ߞߐߣߊߞߙߌ߫ ߘߓߊ߬ߓߌߟߊ߫ ߕߋ߬ߟߋ߫ ߂߀/ ߂߀߂߆ ߞߏߕߌ߯ߝߟߐߘߊ߫ ߞߎߓߋߘߐ ߗߋߕߌ߮ ߞߏߕߌ߮ ߞߏ߲߬ߓߏ ߘߊߎߘߊ߫ ߞߊ߬ߡߌ߬ߛߏ߬ߞߏ߫، ߞߊ߬ ߢߍߡߌߘߊߟߌ ߞߍ߫ ߞߏߕߌ߯ ߝߟߐ ߣߌ߫ ߞߎ߲߬ߠߊ߬ߛߌ߮ ߞߎ߲߬ߕߌ߮ ߕߐ߯ ߘߐ߫، ߞߏߖߊ ߡߊߡߊ߬ߙߊ ߓߏ߲ߘߋ߲߫ ߞߊ߬ ߟߊ߬ߘߍ߬ ߢߊ߬ߕߣߐ߬ߡߊ߬ߓߊ ߘߏ߫ ߞߍ߫، ߞߵߊ߬ ߓߍ߲߬ ߛߍ߲ߞߍߘߊ ߡߊ߲߬ߕߙߐ ߣߊ߬ߕߐ ߢߍߓߍ߲ ߞߏ ߡߊ߬߸ ߏ߬ ߡߍ߲ ߟߊߞߏߟߐ߲ߣߍ߲߫ ߣߐ߲ߜ߭ߐ߫ ߞߌ߲߬ߘߊ ߟߊ߫ ߟߊ߲߬ߓߊ߬ߦߌ߲߫ ߞߊ߬ߝߏ߬ߙߋ߲ ߞߣߐ߫.
ߢߐ߲߯ߦߋ ߣߌ߲߬ ߞߊ߬ ߡߊ߬ߘߎ߰ ߥߣߊ߫ ߛߌߦߊߡߊ߲߫ ߠߋ߬ ߟߊߘߍ߬. ߞߵߊ߬ߟߎ߬ ߟߐ߬ ߖߊ߬ߕߋ߬ߛߎ߰ߓߐ ߘߏ߫ ߞߍ߫ ߟߊ߫ ߟߌ߬ߤߟߊ ߣߌ߲߬ ߞߊ߲߬. ߊ߬ ߣߌ߫ ߞߊ߬ ߟߊ߬ߞߙߐ߬ߛߟߌ߬ ߝߟߐ ߟߎ߬ ߞߍ߫ ߞߣߍ ߞߊ߲߬. ߛߊ߫ ߊ߬ ߓߐߛߎ߲ ߘߌ߫ ߛߋ߫ ߟߐ߲߫ ߠߊ߫، ߞߵߊ߬ ߞߎ߲߭ ߠߎ߬ ߝߊ߰ߡߎ߲߬. ߞߏߖߊ ߡߊߡߊ߬ߙߊ ߓߏ߲ߘߋ߲ ߞߊ߬ ߛߎ߲ߟߊߟߌ ߞߍ߫ ߕߌߙߌ߲ߠߌ߲ ߘߐߘߎ߲߬ߧߊ߬ߣߍ߲ ߘߏ߫ ߟߋ߬ ߟߊ߫.. ߞߊߕߙߍ߬ߕߍ߬ ߘߎ߰ߘߐ߬ߞߏ߬ ߕߌߙߌ߲ߠߌ߲ ߡߊ߬، ߘߎ߰ߘߐ߬ߞߏ ߛߋ߲ߞߏߟߦߊ ߟߎ߬ ߣߌ߫ ߘߎ߰ߘߐ߬ߞߊߙߊ߲، ߞߵߏ߬ ߟߊ߫ ߓߐ߰ߝߍ ߥߟߊ߫ ߥߋ߲ߛߋ߲ߡߊ ߟߎ߬ ߞߊ߬ߙߊ߲ ߞߊ߲߬، ߊ߬ ߣߌ߫ ߘߎ߰ߡߊ߬ߛߓߍ ߘߐߥߍߘߍ߲ߞߍ߫ ߛߊ߫ ߞߊ߬ ߘߌ߲߬ߞߌߙߊ߬ ߞߏߝߐߣߍ߲ ߠߎ߬ ߘߎ߰ߞߟߏ ߝߛߍ߬ߝߛߍ߬ ߔߊ߬ߔߘߊ ߞߊ߲߬.
ߕߌߙߌ߲ߠߌ߲߫ ߓߐߣߍ߲ߢߐ߲߰ߡߊ ߟߎ߬ ߘߌ߫ ߞߍ߫ ߛߊߓߎ߫ ߘߌ߫، ߘߐ߬ߞߣߍ߬ߟߌ ߘߐ߫ ߞߏ ߣߌ߲߬ ߞߍ߫ ߞߎ߲ ߠߊ߫. ߊ߬ ߣߌ߫ ߞߵߊ߬ ߖߐ߬ߘߐ ߟߎ߬ ߖߊ߬ߕߋ߬ߘߐ߬ߛߌ߮ ߞߍ߫، ߊ߬ ߣߌ߫ ߞߊ߬ ߞߍߕߊ ߟߎ߬ ߛߙߍߘߍߦߊ߫، ߞߵߏ߬ ߟߎ߬ ߓߟߏߦߊ߫ ߛߊ߫ ߞߊ߬ ߟߊ߬ߞߊ߲߬ߘߊ߬ߟߌ ߟߐ߬ߞߎ߬، ߊ߬ ߣߌ߫ ߞߊ߬ ߞߎ߲߬ߠߊ߬ߛߌ߮ ߟߐ߬ ߓߟߏߘߐߓߍ߲ ߠߊ߫ ߏ߬ ߞߏߢߊ ߢߍ߫. ߞߊ߬ ߡߌ߬ߙߌ߲߬ߘߌ ߟߊ߫ ߞߊ߲ߘߊ߫ ߊ߬ ߣߌ߫ ߘߌ߲߬ߞߌߙߊ߫ ߛߌ߰ߓߊ߮ ߟߎ߬، ߊ߬ ߣߌ߫ ߞߊ߬ ߞߎ߲߬ߠߊ߬ߛߌ߮ ߟߊ߫ ߖߊ߬ߓߌ߬ߟߌ ߟߎ߬ ߡߊߞߐ߬ߣߐ߲߬. ߞߵߊ߬ ߟߐ߬ ߟߌ߬ߤߟߊ߬ ߛߎ߯ ߢߌ߲߬ ߠߎ߬ ߡߊ߬.
ߞߏߕߌ߯ߝߟߐߘߊ ߞߎߓߋߘߐ ߗߋߕߌ߮ ߞߏߕߌ߮، ߞߏ߲߬ߓߏ ߘߊߎߘߊ߫ ߞߊ߬ߡߌ߬ߛߏ߬ߞߏ߫، ߞߊ߬ ߖߡߊ߬ߙߌ ߘߌ߫ ߡߐ߰ ߞߋ߬ߟߋ߲߬ߞߋ߬ߟߋ߲߬ߠߊ ߡߊ߬ ߊ߬ ߦߋ߫ ߡߍ߲ ߠߎ߬ ߟߊ߫ ߡߊ߬ߘߎ߮ ߘߐ߫، ߞߏ߫ ߊ߬ߟߎ߬ ߦߋ߫ ߞߏ ߟߎ߬ ߔߙߋߔߙߋߟߊߕߍ߰ ߥߊ߯ߕߌ߫ ߛߎߘߎ߲߫ ߞߘߐ߫. ߕߊ߯ߛߌߟߊ߫ ߞߋߟߋ߲߫ ߏ߬ ߦߋ߫ ߥߟߏ߫ ߞߍߢߊ߫ ߝߊ߲߬ߝߘߊ ߘߏ߫ ߟߊ߫ ߛߊ߫ ߊ߲ ߘߌ߫ ߛߋ߫ ߛߋ߲߬ߕߊ߰ ߛߊ߲ߘߐߕߊ ߟߎ߬ ߞߍ߫ ߟߊ߫. ߊ߬ ߞߵߊ߬ ߦߌ߬ߘߊ߬ ߞߏ߫ ߞߎ߲߬ߠߊ߬ߛߌ߮ ߟߊ߫ ߞߏ߫ ߊ߬ ߦߴߊ߬ߟߎ߬ ߟߊ߫ ߓߌ߬ߟߊ ߘߐ߫. ߛߊ߫ ߞߊ߬ ߛߎߡߊ߲ߠߌ߲ ߢߊ߬ߒ߬ߞߐ߬ߓߊߟߌ ߟߎ߬ ߞߍ߫ ߞߊߣߊ߬ ߞߐߝߟߌ߫ ߖߍ߬ߘߍ ߖߍ߬ߘߍ ߟߎ߬ ߘߌ߫ ߘߎ߲ߡߊ߫ ߓߟߏߡߊ߬ ߞߵߊ߬ ߓߍ߲߬ ߞߏߢߊ ߣߌ߲߬ ߡߊ߬.
