ߓߌ߲ߠߊߥߎߟߋ߲߫ ߕߟߋ߬߈/ ߂߀߂߆
ߞߏߕߌ߯ ߝߟߐ ߊߡߊߘߎ߫ ߎߙߌ߬ ߓߊ ߞߊ߬ ߛߋ߲ߞߏߟߦߊ ߛߌ߲߬ߝߏ߲ ߠߎ߬ ߟߊ߫ ߘߍ߬ߘߊ ߟߊߛߣߍ߫ ߞߏߕߌ߯ߝߟߐߘߊ ߟߊ߫ ߡߍ߲ ߠߎ߬ ߟߊߢߎ߲߯ߣߍ߲߫ ߕߍߝߐ߫ ߝߊ߬ߛߏ߬ߟߊ߬ߞߊ ߟߥߊ߬ߟߌ߬ߕߊ ߄߅ ߓߟߏߦߊߟߌ ߟߊ߫. ߏ߬ ߡߍ߲ ߢߍߖߟߎ ߡߌ߬ߣߊ߬ߣߍ߲߫ ߞߏߕߌ߯ߝߟߐߘߊ ߞߎߓߋߘߐ ߞߏߕߌ߮ ߓߟߏ߫ ߏ߬ ߡߍ߲ ߦߋ߫ ߗߋߦߊߟߌ ߣߌ߲߬ ߞߊ߲ߕߌ߮ ߘߌ߫. ߡߎߤߊ߲ߡߍߘ ߟߊ߬ߡߌߣߌ߲߫ ߛߌ߫ ߛߝ߭ߊ߬ߣߍ߫ ߏ߬ ߣߌ߫ ߗߋߦߊߟߌ ߣߊ߬ߣߍ߲߫ ߞߏߕߌ߯ ߝߟߐ ߝߏ߬ ߟߊ߫. ߊ߬ ߣߌ߫ ߞߊߣߵߊ߬ ߟߊ߫ ߥߊ߬ߛߊ ߝߣߊ߫ ߦߌ߬ߘߊ߬ ߞߵߊ߬ ߓߍ߲߬ ߊ߬ߟߎ߬ ߞߏߟߊߘߍߢߐ߲߯ߦߊ ߛߌߟߊ ߡߊ߬ ߊ߬ ߟߊ߫ ߘߍ߬ߢߐ߲߰ߦߊ ߛߌ߲߬ߝߏ߲߬ߘߟߊ߬ߞߊ ߟߎ߬ ߞߣߐ߫. ߏ߬ ߡߍ߲ ߞߐߝߟߌ ߟߊߞߙߐ߬ߛߌ߬ߣߍ߲߫ ߛߊ߲߬ ߛߓߊ߬ ߓߊ߯ߙߊ߫ ߕߊ߬ߡߌ߲߬ߣߍ߲ ߞߘߐ߫. ߘߊߘߐߝߙߊߢߐ߲߯ߦߊ ߞߍ߫ ߘߊ߫ ߛߊߓߎ߫ ߘߌ߫ ߞߊ߬ ߞߏ߫ ߟߎ߬ ߛߌ߰ ߛߋ߲߬ߞߊ߲߬߸ ߞߵߊ߬ ߓߍ߲߬ ߓߊ߯ߙߊ ߟߊ߫ ߢߍߕߊ ߡߊ߬ ߞߵߊ߬ ߓߍ߲߬ ߟߊߢߌߣߌ߲߫ ߄߅ ߡߊ߬. ߏ߬ ߡߍ߲ ߝߊ߲߬ߓߊ߬ߦߊ߫ ߓߊ߯ߙߊ ߟߎ߬ ߓߘߊ߫ ߓߊ߲߫ ߞߍ߫ ߟߊ߫ ߓߌ߬ ߝߊߦߌߘߊ߫. ߊ߬ ߕߐ߭ ߟߎ߬ ߝߣߊ߫ ߣߊ߬ߕߐ߫ ߟߊ߬ߘߏ߲߬ ߠߊ߫ ߓߏߟߏ߲ߝߘߊ ߟߎ߬ ߡߊ߬ߘߎ߮ ߗߋߦߊߟߌ ߗߋߛߓߍ ߛߊ߲߬ߠߊ߬ߞߊ ߘߐ߫. ߛߟߊߕߌ߯ ߛߝ߭ߊߣߋ ߞߊ߬ ߝߏ߬ߟߌ ߞߍ߫ ߞߵߌ ߕߌ߲ߕߌ߲߫ ߕߍߝߐ߫ ߝߊ߬ߛߏ߬ߟߊ߬ߞߊ ߞߊ߲߬. ߏ߬ ߡߍ߲ ߛߌ߬ ߘߊ߫ ߛߋ߲߬ߞߊ߲߬ ߂߀߂߂ ߕߙߊߓߊ ߟߊ߫߸ ߏ߬ ߡߍ߲ ߢߌߣߌ߲ߞߏ߫ ߕߘߍ߬ ߓߍ߲߭ ߣߌ߫ ߞߍߞߋߟߋ߲ߘߌ ߝߊ߲߬ߞߊߘߏ߲߭ ߘߌ߫. ߏ߬ ߡߍ߲ ߞߎ߲߬ߕߋߟߋ߲ ߦߋ߫ ߢߣߊߕߊߟߌ߫ ߕߊ߯ߛߌߟߊ߫ ߖߐߡߊ ߣߴߊ߬ ߜߍߦߊߣߍ߲ ߘߌ߫. ߢߌߣߌ߲ߞߏ ߏ߬ ߟߎ߬ ߡߍ߲ ߠߎ߬ ߓߘߊ߫ ߓߐ߫ ߢߊ߫ ߟߊ߫ ߓߌ߬߸ ߏ߬ ߕߊ߬ߡߌ߲߬ߣߍ߲ ߞߐ ߊ߬ ߞߵߊ߬ ߡߙߌߦߊ ߝߐ߫ ߘߍ߬ߘߊ ߛߌ߲߬ߝߏ߲ ߠߎ߬ ߟߊ߫ ߛߍ߰ߘߏ߲ ߓߟߏߟߊߕߎ߲߮ ߘߐ߫ ߞߵߊ߬ ߓߍ߲߬ ߖߌ߬ߣߍ߫ ߞߊ߬ߝߏ ߘߍ߬ߡߍ߲ ߡߊ߬߸ ߞߊ߬ ߓߍ߲߬ ߥߙߎߞߌ ߘߍ߬ߞߏ߬ߦߊ ߟߊߛߓߊ߬ߕߌ ߡߊ߬.
ߞߏߕߌ߯ ߝߟߐ ߞߵߊ߬ ߦߌ߬ߘߊ߬ ߞߎߡߊ ߞߐߛߊߦߌ ߘߐ߫ ߞߊ߲ߓߍ߲߫ ߞߊ߲ߕߌ߯ ߡߊ߬ߡߊߘߌ߫ ߘߎ߲ߓߎߦߊ߫ ߕߐ߯ ߘߐ߫. ߊ߬ ߞߊ߬ ߘߍ߬ߘߊ ߛߌ߲߬ߝߏ߲ ߠߎ߬ ߞߎߟߎ߲ߖߋ߫ ߞߐߝߟߌ߫ ߛߐ߬ߘߐ߲߬ߣߍ߲ ߠߊ߫ ߞߊ߬ߝߏ ߟߊ߫ ߣߊ߬ߝߊ ߞߊ߲ߡߊ߬. ߊ߬ ߞߵߊ߬ ߞߊ߲ߠߊߕߍ߰ ߢߡߊߦߟߍߡߊ߲߫ ߓߎ߰ߓߎ߰ߣߍ߲ ߓߟߏߡߦߊ߫ ߞߏ ߞߊ߲߬. ߞߵߊ߬ ߓߍ߲߬ ߟߊ߬ߢߌߣߌ߲߫ ߖߙߎߡߎ߲ߦߊߣߍ߲ ߠߎ߬ ߡߊ߬. ߞߊ߬ ߞߎ߲߬ߠߊ߬ߛߌ߮ ߖߘߍ߬ߘߏ߲߬ߒ߬ߞߊ߲߬ߡߊ ߓߟߏߡߦߊ߫ ߓߊ߯ߙߊ ߟߎ߬ ߞߍߟߌ ߓߐߒߢߟߊ ߞߏ ߘߐ߫.
