊ߬ ߦߌ߬ߘߵߊ߬ ߟߊ߫ ߛߙߊ߬ߣߎ߲ ߘߐ߫ ߞߏ߫ ߊ߬ ߦߴߊ߲ ߠߊ߫ ߓߌ߬ߟߊ ߘߐ߫ ߓߊ߯ߙߊ ߟߎ߬ ߓߐߒߢߟߊ ߘߐ߫ ߖߌ߬ߣߍ߬ ߡߙߊ߬ߦߊ ߟߎ߬ ߞߙߍ߬ߝߍ߬. ((ߞߐߡߊߓߌ߲ߓߌ߲ߠߌ߲ ߘߐ߫ ߏ߬ ߓߟߏߟߊߕߎ߲߮ ߦߋ߫ ߕߋߙߌߦߊ ߓߌ߬ߟߊ߬ߢߐ߲߰ߡߊ ߘߝߊߣߍ߲ ߠߋ߬ ߘߌ߫߸ ߡߍ߲ ߞߎ߲߬ߛߌ߲߯ߣߍ߲ ߢߐ߲߯ ߘߍߡߍ߲ ߞߍߢߊ ߥߙߍ ߡߊ߬ ߡߍ߲ ߦߋ߫ ߛߣߍ߬ߜ߭ߊߟߌ߫ ߡߌ߬ߙߌ߲߬ߘߌ ߣߌ߫ ߖߌ߬ߣߍ߬ ߡߌ߬ߙߌ߲߬ߘߌ ߟߊ߫ ߘߍ߬ ߟߊ߫)) ߞߏߕߌ߯ ߝߟߐ ߞߵߊ߬ ߟߊ߫ ߛߍߥߊ ߦߌ߬ߘߊ߬ ߡߙߌߣߊ߲ ߢߌߡߊ ߣߌ߲߬ ߘߐ߫ ߞߵߊ߬ ߓߍ߲߬ ߊ߬ ߟߊ߫ ߥߞߊ߬ߟߌ ߡߊ߬ ߣߝߊ߬ߢߐ߲߰ߦߊ ߞߟߍ߬ߦߊ߬ߡߊ ߘߐߖߊ߭ ߘߐ߫ ߡߍ߲ ߦߋ߫ ߞߐߣߊߞߙߌ߫ ߣߌ߫ ߘߞߊߙ ߟߞߊ߬ߝߏ߬ ߟߊ߫. ߕߏ߰ߝߏ ߣߌ߲߬ ߦߋ߫ ߞߊ߲ߓߍ߲ ߞߊ߲ߕߌ߯ ߛߟߊߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߣߌ߫ ߓߊߛߌߙ ߖߏߡߊߦ ߝߊߦ ߞߎ߲߬ߕߋߟߋ߲ ߠߋ߬ ߘߌ߫. ߡߍ߲ ߘߊߓߐߣߍ߲߫ ߣߝߊ߬ߢߐ߲߰ߦߊ ߞߊ߲ߡߊ߬ ߖߌ߬ߣߍ߬ ߣߌ߫ ߛߣߍ߬ߜ߭ߊߟߌ߫ ߕߍ߫ ߏ߬ ߦߋ߫ ߦߟߌߡߊߛߙߋ ߟߋ߬ ߘߌ߫ ߊ߲ ߠߊ߫ ߜߙߋ ߞߊ߲߬.
