ߊ߬ ߣߴߊ߬ ߡߐ߬ߟߐ߲߬ߞߋ߬ߟߋ߲߬ߢߐ߲߮ ߜߋ߲ߞߐ߰ߖߌ߬ߘߊ߬ߞߊ ߟߊ߫ ߓߊ߬ߘߏ߬ߢߐ߲߰ߦߊ ߞߐߝߍ߬، ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߊߡߊߘߎ߫ ߎߙߌ߬ ߓߊ ߕߊ߯ ߘߊ߫ ߖߌ߬ߣߍ߬ ߟߊ߬ߛߌ߰ߘߊ ߟߊ߫ ߊ߬ ߣߌ߫ ߖߌ߬ߣߍ߬ߞߊ ߓߐߓߊ߯ߕߐ ߟߎ߬ ߞߊ߬ ߢߐ߲߮ ߦߋ߫ ߦߋ߲߬ ߡߍ߲ ߘߐ߫، ߊ߬ ߡߊ߬ߟߐ߬ߣߍ߲߫ ߕߘߍ߬ ߝߊ߲߬ߝߘߊ߬ߟߌ ߣߌ߫ ߥߙߎߞߌ ߣߌ߫ ߣߝߊ߬ߢߐ߲߰ߦߊ߫ ߡߊ߲߬ߕߏ߲߬ߕߍ߬ߟߊ߬ߞߊ ߞߏߕߌ߮ ߟߋ߬ ߓߟߏ߫. ߊ߬ ߣߌ߫ ߡߊ߬ߡߙߊ߬ߟߌ ߣߌ߫ ߝߘߏ߬ߓߊ߬ ߗߋߢߊ ߢߊߞߎߘߦߊߟߌ ߞߏߕߌ߮، ߞߎ߲߬ߠߊ߬ߛߌ߮ ߞߎ߲߬ߕߌ߮ ߣߌ߫ ߖߡߊ߬ߣߊ߬ߘߋ߲߬ߢߐ߲߮ ߠߎ߬ ߞߊ߬ ߘߡߊߝߊߟߋ߲ ߞߍ߫ ߞߵߊ߬ ߓߍ߲߬ ߊ߬ߟߎ߬ ߖߘߐ߬ߣߊ߲߬ߞߏ ߟߎ߬ ߣߌ߫ ߣߊ߬ߕߊ ߟߎ߬ ߡߊ߬.
ߊߡߊߘߎ߫ ߎߙߌ߬ ߓߊ ߞߵߊ߬ ߟߊ߬ߘߍ߲߬ߞߣߍ߬ߦߊ߬ߟߌ ߞߍ߫ ߞߎ߲߬ߠߊ߬ߛߌ߮ ߟߊ߫ ߞߐߡߊߓߌ߲ߓߌ߲ߠߌ߲ ߡߊ߬، ߞߵߊ߬ ߓߍ߲߬ ߖߌ߬ߣߍ߬ߞߊ ߓߐߓߊ߯ߕߐ ߟߎ߬ ߟߌ߬ߤߟߊ ߡߊ߬، ߞߊߕߙߍ߬ߕߍ߫ ߘߊߞߎ߲߫ ߘߊ߲ߘߐ߫ ߢߌ߲߬ ߠߎ߬ ߡߊ߬:
- ߢߣߊߡߦߊ ߞߍߞߏ߫ ߢߌߡߊ: ߞߊ߬ߙߊ߲߬ߕߟߊ߬ߘߏ߲، ߊ߬ ߣߌ߫ ߞߊ߬ ߛߋ߫ ߞߊ߬ߙߊ߲߬ ߛߊ߲ߘߐ ߟߎ߬ ߛߐ߬ߘߐ߲߬ ߠߊ߫.
- ߓߊ߲߬ߘߊ߬ߡߌߘߊ ߣߌ߫ ߟߊ߬ߞߐ߰ߟߌ: ߞߊ߬ ߣߝߊ߬ߢߐ߲߰ߦߊ߫ ߜߋ߲߬ߞߘߎ߬ ߊ߬ߟߎ߬ ߣߌ߫ ߍߛ ߍߣ ߊ ߓߋ ߕߍ߫،
- ߣߊ߲߬ߝߟߏ߬ߘߏ߲߬ߘߊ߬ߟߊ: ߊ߬ ߣߌ߫ ߕߎ߲ߞߙߊߒߞߋ ߟߎ߬ ߡߊߞߟߌ߫ ߝߊ߬ߛߏ ߟߊ߫ ߥߙߎߞߟߌ ߡߊ߬.
ߊ߬ ߞߊ߬ ߞߎߡߊ ߏ߬ ߝߐ߫ ߖߌ߬ߣߍ߬ߞߊ ߟߎ߬ ߟߋ߬ ߢߍ߫ ߦߋ߲߬، ߞߏߕߌ߯ ߝߟߐ ߞߊ߬ ߞߎߟߎ߲ߖߋߟߌ ߞߍ߫ ߡߊ߬ߝߊ߲ ߞߍ߫ ߘߐ߫ ߖߌ߬ߣߍ߬ ߟߊ߫ ߥߙߎߞߌ ߝߊ߬ߛߏ߬ߟߊ߬ߞߊ ߘߐ߫، ߊ߬ ߞߊ߬ ߕߎ߲ߞߙߊߒߞߋ ߟߎ߬ ߡߊߞߟߌ߫ ߖߡߊ߬ߣߊ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߢߡߊߦߟߍߡߊ߲߫ ߕߣߐ߬ߓߐ߬ߟߌ ߡߊ߬، ߣߊ߲߬ߝߟߏ߬ߘߏ߲߬ߘߊ߬ߟߊ ߛߌߟߊ ߝߍ߬، ߊ߬ ߣߌ߫ ߤߊ߲ߞߟߌߦߊ߫ ߟߎ߬ ߘߐ߬ߕߟߊ߬ߟߌ ߓߟߏߡߊ߬ ߊ߬ߟߎ߬ ߦߋ߫ ߖߌ߬ߣߍ߫ ߘߍ߬ߡߍ߲ ߞߍ߫ ߖߡߊ߬ߣߊ ߟߐ߬ߟߌ ߘߐ߫.
